1-3. Kit lapeny ango ma dano gipenyo i kom to, dok lagam ango ma dini mapat pat gimiyo?

BAIBUL omiyowa cikke ni kare bibino ma “to bene dong bibedo pe.” (Niyabo 21:4) I Dul me 5, wapwonyo ni ginkok oyabo yo piwa me nongo kwo ma pe tum. Ento dano pud gito. (Latitlok 9:5) Dong lapeny acel ma pire tek ma wapenye kwede aye ni, Ngo ma timme i komwa ka wato?

² Lagam me lapeny man mitte tutwalle ka dano ma wamaro oto. Waromo bedo ki par kun wapenye kekenwa ni: ‘Ngo ma otimme i kome? Mono en tye ka nenowa? Tika en twero konyowa? Mono wabineno en doki?’

³ Dini mapol gigamo lapeny magi i yo mapat pat. Mogo gipwonyo ni ka ibedo ngat maber, ci icito i polo ento ka ibedo dano marac, ci ibiwang i mac me kapiny. Mukene giwacci ka ito, idoko cwiny ci ibedo kacel ki wadini ma dong guto woko. Dini mogo giwacci ka ito, kingolo kop i wi ci kinywali odoco, nyo idwogo makwo ki kom mapat calo dano mukene nyo kadi wa lee.

4. Kit tam ango ma dini mapol gitye kwede i kom to?

⁴ Dini magi ginen calo gitye ki pwony mapat pat. Ento gin ducu gipwonyo tam acel. Gipwonyo ni ka dano oto, gin mo tye ma bwot ki i kome ci medde ki kwo. Tika meno lok ada?

NGO MA TIMME I KOMWA KA WATO?

5, 6. Ngo ma timme i komwa ka wato?

⁵ Jehovah aye ngeyo gin ma timme i komwa ka wato, dok en owaco botwa ni ka dano moni oto, kwone tum woko. To obedo olungtuke me kwo. Pi man ka ngat mo oto, ngecce ki tamme ducu pe medde ki kwo ka mo doki.a Ka wato nongo dong pe watwero neno piny, pe watwero winyo lok dok pe watwero tamo tam.

⁶ Kabaka Solomon ocoyo ni ‘jo ma dong guto woko pe gingeyo gin mo.’ Jo muto pe gitwero nyuto mar nyo adage, dok “tic nyo tam nyo ngec nyo ryeko mo dong pe i lyel.” (Kwan Latitlok 9:5, 6, 10.) Dok i Jabuli 146:4, Baibul wacciwa ni ka ngat mo oto, “yubbe ducu ma yam oyubo rwenyo woko liweng.”

GIN MA YECU OWACO I KOM TO

7. Ngo ma Yecu owaco i kom to?

⁷ I kare ma lareme Lajaro oto, Yecu owaco bot lukwenane ni: “Laremwa Lajaro dong onino.” Ento, Yecu onongo pe tye ka wacone ni Lajaro onino me nongo yweyo. Yecu omedde ni: “Lajaro dong oto” woko. (Jon 11:11-14) Dong, Yecu oporo to ki nino. En pe owacci Lajaro tye i polo nyo tye kacel ki wadine ma dong guto woko. Dok en pe owacci Lajaro onongo tye ka deno can i mac me kapiny nyo kitye ka nywale odoco macalo dano nyo lee. Pe, onongo tye calo Lajaro onino woko matut. Ginacoya mukene bene poro to ki nino. I kare ma kicelo Citefano wa i to, Baibul wacci en “te nino gire oko.” (Tic pa Lukwena 7:60, Lango Baibul) Lakwena Paulo bene ocoyo ni Lukricitayo mogo me karene onongo dong ‘gunino’ i to.​—1 Jo Korint 15:6, Lango Baibul.

8. Wangeyo nining ni Lubanga pe ocweyo dano ni myero guto woko?

⁸ Lubanga mono ocweyo Adam ki Kawa ni gubed kwo pi kare mo ci guto woko? Pe kumeno! Jehovah ocweyogi wek gunong mit pa kwo ma pe tum ma komgi yot. I kare ma Jehovah ocweyo dano, en ominigi miti me kwo pi naka. (Latitlok 3:11, NW) Lunyodo pe gimito neno ka lutinogi two dok gito woko, dok Jehovah bene winyo kit meno. Ento ka Lubanga ocweyowa ni wakwo pi naka, pingo dok wato?

PINGO WATO?

9. Pingo cik ma Jehovah omiyo bot Adam gin ki Kawa onongo pe tek me lubone?

⁹ I poto me Eden, Jehovah owaco bot Adam ni: “Yadi ducu ma tye i poto, camgi macalo imito; ento yat me ngeyo gin maber ki marac pe icam, pien i nino ma ibicamo iye, en aye ibito iye bene.” (Acakki 2:9, 16, 17) Cik pa Jehovah onongo lubone pe tek, dok En onongo tye ki twero me tito bot Adam ki Kawa gin maber ki marac. Ka onongo guwinyo dog Jehovah, kono gunyuto bote ni giworo twerone. Nongo bene kono gunyuto bote ni gitye ki pwoc pi jami ducu ma en omiyo botgi.

10, 11. (a) Catan obwolo Adam gin ki Kawa nining? (b) Pingo Adam gin ki Kawa onongo pe gitwero gengo ngegi pi bal ma gutimo?

¹⁰ Rac mada ni, Adam ki Kawa guyero pe me winyo Jehovah. Catan openyo Kawa ni: “Lubanga mono owacci, ‘Pe wucam yat ducu ma tye i poto-ni’?” Kawa odok iye ni: “Watwero camo nyig yadi ducu ma tye i poto-ni, ento Lubanga ociko ni, ‘Pe wubicamo nyig yat ma tye i dye poto, pe wugud kome bene, wek pe wuto.’”​—Acakki 3:1-3.

¹¹ Ci Catan owacci: “Pe wubito. Pien Lubanga ngeyo ni, ka wucamo, ci wangwu biyabbe woko, ci wubidoko calo Lubanga, miyo wungeyo gin maber ki gin marac.” (Acakki 3:4-6) Catan onongo mito ni Kawa otam ni etwero moko tamme pire kene i kom gin maber ki marac. En bene oloko lok bwola i kom gin ma bitimme ka Kawa okwero winyo dog Lubanga. En owacci Kawa pe bito, pi meno Kawa ocamo nyig yat-ti ci omiyo mogo bot cware. Adam ki Kawa onongo gingeyo ni Jehovah ocikogi ni pe gucam nyig yat meno. I kare ma gucamo, gin guyero me turo cik ma lubone yot. Camo nyig yat meno bene onyuto ni, gin gipe ki woro i kom Wongi me polo. Onongo dong pe gitwero gengo ngegi pi bal ma gutimo!

12. Pingo tye me cwer cwiny tutwal ni Adam gin ki Kawa gukwero winyo Jehovah?

¹² Pud dong tye me cwer cwiny madit ya ni lunyodowa mukwongo gunyuto twon cac ma kit meno i kom Lacwecgi! Iwinyo nining ka itute matek me pito wodi ki nyari ento lacen gujemo i komi ki timo jami ma iwaco botgi ni pe gutim? Man mono pe obituro cwinyi?

13. Gin ango ma Jehovah onongo tye ka lok iye i kare ma owacci “ibidok i apwa”?

¹³ I kare ma gukwero winyo Jehovah, Adam gin ki Kawa gurwenyo mot me kwo pi naka. Jehovah owaco bot Adam ni: “In apwa, dok bene ibidok i apwa.” (Kwan Acakki 3:19.) Meno te lokke ni Adam onongo bidoko apwa, calo i kare ma pud peya kicweye. (Acakki 2:7) I kare ma Adam obalo, en oto ci obedo pe.

14. Pingo wato?

¹⁴ Ka Adam gin ki Kawa onongo gubed luwiny, kono watin pud gikwo. Ento i kare ma gukwero winyo dog Lubanga, gin gubalo, ci mot mot guto woko. Bal obedo calo two marac adada ma walako ki bot lunyodowa mukwongo. Wan ducu kinywalowa ki bal, pi meno wato. (Jo Roma 5:12) Ento meno pe obedo yub pa Lubanga pi dano. Lubanga onongo pe mito ni dano oto, dok Baibul lwongo to ni “lakwor.”​—1 Jo Korint 15:26.

NGEYO LOK ADA GONYOWA

15. Ngeyo lok ada i kom to gonyowa nining?

¹⁵ Lok ada i kom to weko wabedo agonya ki i tam ma pe tye atir. Baibul pwonyowa ni dano ka oto pe winyo arem nyo bedo ki cwer cwiny. Pe watwero lok kwedgi, dok gin bene pe gitwero lok kwedwa. Pe watwero konyo jo muto dok gin bene pe gitwero konyowa. Pe gitwero wanowa, pi meno pe myero wabed ki lworo i komgi. Ento pol pa dini gitito ni jo muto gitye makwo ka mo dok ni watwero konyogi ka waculo cente bot padi nyo jo ma gilwonge ni dano pa Lubanga. Ento ka wangeyo lok ada i kom to, pe kitwero bwolowa.

16. Goba ango ma dini mapol gipwonyo i kom jo muto?

¹⁶ Catan tiyo ki dini goba me bwolowa wek watam ni jo muto pud gikwo. Me labolle, dini mogo gipwonyo ni ka wato, but komwa mukene medde ki kwo ka mo. Dini ma megi mono pwonyo pwony ma kit meno onyo pwonyo gin ma Baibul tito i kom jo muto? Catan tiyo ki goba me kwanyo dano woko ki bot Jehovah.

17. Pingo pwony i kom mac me kapiny kelo yet i kom Jehovah?

¹⁷ Pwony pa dini mapol balo cwiny adada. Me labolle, dini mukene pwonyo ni jo maraco gibibedo ka wang i mac me kapiny pi naka. Goba ma kit meno rom ki yeto Jehovah. En pe twero weko dano limo can malit atika kit meno! (Kwan 1 Jon 4:8.) Iwinyo ningo i kom dano ma miyo pwod bot latin ki wango cinge i mac? Ibitamo ni en dano ma cwinye col atika. Pe ibibedo ki miti me ngeyo en. Dong meno aye kit ma Catan mito ni wawiny kwede i kom Jehovah!

18. Pingo myero pe walwor jo muto?

¹⁸ Dini goba mogo tito ni ka dano oto, ci lokke doko cwiny. Gipwonyo bene ni omyero wawor cwiny magi pien gitwero bedo luremwa matego nyo gidoko lumonewa maraco adada. Jo mapol giye goba meno. Gilworo jo muto, pi meno gimiyo botgi woro ma ka woro Jehovah. Wi opo ni jo muto pe gingeyo nyo giwinyo gin mo, pi man omyero pe walworgi. Jehovah aye Lacwecwa. En Lubanga me ada dok omyero wawor en keken.​—Niyabo 4:11.

19. Ngeyo lok ada i kom to konyowa nining?

¹⁹ Ka wangeyo lok ada i kom to, ci wabedo agonya ki i lok goba ma dini mogo pwonyo. Man bene konyowa me niang cikke mamwonya ma Jehovah tye kwede pi kwowa ki anyimwa.

20. Wabipwonyo gin ango i dul ma lubo man?

²⁰ I kare ma okato angec, latic pa Lubanga ma nyinge Yubu openyo ni: “Ka dano dong oto, pud dok bibedo kwo?” (Yubu 14:14) Tika ada twere pi ngat ma oto me kwo doki? Lagam ma Lubanga omiyowa i Baibul yomo cwinywa adada. Wabinyamo kop meno i dul ma lubo man.

1-3. Wan ducu kitweyowa i buc mene, dok Jehovah bigonyowa ki iye nining?

GO KONG ni kitweyi i buc pi kare me kwoni lung pi bal mo ma pe itimo. Pe itye ki gen mo ni kibigonyi. Gen mo me anyim dong pe piri, dok pe tye gin mo ma itwero timone. Ma wi pud ocung woko, iniang ni dano mo tye ki twero me gonyi, dok en ocikke me konyi! Ibiwinyo nining?

² Wan ducu watye mabuc pa to. Kadi watim ngo, pe watwero bwot ki iye. Ento Jehovah tye ki teko me gonyowa ki i to. Dok en ocikke ni “lakwor ma gibityeko woko me agikki en aye to.”​—1 Jo Korint 15:26.

³ Tam kong kit ma ibiwinyo agonya kwede ka par i kom to dong peke! Jehovah pe bijwayo to keken. En bene bidwoko cen jo ma yam guto wek gukwo odoco. Tam kong kit ma man bigudi kwede. En ocikke ni “jo ma yam dong guto woko” gibikwo doki. (Icaya 26:19) Man aye gin ma Baibul lwongo ni nicer.

KA DANOWA ME AMARA OTO

4. (a) Ngo ma twero kweyo cwinywa ka dano me otwa nyo laremwa mo oto? (b) Angagi ma gubedo lurem Yecu macok?

⁴ Ka ngat mo me otwa nyo laremwa macok oto, arem ki cwercwiny ma wawinyo lit ma pe wacce. Komwa nyonge woko. Pe tye gin mo ma waromo timone me dwoko ngat meno cen i kwo. Ento Baibul miyo botwa kwe cwiny me ada. (Kwan 2 Jo Korint 1:3, 4.) Kong dong wanenu labol acel ma nyuto ni Jehovah gin ki Yecu gitye ki miti madit me dwoko cen jowa me amara ma dong guto woko. I kare ma Yecu onongo tye i lobo, en onongo maro limo Lajaro ki lumegine, Marita gin ki Maliam. Jo adek magi onongo gitye lurem Yecu macok. Baibul wacci: “Yecu yam maro Marita ki laminne ki Lajaro.” Ento, i nino mo acel, Lajaro oto woko.​—Jon 11:3-5.

5, 6. (a) Ngo ma Yecu otimo i kare ma en oneno jo gang pa Lajaro ki lureme gitye ka kumo? (b) Pingo ngeyo kit ma Yecu owinyo kwede i kom to kweyo cwinywa?

⁵ Yecu ocito ka kweyo cwiny Marita gin ki Maliam. I kare ma Marita owinyo ni Yecu tye ka bino, en oa woko ki i boma me cito ka rwatte kwede i yo. Marita obedo ki yomcwiny me neno Yecu, ento owaco bote ni: “Rwot, kono nene itye kany, kono omera pe oto.” Marita otamo ni Yecu ogalle tutwal. I nge meno, Yecu oneno laminne Maliam tye ka koko. Neno cwer cwinygi ogudo cwinye, mumiyo en bene okok ki pig wange. (Jon 11:21, 33, 35) En owinyo arem malit ma bino calo adwogi me rwenyo danowa me amara i to.

⁶ Ngeyo ni Yecu bene winyo kit ma wan wawinyo kwede i lok ma dok i kom to kweyo cwinywa. Kit pa Yecu rom aroma ki pa Wonne. (Jon 14:9) Jehovah tye ki teko me jwayo to woko matwal, dok meno aye gin ma en bitimo cokcok-ki.

“LAJARO, KATTI WOKO!”

7, 8. Pingo Marita onongo pe mito ni kikwany got woko ki i dog lyel pa Lajaro, ento ngo ma Yecu otimo?

⁷ I kare ma Yecu oo ka ma kikano iye kom Lajaro, dog boro me lyel onongo kiloro ki got mapek. Yecu owacci: “Kwanyu got woko.” Ento Marita onongo pe mito ni kikwany got. Kom Lajaro onongo dong ori i lyel pi “nino angwen” kulu. (Jon 11:39) En onongo pe ngeyo gin ma Yecu mito timone pi omine.

⁸ Yecu owaco bot Lajaro ni: “Katti woko!” Gin ma Marita ki Maliam guneno i ngeye obedo me ur. “En ma ceng oto-ni okatti woko, kun cinge ki tyene giriyo ki bongo.” (Jon 11:43, 44) Lajaro odwogo cen i kwo doki! En dok ocako kwo kacel ki jo me pacone ki lureme. Onongo gitwero gudo kome dok guloko kwede. Man pud dong obedo twon tango madit ya! Yecu ocero Lajaro woko.

“LATIN ANYAKA, AWACCI NI, ‘A MALO!’”

9, 10. (a) Anga ma omiyo Yecu teko me cero jo muto? (b) Pingo lok i kom jo ma kicerogi pire tek botwa?

⁹ Yecu mono ocero dano ki teko mere kene? Pe. Ma peya en ocero Lajaro, Yecu olego bot Jehovah ni omine teko me cero Lajaro. (Kwan Jon 11:41, 42.) Lajaro pe obedo ngat acel keken ma kicero. Baibul tittiwa lok i kom anyaka me mwaka 12 ma kome obedo lit mada. Wonne Yairo onongo mito kony pi oyotoyot, dok obako doge bot Yecu ni ocang nyare. Anyaka meno onongo tye latinne acel keken. Ma en onongo pud tye ka lok ki Yecu, co mogo gubino ci guwacci: “Nyari dong oto woko, pud dok iyelo lapwony pingo? Ento Yecu owaco bot Yairo ni: “Pe ilwor, ye ayeya keken, ci en bicang.” En owoto ki Yairo wa i pacone. Ma dong gicok o i ode, Yecu oneno dok owinyo dano ka koko. Yecu owaccigi ni: “Wuwek koko obedi; pien nyako-ni pe oto, ento onino anina.” Won nyako-ni ki minne nen calo gubedo ka tamo tyen lok pa Yecu-ni. Yecu olego dano ducu ni gua woko ci otero won latin ki minne i ot ka ma kipyelo latin anyakagi iye. Yecu omako cing latin anyaka-ni ci owacce ni: “Latin anyaka, awacci ni, ‘A malo!’” Go kong yomcwiny ma lunyodone gubedo kwede i kare ma guneno latin anyakagi oa malo ci ocako wot! Yecu onongo ocero anyakagi woko. (Marako 5:22-24, 35-42; Luka 8:49-56) Cakke i nino meno, ka guneno anyakagi onongo wigi po i kom gin ma Jehovah otimo pigi kun tiyo ki Yecu.a

¹⁰ Jo ma Yecu ocerogi-ni dok guto woko i nge kare mo. Ento lok ma wakwano i komgi pire tek pien miyowa gen me ada. Jehovah mito cero jo muto, dok bitimone.

PWONY MA WANONGO KI I KOM KOP ME NICER

11. Ngo ma Latitlok 9:5 pwonyowa i kom Lajaro?

¹¹ Baibul waco ka maleng ni “jo ma dong guto woko pe gingeyo gin mo.” Lok i kom Lajaro moko ni meno obedo lok ada. (Latitlok 9:5) Kit ma Yecu owaco kwede, obedo calo Lajaro onongo tye ka nino. (Jon 11:11) I kare ma en onongo tye i lyel, Lajaro onongo ‘pe ngeyo gin mo.’

12. Wangeyo nining ni cer pa Lajaro otimme ada?

¹² I kare ma Yecu ocero Lajaro, dano mapol guneno. Kadi wa lumone pa Yecu gungeyo ni en otimo tango man. Lajaro onongo tye makwo, dok man omoko ka maleng ni en ocer ada. (Jon 11:47) Medo i kom meno, dano mapol gucito ka limo Lajaro, ci gucako ye ni Lubanga aye ooro Yecu. Lumone pa Yecu pe gumaro gin mutimme-ni, ci gugoyo pulan me neko Yecu ki Lajaro bene.​—Jon 11:53; 12:9-11.

13. Pingo watwero bedo labongo akalakala mo ni Jehovah bicero jo muto?

¹³ Yecu owaco ni “jo ducu ma tye i lyel” gibicer woko. (Jon 5:28) Man te lokke ni jo ducu ma Jehovah wiye po i komgi bidwogo cen i kwo. Ento, wek Jehovah ocer ngat moni, wiye myero opo i kom jami ducu ma kwako ngat meno. En mono twero timo meno? Tam kong, tye lacer bilion mapol ata i dan polo. Ento Baibul waco ni Jehovah ngeyo nyinggi ki acel acel. (Kwan Icaya 40:26.) Ka wiye twero po i kom nying lakalatwe acel acel, ci ada wiye twero po i kom jami ducu ma dok i kom jo ma en bicerogi. Ma dong pire tek loyo, Jehovah ocweyo jami ducu, pi meno en tye ki teko me miyo dano kwo odoco.

14, 15. Lok pa Yubu pwonyowa gin ango i kom nicer?

¹⁴ Yubu, laco ma obedo lagen, onongo ye i kom nicer. En openyo ni: “Ka dano dong oto, pud dok bibedo kwo?” En owaco bot Jehovah ni: “Ka lacen ibilwonga, ci abigamo dogi; pira bibedo mitti mada, pien in aye iketo an.” Ada, Yubu onongo ngeyo ni Jehovah tye ka kuro kare ma en bicero iye jo muto.​—Yubu 14:13-15.

¹⁵ Gen me nicer miyo iwinyo nining? Itwero bedo ka pennye ni, ‘Wadina ki lurema ma dong guto woko-ni, mono kibicerogi bene?’ Kweyo cwinywa me ngeyo ni Jehovah tye ki miti madwong me cero jo muto. Kong dong wanenu gin ma Baibul waco i kom jo ma kibicerogi ki ka ma gibikwo iye.

‘GIBIWINYO DWANE CI GIBIKATTI WOKO’

16. Jo ma kibicerogi i wi lobo gibibedo ki kit kwo ango?

¹⁶ I kare mukato angec, jo ma kicerogi gudwogo i lobo kany ci guribbe kacel ki jo me odigi ki luremgi. Man bene bitimme i anyim ento bibedo ber makato. Pingo? Pien jo ma gibidwogo i lobo kany gibibedo ki kare me kwo nakanaka labongo to doki. Dok gibikwo i lobo mapat ki man ma wakwo iye i kareni. Lweny, turo cik ki two bibedo pe.

17. Angagi ma kibicerogi?

¹⁷ Angagi ma kibicerogi? Yecu owacci ‘jo ducu ma tye i lyel biwinyo dwane ci gibikatti woko.’ (Jon 5:28, 29) Dok Niyabo 20:13 wacciwa ni: “Nam bene odwoko jo ma yam guto i iye-ni woko cen, To ki Lyel bene gumiyo jo muto ma yam tye botgi.” Ada, dano bilion mapol bikwo doki. Lakwena Paulo bene owacci “jo ma kitgi atir wa ki jo ma kitgi pe atir” gibicer. (Kwan Tic pa Lukwena 24:15.) Man te lokke ngo?

18. Angagi ma gitye i kin “jo ma kitgi atir” ma kibicerogi?

¹⁸ “Jo ma kitgi atir” kwako lutic pa Jehovah ma lugen ma gukwo con ma Yecu peya obino i lobo. Dano calo Nua, Abraim, Cara, Moses, Ruth, ki Esta kibicerogi me kwo i lobo kany. Itwero kwano lok i kom co ki mon magi i buk pa Jo Ibru cura 11. Ento lutic pa Jehovah ma lugen ma gito i karewa-ni kono? Gin bene gitye i kin “jo ma kitgi atir,” pi meno gibicerogi.

19. Angagi ma gubedo “jo ma kitgi pe atir”? Jehovah bimiyo botgi kare me timo gin ango?

¹⁹ “Jo ma kitgi pe atir” kwako dano bilion mapol ata ma pe gunongo kare me ngeyo Jehovah. Kadi bed dong guto woko, Jehovah wiye pe owil i komgi. En bicerogi, dok gibibedo ki kare me pwonyo lok i kome ki tic pire.

20. Pingo pe kibicero dano ducu?

²⁰ Man mono tyen lokke ni dano ducu ma guto wa con gibicerogi? Pe. Yecu owacci jo mukene pe kibicerogi. (Luka 12:5) Anga ma bimoko ka kibicero ngat moni nyo pe? Jehovah aye obedo Langolkop me agikki, ento en bene omiyo twero bot Yecu me “bedo langolkop pa jo makwo ki jo muto.” (Tic pa Lukwena 10:42) Ngat mo keken ma kingolo kop i wiye ni kite rac dok pe ye loko kite pe kibicerone.​—Nen Lok me Giko Buk Man 19.

CER ME CITO I POLO

21, 22. (a) Kit kom ango ma jo ma kibicerogi me kwo i polo bibedo kwede? (b) Anga ma okwongo cer me kwo i polo?

²¹ Baibul bene tittiwa ni jo mukene bikwo i polo. Ka kicero ngat moni me kwo i polo, en pe bicer ki kom pa dano me lobo. Kibicere me kwo i polo kun kimiye kom me cwiny.

²² Yecu obedo dano mukwongo ma kicero i yo man. (Jon 3:13) I yo nge nino adek ma kineke, Jehovah ocere woko. (Jabuli 16:10; Tic pa Lukwena 13:34, 35) Yecu pe kicere ki kom pa dano me lobo-ni. Lakwena Petero otito ni Yecu “yam gineko kome, ento gicere woko i cwiny.” (1 Petero 3:18) Yecu odoko kwo macalo cwec me cwiny matek adada! (1 Jo Korint 15:3-6) Ento Baibul wacci en onongo pe bibedo ngat me agikki ma bicer kit meno.

23, 24. Angagi ma gubedo “romi manok” ma Yecu oloko i komgi-ni, dok welgi bibedo adi?

²³ Ma Yecu peya oto, en owaco bot lukwenane ma lugen ni: “Acito ka yubo ki wun kabedo.” (Jon 14:2) Man te lokke ni lulub kore mukene onongo kibicerogi me kwo i polo kacel kwede. Gin adi? Yecu owacci welgi bibedo manok, nyo “romi manok.” (Luka 12:32) Lakwena Jon omiyo welgi kikome i kare ma en oneno Yecu “ocung i wi got Cion [i polo]; onongo jo alip miya acel ki pyerangwen wiye angwen tye kacel kwede.”​—Niyabo 14:1.

²⁴ Lukricitayo 144,000 magi kibicerogi awene? Baibul wacciwa ni meno onongo bitimme i kare ma nongo Kricito dong ocako loc i polo. (1 Jo Korint 15:23) Dong watye ka kwo i kare meno, dok pol pa jo 144, 000 magi dong kityeko cerogi woko me cito i polo. Jo manok i kingi ma pud gikwo i karewa-ni ka guto kicerogi cutcut ci gicito i polo. Ento, pol pa dano gire kibicerogi i kare me anyim me kwo i Paradic i lobo kany.

25. Ngo ma wabipwonyone i dul ma lubo man?

²⁵ Cokcok-ki, Jehovah bigonyo dano ducu ki i buc me to dok to bibedo pe matwal! (Kwan Icaya 25:8.) Ento ngo ma jo ma gicito i polo gibitimone kunnu? Baibul tito ni gibiloc kacel ki Yecu i Ker me polo. Wabipwonyo lok i kom ker meno i dul ma lubo man.