Lubanga Oketo Yub me Laro Dano

Lubanga ocikke bot Abraim ni ‘lakwaro’ ma kitito pire-ni bia ki i doggolane. Dano me “rok ducu” onongo gibinongo mot mapol ki bot lakwaro meno. (Acakki 22:18) Yakobo, lakwaro pa Abram, lacen odak ocito i lobo Ejipt, ka ma jo me ode gunya gudoko rok me Icrael.

Lacen i Ejipt, Parao mo ma kite rac oloko Luicrael gudoko opii nio ka Lubanga ocwalo lanebi Moses, ma otelo wigi ki i lobo meno wa i Nam Makwar ka obaro iye i yo me tango. Inge meno, Lubanga omiyo bot jo Icrael cik mapol, ma man bene kwako Cik Apar-ri, me tiro ki dok gwokogi. Cik magi onongo loko i kom gityer mapat pat me weko bal. Pi teko pa Lubanga, Moses owaco bot jo Icrael ni Lubanga bioro botgi lanebi mukene. Lanebi meno onongo bibedo ‘lakwaro’ ma kiciko pire-ni.

I nge mwaki makato 400, Lubanga ocikke bot Kabaka Daudi ni ngat ma tye ka bino, ‘lakwaro’ ma kiciko pire i poto me Eden-ni biloyo ker ma birii nakanaka. Ngat meno onongo bibedo Meciya, Lalar ma Lubanga ocimo me laro dano ki dok me dwoko paradic i lobo.

Lubanga otito motmot lok mapol madok i kom Meciya kun tiyo ki Daudi kacel ki lunebi mukene. Gin gutito ni en bibedo mwol dok lakica ki dok ni i te locce kec, ngolo kop alenga ki dong lweny gibibedo pe. Dano ducu bibedo ki kuc i kingi kacel ki lee. Lubanga bijwayo two, deno can kacel ki to pien pe gubedo but yubbe i acakki, ki dong jo ma guto bene kibicerogi me kwo i lobo pi naka.

Lubanga otiyo ki lanebi Mika me tito ni kibinywalo Meciya i Beterekem ki dok otiyo ki lanebi Daniel me titone ni lacen kibineke woko. Ento, Lubanga onongo bicero Meciya woko ci keto en me bedo Kabaka i polo. Daniel bene otito ni Ker pa Meciya bileyo kaka gamente mukene-ni ducu ci rii pi naka. Meciya tika ada obino kit ma lunebi gutito kwede-ni?

​—Jenge i Acakki cura 22-50, ki bene Nia, Nwoyo Cik, 2 Camuel, Jabuli, Icaya, Daniel, Mika, Jekaria 9:9.