Bed Lagen i Jami Ducu

Jo ducu gimito lurem ma gigenne. Jehovah mito ni lureme bene gubed jo ma genne. Ento man pe yot i lobo ma opong ki jo ma pe gigenne. Adwogi maber ango ma wanongo ka wabedo jo ma genne i jami ducu?

1. Tyen lok ango ma pire tek loyo ma oweko omyero wabed lugen?

Ka wabedo lugen bot jo mukene, wanyuto ki Jehovah ni wamare dok wawore. Tam kong: Jehovah ngeyo jami ducu ma watamo dok watimo. (Jo Ibru 4:13) En neno ka wayero me bedo jo ma genne dok man yomo cwinye. Lokke tittiwa ni: ‘Jehovah dag jo ma gitimo gin marac akaka, ento en bedo larem jo ma kitgi atir.’—Carolok 3:32.

2. I yo mapatpat ango ma watwero nyuto ni wabedo jo ma genne?

Jehovah mito ni ‘ngat acel acel olok lok ada bot lawote.’ (Jekaria 8:16, 17) Man tyen lokke ngo? Ka watye ka lok ki jo me gangiwa, lutic luwotwa, omege ki lumege, nyo lutela pa gamente, pe wawaco lok goba nyo waminigi ngec ma pe tye atir. Jo ma genne pe giburo nyo gikwalo jo mukene. (Kwan Lulevi 19:11 ki Jo Epeco 4:28.) Giculo mucoro ducu ma mitte ni gucul. (Jo Roma 13:5-7) I yo magi ki mukene mapatpat, wanyuto ni wan “jo ma genne.”—Tito 2:10.

3. Adwogi mabeco ango ma wanongo ka wabedo jo ma genne?

Ka wangene macalo jo ma genne, ci jo mukene gibimarowa. Wakonyo jo ducu me kacokke me bedo agonya calo jo me ot ma gimare. Wanongo yomcwiny me bedo ma cwinywa pe pidowa. Bedo jo ma genne bene twero weko ‘pwony pa Lubanga Lalarwa nen mamwonya,’ dok man weko jo mukene gibedo ki miti me ngeyo Jehovah.—Tito 2:10.

NONG NGEC MATUT

4. Bedo lagen yomo cwiny Jehovah

Kwan Jabuli 44:21 ki Malaki 3:16, ci wunyam lapeny magi:

• Pingo itamo ni pe nyuto ryeko me tam ni watwero kano gin mo ki i wang Jehovah?

• Itamo ni Jehovah winyo nining ka wayero me loko lok ada, kadi bed timo meno tek?

5. Bed lagen kare ducu

VIDIO: Ngo ma Keliwa Yomcwiny?—Cwiny ma Pe Pidowa (2:32)

Kwan Tito 2:10, ci wunyam kit ma watwero bedo jo ma genne . . .

• bot jo me gangiwa.

• i gang tic nyo i cukul.

• i kabedo mukene i kwowa.

6. Bedo lagen keliwa adwogi maber

I acakkine, bedo ngat ma genne twero nen calo gin ma keliwa pekki mogo. Ento i nge kare mo, waniang ni man aye obedo gin maber loyo me atima. Kwan Jabuli 34:12-16, ci wunyam lapeny man:

• Bedo ngat ma genne weko kwoni bedo maber nining?

1. Jo ma gunyomme ma gitye lugen gijingo nyomgi

2. Lutic ma lugen giyomo cwiny ludito ticgi

3. Lutic pa gamente gimaro jo ma lugen

WOT WIYE WIYE

Jehovah mito ni lureme gubed jo ma genne i jami ducu ma giwaco dok gitimo.

Ngo ma ipwonyo?

• I yo mapatpat ango ma watwero nyuto kwede ni wabedo lugen?

• Pingo itamo ni pe tye me ryeko me tamo ni watwero kano ada?

• Pingo imito bedo ngat ma genne kare ducu?

TIM KWED

Lunyodo gitwero pwonyo lutinogi nining me bedo jo ma genne?

Lok Lok Ada (1:44)

Pingo ber me cobo gin ma wacikke me timone?

Gwok Cikkeni, Nong Mot (9:09)

Nen kong ka omyero wacul mucoro kadi bed kitiyo kwede i yo marac.

“Tika Omyero Icul Mucoro?” (Wi Lubele, Sektemba 1, 2011)

Gin ango ma otugo cwiny laco mo ma lakwo me loko kwone ci ocako tiyo tic maber?

“Apwonyo ni Jehovah Timo Kica” (Wi Lubele, Mai 1, 2015)