LOK MA I POK NGEYE | LUBANGA TIKA TAMO PIRI?
Lubanga Twero Kweyo Cwinyi
“Lubanga ma kweyo cwiny jo ma can obwoyogi, okweyo cwinywa.”—2 JO KORINT 7:6.
“Wod pa Lubanga . . . ceng omara ka omine gire pire kene pira.”—JO GALATIA 2:20
GIN MUMIYO JO MOGO GITYE KI AKALAKALA: Kadi bed ni jo mogo gimito kwe cwiny adada, gin gitamo ni pe pore me penyo Lubanga wek okonygi me lweny ki pekkigi. Dako mo ma nyinge Raquel owaco ni: “Ka aneno wel dano ducu ma tye i wi lobo kacel ki pekki madongo ma gitye ka denone, man miyo aneno ni pekona tidi adada ma weko pe apenyo Lubanga ni okonya.”
GIN MA LOK PA LUBANGA PWONYO: Lubanga okonyo dok okweyo cwiny dano mapol. Dano ducu ma gikwo i lobo i kareni gulako bal—ma weko pe gitwero timo gin ma Lubanga mito ki botgi. Ento, Lubanga “omarowa, ci ocwalo Wode me bedo gin me kwanyo bal woko ki i komwa.” (1 Jon 4:10) Pi ginkok pa Yecu, Lubanga dong twero timo kica pi balwa, wabedo ma cwinywa pe ngoliwa kop, dok wabedo ki gen me kwo ki kuc i lobo manyen.a Ento, ginkok meno mono tye pi dano ducu, kece nyuto miti pa Lubanga i komi macalo dano adana?
Tam kong i kom lakwena Paulo. Ginkok pa Yecu ogudo cwinye adada mumiyo en ocoyo ni: ‘Abedo kwo pi ye Wod pa Lubanga, ma ceng omara ka omine gire pire kene pira.’ (Jo Galatia 2:20) Ki lok ada, Yecu oto ma peya Paulo odoko Lakricitayo. Kadi bed kumeno, Paulo oneno ginkok meno macalo mic ma Lubanga omiyo pire.
Ginkok pa Yecu tye mic ma Lubanga omiyo piri bene. Mic meno nyuto kit ma piri tek kwede bot Lubanga. Twero miyo boti ‘kwe cwiny matwal ki gen maber’ wek ‘imok matek i tic ki i lok ducu mabeco.’—2 Jo Tecalonika 2:16, 17.
Yecu omiyo kwone macalo ginkok cokcok mwaki 2,000 mukato angec. Gin ango ma nyuto ni Lubanga mito bedo ki wat macok kwedi i kareni?
a Pi ngec mapol madok i kom ginkok pa Yecu, nen dul me 5 i buk me Baibul Mono Ada Pwonyo Gin Ango? ma Lucaden pa Jehovah aye gucoyo.