PWONY ME 29

Ngo ma Timme i Komwa ka Wato?

Kit ma Nen Kwede i Buk Kikome

In tika dong irwenyo danoni me amara mo i to? I kare meno me arem cwiny-nyi, iromo pennye kekeni ni: ‘Ngo ma timme i komwa ka wato? Tika gen mo tye ni wabineno jowa me amara ma guto doki?’ I pwony man ki ma lubo, wabineno lagam ma Baibul miyo ma kweyo cwinywa adada.

1. Ngo ma timme i komwa ka wato?

Yecu oporo to ki nino matut adada. Pingo? Ngat ma onino matut, pe ngeyo gin ma tye ka timme i ka ngete. I yo acel-lu, ngat ma oto nongo pe ngeyo gin mo keken ma tye ka timme. En pe winyo arem dok pe deno can. Baibul waco ni: “Jo ma dong guto woko pe gingeyo gin mo.”—Kwan Latitlok 9:5.

2. Ngeyo lok ada madok i kom to konyowa nining?

Jo mapol gilworo to—gilworo kadiwa jo muto bene! Ento iromo nongo kwe cwiny ki i gin ma Baibul pwonyo madok i kom to. Yecu owaco ni: “Lok me ada bigonyowu.” (Jon 8:32) Dini mogo gipwonyo ni i kare me to, tye gin mo ma a ki i kom dano ci medde ki kwo, ento man pe obedo gin ma Baibul pwonyo. Pi meno, pe tye ngat mo ma deno can i nge to. Dok kit macalo jo muto pe gingeyo gin mo keken, pe gitwero wanowa. Dong pe mitte ni wawor jo muto nyo watim jami mogo wek kiniga pe omakgi i komwa, dok pe mitte ni waleg pigi.

Jo mogo giwaco ni gitwero kubbe ki jo muto. Ento man pe twere. Kit ma pud wapwonyo apwonya malo-ni, jo muto “pe gingeyo gin mo.” Jo ma gitamo ni gitye ka kubbe ki danogi me amara ma guto twero bedo ni gitye ka kubbe ki jogi, ma giporo bedo jo ma guto. Pi meno, ngeyo lok ada madok i kom jo muto gwokowa ki i kom jogi. Jehovah ocikowa ni pe watemme me kubbe ki jo muto pien en ngeyo ni ka wakubbe ki jogi, gibiwanowa marac.—Kwan Nwoyo Cik 18:10-12.

NONG NGEC MATUT

Nong ngec matut i kom gin ma Baibul pwonyo madok i kom to, dok ijing niyeni i kom Lubanga ma lamar ma pe uno jo ma guto.

Laco mo kacel ki lutinone aryo matino gubedo i wi kom kun gikuro winyo pwony ma kibimiyo pi to pa dakone ki megi lutinone. Luremgi ki wadigi gugure ka kweyo cwinygi ki konyogi.

3. Pwony kit ma jo muto gitye kwede kikome

I twok lobo-ni ducu, dano gitye ki niye mapatpat madok i kom gin ma timme ka wato. Ngene kene ni, niye magi ducu pe gitwero bedo ada.

Pol pa dano me kabedowu gitye ki niye ango madok i kom kit ma jo muto gitye kwede?

Me neno gin ma Baibul pwonyo, tuk VIDIO.

VIDIO: Jo Muto Mono Gitye Nining?—Bute Manok (1:19)

Cal ma kiribogi kacel: Cal ma kikwanyo ki i vidio me ‘Jo Muto Mono Gitye Nining?—Bute Manok.’ 1. Kom lato ma tye i wi kitanda i ot yat. 2. Laco mo onino woko ma obedo i kin jo aryo i kare ma gitye ka wot ki gar.

Kwan Latitlok 3:19, 20, ci wunyam lapeny magi:

Ma lubbe ki tyeng magi, ngo ma timme ka ngat moni oto?
Tika tye gin mo ki i kom dano ma bwot ka en oto ci medde ki kwo?

Baibul tittiwa lok madok i kom to pa Lajaro, larem Yecu macok. Ka itye ka kwano Jon 11:11-14, nen gin ma Yecu owaco i kom kit ma Lajaro onongo tye kwede i kare ma oto. I nge meno wunyam lapeny magi:

Yecu oporo to ki ngo?
Lapor ma Yecu otiyo kwede-ni pwonyowa gin ango madok i kom kit ma jo muto gitye kwede?
Itamo ni gin ma Baibul waco i kom to tye kakare?

4. Ngeyo lok ada madok i kom to keliwa adwogi maber

Ngeyo lok ada madok i kom to gonyowa ki i lworo jo muto. Kwan Latitlok 9:10, ci wunyam lapeny man:

Jo muto tika gitwero wanowa?

Ka waye lok ada ma tye i Baibul, pe wabiye lok goba ma waco ni omyero watim gin mo me yomo cwiny jo muto nyo waworgi. Kwan Icaya 8:19, 20 ki Niyabo 4:11, ci wunyam lapeny man:

Itamo ni Jehovah winyo nining i kom ngat ma woro nyo yenyo kony ki bot ngat muto?

Cal ma kiribogi kacel: Kwer mogo ma kubbe ki woro kwariwa ma guto. 1. Laco ma ogungo piny dok tye ka lega i nyim lyel ma kicweyo maber kun bene otyero cam i nyime. 2. Co adek ma gitye ka myel kun guruko ruk me tekwarogi. 3.Gurup pa dano ma gitye ka dorre kun guruko camongenye dok gutingo cal okoto wic madongo i Nino pa Jo Muto. — Ngeyo lok ada madok i kom to gonyowa ki i kwero kwer mogo ma pe yomo cwiny Jehovah

5. Ngeyo lok ada madok i kom to kweyo cwinywa

Jo mapol dong kipwonyogi ni ka guto, gibinongo pwod pi jami maraco ma gutimo i kwogi. Ento kweyo cwinywa me ngeyo ni pe tye ngat mo ma deno can i nge to—kadi wa ngat ma otimo bal madongo adada. Kwan Jo Roma 6:7, ci wunyam lapeny man:

Baibul waco ni ka dano oto, Lubanga pe dong neno en macalo labalo. Dong, itamo ni ngat mo keken ma oto tye ka deno can pi bal ma en otimo i kare mukato angec?

Ka wamedde ki ngeyo Jehovah maber, ci wabiniang maber ni jo muto pe gideno can. Tam man ni kiuno jo muto obedo gin ma wango iye matek. Kwan Nwoyo Cik 32:4 ki 1 Jon 4:8, ci wunyam lapeny magi: