Labeka Onongo Mito Yomo Cwiny Jehovah

Labeka obedo dako ma maro Jehovah mada. Cware nyinge Icaka. En bene onongo maro Jehovah. Labeka ocako ngeyo Icaka nining? En onyuto nining ni emito yomo cwiny Jehovah? Kong wanenu lok i kom Icaka, ma obedo cwar Labeka.

Lunyodo pa Icaka gubedo Abraim ki Cara. Gin gukwo i lobo me Kanaan, ka ma danone onongo pe giworo Jehovah. Ento Abraim onongo mito ni wode onyom dako ma woro Jehovah. Pi meno, en ocwalo laticce, ma oromo bedo Eliejer, wek ocit onong dako pi Icaka ki i lobo me Karan, ka ma wadi pa Abraim bedo iye.

Eliejer owoto kacel ki lutic pa Abraim mogo. Guwoto wot mabor mada. Guwoto ki kinaga apar me tingo cam ki mic ma guwoto kwede. Eliejer onongo bingeyo dako mupore pi Icaka nining? I kare ma Eliejer ki lutic luwote guo i Karan, gin gucung cok ki wang it pien Eliejer onongo ngeyo ni meno aye obedo cawa me twomo pii. En olego bot Jehovah kun wacci, ‘Ka apenyo nyako mo ni omiya pii ce omiya dok omiyo ki kinaga bene, ci abingeyo ni meno aye nyako ma iyero.’

Anyaka ma nyinge Labeka obino i wang it ka twomo pii. Baibul wacci en onongo mwonya mada. Eliejer openye pi pii amata ci en ogamo lokke kun wacci: ‘Aya. Abitwomo pii me amatani dok abimiyo pii ki kinagani bene.’ Tam kong! Kinaga ma orwo onekogi gimato pii madwong adada, ci Labeka obedo ka ringo ka twomo pii tyen mapol. Tika itwero neno ki i cal kit ma Labeka tye ka tic matek kwede?— Eliejer obedo ki ur mada i kit ma Jehovah ogamo kwede legane.

Eliejer omiyo mot mabeco mapol bot Labeka. Labeka olwongo Eliejer ki lutic luwote i pacogi. Eliejer otito ngo mumiyo Abraim ocwale, ki kit ma Jehovah ogamo kwede legane. Wadi pa Labeka guye ki yomcwiny ni Icaka onyom Labeka.

Itamo ni Labeka onongo mito nyomme ki Icaka?— Labeka oniang ni Jehovah aye ocwalo Eliejer kunu. I kare ma lupaco pa Labeka gupenye ka mito cito i Kanaan ka nyomme ki Icaka, en ogamo ni: ‘Ee, amito cito.’ Cutcut Labeka ocito kacel ki Eliejer. I kare ma guo i Kanaan, Labeka onyomme ki Icaka.

Kit ma Labeka otimo gin ma Jehovah mito ni en otim, Jehovah ogwoke maber. Lacen i nge mwaki mapol, Yecu obedo lakwar Labeka! Ka ibedo calo Labeka kun iyomo cwiny Jehovah, ci en bigwoko in bene maber.