Okeyo Paulo Cwinye Tek

Kong wanenu lok i kom awobi mo ma olaro kwo pa nerone. Nero awobi meno obedo lakwena Paulo. Pe wangeyo nying awobi man, ento wangeyo ni en otimo gin ma nyuto tekcwiny. Imito ngeyo ngo ma en otimo?—

Paulo onongo tye mabuc i Jerucalem. Onongo kimake pien en obedo ka tito kwena i kom Yecu. Jo mogo maraco onongo gidag Paulo ci guyubo yo me neke. Guwacci: ‘Wapeny kapten me mony wek lumonye gukel Paulo i kot. Wan wabikanne i nget gudi, ci ka Paulo tye ka kato, wabineke woko!’

Okeyo Paulo owinyo pi yub me neko Paulo. Ngo ma en otimo? Ocito i buc ka ma Paulo tye iye ci otito pi yub man bote. Cutcut lakwena Paulo ocwale bot kapten me mony wek otit bote pi yub marac man. Itamo ni obedo yot pi okeyo Paulo me tito lok man bot kapten me mony?— Pe obedo yot, pien kapten me mony obedo ngat ma pire tek adada. Ento okeyo Paulo cwinye obedo tek ci oloko bot ladit man.

Cutcut kapten me mony ongeyo gin ma myero etim. En oyero lulweny ma romo 500 pi gwoko Paulo! En ocwalo lulweny magi me tero Paulo i Cecaria i dyewor meno. Tika kilaro kwo pa Paulo?— Ee, pien jo maraco magi onongo pe gitwero lweny i kome! Yubgi marac-ci pe ocobbe.

Ngo ma itwero pwonyo ki i lok man?— In bene iromo bedo dano ma cwinye tek calo okeyo Paulo-ni. Myero wabed ki tekcwiny ka watye ka lok i kom Jehovah bot jo mukene. Tika ibibedo ngat ma cwinye tek kun imedde ki lok i kom Jehovah?— Ka itimo kit meno, ci itwero laro kwo pa dano.