Camuel Omedde ki Timo Gin Matir

Cakke i kare ma Camuel pud tidi adada, en onongo bedo dok tiyo i kema me rwatte, ka ma dano bino iye ka woro Jehovah. In ingeyo kit ma Camuel ocako bedo kwede i kema me rwatte? Wacaku kong ki neno lok i kom Anna, mama pa Camuel.

Pi kare malac Anna onongo mito latin, ento en onongo pe nywal. Pi meno en olego bot Jehovah, kun bako doge bote ni okonye. En ocikke ni ka enywalo latin awobi, ci ebitero awobi-nu ka tic ki bedo i kema me rwatte. Jehovah ogamo legane, ci en onywalo latin awobi. Ocako nyinge ni Camuel. Dok kit ma Anna onongo ocikke kwede, i kare ma Camuel tye i kine ka mwaka adek nyo angwen, en otero Camuel i kema me rwatte ka tic pi Lubanga kunnu.

Eli aye onongo lalamdog madit i kema me rwatte. Pi meno, en aye onongo kubo kin dano ki Lubanga. Awobene aryo bene onongo gitiyo kunnu calo lulamdog. Wi opo ni, kema me rwatte onongo obedo ot me woro Lubanga, dok dano myero gutim jami mabeco keken iye. Ento awobe pa Eli onongo gitimo jami maraco adada. Camuel obedo ka neno jami ma gitimo. Camuel mono bene otimo jami maraco calo awobe pa Eli?— Pe, en omedde ki timo gin matir, kit ma lunyodone onongo gupwonye kwede.

In itamo ni Eli onongo myero otim ngo i kom awobene aryo-ni?— En nongo myero omi botgi pwod kun ryemogi woko ki i tic i ot pa Lubanga. Ento Eli pe otimo kit meno, ci Jehovah iye owang matek i kom Eli kacel ki awobene aryo-ni. Jehovah omoko tamme me pwodogi.

I nino mo acel ma Camuel onongo tye ka nino, en owinyo ka ngat mo lwonge ni: ‘Camuel!’ En oringo bot Eli, ento Eli owacci: ‘An pe alwongi.’ Man dok otimme tyen aryo mukene. Ma dong otimme tyen me adek-ke, Eli owaco bot Camuel ni ka owinyo dwan meno doki, en myero ogam ni: ‘Jehovah, loki, atye ka winyone.’ Dok meno aye gin ma Camuel otimo. Jehovah owaco bot Camuel ni: ‘Wac bot Eli ni abiketo can i kom jo me ode pi jami maraco ma gutimo.’ Itamo ni obedo yot pi Camuel me miyo kwena man bot Eli?— Ku, pe obedo yot. Ento kadi bed Camuel onongo lwor, en otimo gin ma Jehovah owaco ni otim. Gin ma Jehovah owaco-ni ocobbe ada. Kineko awobe pa Eli aryo-ni, dok Eli bene oto woko.

Camuel tye lanen maber piwa. En otimo gin maber kadi bed oneno jo mukene ka timo jami maraco. In kono? Ibibedo calo Camuel kun imedde ki timo gin matir? Ka itimo kit meno, ci ibiyomo cwiny Jehovah kacel ki lunyodoni.