Wubed “Opii” Pa Jehovah

1. Por kit ma dano gineno kwede bedo opii ki kit ma kicoyo kwede i Jo Roma 6:22.

KADI bed ni Lukricitayo gitye opii, ento bedo opiigi-ni dok pat adada ki kit ma dano mapol gitamo kwede. Ki tung botgi, bedo opii miyo gitamo i kom ngat ma kiuno, kidiyo, ki dok kitero i yo marac. Ento, Lok pa Lubanga loko i kom tic macalo opii ma nongo imine labongo dic bot Ladit ma lamar. Ki lok ada, i kare ma lakwena Paulo owacci Lukricitayo gitye “opii pa Lubanga,” en onongo tye ka wacci gitye ka tic pi Lubanga pi mar ma i cwinygi. (Rom. 6:22) Bedo opii man kwako gin ango? Ngo ma waromo timone wek pe wadok opii pa Catan ki lobone? Mot ango ma wanongo ka wabedo lugen bot Jehovah kun watiyo macalo opii?

“AN AMARO RWODA”

2. (a) Pingo Laicrael moni onongo moko tamme me medde ki bedo opii? (b) Ka ce opii moni omine kene ni kituc ite, man nyuto gin ango?

² Cik ma Lubanga omiyo bot Luicrael konyowa me niang ngo ma mitte me bedo opii pa Jehovah. Opii ma Laibru onongo kigonyo woko i nge tic pi mwaki abiro. (Nia 21:2) Ento, ka opii moni onongo maro laditte adada ki dok mito gak macalo opiine, cik pa Lubanga onongo ye. Laditte onongo kelo opiine i nget kika nyo i kom okar me doggola ci tuco ite ki atero. (Nia 21:5, 6) Pingo en onongo timo kumeno? I leb Ibru, bedo lawiny kubbe ki nyig lok ma gonye ni ciko iti ka winyo lok. Opii ma omine kene ni kituc ite-ni nongo mito medde ki bedo lawiny bot laditte. Man konyowa me niang gin ma dyerewa bot Jehovah kwako​—winyo dog Lubanga labongo dic pi mar ma wamarre kwede.

3. Pingo wadyere bot Lubanga?

³ I kare ma wamine me nongo batija, onongo dong wamoko tamwa me tic pi Jehovah macalo opiine. Wadyere bot Jehovah pien wamito winyo doge ki dok timo mitine. Pe kidiyowa adiya me timo man. Ada, kadiwa lutino ma ginongo batija kong gidyere bot Jehovah, ento pe ginongo batija me yomo cwiny lunyodogi. Wadyere bot Laditwa, Jehovah, pien wamarre. Lakwena Jon ocoyo ni: “Maro Lubanga en aye gwoko cikke.”​—1 Jon 5:3.

WATYE AGONYA ENTO PUD WATYE OPII

4. Ngo ma myero watim me doko “opii me kit ma atir”?

⁴ Watye ki pwoc madit atika bot Jehovah me ye ni wabed opiine! Niyewa i kom ginkok pa Kricito aye gonyowa ki i bedo opii me bal. Kadi bed ni watye ki roc, wan wamine kenwa me bedo i te loc pa Jehovah ki Yecu. Paulo otito man ka maleng i waragane bot Jo Roma ni: “Myero wutam i komwu kekenwu ni, wun jo muto tung bot bal, ento wubedo kwo tung bot Lubanga [pi Kricito Yecu].” I ngeye, en ocikogi ni: “Pe wungeyo ni ka dong wumine kenwu bot ngat mo calo opii me winyo gin ma en loko, dong bene wudoko opii pa ngat ma wuwinyo lokke-ni? Nyo wudoko opii me bal ma terowu i to, nyo wudoko opii me winyo lok pa Lubanga, ma telowu i kit ma atir. Ento myero wupwo iye Lubanga, pien yam wubedo opii me bal, ento dong wutye ka lubo kit pwony ma gipwonyowu kwede ni wulubi ki cwinywu ducu. Dong gityeko gonyowu woko ki i opii me bal, wudoko opii me kit ma atir.” (Rom. 6:11, 16-18) Nge ni lakwena Paulo oloko i kom ‘bedo lawiny ki cwinywa ducu.’ Ada, dyerewa bot Jehovah miyo wadoko “opii me kit ma atir.”

5. Lweny ango ma wan ducu watye kwede, dok pingo?

⁵ Ento, tye ariya mogo ma myero walweny kwedgi wek wagwok dyerewa bot Jehovah. Watye ki lweny laiye aryo. Me acel aye roc ma watye kwede. Paulo bene olwenyo kwede. En ocoyo ni: “Pien amaro kwano cik pa Lubanga, kun alwodo lokke ki iya. Ento dok aneno cik mukene i dul koma ducu, kun tye ka lweny ki cik ma i tamma, tera i opii i te cik me bal ma bedo i dul koma ducu.” (Rom. 7:22, 23) Wan bene watye ki roc. Pi meno, omyero walweny ki miti ma weko watimo gin ma Jehovah dagi. Lakwena Petero ocuko cwinywa ni: “Wubed calo jo ma lone kengi, ento pe wuti ki locken meno pi timo gin marac; wubed giwu macalo opii pa Lubanga.”​—1 Pet. 2:16.

6, 7. I yo ango ma Catan weko jami me lobo-ni ginen maber adada i wangwa?

⁶ Lweny me aryo ma watye kwede tye i kom loboni ma tye i te loc pa jogi. Catan, ma en aye lalo lobo-ni tiyo ki jami lweny mapol mapat pat i komwa wek pe wabed lugen bot Jehovah ki Yecu. Catan mito ni wadok opiine kun bitowa wek wapot i owicce. (Kwan Jo Epeco 6:11, 12.) Yo acel ma Catan timo ki man aye ni en weko jami me lobo-ni ginen maber adada i wangwa. Lakwena Jon ocikowa ni: “Ka dano mo maro lobo, nongo mar pa Lubanga pe i iye. Pien gin ducu ma tye i lobo, macalo miti me komwa ma ginywalowa kwede, ki miti marac pi gin ma waneno ki wangwa, ki dok wakke ki jami ma watye kwede i kwowa, magi ducu pe gua ki bot Won, ento gucakke i lobo kany.”​—1 Jon 2:15, 16.

⁷ Miti me bedo ki lonyo nen ka maleng i loboni. Catan weko dano giye ni bedo ki cente oduk kelo yomcwiny. Dukan madongo dwong ata i kin piny. Kwena me cato wil cuko cwiny dano me bedo ki jami mapol ki dong mwodo kwo. Jo mogo gicito kacel ki luwotgi ma gitye ki cwiny me lobo man i kabedo mogo calo i pak ka ma kigwoko iye lee. Ada, ka mo keken ma watye iye, kiwacciwa ni walok kwowa obed ma rwatte ki kit me loboni.

8, 9. Yot tutwal me timo gin ango, dok pingo?

⁸ I cencwari me acel, Petero ociko Lukricitayo me gwokke ki jo mogo ma gitye i kacokke ma gitamo calo jo me lobo kun wacci: “Cwinygi yom i karama maraco ma gicamo i dyeceng. Gikelo lewic ki bal ka guribbe kwedwu i camo karama, pien gimito megi gat me yomcwiny marac. . . . Giloko lok mogo maditodito me wakke ma tere pe, kun gibito ki dano ma pud gibwot abwota ki i kin jo ma kitgi obedo atata, ka giterogi i timo abor-gu kun gilubo mit me kom. Gin gicikke me miyo jo meno gulone kengi, kun gin kikomgi gibedo opii pa gin ma balogi; pien ka gin mo oloyo kwo pa dano mo, en dong nongo odoko opii pa gin meno.”​—2 Pet. 2:13, 18, 19.

⁹ Cobo “miti marac pi gin ma waneno ki wangwa” pe weko ngat moni bedo agonya. Ma ka meno, en doko opii pa ladit me lobo-ni, Catan Larac-ci. (1 Jon 5:19) Doko opii pa jami me kom yot tutwal. Ka meno otimme, tek tutwal me a ki iye.

TIC MA KELO YOMCWINY

10, 11. Angagi ma Catan maro bwologi i kareni, dok kwan i rwom mamalo twero bedo ariya botgi nining?

¹⁰ I kare-ni, Catan mitine tye me bwolo jo ma ngecgi nok kit ma en otimo kwede i poto me Eden-ni. En maro bwolo jo matino. Catan cwinye pe yom ka latin, nyo ngat mo keken odyere me bedo opii pa Jehovah. Lamone pa Lubanga mito ni jo ducu ma gudyero kwogi bot Jehovah pe gugwok gennegi.

¹¹ Kong dok wadwok wiwa i kom opii ma oye ni kituc ite-ni. Oromo bedo ni opii man owinyo arem pi tutuno; ento tuco ite-ni oweko alama ma nyuto ni en omoko tamme me gak macalo opii pa laditte pi naka. Jo matino giromo nongo ni tek tutwal nyo cwero cwinygi me kwero timo jami ma luwotgi timo. Catan miyo dano mapol gitamo ni bedo ki dog tic i lobone bikelo yengo botgi, ento Lukricitayo myero gucwal cobo mitigi i yo me cwiny calo gin ma pire tek loyo. Yecu opwonyo ni “Gitye ki gum [yomcwiny] jo ma gingeyo ni gin lucan i lok me cwiny.” (Mat. 5:3) Lukricitayo ducu gudyero kwogi me timo miti pa Lubanga ento pe Catan. Gin gimaro kwano cik pa Jehovah, dok gilwodo lok iye dyeceng ki dyewor. (Kwan Jabuli 1:1-3.) Kadi bed kumeno, kwan i rwom mamalo pol kare pe miyo kare muromo bot latic pa Jehovah me lwodo Lok pa Lubanga ki dok tic pire.

12. Gin ango ma lutino i kareni gitye ki kare me yerone?

¹² Ladit ma tamo i yo me loboni twero weko kwo bedo tek bot opii ma Lakricitayo. I waragane mukwongo bot Jo Korint, Paulo openyo ni: “I kare ma gilwongi onongo ibedo opii?” Ci dong omiyo tira ni: “Pe ipar. Ento ka inongo yo me a woko ki i opii, ci ti kwede.” (1 Kor. 7:21) Ka opii moni onongo tye ki ladit ma weko kwone bedo tek, onongo bedo ber ka en tye agonya. I kareni, cik pa lobe mapol waco ni lutino myero gucit i cukul pi mwaki mogo. I ngeye, kimiyo kare bot lutino kwan me yero gin ma gimito timone. Medde ki kwan i rwom mamalo wek ibed ki dog tic i loboni twero gengo ngat moni pe me donyo i tic pi kare malac.​—Kwan 1 Jo Korint 7:23.

KWAN I RWOM MAMALO NYO PWONYE MABER LOYO?

13. Pwonye mene ma bikelo adwogi maber loyo bot latic pa Jehovah?

¹³ Paulo ociko Lukricitayo me Kolocai ni: “Wugwokke wek ngat mo pe ongakwu woko ki tam me ryeko nyo me bwola mo ma tere pe, kun wulubo kit pa kwaro ki pwony pa jogi macon me lobo, ma pe wulubo Kricito.” (Kol. 2:8) Lupwonye mapol gipwonyo ‘tam me ryeko nyo me bwola ma tere pe, kun gilubo kit pa kwaro.’ Lutino ma gikwano i rwom mamalo pol kare kicuko cwinygi tutwalle me kwan matek ento jo ma gityeko kwan pol kare pe gitye ki diro i nge tyeko kwangi, man weko ginongo kwo tek. Ento, lutic pa Jehovah dok gipat adada, pien giyero pwonye ma minigi diro ma mitte wek gibed ki kwo ma lapiny kun gitiyo pi Lubanga. Gin gijolo tira ma Paulo omiyo bot Temceo: ‘Labongo akalakala, mot mapol bino pi lworo Lubanga kacel ki bedo ma wayeng ki jami ma watye kwede. . . . Ento ka watye ki cam ki ginaruka, jami magi romowa gire.’ (1 Tem. 6:6, 8) Ma ka nongo digiri nyo rwom, Lukricitayo giketo cwinygi i nongo ‘waraga me pakogi’ ki nywako i ticwa me pwony-nyi ki kerogi ducu.​—Kwan 2 Jo Korint 3:1-3.

14. Ma lubbe ki Jo Pilipi 3:8, Paulo oneno motte me tic macalo opii pa Lubanga ki Kricito nining?

¹⁴ Nen kong labol pa lakwena Paulo. Gamaliel opwonye ki Cik pa Lujudaya. Rwom me kwan pa Paulo kitwero porone ki pa ngat ma oo i univaciti i kareni. Ento Paulo oneno man nining ka kiporo ki motte me tic macalo opii pa Lubanga ki Kricito? En ocoyo ni: “Tye gin mo maber makato, en aye ngeyo Rwotwa Yecu Kricito; meno aye gin mumiyo aneno jami ducu macalo gin ma konygi pe.” I ngeye en omedo ni: “Pi Kricito omiyo alokke adoko lacan jami ducu, dok anenogi calo yugi, wek anong Kricito.” (Pil. 3:8) Neno pa Paulo-ni konyo lutino ma gin Lukricitayo kacel ki lunyodogi ma gilworo Lubanga-ni me moko tam me ryeko ka odok i lok me kwan. (Nen cal.)

NONG ADWOGI MABER KI I PWONYE MABER LOYO

15, 16. Pwonye ango ma dul pa Jehovah miyo, dok konyowa nining?

¹⁵ Gin ango ma pol kare timme i gangi pwonye madongo? Jo ma gitye i kabedo magi pol kare gijemo i kom gamente nyo lutelagi. (Ep. 2:2) Ki tungcel, dul pa Jehovah miyo pwonye maber loyo i kacokke ka ma jemo pe iye-ni. Wan ki acel acel watye ki kare me nongo adwogi maber ki i Cukul me Tiokraci ma bedo tye i cabit ducu-ni. Ki bene watye ki cukul mogo pi omege ma wigi nono ma gitye painia (Cukul me Baibul pi Omege ma Wigi Nono) ki dok painia ma gunyomme (Cukul me Baibul pi Jo Munyomme). Pwonnye macalo magi konyowa me winyo dog Jehovah, Laditwa.

¹⁶ Watwero tic ki Watch Tower Publications Index nyo Watchtower Library i CD-ROM me kwedo lok mapol. Pwonye man tye pi woro Jehovah. Pwonyowa kit me konyo jo mukene wek guyub watgi ki Lubanga. (2 Kor. 5:20) Man bene konyogi wek gupwony jo mukene.​—2 Tem. 2:2.

MOT ME TIC MACALO OPII

17. Yero pwonye ma pud dong ber loyo kelo adwogi ango?

¹⁷ I carolok pa Yecu madok i kom ciling-ngi, kipwoyo lutic aryo ma gigenne-ni dok bene gudonyo i yomcwiny pa laditgi pien kimedo botgi tic. (Kwan Matayo 25:21, 23.) Yero pwonye ma pud dong ber loyo i kareni kelo yomcwiny kacel ki mot mapol. Nen kong labol pa Michael. En otimo maber adada i cukul mumiyo lupwonye gulwonge me nywako tam kwede i kom cito i univaciti. Obedo me ur botgi ni Michael oyero me cito ka kwano tic cing. Man okonye me nongo jami ma mitte me kom kun nongo tiyo macalo painia marii. Tika en tamo ni emoko tam marac? En owacci “Pwonye ma anongo macalo painia ki dong laelda i kacokke pe kiromo porone ki gin mo keken. Adwogi maber ma anongo kacel ki mot me tic ma atye kwede dit kato cente ma onongo abinongo. Cwinya yom ni pe amedde ki kwanna i rwom mamalo.”

18. Gin ango ma oweko iyero pwonye maber loyo?

¹⁸ Pwonye maber loyo konyowa me ngeyo miti pa Jehovah ki dok me tic macalo opiine. Dok bene miniwa gen me bedo ‘agonya ki i opii me bedo gin ma top’ ki dong nongo “kuc ki deyo ma gimiyo ki litino pa Lubanga.” (Rom. 8:21) Ma dong pire tek loyo aye ni wapwonye me nyuto mar matut pi Laditwa me polo, Jehovah.​—Nia 21:5.