Lok Ada I Kom Armagedon
“Cen pa jok . . . giwoto bot luker me wi lobo ducu ka . . . , gucoko luker kacel i kabedo ma gilwongo i leb Ibru ni Armagedon.”(Coc ma obuto abuta-ni megwa.)—NIYABO 16:14, 16.
IKINE mukene ka kiwaco ni Armagedon, nongo kitye ka lok i kom nying kabedo moni. Ento, kabedo ma kit meno nen calo onongo peke i lobo kany.
Ci dong, mono nyig lok man ni “Armagedon[-ni]” gonye ningo? Dok pingo pol kare kiloko iye ma kubbe ki gin mo mutimme calo lwenygi-ni?
Gucokke i Kabedo ma Kilwongo ni Armagedon
I leb Ibru, nyig lok man ni Armagedon-ni te lokke gonye ni “Got me Megido.” Kadi bed ni got-ti onongo pe ka mo keken, ento kabedo ma kilwongo ni Megido gire tye. Onongo tye ka mo ma pire tek adada, ka ma yo aryo gurwatte iye i kupoto ceng me lobo Icrael macon. Lweny mapol matego kilwenyo cok ki got man. Pi meno, nying me Megido-ni kicako kubone ki lweny.a
Kitungcel, Megido pire tek pe pi lweny mutimme iye, ento pi gin mumiyo kilwenyo kunnu. Megido onongo tye but Lobo ma Kiciko Pire me amiya bot jo Icrael. (Nia 33:1; Yocwa 12:7, 21) Lubanga ocikke ni ebigwoko jone ka lukworgi gubino ka lweny i komgi. (Nwoyo Cik 6:18, 19) Me laporre, Jehovah olwenyo pi Luicrael i Megido i yo me tango i kom mony pa Kabaka Jabin kacel ki ladit wi monnye Cicera.—Lungolkop 4:14-16.
Pi meno, nyig lok man ni “Armagedon[-ni]” tye ki tyen lok ma pire tek ada. Man kubbe ki lweny, ka ma oluma nyo oteka aryo gimake iye wang ki wang.
Buk me Niyabo niangowa ni i kare mo i anyim, Catan kacel ki jogine gibitugo cwiny gamente pa dano me coko monygi, pi meno gibikelo bura i kom lutic pa Lubanga. Dano milion mapol ata gibito pien Lubanga biloyo gamente pa dano ki monygi ducu i lweny man.—Niyabo 19:11-18.
Ento, pingo Lubanga dok neko dano milion mapol ata kun Baibul wacci en obedo ‘lakica, kiniga pe make oyot, mar mere dwong ma pe lokke’? (Nekemia 9:17) Me niang gin ma Lubanga bitimone, omyero wagam lapeny adek mucwiny: (1) Anga ma bicako lweny me Armagedon? (2) Pingo Lubanga bidonyo i lweny man? (3) Lweny me Armagedon-ni mono bikelo adwogi ango i lobo kacel ki dano ma gibedo iye?
1. ANGA MA BICAKO LWENY ME ARMAGEDON?
Lweny me Armagedon pe obedo tim gero ma bia ki bot Lubanga. Ma ka meno, Lubanga bilaro jo mabeco ki i cing jo ma gimito tyekogi. Jo ma gibicako lweny-nyi aye “luker me wi lobo ducu,” ma gin aye luloc me lobo-ni. Pingo gibicako lweny man? Pien gitye rwot ineka pa Catan, en bituko ki wi gamente kacel ki dulle ma giyubo jami lweny wek gutug lweny i kom jo ducu ma giworo Lubanga Jehovah.—Niyabo 16:13, 14; 19:17, 18.
Kit macalo i lobbe mogo i kare-ni dano gitye agonya me lok ki dong woro Lubanga-ni, tam moni ni gamente biketo kigeng nyo bijwayo dini mo keken-ni, nen calo gin ma pe bitimme. Ento, lweny ma kit meno otimme i cencwari me 20 dok bene pud tye ka timme.b Kadi bed kumeno, apokapoka aryo madit tye i kin lweny ma gukato angec ki dong man ma kubbe ki Armagedon-ni. Me acel, lweny me Armagedon bikwako wi lobo lung wa kabedo matitino ducu. Me aryone, kit ma Lubanga Jehovah bilweny kwede pi jone bibedo gwa aboka lam, loyo me kare mukato angec ducu. (Jeremia 25:32, 33) Baibul lwongo lweny me Armagedon-ni ni ‘lweny madit pa Lubanga Won Twer Ducu.’
2. PINGO LUBANGA BIDONYO I LWENY MAN?
Jehovah ociko jo ma wore ni gubed ki kuc dok gumar lumonegi. (Mika 4:1-3; Matayo 5:43, 44; 26:52) Pi meno, gin pe gibitingo jami lweny me lweny pigi ka lumonegi omonyogi. Ka Lubanga pe otim gin mo me laro jone, ci kityekogi woko. Pi meno, nying Lubanga Jehovah bibale matek adada. Ka ni lumone pa jo pa Lubanga gunongo kare me tyekogi woko, ci man biweko Jehovah nen calo ngat ma pe lamar, ngolo kop alenga, dok bene goro. Eni gin mo ma pe romo timme wacel!—Jabuli 37:28, 29.
Lubanga pe mito neko ngat mo, pi meno pol kare en poyo wi dano i kom gin ma ebitimone i anyim. (2 Petero 3:9) En poyo wi dano ducu kit ma edok kwede yam con i kare ma gilwenyo i kom jone kun tiyo ki rekod ma kicoyo tye i Baibul. (2 Luker 19:35) Baibul bene poyo wiwa ni i anyim, ka Catan kacel ki rwot inekane gibilweny i kom jo pa Lubanga, ci Jehovah bidwoko mac magwar i komgi. Ki lok ada, Lok pa Lubanga owaco wacon ni Jehovah bityeko lutim maraco ducu. (Carolok 2:21, 22; 2 Tecalonika 1:6-9) I kare meno, Catan ki jone gibiniang maber adada labongo akalakala ni gitugo lweny i kom Lubanga Won Twer Ducu.—Ejekiel 38:21-23.
3. LWENY ME ARMAGEDON-NI MONO BIKELO ADWOGI ANGO?
Lweny me Armagedon bilaro kwo pa dano milion mapol ata. I ada, man bibedo acakki me kuc i lobo kany.—Niyabo 21:3, 4.
Buk me Niyabo loko i kom “lwak dano mapol ata” ma welgi pe kwanne ma gibibwot ki i lweny man. (Niyabo 7:9, 14) I te tela pa Lubanga, jo magi ma gubwot-ti gibikonyo me loko lobo doko Paradic kit ma Jehovah onongo con oyubo ni obed kwede.
Tika wangeyo awene ma kibitugo iye lweny i kom jo pa Lubanga?
[Lok ma tye piny]
a Cako nying kabedo moni ma lubbe ki lweny pe obedo gin manyen. Me labolle, i lobo Japan, boma me Hiroshima ma kicelo ki bombom mujinga kiketo woko atata-ni, i kareni tye lanyut ma cung pi lweny me bombom nuclear.
b Nek lumuku-ni tye labol acel ma nyuto kit ma gamente tye ka tute kwede me jwayo lok me dini ki kaki mogo. I kare ma gamente me Soviet Union tye i loc, kibedo ka diyo adada dul dini mogo ma onongo gitye i U.S.S.R. Nen pwony ma wi lokke tye ni “A Peaceable People Defend Their Good Name,” i Wi Lubele me Mai 1, 2011 ma tye i leb muno dok Lucaden pa Jehovah aye gucoyo.
[Cal ma tye i pot karatac 6]
Lubanga Jehovah olwenyo pi jone i kare mukato angec
[Cal ma tye i pot karatac 7]
Jehovah bene bilweny pi jone i Armagedon