PWONY ME 28
Nyut Pwoc pi Gin ma Jehovah ki Yecu Gutimo Piri
Iwinyo nining ka laremi mo omini mot mamwonya adada? Nen calo yomo cwinyi matek dok weko ibedo ki miti me nyuto bot laremi ni itye ki pwoc pi mot meno. Jehovah gin ki Yecu guminiwa mic ma pud dong ber loyo ma watwero nongone: meno ginkok. Watwero nyuto nining ni watye ki pwoc pi mic meno?
1. I yo mene ma watwero nyuto ni watye ki pwoc pi gin ma Lubanga ki Yecu gutimo piwa?
I Baibul, wanongo cikke ni “dano ducu ma ye en [Yecu]” twero kwo pi naka. (Jon 3:16) Watwero timo man nining? Mitte ni wanyut niyewa ki i tam ma wamoko kacel ki jami ma watimo. (Yakobo 2:17) Ka wanyuto niyewa i lokwa ki jami ma watimo, wajingo wat i kinwa ki Yecu kacel ki Wonne, Jehovah.—Kwan Jon 14:21.
2. Yub ma pire tek ango ma konyowa me nyuto pwocwa pi gin ma Jehovah ki Yecu gutimo?
I otyeno ma Yecu peya oto, en otito ki lulub kore yo mukene ma gitwero nyuto kwede pwoc pi gityere. En owaccigi ni omyero gucokke kacel pi yub mo ma pire tek ma Baibul lwongo ni “Cam pa Rwotwa,” ma bene walwongo ni Nipo me to pa Kricito. (1 Jo Korint 11:20) Yecu onongo mito ni lukwenane—ki Lukricitayo me ada ducu ma gibikwo lacen—wigi opo ni en emiyo kwone pi wan ducu. Ma lubbe ki kwer man, Yecu ociko ni: “Wutim kuman me po pira.” (Luka 22:19) Ka ibedo tye i kwer me Nipo, inyuto ni itye ki pwoc pi mar madit ma Jehovah ki Yecu gitye kwede piwa.
NONG NGEC MATUT
Pwony yo mukene ma itwero nyuto kwede pwoc pi mar madit ma Jehovah ki Yecu gunyuto. Nen pingo Nipo me to pa Kricito pire tek adada.
3. Gin ango ma watwero timo me nyuto ni watye ki pwoc?
Go kong ni ipoto i dye nam kun pe ingeyo kwang. Ci ngat mo obino olari. Tika wi biwil woko i kom gin ma ngat meno otimo piri? Nyo mono ibiyenyo yo mo me nyuto ni itye ki pwoc pi gin ma en otimo piri?
Watye ki kare me nongo kwo ma pe tum pi kica pa Jehovah. Kwan 1 Jon 4:8-10, ci wunyam lapeny magi:
Pingo gityer pa Yecu obedo mic ma pire tek adada?
Iwinyo nining pi gin ma Jehovah ki Yecu gutimo piri?
Watwero nyuto nining ni watye ki pwoc pi gin ma Jehovah ki Yecu gutimo piwa? Kwan 2 Jo Korint 5:15 ki 1 Jon 4:11; 5:3. I nge kwano ginacoya acel acel, wunyam lapeny man:
Ma lubbe ki ginacoya man, ngo ma waromo timo me nyuto pwocwa?
4. Lub lanen pa Yecu
Yo mukene ma watwero nyuto kwede pwocwa aye ki lubo lanen pa Yecu. Kwan 1 Petero 2:21, ci wunyam lapeny man:
I yo mapatpat ango ma itwero lubo kor Yecu macok?
Yecu onongo maro Lok pa Lubanga, otito kwena maber-ri, dok okonyo jo mukene
5. Bed tye i kwer me Nipo me to pa Kricito
Me neno gin mutimme i kare me kwero Cam me Otyeno pa Rwotwa pi tyen mukwongo, kwan Luka 22:14, 19, 20. I nge meno, wunyam lapeny magi:
Ngo mutimme i kare me kwero Cam me Otyeno pa Rwotwa?
Mugati ki kongo vino cung pi gin ango?—Nen tyeng me 19 ki 20.
Yecu onongo mito ni lulub kore gukwer Cam me Otyeno pa Rwotwa kicel mwaka ki mwaka i nino dwe ma en oto iye. Pi meno, Lucaden pa Jehovah gicokke kicel mwaka ki mwaka me po pi to pa Kricito i yo ma en ociko. Me pwonyo lok mukene madok i kom cokke man ma pire tek-ki, tuk VIDIO. I nge meno wunyam lapeny ma lubo-ni.
Ngo ma timme i kwer me Nipo?
Mugati ki kongo vino cung pi gin mo. Mugati cung pi kom Yecu ma roc mo pe iye ma en omiyo macalo gityer piwa. Kongo vino cung pi remone
JO MOGO GIWACO NI: “Gin ma omyero itim me nongo larre aye me ye Yecu keken.”
Itwero tic ki Jon 3:16 ki Yakobo 2:17 nining me nyuto ni meno keken pe romo?
WOT WIYE WIYE
Wanyuto pwoc pi gin ma Yecu otimo ka wanyuto niye i kome dok wabedo tye i Nipo me tone.
Ngo ma ipwonyo?
Tyen lokke ngo me bedo ki niye i kom Yecu?
In imito nyuto pwocci pi gin ma Jehovah ki Yecu gutimo piri nining?
Pingo pire tek tutwal me bedo tye i kwer me Nipo me to pa Kricito?
TIM KWED
To pa Kricito tugo cwinywa me timo gin ango?
Nong ngec matut madok i kom niye ki kit ma watwero nyutone kwede.
“Ket Niyeni i Kom Cikke pa Jehovah” (Wi Lubele, Oktoba 2016)
I pwony ma wiye tye ni “Awinyo ni Atye ma Koma Leng dok Atye Kwo,” nen kit ma kwo pa dako mo olokke kwede i kare ma en oniang tyen lok me gityer pa Kricito bote.
Nen kong tyen lok mumiyo jo manok keken aye gicamo mugati dok gimato vino i Nipo.