PWONY ME 22
Itwero Nywako i Tic me Tito Kwena Maber-ri Nining?
Ka iwoto ki pwonyo lok ada ma tye i Baibul, iromo tamo ni, ‘Dano ducu myero gunge lok man!’ Tye kit meno, dano ducu myero gunge! Kadi bed kit meno, lworo twero maki me tito pi jami ma ipwonyo bot jo mukene. Kong dong wanyam gin ma twero konyi me loyo lworo meno wek icak nywako i tic me tito kwena maber-ri ki yomcwiny.
1. Itwero nywako jami ma ipwonyo ki jo ma ingeyogi nining?
Lupwonnye pa Yecu guwaco ni: “Pe watwero weko tito pi gin ma yam waneno ki ma wawinyo.” (Tic pa Lukwena 4:20) Onongo gimaro jami ma gupwonyo ki bot Yecu adada ma oweko onongo gimito tito pire bot dano ducu. In bene tika iwinyo kit meno? Ka tye kit meno, ci ti ki kare mo keken ma ononge me lok i yo me woro ki jo me gangwu nyo luremi i kom jami ma ipwonyo.—Kwan Jo Kolocai 4:6.
Yo mapatpat me cako lok
Ka itye ka lok ki watti mo, cak lok i kom pwony mo ma i Baibul ki wacce ni: “Apwonyo gin mo mamwonya adada i cabit-ti.”
Nywak wang ginacoya mo ki laremi ma kome lit nyo tye ki par.
Tit ki lutic luwoti jami ma ipwonyo i kwanni me Baibul nyo i cokke ka gupenyi kit ma itye kwede.
Nyut ki luremi kabedowa me Intanet me jw.org.
Lwong jo mukene wek gubin gubed kacel kwedi i cawa me kwanni me Baibul, nyo itwero nyutigi kit ma gitweropenyo pi yub me kwano Baibul ki i jw.org.
2. Pingo tito kwena kacel ki kacokke obedo yub maber ma itwero ketone?
Lupwonnye pa Yecu pe gutito kwena maber-ri bot jo ma gingeyo keken. Yecu “oorogi ki aryo aryo . . . me cito i gangi ducu” ka tito kwena maber-ri. (Luka 10:1) Tito kwena i yo ma guyubbe meno omiyo kare ki dano mapol adada me winyo kwena maber. Tito kwena maber-ri kacel okelo yomcwiny madwong bot lupwonnye. (Luka 10:17) Tika itwero keto macalo yubbi me tito kwena kacel ki jo me kacokke?
NONG NGEC MATUT
Pwony jami ma twero konyi me lweny ki lworo wek inong yomcwiny ma bino pi nywako i tic me tito kwena maber-ri.
3. Jehovah bikonyi
Jo mogo ma gimito tito kwena maber-ri lworo makogi ka gutamo kit ma dano binenogi kwede nyo kit ma jo mukene bidok kwede iye.
In tika ilworo nywako jami ma ipwonyo ki jo mukene? Pingo lworo maki, nyo pe maki?
Tuk VIDIO, ci wunyam lapeny ma lubo.
Lucaden magi ma gitino guloyo lworo ma onongo gitye kwede nining?
Kwan Icaya 41:10, ci wunyam lapeny man:
Ka lworo tye ka maki me tito kwena, pingo omyero ilegi?
Tika onongo ingeyo?
Lucaden pa Jehovah mapol i acakkine onongo gitamo ni pe gibitwero nywako i tic me tito kwena maber-ri ki jo mukene. Me labolle laco mo ma nyinge Sergey, onongo lalewic dok lworo lok ki jo mukene. Ento lacen en okwano Baibul ki Lucaden pa Jehovah. En owaco ni: “Kadi bed onongo atye ki lworo, acako lok ki jo mukene i kom jami ma atye ka pwonyone. Abedo ki ur madit adada ni tito lok me Baibul ki jo mukene okonya me loyo lewic ki lworo. Dok bene ojingo niyena i kom jami ma onongo atye ka pwonyone.”
4. Nyut woro bot jo mukene
Ka itye ka nywako kwena maber-ri ki jo mukene, tam i kom gin ma imito lok iye ki bene kit ma omyero i lok kwede i yo ma nyuto woro. Kwan 2 Temceo 2:24 ki 1 Petero 3:15, ci wunyam lapeny magi:
Itwero keto i tic pwony ma tye i wang ginacoya magi nining ka itye ka nywako lok me Baibul ki jo mukene?
Wadini nyo luremi mogo gitwero kwero lokki woko. Itwero timo gin ango? Gin ango ma myero pe itim?
Pingo ber loyo me lok kwedgi ki woro me ka diyogi me ye i kom gin ma ipwonyo?
5. Nywako i tic me tito kwena maber-ri kelo yomcwiny
Jehovah omiyo ki Yecu tic me tito kwena maber. Yecu onongo neno tic man nining? Kwan Jon 4:34, ci wunyam lapeny magi:
Camo cam mabeco gwoko kwowa dok keliwa yomcwiny. Pingo Yecu oporo timo miti pa Lubanga—ma i kine tye iye tito kwena maber-ri—ki camo dek?
Yomcwiny ango ma itamo ni itwero nongone macalo adwogi me nywako i tic me tito kwena maber-ri?
Jami me atima
I cawa me cokke me dye cabit, nen kit ma itwero pwonyo diro me cako lok.
Lok ki lapwonyi me Baibul pi kit ma itwero doko kwede latin kwan i cukul ma bedo i cokke me dye cabit. Pwony ma kimiyo ki lutino kwan i cukul man twero konyi me yubbe me tito ki jo mukene jami ma itye ka pwonyone.
Ti ki bute me “Jo Mogo Giwaco Ni” nyo “Ngat Mo Romo Penyi Ni” ma tye i buk man me yubbe me gamo lapeny ma dano maro penyo nyo lok ma gimaro waco me ngolo lokwa.
NGAT MO ROMO PENYI NI: “Ngo manyen?”
Itwero tic ki kare man nining me tito ki ngat meno jami ma ipwonyo ki i kwanni me Baibul?
WOT WIYE WIYE
Nywako kwena maber-ri ki jo mukene kelo yomcwiny, dok cako tito kwena yot adada.
Ngo ma ipwonyo?
Pingo mitte ni inywak kwena maber-ri ki jo mukene?
Itwero timo man i yo me woro nining?
Itwero loyo lworo mo keken ma itye kwede me tito kwena nining?
TIM KWED
Nen kong yo angwen mayot ma itwero tito kwede kwena kun itiyo ki kadwa me jw.org.
Pwony kit angwen mapatpat ma itwero dongone ma gitwero konyi me tito kwena maber-ri.
“Tika Itye Atera me Doko Lamak Dano?” (Wi Lubele, Sektemba 2020)
Nen kit ma labol me Baibul twero mini tekcwiny me tito kwena maber-ri kadi bed in latin.
Pwony kit ma itwero lok ki wadini ma peya gupwonyo lok i kom Jehovah.
“Kit me Gudo Cwiny Wadiwa ma Pe Gingeyo Jehovah” (Wi Lubele, Marci 15, 2014)