Jo mapol dong gujuko cito i ot lega woko pien pe ginongo kwe cwiny nyo lagam pi lapeny ma pigi tego i kwogi. Pi meno dong, tyen lok maber ango mumiyo myero icit i cokke pa Lucaden pa Jehovah? Ngo ma ibinongone kunnu?

Ibinongo yomcwiny me bedo i kin jo ma gimaro dok giparo pi ngat acel acel. I cencwari me acel, Lukricitayo onongo gitye ma guyubbe i kacokke mapat pat, dok gibedo ki cokkegi pi woro Lubanga, pi kwano Ginacoya, ki pi cuko cwinygi kekengi. (Jo Ibru 10:24, 25) Ka gucokke kacel, onongo giwinyo ni gitye i kin lurem me ada—omege ki lumege me kacokke. (2 Jo Tecalonika 1:3; 3 Jon 14) I kare-ni, walubo lanen pa Lukricitayo me cencwari me acel dok wanongo bene yomcwiny marom aroma.

Ibinongo adwogi maber ma bino pi pwonyo kit me keto cik me Baibul i tic. Kit ma onongo kitimo kwede i kare ma kicoyo Baibul, i kacokkewa bene co, mon, ki lutino ducu gicokke kacel. Lupwonye ma gucwiny gitiyo ki Baibul me konyowa niang kit ma watwero lubo kwede cikke nino ducu. (Nwoyo Cik 31:12; Nekemia 8:8) Jo ducu gitye agonya me wero wer ki me nywako i miyo lagam ka nyamo lok kacel ki lwak tye, man weko watuco gen ma watye kwede calo Lukricitayo.—Jo Ibru 10:23.

Ibijingo niyeni i kom Lubanga. Lakwena Paulo owaco bot jo me kacokke mo acel i karene ni: “Atye ka paro me nenowu mada, . . . ni wun kacel ki an wabikonnye lawangacel; en aye ni niyena bikonyowu, ki niyewu bene bikonya.” (Jo Roma 1:11, 12) Ribbe kacel ki luye luwotwa kare ki kare i cokkewa jingo niyewa ki tam ma wamoko me kwo i yo ma lubbe ki cik me Baibul.

Pingo pe ijol lwongo me bino i cokkewa i cabit man wek inong jami mabeco magi piri keni? Wabijoli ki yomcwiny. Cokkewa ducu tye me nono—pe tye iye kit ajog mo.

• Cokkewa me kare-ni jenge i kom lanen mene?

• Watwero nongo adwogi maber nining ki i cito i cokke pa Lukricitayo?

Kadi bed ni wakato ki i bunga nyo kot pwodowa ma watye ka cito i kacokke, wan pe wakeng cokke. Labongo paro pi ayelayela me kwo nyo olo ma giwinyo i nge tic me nino ducu, pingo Lucaden pa Jehovah gitute me ribbe kacel ki luye luwotgi?

Keliwa yotkom ki yomcwiny. Lakwena Paulo ocoyo ni, “myero watamu kit macalo watwero tugo kwede cwinywa kekenwa” kun onongo tye ka lok i kom jo ma waribbe kwedgi i kacokke. (Jo Ibru 10:24) Man te lokke ni omyero watute me ngeyo ngat acel acel. Pi meno, lok pa lakwena man cuko cwinywa me paro pi jo mukene. Ka watute me ngeyo jo me kacokkewa, wanongo ni mukene i kingi gulwenyo ki pekki ma wan bene watye ka yelle kwede ci nongo gitwero konyowa.

Konyowa me dongo wat macok ki luremwa. I kacokkewa, wacokke kacel ki omege ki lumege ma gitye luremwa. I kare mukene, wabedo kacel kwedgi pi mato yamo i yo mupore. Ribbe kacel i yo magi keliwa adwogi mabeco ango? Miyo wabedo ki pwoc pi ngat acel acel i kinwa, dok meno jingo marwa. Ci, ka omegiwa gitye ka wok i kwo matek, wakonyogi ki cwiny acel pien nongo watye ki wat macok i kinwa. (Carolok 17:17) Ka waribbe kacel ki jo ducu me kacokkewa, wanyuto ni wan bene ‘waparo pi dul kom wadwa.’—1 Jo Korint 12:25, 26.

Wacuko cwinyi me yero jo ma gitye ka timo miti pa Lubanga macalo luremi. Ibinongo lurem ma kit meno i kin Lucaden pa Jehovah. Pe iwek gin mo keken ogengi ribbe kacel kwedwa.

• Ngo mumiyo ribbe kacel i kacokkewa tye pi ber bedowa?

• Awene ma itamo ni itwero bino i cokkewa wek inge Lucaden pa Jehovah me kabedowu?

I cokke pa Lukricitayo macon, onongo gibedo ki wer, lega, ki dok kwano ki nyamo Ginacoya, dok pe onongo gilubo yub mo me tekwaro. (1 Jo Korint 14:26) Ibinongo yub ma kit meno bene i cokkewa.

Pwony ma kimiyo jenge i Baibul dok konyo. I tum pa cabit kacokke acel acel cokke ka winyo Pwony ma kiyubo pi lwak ma cwalo dakika 30. Pwony man nyuto kit ma Ginacoya gudo kwede kwowa, dok tito pi kare ma watye ka kwo iye. Kicuko cwiny wan ducu me lubo pwony ma kimiyo kun watiyo ki Baibul ma megwa. I nge pwony meno, tye yub me Kwano “Wi Lubele,” ma cwalo cawa acel. I bute man, kijolo lwak me kacokke me nywako i nyamo pwony ma tye i Wi Lubele. Nyamo lok kit meno konyowa me lubo tira me Baibul i kwowa. Pwony acel-lu bene kinyamo i kacokke makato 115,000 i wi lobo ducu.

Wanongo kony me dongo dirowa me pwony. Watye bene ki cokke mukene i dye cabit i otyeno ma wiye tye ni Kwowa ki Ticwa Macalo Lukricitayo. Cokke man kipoko iye i bute adek dok jenge i Yub me Cokke me Kwowa me Ticwa ma katti dwe ki dwe. Bute mukwongo aye Lonyo ma Tye i Lok pa Lubanga, ma konyowa me niang cura me Baibul ma kacokke obedo ka kwanone con. I ngeye, bute me Tute Matek i Tic me Pwony tye ki lapor i kom kit me nyamo lok me Baibul ki jo mukene. Laelda ma tye ka doro cokke miyo tam ma twero konyowa me dongo dirowa me kwan ki lok. (1 Temceo 4:13) Bute me agikki ma wiye tye ni, Kwowa Macalo Lukricitayo, nyamo yo mapat pat me keto cik me Baibul i tic i kwowa me nino ducu. Bute man tye ki nyamo lok ma watiyo ki lapeny ki lagam ma konyowa me niang Baibul i yo matut.

Labongo akalakala mo, ka ibedo tye i cokkewa, ibibedo ki yomcwiny pi ngec ma pire tek ma ibinongo ki i Baibul.—Icaya 54:13.

• Ngo ma itwero nongone ki i cokke pa Lucaden pa Jehovah?

• Cokkewa mene ma imito cito iye cokcok-ki?

Mono dong ineno i cal ma tye i brocuwa man kit ma Lucaden pa Jehovah girukke kwede maleng ka gicito i cokkegi? Pingo mono waparo tutwal pi rukwa ki kit ma wanen kwede?

Me nyuto woro pi Lubangawa. Tye ada gire ni Lubanga pe keto cwinye tutwal i kit ma wanen kwede ki woko. (1 Camuel 16:7) Ento ka wacokke kacel me woro en, mitiwa nongo tye me nyuto woro bote ki bot luworo luwotwa. Ka kilwongowa me wot i nyim kabaka nyo preciden, wabitute matek me neno ni rukwa ki kit ma wanen kwede nyuto woro bote ma lubbe ki rwomme. I yo acel-lu, kit ma wanen kwede i cokkewa nyuto woro bot Jehovah “kabaka ma loyo rok ducu,” ki kabedo me worowa.—Jeremia 10:7.

Me nyuto cik ma walubo i kwowa. Baibul cuko cwiny Lukricitayo ni myero “gurukke maber ki mwolo, [kun] gigwokke.” (1 Temceo 2:9, 10) Rukke “ki mwolo” te lokke ni pe waruko bongo ma ywayo tam pa dano i komwa, nyuto dul komwa ma pe myero onen ka maleng dok tugo miti marac i cwiny jo mukene. Dok bene, ‘gwokke’ konyowa me yero bongi ma pe me luriyo nyo maraco. Cik magi gire weko wabedo agonya me yero kit me ruk mapol mapat pat. Kadi bed pe waloko gin mo, rukwa ki kit ma wanen kwede maber twero miyo “pwony pa Lubanga Lalarwa onen ma mwonya” dok miyo “deyo bot Lubanga.” (Tito 2:10; 1 Petero 2:12) Ka warukke maleng pi cokkewa, wagudo kit ma jo mukene neno kwede woro pa Jehovah.

Kadi bed pe itye ki bongi mabeco, pud wajoli me bino pi cokkewa i Ot me Ker. Watwero rukke maber, dok maleng kadi bed pe watye ki bongi ma welgi tek nyo me cital ma pud okatti nyen.

• Kit ma warukke kwede pire tek lakwene i woro Lubanga?

• Lok ada mene me Baibul ma tiro rukwa ki kit ma wanen kwede?

Ka itye ka kwano Baibul ki Lucaden pa Jehovah, oromo bedo ni nongo iyubbe woko con pi kwanwu kare ki kare. Wek inong adwogi maber loyo, bedo ber bene ka iyubbe woko con pi cokke. Adwogi maber loyo binen ka ce wanyebo tim me yubbe kare ducu.

Mok tammi i kom kabedo ki cawa me kwan. Cawa mene maber loyo ma wi romo mako iye jami? Odiko con, ma peya icako ticci me nino ducu, nyo otyeno ka lutino dong gunino woko? Kadi bed ni gwok pe itwero kwan pi cawa malac, mok cawa ma itwero cwalone, dok pe iye ni gin mo mukene obal yub meno. Nong kabedo ma okwe mot, dok inek jami ma dwoyo tam calo redio, telebijon ki cim cing woko. Lega ma peya icako kwanni bikonyi me lweny ki par me nino meno, wek iket tammi i kom Lok pa Lubanga.—Jo Pilipi 4:6, 7.

Ngol te lagammi dok iyubbe me nywako i miyone. Cak ki niang pwony moni wiye wiye. Tam i kom wi lok madit me dul nyo pwony moni, kit ma wi lok matino kubbe kwede ki pwony madit, dok ingii cal ki lapeny me poyo wic ma gikonyo me niang pwony ma pire tek. Ci ikwan paragraf ducu, dok iyeny lagam me lapeny me paragraf acel acel. Yab ci ikwan ginacoya ma kiketogi, dok itam i kom kit ma girwatte kwede ki pwony meno. (Tic pa Lukwena 17:11) Ka dong inongo lagam me lapeny moni, ngol tere nyo te nyig lok mogo ma twero poyo wi i kom lagam meno i kare me cokkewu. Dong i cokkewu, iromo gire ilo cingi malo ka ce imito miyo lagammi macek cek.

Ka ibedo ka ngiyo pwony mapatpat ma kinyamo cabit ki cabit i cokke, ci ibimedo tam manyen i kom ngecci me Baibul ma tye calo ‘lonyo.’—Matayo 13:51, 52.

• Ngo ma itwero timone wek inyeb tim me yubbe pi cokke?

• Itwero yubbe maber wek inywak i miyo lagam i cokke nining?

Cakke wa i kare macon, Jehovah omito ni jo me ot acel acel gunong kare me bedo kacel, kun gijingo watgi kwede ki dok wat i kingi kekengi. (Nwoyo Cik 6:6, 7) Meno aye gin mumiyo Lucaden pa Jehovah gitiyo ki otyeno acel i cabit ducu me woro Lubanga kacel macalo jo me ot—kun ginyamo jami me cwiny ma kwakogi. Kadi ka ibedo keni, pud iromo tic ki kare man me pwonyo lok i kom Lubanga kun ikwedo piri keni lok mo me Baibul ma iyero.

Obedo kare me nyiko cok bot Jehovah. “Wunyik cok bot Lubanga, ci en bene binyiko cok botwu.” (Yakobo 4:8) Ka wapwonyo ki i Baibul lok i kom kit pa Jehovah ki ticce, konyowa me ngeyo en maber. Yo mayot me cako woro pi jo me ot aye me kwano Baibul kacel ki dwan malongo, wutwero lubo yub me kwano Baibul pi Cokke me Kwowa ki Ticwa me cabit meno. Kiromo miyo bot ngat acel acel me ot bute me akwana, ci i ngeye wutwero nyamo gin manyen ma wupwonyo.

Obedo kare me nyiko cok bot jo mukene me ot. Co ki mon, ki dok lunyodo ki lutino, gijingo wat i kingi ka gikwano Baibul kacel macalo jo me ot. Man myero obed kare ma kelo yomcwiny ki kuc, dok obed gin ma jo ducu me ot gikuro ki yomcwiny cabit ki cabit. Ma lubbe ki mwaka pa lutinogi, lunyodo romo yero jami ma tye me kony ma myero gunyam, giromo tic ki pwony mogo ma tye i Wi Lubele ki Awake! nyo ki i kabedowa me Intanet, jw.org. Wuromo lok i kom peko ma lutinowu tye ka yelle kwede i cukul ki kit me lweny kwede. Pingo pe wunen purogram me JW Broadcasting (tv.jw.org) ci wunyam pwony ma wunongo ki iye kacel? Wuromo wero wer ma kibiwero i cokke me cabit meno dok wuromo camo nyo mato gin mo kacel i nge kwanwu.

Kare man ma wutiyo kwede cabit ki cabit me woro Jehovah kacel bikonyo jo ducu me ot me nongo mit pa kwano Lok pa Lubanga, dok en bigoyo laane i kom tutewu.—Jabuli 1:1-3.

• Pingo omyero waket kare me woro kacel macalo jo me ot?

• Lunyodo romo weko kare man bedo mamit bot jo ducu me ot nining?

Pingo jo magi cwinygi yom adada? Pien gitye i gurewa madit acel. Calo lutic pa Lubanga me kare macon, ma onongo kicikogi me gure kacel kidek i mwaka acel, wan bene watye ki miti me nywako i gure madito. (Nwoyo Cik 16:16) Mwaka ki mwaka wabedo ki gure ma kit meno adek: gure me adwol ma tero nino acel bedo tye kiryo, ki dong gure madit me rijon ma tero nino adek. Adwogi mabeco ango ma wanongo ki i gure magi?

Gijingo notewa kacel calo utmego ma Lukricitayo. Kit ma Luicrael gubedo kwede ki yomcwiny me pako Jehovah “i dye lwakke ma gucokke,” wan bene wanongo yomcwiny me woro en kacel i gure magi ma kitgi dok pat-ti. (Jabuli 26:12; 111:1) Gure magi miyowa kare me rwatte ki me nywako lok kacel ki Lucaden pa Jehovah ma gitye i kacokke nyo lobe mukene. Cawa abicel me dye ceng, wanongo yomcwiny me cam kacel ki luwotwa i kabedo me gure, dok man medo lirem ma wanongo i gure magi. (Tic pa Lukwena 2:42) I gure magi, waneno ka maleng mar ma noto ‘utmegiwa’ me lobo ducu.—1 Petero 2:17.

Gikonyowa me dongo i yo me cwiny. Luicrael bene gunongo adwogi maber i kare ma “guniang maber” Ginacoya ma gitito botgi. (Nekemia 8:8, 12) Wan bene watero pwony me Baibul ma wanongo i gurewa madito calo gin ma pire tek. Yub me nino acel acel tye ki wi lok madit ma jenge i kom Baibul. Kitiyo ki pwony, pwony ma kipoko iye, ki dong lapor mogo me pwonyowa kit me tiyo miti pa Lubanga i kwowa. Winyo kit ma utmego gitye ka loyo kwede lweny ki peko me kwo calo Lukricitayo i kare man ma kwo tek adada-ni cuko cwinywa. I gure madit me rijon, goga ma kirukke iye calo jo me Baibul konyowa me niang maber dok pwonyowa jami ma watwero ketone i tic. I gure acel acel, kibatija jo ma gimito nyuto ni dong gutyeko dyere me tic pi Lubanga.

• Pingo gurewa madito gubedo kare me yomcwiny?

• Itwero nongo adwogi maber ango ka ibedo tye i gurewa mo madit?

I kare ma en dong cok to, Yecu owacci: “Lok man me kwena maber me ker pa Lubanga gibitito i wi lobo ducu, me bedo caden bot rok ducu; ka dong lacen agikki piny bibino.” (Matayo 24:14) Ento tic man ma kwako lobo ducu-ni kibicobone nining? Ki lubo lanen pa Yecu i kare ma en obedo i wi lobo.—Luka 8:1.

Watute me lok ki dano ki i pacigi. Yecu opwonyo lupwonnyene me tito kwena maber-ri i ot ki ot. (Matayo 10:11-13; Tic pa Lukwena 5:42; 20:20) Lutit kwena me cencwari me acel kimiyogi wang tic mapatpat ni gutit iye kwena. (Matayo 10:5, 6; 2 Jo Korint 10:13) I kare-ni bene, watye ki yub maber pi ticwa me tito kwena-ni, dok kacokke acel acel tye ki wang tic ma kimiyogi. Man miyo wacobo gin ma Yecu ocikowa ni, “watit lok ki dano kun wamiyo caden [kore ki kore].”—Tic pa Lukwena 10:42.

Watute me yenyo dano ka ma ginonge iye. Yecu bene oweko lanen maber me tito kwena bot dano i kabedo ma dano mapol gure iye, calo i dog nam nyo wang it me pii. (Marako 4:1; Jon 4:5-15) Wan bene waloko lok i kom Baibul ki dano ducu ma wanongo—i teng gudi, i ka cato wil, i bac pak, nyo ki cim. Wamiyo caden bene bot jiraniwa, lutic luwotwa, lutino kwan luwotwa, ki wadiwa tekke karene opore. Tic ki yo magi ducu dong omiyo dano milion mapol i lobo-ni guwinyo pi ‘kwena maber me larre.’—Jabuli 96:2.

Tika iromo tamo pi ngat mo ma imito nywako kwede kwena maber me Ker pa Lubanga ki adwogi mabeco ma ker meno twero kelone i kwogi me anyim? Pe iling mot i kom kwena man. Tit botgi cutcut ka itwero!

• “Kwena maber” ango ma omyero kitit?

• Lucaden pa Jehovah gitye ka lubo lanen pa Yecu me pwony nining?

“Painia” obedo ngat ma cito anyim ci yubo yo pi jo mukene ma lubo kore. Yecu obedo macalo painia pien kicwale i lobo me tiyo tic me pwony ma miyo kwo ki me yubo yo pi dano me nongo larre. (Matayo 20:28) I kare-ni, lulub kore gitye ka lubo lanene kun gicwalo kare malac i tic me ‘loko dano me doko jo ma lubo kore.’ (Matayo 28:19, 20) Jo mukene i kingi gitiyo macalo painia.

Painia obedo ngat ma tito kwena pi kare malac. Lucaden pa Jehovah ducu gitiyo macalo lutit kwena maber-ri. Ento, lucaden mogo guketo yub me tic macalo painia marii, kun gitito kwena pi cawa 70 dwe ki dwe. Me timo man, jo mukene yenyo dog tic ma pe tero cawa malac. Jo mukene kiyerogi me tic macalo painia keken i kabedo ma can lutit kwena me Ker-ri tye iye, kun gitiyo tic me pwony pi cawa 130 nyo makato dwe ki dwe. Painia magi giyeng ki kwo ma pe mito jami mapol, dok gitye ki gen ni Jehovah bimiyogi jami ducu ma mitte pi kwo. (Matayo 6:31-33; 1 Temceo 6:6-8) Jo ma pe gitwero tic macalo painia pi kare malac giromo tic macalo painia pi tutunu, kun gimedo cawagi ci gitiyo pi cawa 30 nyo 50 i dwe meno.

Mar pi Lubanga ki pi dano aye tugo cwiny painia. Macalo Yecu, wan bene wanongo ni jo mapol gimito winyo lok i kom Lubanga ki yubbe. (Marako 6:34) Ento watye ki ngec ma twero konyogi kombeddi, ma miyogi gen ma pe tur pi anyim. Mar pi jirani aye cuko cwiny painia me jalo cawane ki kerone me konyo jo mukene wek guwiny kwena maber-ri. (Matayo 22:39; 1 Jo Tecalonika 2:8) Macalo adwogine, niyene jing, en nyiko cok bot Lubanga, dok nongo yomcwiny madwong.—Tic pa Lukwena 20:35.

• Painia obedo anga?

• Ngo ma tugo cwiny jo mukene me tic macalo painia pi kare malac?

Cakke wacon, Jehovah obedo ka miyo pwonnye bot Lucadenne. Cukul ma kite dok pat kiyubogi pi jo ma gitiyo tic me tito kwena me Ker-ri pi kare malac wek ‘gucob ticgi ducu kakare.’—2 Temceo 4:5.

Cukul pi Painia. I agikki me mwaka mukwongo ma ngat moni otiyo macalo painia marii, kilwonge me cito i cukul pi nino abicel ma bedo tye i Ot me Ker macok kwede. Cukul man kiyubo me konyo painia wek gunyikke cok bot Jehovah, gudok jo mucwiny i tiyo tic me pwony, ki dong gumedde ki bedo lugen i tic pa Jehovah.

Cukul pi Lutit Kwena me Ker-ri. Cukul man ma tero dwe aryo-ni, kiyubo me pwonyo painia mucwiny ma gitye atera me weko pacogi me cito ka mo keken ma gimitte iye. Bedo calo gitye ka wacci, “An ene; ora!” kun giporo lanen pa Yecu Kricito, Latit kwena ma pud dong oywek loyo ma otiyo i lobo kany. (Icaya 6:8; Jon 7:29) Cito ka mabor ki gang pol kare kwako dwoko rwom me kwogi piny. Tekwaro, cwir nyo oro, wa ki cam me kabedo meno romo bedo pat ki ma gungiyo kwede. Pol kare mitte ni gupwony leb manyen. Cukul man kiyubo pi omege ki lumege ma wigi nono kacel ki jo munyomme, ma mwakagi tye 23 me o 65. Pwonnye man konyogi me dongo kit pa Lukricitayo ma bikonyogi i ticgi ki dok diro ma miyo Jehovah kacel ki dulle tiyo kwedgi i yo mapol.

Cukul me Gilead. I leb Ibru, nyig lok man ni “Gilead” gonye ni miyo “Caden.” Nicakke i mwaka 1943 ma cukul me Gilead ocakke iye, lumiconari makato 8,000 ma kipwonyogi i cukul man gumiyo caden “wa i agikki piny ducu,” dok gunongo adwogi maber. (Tic pa Lukwena 13:47) I kare ma Lumiconari guo i lobo me Peru tyen mukwongo, onongo pe watye ki kacokke mo kunnu. Kombeddi, watye ki kacokke makato 1,000. I kare ma Lumiconari gucako tic i Japan, onongo wel Lucaden pe romo apar. Kombeddi, welgi kato 200,000. Cukul man ma tero dwe abic-ci kwako kwano Lok pa Lubanga i yo matut. Jo ma gitiyo macalo painia keken nyo lumiconari, jo ma gitiyo i jang gang kal, nyo macalo luneno me adwol aye kilwongogi me cito i cukul man wek gunong pwonnye magwar me konyogi me jingo kor ticwa ma kwako wi lobo ducu-ni.

• Pingo kiyubo Cukul pi Painia?

• Angagi ma kilwongogi i Cukul pi Lutit Kwena me Ker-ri?