PWONY ME 18

Mi Ngec Manyen

1 Jo Korint 9:19-23

GIN ME ATIMA: Kony jo ma tye ka winyo pwony-nyi me tam iye pigi kengi, wek gunge ni gupwonyo gin ma twero konyogi.

Tam i kom gin ma jo ma tye ka winyi dong gingeyo. Ma ka nwoyo gin ma dong guwinyo con, konygi me neno gin ma itye ka lok iye-ni i yo manyen.

Pe irii ka lok i kom gin ma dano gingeyo maber, ento ter kare-ni me nyamo tam manyen.
Kwed lok dok ilwodi. Ka ce twere, mi labol i kom pwony ma pigi tego kun itiyo ki lok kom gin ma dano pe gingeyo tutwal nyo jami ma tye ka timme i kareni. Tam matut i kom pwony-nyi ki kit ma kubbe kwede ki labol magi ma imito tic kwedgi-ni.

Ka iwoto ki kwano lok ma ikwedo-ni, tam iye matut kun ipenye kekeni ki lapeny magi ‘man gin ango, pingo kiwaco man, otimme awene, otimme kwene, anga ma otimo, ki dok otimme nining?’ Wek pwony-nyi obed mit kun ipenyo dok igamo lapeny magi.
Nyut pingo pwony meno pire tek. Tit kit ma lok ma pire tek ma i Ginacoya twero konyo kwede dano i kwogi me nino ducu. Nyam lok i kom jami, kit, ki tim mogo ma gudo kwo pa jo ma tye ka winyo lokki.