En Oyomo Cwiny Wonne ki Cwiny Jehovah

In itye ka neno anyaka ma tye i cal-li?— En obedo nya pa laco ma nyinge Jeputa. Baibul pe otito botwa nying anyaka man, ento wangeyo ni en oyomo cwiny wonne ki cwiny Jehovah. Kong wapwonyu lok i kome ki wonne Jeputa.

Jeputa obedo laco ma kite ber dok kare ki kare onongo pwonyo nyare lok i kom Jehovah. En obedo laco ma kome tek dok latela maber. Pi man, jo Icrael gupenye me telo wigi wek gilweny i kom lumonegi.

Jeputa olego ni Lubanga okonye wek elo lweny. Jeputa okwonge ni ka eloyo lweny, ci ebimiyo bot Jehovah ngat mukwongo kato woko ki i ode ka edok cen paco. Dano man bibedo dok bitic pi kwone ducu i kema pa Lubanga. Yam con kabedo me woro Lubanga kong obedo kema. Ada, Jeputa gire oloyo lweny! Ma en odwogo paco, ingeyo anga mukwongo katti woko ki i ode me rwatte kwede?—

Kakare, obedo nya pa Jeputa! En onongo tye ki latin acel keken, dong onongo mitte ni ocwal nyare-nu ka tic i kema pa Lubanga. Lok man ocwero cwiny Jeputa mada. Ento wi myero opo ni, Jeputa onongo okwonge. Cutcut, nyare ogamo ni: ‘Baba, in ikwonge bot Jehovah, dong myero ilub kwonge-ni.’

Nya pa Jeputa bene cwinye ocwer mada. Ki i kema pa Lubanga kunu, en onongo pe binyomme dok pe binywalo lutino. Ento en onongo mito gwoko kwonge pa wonne ki cwinye ducu wek eyom cwiny Jehovah. Timo man onongo pire tek bote loyo nyom ki nywalo lutino. Pi man en oweko pacogi ci ocito ka bedo i kema pa Lubanga pi kwone ducu.

Itamo ni gin ma en otimo-ni oyomo cwiny wonne ki cwiny Jehovah?— Ee, en oyomo cwinygi! Ka in ibedo lawiny dok imaro Jehovah, itwero bedo calo nya pa Jeputa. In bene ibiyomo cwiny Jehovah ki lunyodoni mada.