Dano Pud Gitye ka Yenyo Lagam

“Cokcok dano ducu gitye ki tam mo olo ma lubbe ki nga ma Yecu obedo. Kadi bed niyewa goro nyo tek, nyo watye ki akalakala, wan ducu wapenye ki lapeny man ni, ‘Laconi mono obedo anga?’”​—MAN LOK PA LACOC MO MA NYINGE STAN GUTHRIE.

DANO gimito niang lok i kom Yecu. Bukke ma kicoyo lok i kom Yecu iye gitye i kin bukke ma dano wilogi loyo dong aloya. Vidio i kom Yecu onya adada i kin piny. Lapeny madok i kom Yecu pe gik. Dano gitye ki tam mapat pat ka odok i kom nga ma Yecu obedo.

Mwaki manok mukato angec, luco lok angeya mo gin aryo gupenyo dano ni gumi tamgi ki i Intanet pi lapeny ni: “Yecu mono obedo anga?” Magi aye tam mogo ma dano gumiyo:

● “Nen calo en obedo rabbi (lapwony) ma kwone me kica tye lanen maber bot dano.”

● “En okwo macalo dano adana.”

● “Pe tye gin mo ma nyuto ni Yecu obedo tye.”

● “Yecu obedo Wod pa Lubanga, kinywale i lobo, oto ka lacen ocer pi larowa ki i balwa. En tye makwo wa i kare-ni, dok bene Bidwogo i lobo.”

● “An atye ki niye ni Yecu aye Wod acel keken pa Lubanga, obedo dano kikome dok kitungcel en bene tye lubanga.”

● “Lok i kom Yecu obedo ododo ma kiboko ki lutino.”

Dong nen ka maleng ni kodi tam mapat pat ma dano gitye kwede-ni pe gin ducu twero bedo lok ada. Tika tye ka mo ma watwero nongo iye lok ma gene ma gamo lapenywa i kom Yecu? Jo ma gicoyo magajin man giye ni Baibul obedo Lok pa Lubanga dok bene ni en keken aye tittiwa lok ada ducu madok i kom Yecu.a​—2 Temceo 3:16.

I pwony ma lubo man, wabineno lagam ma a ki i Baibul pi lapeny mogo ma dano gimaro penyone madok i kom Yecu. En bene owaco ni yo me larre tye ma twolo bot “dano ducu ma ye en.” (Jon 3:16) Wakwayi me ngiyo lagam magi ci imok giri tammi piri keni ka ce mitte ni ipwony jami mapol madok i kom Yecu ki dong kit me nyuto niye i kome.

[Lok ma tye piny]