Kit me Pwonyo Lutino Lok i Kom Lubanga yo Mene ma Tiyo Maber?

“Lok magi ducu ma acikowu kwede tin-ni wubiketo i cwinywu; dok wubipwonyo litinowu kwedgi matek. Wulok lok i komgi ma wubedo i odiwu, ki ka wutye ka wot i yo, ka wubuto piny ki ka wua malo.”​—NWOYO CIK 6:6, 7.

IKINE mukene lunyodo ginongo ni tic me pwonyo lutino bwoyogi woko. Ento ka giyenyo tam, wigi romo nywene woko pi tam mapat pat ma kiminigi nyo gikwano. Wadi kacel ki lurem pol kare girune oyotoyot me miyo tam. Dok bene bukke, magajin, ki dong Intanet gibedo ka miyo tam ma kare mogo pe rwatte ki pa lanyodo .

Kitungcel, Baibul pe miyo keken bot lunyodo tira i kom gin ma myero gupwony ki lutinogi ento bene miyo tira ma konyo i kit ma myero gupwonygi. Kit ma wang Baibul ma kiketo malo-ni nyuto kwede, lunyodo myero guyeny yo mo nino ducu me tito bot lutinogi lok i kom Lubanga. Piny kany kinyamo tam ma gijenge i Baibul ma okonyo lunyodo alip mapol me pwonyo lutinogi lok i kom Lubanga.

1. Nong pwony ki i ginacweya. Lakwena Paulo ocoyo ni: “Kit pa Lubanga ma onongo pe nen dong onen, kun gingeye i jami ducu ma en otiyo, en aye tekone ma pe gik, ki dit ma en Lubanga tye kwede.” (Jo Roma 1:20) Lunyodo giromo tic matek me konyo lutinogi wek guniang ni gitwero bedo ki wat i kingi ki Jehovah, ka ce giloko i kom cwec pa Lubanga kun gikonyo lutinogi me niang kit mene pa Lubanga ma cwec magi ginyuto.

Yecu otiyo ki yo man me pwonyo lupwonnyene. Me lapore, en owaco ni: “Kong wunen winyo me polo; pe gicoyo kodi dok bene pe gikayo, pe bene gidilo cam i dero, ento Wonwu ma tye i polo pud pitogi. Wun pe piwu tek kato pigi woko?” (Matayo 6:26) Kany, Yecu oloko i kom mar kacel ki kica ma gubedo kit pa Jehovah. Ento, en otimo gin mukene. En okonyo lupwonnyene me niang kit ma Lubanga nyuto kwede kit magi bot lutino.

Kabaka Solomon, dano maryek-ki, oloko i kom ryeko ma Lubanga omiyo bot nginingini kun tiyo ki cwec magi matino tino-ni me miyo pwony mo ma pire tek adada. En ocoyo ni: “In lawackom, nen kit ma nginingini tiyo kwede; mito kong ibed ki ryeko me neno kite. Pe gitye ki rwot mo, kadi ladit nyo laloc mo; giyubo cam me akana i kare me oro, dok gicoko wit cam mapatpat i kare me kac.” (Carolok 6:6-8) Man pud dong yo maber adada me pwonyo kit ma pire tek kwede me keto yub ma konyo kun watiyo ki kero ma Lubanga ominiwa me cobogi!

Lunyodo gitwero lubo yo maber me pwony pa Yecu ki Solomon-ni ka ce gitimo jami magi: (1) Gipenyo lutinogi i kom ginapita ki lee ma yomo cwinygi. (2) Gipwonyo jami mapol i kom ginapita ki lee. (3) Ginongo pwony i kom Lubanga ki i cwec magi.

2. Lub cwiny ma Yecu obedo kwede i kom jo ma en opwonyogi. I kin jo ducu ma gukwo, Yecu onongo tye ki lok ma pire tek ma myero owacci. En ocwalo cawa malac i penyo peny. Mitine onongo tye i kom tam ki par ma tye i cwiny jo ma en pwonyogi. (Matayo 17:24, 25; Marako 8:27-29) I yo acel-lu, lunyodo gitye ki jami mapol ma pigi tego ma myero gupwony ki lutinogi. Wek gupwony maber, mitte ni lunyodo gulub lanen pa Yecu dok gucuk cwiny lutinogi me tito lok ma i cwinygi labongo dic.

Ento ka lutino pe giniang oyot pwony mogo ma pigi tego kono? Tam kong kit ma Yecu opwonyo kwede lukwenane. I kine mukene onongo gibedo ki pyem magwar i kingi dok giniang mot adada adwogi maber ma bino pi bedo ki mwolo. Yecu odiyo cwinye dok obedo ka lok teretere ni myero gubed mwol. (Marako 9:33, 34; Luka 9:46-48; 22:24, 25) Lunyodo ma gilubo lanen pa Yecu gidiyo cwinygi ka gitiro lutinogi, dok ka mitte, ginwoyo pwony moni-ni wang ma latin oniang kit ma pire tek kwede.a

3. Pwonygi ki lanen ma megi. Lunyodo myero guwiny tira ma lakwena Paulo omiyo bot Lukricitayo ma i Roma. En ocoyo botgi ni: “Dong in lapwony ma ipwonyo jo mukene, pe ipwonnye kekeni bo? Itito lok ni, ‘Pe ikwal’, in kono ikwalo kwo?”​—Jo Roma 2:21.

Tira meno konyo pien jami ma lunyodo timo gudo cwiny lutino kato gin ma lunyodo giwaco. Ki lok ada, lunyodo ma gilubo gin ma gipwonyo, lutinogi bene romo winyo gin ma gipwonyo.

4. Cak ma nongo latin pud tidi. Temceo, ma owoto kacel ki lakwena Paulo i tic me pwony calo lamiconari-ni, onongo tye lanen maber i kacokke. (Tic pa Lukwena 16:1, 2) Tyen lok me acel aye ni cakke wa i ka ‘tinone’ kipwonye ki “coc maleng.” Dada kacel ki mama pa Temceo, pe gukwano keken Ginacoya bote ento gukonye me niang ada ma tye i coc magi.​—2 Temceo 1:5; 3:14, 15.

Ka ma Iromo Nongo iye Kony

Lucaden pa Jehovah gigoyo bukke mapol ma kicoyogi tutwalle me konyo lunyodo wek gupwony lutinogi lok ada i kom Lubanga. Mukene kicoyogi me konyo lutino. Mogo konyo lunyodo kacel ki lutinogi me mwaka apar ki wiye wek gubed agonya me lok i kingi.b

Ma peya lunyodo gucako pwonyo lutinogi lok i kom Lubanga, mitte ni myero kong gunge lagam pi lapeny mogo matego ma lutino romo penyogi kwede. Me lapore, ibigamo lapeny ma kiryeyogi piny kanyi nining: Pingo Lubanga weko dano deno can? Lubanga tye ki yub ango pi lobo? Jo ma guto mono gitye kwene? Lucaden pa Jehovah gibibedo ki yomcwiny me konyi ngeyo lagam pi lapeny magi ki mukene wek in kacel ki jo me odi wunyike cok bot Lubanga.​—Yakobo 4:8.

[Lok ma tye piny]