Kwena ma pire tek loyo ki i Baibul obedo lok me Ker pa Lubanga. Jehovah bitic ki Ker meno me cobo yub ma en onongo tye kwede pi lobo-ni cakke ki i acakki piny. Ker-ri obedo gin ango? Wangeyo nining ni Ker-ri dong tye ka loc i kare-ni? Gin ango ma Ker man dong ocobo? Dok bitimo gin ango i kare me anyim? Pwony man ki pwony aryo ma lubo-ni bigamo lapeny magi.

1. Ker pa Lubanga obedo gin ango, dok anga ma tye Kabakane?

Ker-ri obedo gamente ma Lubanga Jehovah aye oketo. Kabakane, Yecu Kricito, loyo loc ki i polo. (Matayo 4:17; Jon 18:36) Baibul loko kit man i kom Yecu: “En biloc macalo Kabaka . . . matwal.” (Luka 1:32, 33, NWT) Macalo Kabaka me Ker pa Lubanga, Yecu biloyo dano ducu ma i wi lobo.

2. Angagi ma gibiloc kacel ki Yecu?

Yecu pe loyo loc kene. Dano “ma gia i kaka mapol mapatpat, ki i leb ki rok mapatpat ducu  . . gin bene gibiloyo lobo.” (Niyabo 5:9, 10) Dano adi ma gibiloc kacel ki Kricito? Nicakke i kare ma Yecu obino i lobo, Lukricitayo milion mapol gudoko lulub kore. Tika gin ducu gibiloc kacel kwede? Pe. Dano 144,000 keken aye gicito i polo ka loc kacel ki Yecu. (Kwan Niyabo 14:1-4.) Lukricitayo mukene ma i lobo kany gibibedo i te loc me Ker-ri.—Jabuli 37:29.

3. I yo ma nining ma Ker pa Lubanga ber loyo gamente pa dano?

Kadi bed ni luloc me lobo-ni gitemme ki tekogi ducu me timo jami mabeco, ento pe gitye ki teko me timo jami ducu ma gimito. I nge kare mo luloc mukene gileyo kakargi, ma gitwero bedo luworo kun nongo bene pe gimito konyo danogi. Ento pe tye ngat mo keken ma bileyo kaka Yecu, Kabaka me Ker pa Lubanga. Lubanga ‘oketo ker ma rii nakanaka ma pe gitwero balone.’ (Daniel 2:44) Yecu biloyo lobo ducu, dok en pe bitero jo mukene calo giber giloyo luwotgi. En lamar, lakica, dok ngolo kop atir, dok en bipwonyo dano me tero luwotgi i yo acel-lu—ki mar, kica, dok i yo ma atir.—Kwan Icaya 11:9.

4. Ker pa Lubanga biloyo lobo ducu

Yecu Kricito tye ki twero me loc ma loyo laloc mo keken i tekwaro pa dano. Kwan Matayo 28:18, ci wunyam lapeny man:

• Apokapoka ango ma tye i kin twero me loc pa Yecu ki pa luloc ma dano?

Gamente pa dano lokke teretere, dok laloc acel acel loyo but lobo mo matidi. Ker pa Lubanga kono? Kwan Daniel 7:14, ci wunyam lapeny magi:

• Itamo ni adwogi maber ango ma wabinongo pien Ker pa Lubanga obedo gamente ma “pe gitwero balone”?

• Itamo ni wabinongo adwogi maber ango pien Ker pa Lubanga biloyo wi lobo ducu?

5. Gamente pa dano pe twero cobo pekkiwa

Pingo mitte ni Ker pa Lubanga ole kaka gamente pa dano? Tuk VIDIO, ci wunyam lapeny ma lubo.

VIDIO: Ker pa Lubanga Obedo Gin Ango?—Bute Manok (1:41)

• Loc pa dano okelo adwogi marac ango?

Kwan Latitlok 8:9, ci wunyam lapeny magi:

• Tika itamo ni Ker pa Lubanga myero ole kaka gamente pa dano? Pingo?

6. Ker pa Lubanga tye ki luloc ma giniang kit pa dano

Kit macalo Kabakawa Yecu kong okwo macalo dano, en twero “winyo arem kacel kwedwa pi gorowa.” (Jo Ibru 4:15) Co ki mon 144,000 ma lugen ma gibiloc kacel ki Yecu-ni, Jehovah aye oyerogi ki “i kaka mapol mapatpat, ki i leb ki rok mapatpat ducu.”—Niyabo 5:9.

• Tika inongo ni kweyo cwinyi me ngeyo ni Yecu kacel ki luloc luwote giniang kit ma wawinyo kwede kacel ki pekki ma watye kwede? Pingo?

7. Ker pa Lubanga tye ki cik mabeco loyo gamente pa dano

Gamente me lobo-ni giyubo cik ma myero ogwok danogi dok okeligi adwogi maber. Ker pa Lubanga bene tye ki cik ma myero jone gulubi. Kwan 1 Jo Korint 6:9-11, ci wunyam lapeny magi:

• Itamo ni lobo-ni bibedo nining ka dano ducu gitye ka lubo cik pa Lubanga?a

• Itamo ni Jehovah tye ki twero me penyo ni jo ma Ker-ri biloyogi myero gulub cik magi? Pingo?

• Ngo ma nyuto ni jo ma pe gitye ka lubo cik magi gitwero lokke?—Nen tyeng me 11.

WOT WIYE WIYE

Ker pa Lubanga obedo gamente ma tye i polo ma biloyo wi lobo ducu.

Ngo ma ipwonyo?

• Angagi ma gubedo luloc me Ker pa Lubanga?

• I yo ma nining ma Ker pa Lubanga ber loyo gamente pa dano?

• Gin ango ma Jehovah mito ki bot jo ma gibibedo i te loc me Ker-ri?

TIM KWED

Nen kong gin ma Yecu opwonyo madok i kom ka ma Ker man tye iye.

“Tika Ker pa Lubanga Tye i Cwinyi?” (Pwony ma tye i jw.org)

Pingo Lucaden pa Jehovah giyero me bedo lugen bot Ker pa Lubanga me kaka gamente pa dano me lobo-ni?

Gitye Lugen Bot Ker pa Lubanga (1:43)

Nen kong gin ma Baibul tito madok i kom dano 144,000 ma Jehovah oyerogi me loc kacel ki Yecu.

“Angagi ma Gicito i Polo?” (Pwony ma tye i jw.org)

Ngo ma oweko dako mo ma onongo tye i buc omoko ni Lubanga keken aye twero kwanyo tim me ngolo kop alenga woko ki i lobo?

“Kit ma Anongo Kwede Lagam pi Tim me Ngolo Kop Alenga” (Awake!, Novemba 2011)

Ker pa Lubanga ocako loc i polo i mwaka 1914. I mwaka meno aye bene kare me agikki me loc pa dano ocakke iye. Wangeyo man nining? Wabineno gin ma Baibul otito con, ki dok jami ma tye ka timme i wi lobo i kare-ni ki kit pa dano nicakke i mwaka 1914.

1. Gin ango ma lok pa lunebi nyuto?

Ki i buk pa lanebi Daniel, wangeyo ni Ker pa Lubanga onongo bicako loc i agikki me kare ma kilwongo i Baibul ni “mwaka abiro.” (Daniel 4:16, 17) I nge mwaki miya mapol, Yecu olwongo kare meno ni “kare pa Lurok,” dok en opwonyo ni kare meno onongo peya otum. (Luka 21:24) Kit ma wabineno kwede, mwaka abiro meno otum i mwaka 1914.

2. Gin ango ma tye ka timme i wi lobo dok kit pa dano tye nining nicakke i mwaka 1914?

Lupwonnye pa Yecu gupenye ni: “Lok man bitimme awene, dok kit gin ango ma binyuto dwogoni, ki agikki piny?” (Matayo 24:3) Me gamo lapenygi, Yecu otito jami mapol ma onongo bitimme i nge cako locce macalo Kabaka me Ker pa Lubanga. I kin jami magi onongo tye iye lweny, kec, ki oyengyeng. (Kwan Matayo 24:7.) Baibul bene otito ni kit pa dano “i kare me agikki” biweko “piny bibedo marac.” (2 Temceo 3:1-5) Lanyut ma Yecu oloko iye-ni ki kit pa dano dong onen woko ka maleng nicakke i mwaka 1914.

3. Pingo piny oballe adada nicakke i kare ma Ker pa Lubanga ocako loc?

Cutcut ma Yecu odoko Kabaka me Ker pa Lubanga, en ocako lweny i kom Catan ki jogine ki i polo. Kiloyo Catan woko i lweny meno. Baibul waco ni “gibole woko piny i ngom kacel ki lumalaikane.” (Niyabo 12:9, 10, 12) Catan tye ki akemo madwong pien en ngeyo ni kibineke woko ma pe orii. Pi meno, en tye ka kelo can ki arem madwong adada i wi lobo-ni. Meno aye tyen lok mumiyo piny tye marac adada i wi lobo ducu! Ker pa Lubanga bicobo pekki magi ducu.

NONG NGEC MATUT

4. Lok pa lunebi me Baibul nyuto ni Ker-ri ocako loc i mwaka 1914

Ker pa Lubanga Ocako Loc i 1914 (5:​02)

Lubanga oweko Kabaka Nebukadnejar me Babilon oleko lek dok i lek man Lubanga onyutte gin ma bitimme i anyim. Wakwano lok i kom lek meno ki kit ma Daniel ogonyo kwede tere i Baibul. Nen ka maleng ni lek meno onongo bicobbe i kom ker pa Nebukadnejar ki bene i kom Ker pa Lubanga.—Kwan Daniel 4:17.a

Kwan Daniel 4:20-26, ci wuti ki chart ma tye me gamo lapeny magi:

• (A) Gin ango ma Nebukadnejar oneno i wang lekke?—Nen tyeng me 20 ki 21.

• (B) Ngo ma onongo bitimme i kom yat-ti?—Nen tyeng 23.

• (C) Gin ango ma onongo bitimme i nge “mwaka abiro”?—Nen tyeng me 26.

Kit ma Lek Madok i Kom Yat-ti Kubbe ki Ker pa Lubanga

LOK PA LANEBI (Daniel 4:20-36)

Loc

(A) Yat mabor dok madit

Loc ogik

(B) “Tong yat meno” wek obed “nio wang ma mwaka abiro okato”

Kidwoko loc cen

(C) “Ker bibedo meri matwal”

Cobbene mukwongo . . .

• (D) Yat-ti onongo cung pi anga? —Nen tyeng 22.

• (E) Locce ogik nining? —Kwan Daniel 4:29-33.

• (F) Gin ango ma otimme i kom Nebukadnejar i agikki me “mwaka abiro”? —Kwan Daniel 4:34-36.

COBBENE MUKWONGO

Loc

(D) Nebukadnejar, Kabaka me Babilon

Loc ogik

(E) I nge mwaka 606 K.M.P., Nebukadnejar odoko lapoya dok onongo pe twero loc pi mwaki abiro

Kidwoko loc cen

(F) Wi Nebukadnejar ocako tic maber ci en ocako loc odoco

Cobbene me aryo . . .

• (G) Yat-ti onongo cung pi angagi? —Kwan 1 Tekwaro 29:23.

• (H) Locgi ogik nining? Wangeyo nining ni onongo pud pe gitye ka loc i kare ma Yecu tye i lobo? —Kwan Luka 21:24.

• (I) Kidwoko loc man cen awene dok ki kwene?

COBBENE ME ARYO

Loc

(G) Luker me Icrael ma onongo giloyo loc me kaka Lubanga

Loc ogik

(H) Kijwero Jerucalem, ci loc pa luker me Icrael ogik woko pi mwaki 2,520

Kidwoko loc cen

(I) Yecu ocako loc i polo macalo Kabaka me Ker pa Lubanga

5. Lobo olokke woko nicakke i mwaka 1914

Tuk VIDIO.

VIDIO: Lobo Olokke Woko Nicakke i Mwaka 1914 (1:10)

Yecu otito kit ma lobo-ni bibedo kwede ka en ocako loc macalo Kabaka. Kwan Luka 21:9-11, ci wunyam lapeny man:

• Jami mene ki i kin ma kititogi-ni ma dong ineno ki wangi nyo iwinyo pire?

Lakwena Paulo oloko i kom kit pa dano ma i kare me agikki. Kwan 2 Temceo 3:1-5, ci wunyam lapeny man:

• Tika dong ineno dano gitimme kit meno i kare-ni?

6. Nyut ni itye ki niye ni Ker-ri dong tye ka loc

Kwan Matayo 24:3, 14, ci wunyam lapeny magi:

• Tic ma pire tek ango ma kitye ka timone ma nyuto ni Ker pa Lubanga dong tye ka loc?

• Itwero nywako i tic man nining?

Ker pa Lubanga tye ka loc, dok nino ma Ker-ri biloyo kwede lobo dong cok. Kwan Jo Ibru 10:24, 25, ci wunyam lapeny man:

• Gin ango ma omyero wan ducu ki acel acel watim ‘kit macalo waneno nino maca dong tye ka nyiko cok-ki’?

WOT WIYE WIYE

Lok pa lunebi me Baibul ki jami ma tye ka timme i lobo moko ni Ker pa Lubanga dong tye ka loc. Wanyuto ni waye lok man ka watito bot jo mukene dok wabedo tye i cokke kare ducu.

Ngo ma ipwonyo?

• Gin ango mutimme i agikki me mwaka abiro ma kitito pire i buk pa Daniel?

• Ngo ma weko in imoko ni Ker pa Lubanga ocako loc i mwaka 1914?

• Itwero nyuto nining ni itye ki niye ni Ker-ri dong tye ka loc?

TIM KWED

Nen kong gin ma luco lok me tekwaro ki jo mukene giwaco i kom kit ma lobo-ni olokke kwede nicakke i mwaka 1914.

“Kare ma Kit pa Dano Oballe Adada” (Awake!, April 2007)

Nen kong kit ma lok pa lanebi ma nonge i Matayo 24:14 ogudo kwede kwo pa laco mo.

“Onongo Amaro Tuko Baseball Makato Gin mo Keken!” (Wi Lubele Nam. 3 2017)

Wangeyo nining ni lok pa lanebi ma kicoyo i Daniel cura 4 ocobbe i kom Ker pa Lubanga?

“Ker pa Lubanga Ocako Loc Awene? (Bute me 1)” (Wi Lubele, Oktoba 1, 2014)

Ngo ma nyuto ni “mwaka abiro” ma kiloko iye i Daniel cura 4 ogik i mwaka 1914?

“Ker pa Lubanga Ocako Loc Awene? (Bute me 2)” (Wi Lubele, Novemba 1, 2014)

Ker pa Lubanga dong tye ka loc i polo. Macok cok-ki, biloyo lobo dok bitimo alokaloka madongo i lobo. Kong dong wanyamu jami mogo mabeco ma Ker-ri bitimone.

1. Ker pa Lubanga bikelo kuc ki ngolo kop atir i lobo nining?

Yecu, Kabaka me Ker pa Lubanga, bijwero dano ki gamente maraco ducu i lweny me Armagedon. (Niyabo 16:14, 16) I kare meno, cikke me Baibul man bicobbe kakare: “Odong kare manok, ci dano marac dong bibedo pe matwal.” (Jabuli 37:10) Yecu bitic ki Ker-ri me kelo kuc ki ngolo kop atir i kabedo ducu i lobo-ni.—Kwan Icaya 11:4.

2. Kwo bibedo nining ka kitye ka timo miti pa Lubanga i lobo?

I te loc me Ker pa Lubanga, “jo ma kitgi atir gibicamo lobo, dok gibibedo iye matwal.” (Jabuli 37:29) Go kong ni itye ka kwo i lobo ma jo ducu kitgi atir dok dano ducu gimaro Jehovah dok gimaro luwotgi! Pe tye ngat mo ma kome lit, dok jo ducu gikwo pi naka.

3. Ker pa Lubanga bicobo gin ango i nge jwero jo maraco?

I nge jwero jo maraco, Yecu biloc macalo Kabaka pi mwaka 1,000. I kare meno, en kacel ki luloc luwote 144,000 gibikonyo me kwanyo bal woko ki i kom dano ma i lobo. I agikki me mwaka 1,000 meno, lobo ducu bibedo paradic maleng adada dok dano ducu cwinygi bibedo yom pien nongo gitye ka lubo cik pa Jehovah. I nge meno, Yecu bidwoko Ker-ri i cing Wonne, Jehovah. I kare meno, kibiworo nying Jehovah maleng-ngi kato i kare mo keken. (Matayo 6:9, 10) Me o i kare meno nongo dong kimoko ka maleng ni Jehovah obedo Laloc maber ma paro pi jo ma gitye i te locce. Ka dong, Jehovah bijwero Catan, jogine, ki jo ducu ma gibiyero me jemo i kom loc pa Lubanga. (Niyabo 20:7-10) Kwo ma roc mo pe iye ma Ker pa Lubanga bikelo-ni birii pi naka.

NONG NGEC MATUT

4. Ker pa Lubanga bijwero gamente pa dano

“Dano ma tye ki twero loyo jo mukene ki tek.” (Latitlok 8:9) Jehovah bitic ki Kerre me yubo jami ducu ma oballe pi tim me ngolo kop alenga meno.

Kwan Daniel 2:44 ki 2 Jo Tecalonika 1:6-8, ci wunyam lapeny magi:

• Ngo ma Jehovah kacel ki Wode, Yecu gibitimo i kom gamente pa dano ki jo ducu ma cwakogi?

• Gin ma ipwonyo i kom Jehovah ki Yecu cuko cwinyi nining ni jami ma gibitimo bibedo jami ma atir?

5. Yecu obedo Kabaka maber loyo ducu

Macalo Kabaka me Ker pa Lubanga, Yecu bikonyo dano ma i lobo i yo mapol. Tuk VIDIO wek inen kit ma Yecu dong onyuto kwede ni emito konyo dano dok ni Lubanga omine teko me timo meno.

VIDIO: Yecu Onyuto Gin ma Ker-ri Bicobo (1:13)

Jami ma Yecu otimo i kare ma en tye i wi lobo onyuto wiye wiye gin ma Ker-ri bitimo. Mot mene ki i kin ma kiryeyogi piny kany ma itye ka kuro neno cobbene? Kwan ginacoya ma lubo-ni ma gikonyowa me nongo ngec matut i kom mot magi.

6. Ker pa Lubanga bikelo anyim mamwonya adada

VIDIO: Abil me Kwo Mamwonya me Anyim (4:38)

Kwan Jabuli 37:4, ci wunyam lapeny man:

• Iwinyo nining me ngeyo ni Jehovah “bimiyi gin ducu ma cwinyi mito”?

WOT WIYE WIYE

Ker pa Lubanga bicobo gin ma Lubanga mito. Biloko lobo-ni doko paradic ma opong ki dano mabeco ma gibiworo Jehovah nakanaka.

Ngo ma ipwonyo?

• Ker pa Lubanga bilonyo nying Jehovah nining?

• Pingo watwero ye ni Ker pa Lubanga bicobo cikke ducu ma tye i Baibul?

• I kin jami mabeco ducu ma Ker-ri bikelone, mene ma dong itye ka kurone loyo?

TIM KWED

Nen gin ma Armagedon obedo.

“Lweny me Armagedon Obedo Gin Ango?” (Pwony ma tye i jw.org)

Nen jami ma bitimme i kare me “twon can madit atika,” kit ma Yecu otito kwede.—Matayo 24:21.

“Twon Can Madit Atika-ni Obedo Gin Ango?” (Pwony ma tye i jw.org)

Nen kit ma jo me odi gitwero goyo kwede kit ma gibikwo kacel i Paradic.

Go ni Itye i Paradic (1:50)

I pwony ma wiye tye ni “Lapeny Mapol Onongo Nyweno Wiya,” nen kong kit ma laco mo ma onongo lajemo i kom gamente onongo kwede lagam ma en obedo ka yenyo.

“Baibul Loko Kwo pa Dano” (Wi Lubele, Januari 1, 2012)