I dulwa pe watye ki lupwonye ma waculogi mucara. Ma ka meno, kit macalo yam kitimo kwede i kacokke pa Lukricitayo macon, luneno ma gitye ki ngec kicimogi me “kwayo lwak pa Lubanga.” (Tic pa Lukwena 20:28) Luelda magi gubedo co ma guteggi i yo me cwiny, ma gin aye gineno wi tic me kacokke kun gikwayo romi pa Lubanga, ‘pe pi dic, ento pi mitigi kengi; pe pi lim ento pi miti me cwinygi.” (1 Petero 5:1-3) Tic ango ma gin gitiyo piwa?

Luelda gwokowa. Luelda gikonyo me gwoko kacokke i yo me cwiny. Kit ma gingeyo ni Lubanga omiyo tic ma pire tek me atiya, gin pe gidiyo lwak pa Lubanga, ma ka meno gin gimito ni kacokke obed ki yomcwiny dok ki kuc. (2 Jo Korint 1:24) Kit macalo lakwat keto cwinye pi gwoko romine ki acel acel, luelda bene gitute me ngeyo jo me kacokke ducu ki acel acel.—Carolok 27:23.

Gipwonyowa kit me timo miti pa Lubanga. Cabit ducu, luelda gidoro yub me cokke wek niyewa obed matek. (Tic pa Lukwena 15:32) Co magi ma gitiyo ki cwinygi ducu-ni gitelo wi tic me tito pi kwena maber-ri, gitiyo kacel kwedwa dok gipwonyowa i yo mapat pat me tito kwena ducu.

Gicuko cwinywa. Pi gwoko wat macok i kin dano moni ki Jehovah, luelda giromo limowa ki paco nyo ki i Ot me Ker pi kweyo cwinywa ki lok ma a ki i Ginacoya.—Yakobo 5:14, 15.

Medo i kom ticgi me kacokke, pol pa luelda gitye ki dog tic ma myero guti pi gwoko jo me odigi, magi ducu kwanyo cawagi ki tamgi. Omege magi ma gitiyo matek tutwal-li myero waworgi mada.—1 Jo Tecalonika 5:12, 13.

• Luelda gitiyo tic ango i kacokke?

• Yo ango ma luelda ginyutu kwede ni giparo pi wan ki acel acel?

Baibul loko i kom gurup aryo pa co ma Lukricitayo ma gitye ki tic i kacokke—“lutel [luneno] ki jo ma konyogi.” (Jo Pilipi 1:1) Pol kare nongo tye luelda ki lukony kor tic mapol i kacokke acel acel. Tic ango ma lukony kor tic timo pi ber bedowa?

Gikonyo luelda. Lukony kor tic gubedo jo ma gitye ki wat macok ki Jehovah, gigenne, dok gubedo lutic matek. Mogo i kingi pud gubedo bulu, ento mukene dong gidito. Gitimo tic ma pire tek i kacokke ki i Ot me Ker, ento pe tic ma kwako pwony ki kwayo romi pa Lubanga. Man weko luelda bedo agonya me keto cwinygi i tic me pwony ki kwat.

Gitimo tic ma konyo. Lukony kor tic mogo kimiyogi tic macalo lujol wele pi jolo jo ducu ma gibino i cokke. Mukene gitiyo i kom lakub dwan, gipoko bukke bot dano, gigwoko buk me lim, dok gicimo wang tic ma omyero kitit iye kwena, bot jo me kacokke. Gikonyo bene i roco ka ma oballe i Ot me Ker. Luelda romo kwayogi me konyo jo muteggi. Lukony kor tic gitye atera me timo tic mo keken ma kimiyogi, cwiny me dyere man miyo jo me kacokke worogi pi ticgi matek.—1 Temceo 3:13.

Giweko lanen maber macalo co ma Lukricitayo. Kiyero lukony kor tic pi kitgi mabeco macalo Lukricitayo. Ka gumiyo pwony i cokke, gijingo niyewa. Gitugo mit komwa pien gitelo yo i tito kwena. Gikelo yomcwiny ki note i kacokke pien gitiyo maber ki luelda. (Jo Epeco 4:16) I nge kare mo, gin bene giromo bedo mupore me tic macalo luelda.

• Lukony kor tic gubedo co ma nining?

• Lukony kor tic gikonyo tic me kacokke me wot maber nining?

Ginacoya me leb Grik loko i kom Barnaba gin ki lakwena Paulo tyen mapol. Co magi gutiyo macalo luneno ma giwoto awota, kun gilimo kacokke me kare ca. Pingo? Gin onongo giparo adada pi ber bedo pa omege me kacokke. Paulo owaco ni emito dok “ka limo utmego” wek enen kit ma gitye kwede. En onongo tye atera me wot mairo miya mapol wek edok cen ka jingogi. (Tic pa Lukwena 15:36) Meno aye miti ma luneno me adwol i kare-ni gitye kwede.

Gibino me cuko cwinywa. Laneno me adwol limo kacokke ma romo 20 tyen aryo i mwaka acel acel, kun bedo bot kacokke acel pi cabit acel. Watwero nongo kony ki i ngec pa omege magi, kacel ki mongi, ka gunyomme. Luneno magi ki mongi gitemme me ngeyo jo matino wa ki jo muteggi, dok komgi mit me wot kwedwa i tic me pwony ki kwan ki lutino kwanwa me Baibul. Luneno magi gicito kacel ki luelda ka limo romi, dok pi jingowa, gimiyo pwony ma cuko cwinywa i cokke ki i gure.—Tic pa Lukwena 15:35.

Ginyuto miti i kom jo ducu. Luneno me adwol gitye ki miti me ngeyo kit ma jo me kacokke acel acel gitye kwede i yo me cwiny. Girwatte ki luelda kacel ki lukony kor tic pi lok i kom dongo ma tye i kacokke ki me miyogi tam ma twero konyogi i cobo ticgi. Gikonyo painia me cobo ticgi me pwony maber, dok gimito ngeyo jo manyen i kacokke ki winyo kit ma gitye ka dongo kwede i ada. Omege acel acel magi gimine kengi macalo ‘lutic wadiwa ma gitiyo piwa.’ (2 Jo Korint 8:23) Omyero walub lanengi me niye ki nyuto margi pi Lubanga.—Jo Ibru 13:7.

• Luneno me adwol gilimo kacokke mapat pat pi tyen lok ango?

• In itwero nongo adwogi maber ki i limgi nining?

Ka can ma poto atura otimme, Lucaden pa Jehovah giyubbe oyotoyot me tero kony bot omegigi ma peko opoto i komgi. Yelle ma kit meno nyuto ada pa marwa pi luwotwa. (Jon 13:34, 35; 1 Jon 3:17, 18) I yo ango ma wamiyo kwede kony?

Wabolo mot me cente. I kare ma twon kec mo opoto i Judaya, Lukricitayo macon me Antiokia gucwalo kony me cente bot omegigi ma Lukricitayo. (Tic pa Lukwena 11: 27-30) I yo acel-lu, ka waniang ni omegiwa i but lobo ka mo gitye ka deno peko, wacwalo mot kun wok ki i kacokkewa pi miyo kony me jami me kom bot jo ma gitye marac.—2 Jo Korint 8:13-15.

Wamiyo kony ma mitte. Luelda ma gitye i kabedo ma peko opoto iye giyenyo lamemba acel acel me kacokke me niang ka gitye maber. Lukomitti ma giloyo lok kom miyo kony guromo doro lok me miyo cam, pii maleng me amata, bongi, kabedo, ki kony me yat. Lucaden mapol ma gitye ki ngec me tic mogo gidyere me cito ki cente ma megi ci gitiyo tic me miyo kony ma mitte nyo me yubo ka muballe i odi ki Odi me Ker. Note ma watye kwede macalo dul acel ki ngec ma wanongo i tic kacel miyo wayenyo kony ma mitte kacel ki jo ma miyo kony, i kare me peko. Kadi bed wamiyo kony bot “utmegiwa ma guye Kricito,” wamiyo kony bene bot jo mukene ka twere labongo paro pi dinigi.—Jo Galatia 6:10.

Wamiyo kwe cwiny ma a ki i Baibul. Jo ma peko opoto atura i komgi gimito kwe cwiny ma loyo. I kare ma kit meno, wanongo teko ki bot Jehovah, “Lubanga ma kweyo cwiny dano ducu.” (2 Jo Korint 1:3, 4) Wabedo ki yomcwiny me nywako cikke me Baibul ki jo ma gitye i peko, kun wadiyo cwinygi ni cokcok-ki Ker pa Lubanga bigiko pekki ducu ma kelo arem ki deno can.—Niyabo 21:4.

• Pingo Lucaden pa Jehovah gilaro dano oyotoyot i kare me can ma poto atura?

• Lok me kwe cwiny ango ma watwero nywako ki jo ma gubwot ki i can ma opoto atura?

I kare ma tone dong cok, Yecu oloko ki lupwonnyene angwen i mung—Petero, Yakobo, Jon, ki Anderiya. Ma Yecu onongo tye ka tito pi lanyut me binone i kare me agikki piny, en openyo lapeny ma pire tek adada ni: “Anga ma lagwok ot ma lagen dok maryek, ma laditte biweko dano ducu ma bedo i ode i te locce, wek opok botgi camgi i kare ma mitte?” (Matayo 24:3, 45; Marako 13:3, 4) Yecu onongo tye ka ciko lupwonnyene ni en macalo ‘laditgi,’ en onongo biweko jo mogo ma gibimiyo cam me cwiny ma mitte pi lulub kore i kare me agikki. Anga ma bibedo i kin lagwok ot man?

Gin gubedo gurup mo matidi pa lulub kor Yecu ma kiwirogi ki cwiny maleng. “Lagwok ot” meno obedo Lukiko Madit pa Lucaden pa Jehovah. En tye ka miyo cam me cwiny i karene kikome bot luwotgi ma giworo Jehovah. Wan ducu wajenge i kom lagwok ot ma lagen man me medde ki poko botwa ‘camwa i kare ma mitte.’—Luka 12:42.

Gidoro tic i ot pa Lubanga. (1 Temceo 3:15) Yecu omiyo bot lagwok ot tic ma pire tek me doro dul pa Jehovah ma tye i wi lobo—gwoko jami pa dul man, ki doro bene tic me tito kwena, ki pwony ma kimiyowa i kacokke. Pi meno, wek wanong kony ma wamito i karene kikome, “lagwok ot ma lagen dok maryek” tye ka poko cam me cwiny kun tiyo ki bukke ma watero i ticwa me pwony, kacel ki pwony ma kimiyo i cokkewa me cabit ki cabit, ki gurewa madito.

Lagwok ot-ti tye lagen i lubo lok ada me Baibul ki tic me tito kwena maber-ri, dok tye ngat maryek i gwoko jami ducu pa Kricito ma gitye i wi lobo. (Tic pa Lukwena 10:42) Jehovah tye ka goyo laane i kom ticgi ki medo wel lutit kwena kun konyo lagwok ot ma lagen dok maryek ki miyo cam me cwiny mabup.—Icaya 60:22; 65:13.

• Anga ma Yecu oweko ni opok cam me cwiny bot lupwonnyene?

• I yo ango ma wanongo ni lagwok ot-ti tye ngat ma lagen dok maryek?

I cencwari me acel, gurup mo matidi, “lukwena ki ludongo,” gubedo ka tic calo lukiko madit ma moko tam ma pigi tego i kom lok ma kwako kacokke pa Lukricitayo ma kiwirogi ducu. (Tic pa Lukwena 15:2) Moko tamgi ki dwan acel onongo twere pien gitiyo ki Ginacoya me nyamo lok kacel, dok giye ni cwiny pa Lubanga aye otirgi. (Tic pa Lukwena 15:25) Yub meno bene kitye ka lubone i kare-ni.

Lubanga tye ka tic kwedgi me cobo mitine. Omege ma kiwirogi ma gitye lumemba me Lukiko Madit gitye ki miti madit i Lok pa Lubanga ki ngec muromo me moko tam i kom kit me tiyo ticwa ki kit me gamo lapeny ma dok i kom Baibul. Gicokke cabit ki cabit ka nyamo miti pa utmego me twok lobo-ni ducu. Calo i cencwari me acel, pwony ma jenge i kom Baibul kimiyo macalo waraga nyo wok ki bot luneno ma giwoto awota kacel ki jo mukene. Man weko jo pa Lubanga ginote kacel i tam ki tic. (Tic pa Lukwena 16:4, 5) Lukiko Madit aye gidoro tic me yubo cam me cwiny, kun gicuko cwiny jo ducu me tero tic me tito kwena-ni calo gin ma pire tek loyo. Gin bene aye gineno yub me yero omege ma gidoro tic mapat pat.

Giye tela pa cwiny pa Lubanga. Lukiko Madit jenge i kom Won Twer Ducu, Jehovah, ki Lawi kacokke, Yecu, pi nongo tira. (1 Jo Korint 11:3; Jo Epeco 5:23) Lumembane pe ginene ni gin aye gitye lutela pa jo pa Lubanga. “Gin jo ma lubo Laitn romo [Yecu] ka ma en woto iye ducu,” kacel ki Lukricitayo mukene-ni. (Niyabo 14:4) Lukiko Madit tye ki pwoc mada pi lega ma walego pi gin kacel ki tic ma gitye ka timone.

• Angagi ma gubedo i kin lukiko madit i cencwari me acel?

• Lukiko Madit me kare-ni gilubo tela pa Lubanga nining?

Betel, obedo nying me leb Ibru, ma te lokke ni “Ot pa Lubanga.” (Acakki 28:17, 19, coc ma tye i tere piny) Nying man oporre pi gedo nyo odi ma Lucaden pa Jehovah gugero i twok lobo ducu ka ma kidoro iye tic me tito kwena. Lukiko Madit gitiyo i gang kal madit maloyo i wi lobo ducu, ma tye i New York State, U.S.A., ka ma gidoro iye tic ma kitiyo i jang gang kal ma gitye i lobe mapol mapatpat. Macalo gurup acel, jo ma gitiyo i kabedo magi kilwongogi ni Lubetel. Calo jo me ot, gibedo kun gitiyo, gicamo, dok ginote i kwano Baibul kacel.—Jabuli 133:1.

Kabedo ma kite dok pat ma jone ducu gitye ki cwiny me jalle kengi. I Betel, tye Lukricitayo ma co ki ma mon ma gitute ki cwinygi ducu i timmo miti pa Lubanga ki tiyo tic me Ker-re pi kare malac. (Matayo 6:33) Pe ginongo mucara mo keken, ento gin ducu ginongo kabuto ki cam gire, kacel ki cente mo manok me gwoko te jebagi. Ngat acel acel ma tye i Betel tye ki dog ticce, man romo bedo i opic, jokon, nyo i ot cam. Jo mogo gitiyo i ka goyo nyo yubo bukke, nyo gitiyo tic me gwoko lengo me ot, lwoko bongo, gwoko macin mapatpat, nyo tic mukene.

Kabedo ma tic dwong iye ma konyo tic me tito kwena me Ker. Gin ma pire tek loyo i Betel ducu aye me miyo lok ada me Baibul ongene bot dano ducu. Brocuwa man obedo lanen acel me tic meno. Kicoyo ki tira pa Lukiko Madit, kicwalo ki kompiuta bot gurup pa lugony leb miya ki miya ma gitye i but lobo ducu, kigoyo ki macin ma goyo bukke oyotoyot ma gitye i Betel mapol, ci dong kipokogi bot kacokke makato 115,000. Lubetel gicwako kor tic man ma pire tek pud dong loyo—tic me tito kwena maber-ri.—Marako 13:10.

• Angagi ma gitiyo i Betel, dok yub ango ma tye pigi?

• Tic ma pire tek ango ma jenge i kom tic ma kitiyo i Betel?

Jo ma bedo i Betel gitiyo i dipatmen mapat pat, ma miyo kony me cobo tic me pwony i lobo acel nyo makato. Guromo tic macalo lugony leb, lugo magajin ki bukke, jo ma tiyo i ot me gwoko bukke ma kigoyo, jo ma yubo jami ma kimako i dwan nyo vidio, nyo gitimo jami mukene pi jo me rijon moni.

Komitti me Jang Gang Kal aye neno wi tic. Lukiko Madit miyo tic me doro jang gang kal acel acel i cing dano adek nyo makato ma nongo gubedo luelda mucwiny me bedo Komitti me Jang Gang Kal. Komitti man weko Lukiko Madit ngeyo kit ma tic tye ka wot kwede i lobo acel acel ma gidoro kacel ki peko mo keken ma romo bino. Ripot ma kit meno konyo Lukiko Madit me yero gin ma omyero kinyam i bukke ma bikatti i anyim ki dok i cokke kacel ki gure. Jo ma cung pi Lukiko Madit gicwalogi kare ki kare me limo jang gang kal mapat pat wek gumi tira bot Komitti me Jang Gang Kal i kit me cobo ticgi. (Carolok 11:14) Kiyubo purogram ma kite dok pat ma nongo tye iye pwony ma lacungo pi gang kal miyo pi cuko cwiny jo ma gibedo i wang tic pa jang gang kal meno.

Gimiyo kony bot kacokke. Luelda mogo me jang gang kal aye giye ni kacokke manyen ocakke. Omege magi bene gidoro tic pa painia, lumiconari, ki luneno me adwol ma gitiyo i wang tic me jang gang kalgi. Giyubo gure me adwol ki gure madito, gikubo tic me gero Odi me Ker manyen, dok gineno ni kicwalo bot kacokke bukke ma gupenyo pire. Tic ducu ma kitimo i jang gang kal konyo me cobo tic me tito kwena maber-ri.—1 Jo Korint 14:33, 40.

• Komitti me Jang Gang Kal konyo Lukiko Madit nining?

• Tic ango ma kitimo i jang gang kal?

Me wek watute me cobo tic me tito “kwena maber . . . bot rok ducu ki kaka ki leb-gu ki jo mapatpat ducu,” wagoyo bukke i leb makato 750. (Niyabo 14:6) Wan mono wacobo tic madit kit man nining? Watimo man ki kony pa lucoc ma gia ki i lobe mapat pat kacel ki lugony leb ma gudyere—ma gin ducu gubedo Lucaden pa Jehovah.

Kicoyo coc mukwongo i leb Muno. Lukiko Madit neno wi tic pa Dipatmen me Coc ma tye i gang kalwa madit. Dipatmen man doro tic pa lucoc ma gitiyo i gang kal madit ki jang gang kal mogo. Tic ki lucoc ma gia ki i kabedo mapat pat weko watwero coyo lok i kom jami ma gudo dano me tekwaro mapat pat, pi meno, bukkewa gudo cwiny dano me lobe ducu.

I ngeye, kicwalo coc man bot lugony leb. Ka dong kityeko ngiyo coc man dok kimoko ni tye maber, kitiyo ki kompiuta me cwalone bot lugony leb i lobe mapat pat ma gigonyo, gingiyo, dok gikwano pi kwedo ka gigonyo maber. Gitute me yero “lok me ada” ma kelo tam kikome ma kicoyo i leb Muno.—Latitlok 12:10.

Kompiuta konyo me cobo tic oyotoyot. Kompiuta pe romo leyo kaka lucoc ki lugony leb ma dano. Ento ticgi twero cobbe oyotoyot ka gitiyo ki dikconari kacel ki jami me gonyo leb ki me kwedo lok ma tye i kompiuta. Lucaden pa Jehovah guyubo gin ma kilwongo ni Multilanguage Electronic Publishing System (MEPS), ma kitwero keto iye coc i leb miya mapol, kacel ki cal bene, kun kiyubo bedo mupore me agoya.

Pingo watute matek kit man, kadi wa pi leb mogo ma jo alip manok keken aye giloko? Pien Jehovah “mito laro jo ducu, dok mito ni jo ducu gunge lok me ada.”—1 Temceo 2:3, 4.

• Coyo bukkewa kwako tic ango?

• Ngo mumiyo wagonyo bukkewa i leb mapol ata?

Dulwa goyo dok poko kopi me Baibul ki bukke mukene makato milion miya ki miya mwaka ducu labongo cul mo. Wagero dok waroco Odi me Ker ki jang gang kal mapol. Wagwoko jo ma tiyo i Betel kacel ki lumiconari alip mapol ata, dok wamiyo kony ka ma peko opoto iye atura. Pi meno, itwero penye ni, ‘Kinongo cente ki kwene me cobo jami magi ducu?’

Pe warayo acel me apar, cente pi lega nyom nyo to, ki ajog mo i adita. Kadi bed ni cente ma mitte me cobo ticwa me pwony-nyi wele dit, wan pe walego cente ki bot dano. Mwaki makato miya acel angec, Wi Lubele me aryone owacci wan wageno ni Jehovah aye cwako ticwa-ni dok ni “pe wabilego kony ki bot dano”—nio wa tin pud pe walego kony!—Matayo 10:8.

Ticwa jenge i kom mot ma dano miyo kun a ki i cwinygi. Dano mapol pwoyo ticwa me pwonyo Baibul dok gimiyo mot me cente me cwakone. Lucaden pa Jehovah kikomgi bene cwinygi yom me miyo cawagi, kerogi, centegi, ki jamigi mukene me cwako tic pa Lubanga i wi lobo ducu. (1 Tekwaro 29:9) I Ot me Ker kacel ki gurewa, inongo kiketo bok me bolo mot, ka ma jo ma gimito gibolo iye motgi. Onyo kiromo miyo mot kun kiwok ki i kabedowa me Intanet me jw.org. Pol kare cente ma wanongo bino ki bot jo ma pe gulony, calo dato ma Yecu oloko maber tutwal i kome i kare ma en obolo cente aryo ma wele tidi i canduk lim i ot pa Lubanga. (Luka 21:1-4) Pi meno, ngat mo keken twero ‘poko lim mogo keto pat’ kare ki kare me amiya “kit macalo cwinye mito.”—1 Jo Korint 16:2; 2 Jo Korint 9:7.

Watye ki gen ni Jehovah bimedde ki tugo cwiny jo ma gimito ‘woro en ki lonyo ma gitye kwede’ kun gicwako tic me Ker-ri, wek gin ma en mito otimme.—Carolok 3:9.

• Ngo mumiyo dulwa dok pat ki dini mukene-ni?

• Mot ma dano miyo ma a ki i cwinygi kitiyo kwede nining?

Kilwongo ni Ot me Ker, pien pen pwony me Baibul ma kimiyo kunu cung i kom Ker pa Lubanga, ma obedo wi lok madit me tic me pwony pa Yecu.—Luka 8:1.

Odi magi gitye kabedo me woro me ada i dye lwak. Lucaden pa Jehovah ginongo yub ki pwony ducu ma kwako tito kwena maber me Ker-ri i Ot me Ker. (Matayo 24:14) Dit pa Odi me Ker tye mapat pat, kun kigerogi i yo ma pe tero cente mapol, dok polgi bedo ki kacokke makato acel. I mwaki manok mukato angec, wagero Odi me Ker alip ki alip (odi maromo abic nino ki nino) pi medde pa wel lutit kwena i kacokkewa. Man otwere nining?—Matayo 19:26.

Kigerogi ki mot ma kimiyo pi cwako tic meno. Mot meno kicwalo i jang gang kal, wek otwere me miyo cente bot kacokke ma mito gero nyo roco Otgi me Ker.

Lugedone pe ginongo mucara mo dok gia ki i kwo, ki dog tic mapatpat. I lobe mapol, Gurup pa Lugedo me Odi me Ker dong tye. Gurup pa lugedo magi giwoto i kacokke ki kacokke me lobo moni, kadi wa ka ma kwo tek iye. Gicito kunu ka gedo ki pwonyo lutit kwena mogo ki diro me gedo. I lobe mukene, kicimo omege ma gupore me neno wi tic me gero ki roco Odi me Ker ma tye i rijon ma meggi. Kadi bed ni ludiro tic mapol me kabedo meno gijalle i tic me gedo ducu, ento jo me kacokke moni aye gibedo pol loyo i jalle me miyo kony. Cwiny pa Jehovah ki tute pa jone ki cwinygi ducu aye miyo tic man twere.—Jabuli 127:1; Jo Kolocai 3:23.

• Pingo kilwongo kabedo me worowa ni Odi me Ker?

• Gero Ot me Ker i twok loboni ducu twere nining?

Odi me Ker pa Lucaden pa Jehovah ducu kilwongogi ki nying Lubanga maleng. Pi meno, nywako i gwoko lengo ki rocone wek obed maber obedo mot dok but worowa ma pire tek. Dano ducu gitwero nywako i timo tic maleng man.

Jalle me timo tic man i nge cokke. Ka cokke acel acel otum, omege ki lumege gitimo tic manok mo olo wek Ot me Ker odong maleng. Kiromo timo tic pi gwoko lengo kicel i cabit acel acel. Laelda nyo lakony kor tic twero doro tic man, kun nongo lubo jami ma kiryeyogi me atima. Ngat acel acel romo dyere me timo gin ma en twero calo yweyo piny, dunyo dye ot, ryeyo kom, dunyo wang ot, lwoko coron, ki bolo nyo yero yugi ma tye i dye kal. Olo kicel i mwaka acel myero kiket yub me tiyo tic matek me gwoko lengo ma ka mo pe dong. Wapwonyo lutinowa me bedo ki woro pi ot me woro Lubanga ki miyogi tic mogo me atima.—Latitlok 5:1.

Rib cing i tic me roco ka ma mitte. Mwaka ki mwaka, kiroto Ot me Ker, kun kingiyo iye kacel ki woko. Ma lubbe ki ngic man, roco ka ma oballe kare ki kare timme ma weko pe o wa i bal ma mito cente mapol. (2 Tekwaro 24:13; 34:10) Ot me Ker ma kigwoko maleng dok kibedo ka rocone kare ki kare porre me bedo kabedo me woro Lubangawa. Wanyuto ni wamaro Jehovah ki dok watero kabedo me worowa calo gin ma pire tek ki nywako i tic man. (Jabuli 122:1) Man bene weko jo ma gibedo cok ki Ot me Ker bedo ki tam maber i kome.—2 Jo Korint 6:3.

• Pingo myero pe wawek kabedo me worowa liyak?

• Yub ango ma kiketo pi gwoko Ot me Ker wek obed maleng?

In mono imito kwedo lok wek imed ngecci me Baibul? Tika imito yenyo ginacoya nyo dano mo, kabedo nyo gin mo ma kiloko pire i Baibul? Nyo gwok pe ingeyo ka Lok pa Lubanga twero konyi i peko mo ma itye kwede? Ka kit meno, ci nong ngec ki i ka gwoko bukke ma tye i Ot me Ker.

Konyo pi kwedo lok. Oromo bedo ni pe itye ki bukke pa Lucaden pa Jehovah, ma gitye i leb ma megi. Dong ka gwoko bukke ma tye i Ot me Ker tye ki pol pa bukke ma gukati nyen. Romo bene bedo ni kadi wa Baibul mapat pat, dikconari maber, kacel ki bukke mukene mabeco bene tye kunu. Itye agonya me tic ki bukke ma gitye i ka gwoko bukke man wiati nyo i nge cokkewu. Ka kompiuta bene tye, ci Watchtower Library nongo kiketo iye. Man obedo yo mo me gwoko lok ma tye i bukkewa mapol, dok tic kwede yot me yenyo lok nyo ginacoya mo ma imito.

Ber pi lutino kwan me Cokke me Kwowa ki Ticwa. Ka dong idonyo i cukul man, itwero tic ki bukke ma bedo ka ma kigwoko iye bukke i Ot me Ker ka imito yubo pwony ma kimiyo boti. Lador wi Cokke me Kwowa ki Ticwa aye loyo kabedo ma kigwoko iye bukke. En aye myero onen ni kiketo bukke manyen ducu kunu dok ni kicanogi maber. En nyo lapwonnyi me Baibul aye myero gunyutti kit me nongo ngec ma imito. Ento, pe myero ngat mo okwany bukke mo ocit kwede. Dok wamito ni wati ki bukkewa maber wek pe waco coc mo i komgi.

Baibul tito ni me nongo “ngec i kom Lubanga,” myero wabed ki miti me yenyone kit macalo kiyenyo “lonyo ma gikano.” (Carolok 2:1-5) Ka gwoko bukke i Ot me Ker twero konyi me cako kwedo lok.

• Jami me kwedo lok ango ma tye i ka gwoko bukke i Ot me Ker?

• Anga ma twero konyi me tic ki bukke ma bedo i ka gwoko bukke?

Yecu Kricito owaco bot jo ma lubo kore ni: “Wubed jo ma menyo piny calo tara bot dano, wek gunen tic mabeco ma wutiyo ci gumi deyo bot Wonwu ma tye i polo.” (Matayo 5:16) Pi meno, watye ka tic maber ki tet me kare-ni, ma i kine tye iye Intanet. kabedowa me Intanet me jw.org, aye ka ma ngec i kom pwony ki tic pa Lucaden pa Jehovah nonge iye. Ngo ma nonge iye?

Lagam ma Baibul miyo i kom lapeny mogo ma pol kare dano penyo. Itwero nongo lagam mogo ma pigi tego i kom lapeny ma dano penyo. Me labolle, trak me Peko Mono Bigik? Ki Jo Muto Mono Gitwero Kwo Doki? ginonge i Intanet i leb makato 600 kulu. Itwero nongo bene Baibul me New World Translation i leb makato 130 ki bukke ma konyo kwano Baibul, ma i kine tye iye Baibul Mono Ada Pwonyo Gin Ango? ki dong Wi Lubele ki Awake! ma nongo okatti nyen. Pol bukke magi kiromo kwanogi nyo winyogi, nyo kobogi macalo MP3, PDF, nyo EPUB ki i kabedowa me Intanet. Iromo bene rudo pot karatac mogo ki i bukke magi ka imito nywako lok i leb pa ngat ma onyuto miti! Vidio mapol bene tye i leb pa luding it i intanet. Itwero bene kobo ginacoya me Baibul ma kikwano ma winye calo tuko goga, tuko goga kikome me Baibul, ki dong wer mamwonya me galo wangi.

Lok ada i kom Lucaden pa Jehovah. Kiketo bene lok angeya ma okatti nyen ki vidio ma tito pi ticwa ma kwako lobo ducu, jami mogo ma timme ma gudo Lucaden pa Jehovah, ki dong kony ma kimiyo ka ma peko opoto iye. Itwero bene nongo lok i kom gure madito, ki ngec ma kwako jang gang kalwa.

Tic ki yo magi, miyo wabedo jo ma menyo piny calo tara i kabedo mogo ma o iye tek i but lobo. Dano me twok lobo-ni ducu ma tye iye kabedo calo Antarctica gitye ka nongo adwogi maber. Walego ni “lok pa Rwot owinnye oywek woko oyotoyot” i lobo ducu pi keto deyo i kom Lubanga.—2 Jo Tecalonika 3:1.

• Kabedowa me Intanet me jw.org tye ka konyo dano me ngeyo lok ada me Baibul nining?

• Gin ango ma imito nongone ki i kabedowa me Intanet?