PWONY ME 11
Lubo Cik pa Lubanga Keliwa Adwogi Mabeco Nining?
1. Pingo wamito tira?
I yo ma nining ma lok ada me Baibul twero konyowa me gwoko kwowa?—JABULI 36:9.
Lacwecwa obedo ngat ma ryekone dwong ma loyo megwa. Calo Wego ma lamar, en paro piwa. Dok bene, en onongo pe mito ni walone kenwa. (Jeremia 10:23) Pi man, kit macalo latin mito tira pa lunyodone-ni, wan ducu wamito tira pa Lubanga. (Icaya 48: 17, 18) Cik me Baibul obedo mic ma oa ki bot Lubanga.—Kwan 2 Temceo 3:16.
Cik pa Jehovah pwonyowa kit me kwo maber loyo kombeddi dok ginyuto kit ma watwero nongo kwede kwo ma pe tum. Kit ma Lubanga aye ocweyowa-ni, pore ni myero walub tirane dok wajol ki pwoc madit.—Kwan Jabuli 19:7; Niyabo 4:11.
2. Lok pa Lubanga tirowa nining?
Lok ada mogo me Baibul nyuto botwa gin ma myero watim ma lubbe ki jami mapat pat ma timme i kwowa. Cik mukene kwako gin acel moni keken. (Nwoyo Cik 22:8) Omyero wati ki ryekowa me niang kit ma lok ada moni me Baibul nyutiwa gin me atima. (Carolok 2:10-12) Me labolle, Baibul pwonyowa ni kwo obedo mot ma oa ki bot Lubanga. Lok ada meno twero tirowa ka watye i dog ticwa, pacowa, ki dong ka wot. Konyowa me gwoko kwowa.—Kwan Tic pa Lukwena 17:28.
3. Cik aryo mene ma pigi tego loyo?
Yecu oloko i kom cik pa Lubanga aryo ma pigi tego. Mukwongone nyuto tyen lok me kwowa—ni myero wange Lubanga, wamar-re, dok wati pire ki gen. Cik mukwongo man myero otir tam ducu ma wamoko. (Carolok 3:6) Jo ma gilubo cik man gibedo ki wat macok ki Lubanga, dok gibinongo yomcwiny me ada ki kwo ma pe tum.—Kwan Matayo 22:36-38.
Cik me aryone twero tirowa me bedo ki kuc ki jo mukene. (1 Jo Korint 13:4-7) Keto cik me aryone-ni i tic kwako lubo kit ma Lubanga tero kwede dano.—Kwan Matayo 7:12; 22:39, 40.
4. Lubo cik pa Lubanga keliwa adwogi mabeco nining?
Cik pa Lubanga pwonyo jo me odi me note kacel ki mar. (Jo Kolocai 3:12-14) Lok pa Lubanga bene gwoko jo me odi kun pwonyo lok ada ma tirowa—ni nyom myero orii pi naka.—Kwan Acakki 2:24.
Lubo pwony me Baibul twero konyowa me gwoko jamiwa me kom ki nongo yomcwiny. Me labolle, ludito tic pol kare gimito lutic ma gilubo cik me Baibul ma kwako bedo lugen ki tic matek. (Carolok 10:4, 26; Jo Ibru 13:18) Lok pa Lubanga pwonyowa me bedo ma wayeng ki gin ma mitte keken ki me tero watwa ki Lubanga calo gin ma pire tek loyo jami me kom.—Kwan Matayo 6:24, 25, 33; 1 Temceo 6:8-10.
Keto i tic cik pa Lubanga twero gwoko yotkomwa. (Carolok 14:30; 22:24, 25) Me labolle, cik ma dok i kom mero gwokowa ki i kom two maraco ki awano ma timme atura. (Carolok 23:20) Jehovah pe gengowa mato kongo, ye ni wamat mupore. (Jabuli 104:15; 1 Jo Korint 6:10) Cik pa Lubanga kelo adwogi maber botwa pien doro tamwa kacel ki ticwa bene. (Jabuli 119:97-100) Ento Lukricitayo me ada pe giworo cik pa Lubanga pi mito nongo adwogi maber keken. Giworo cikke pi kelo deyo bot Jehovah.—Kwan Matayo 5:14-16.