Jehovah Tero “Amen” ma Iwaco Calo Gin ma Pire Tek

JEHOVAH tero worowa calo gin ma pire tek. En ‘tero ite, ci winyo’ lok pa luticce, dok en pwoyo jami ducu ma watimo me pakke, kadi bed gin matidi mo. (Mal. 3:16) Me labolle, tam kong i kom nyig lok mo ma dong wawaco tyen mapol ata. Nyig lok meno aye “amen.” Jehovah tika tero nyig lok acel meno calo gin ma pire tek? Ada, en tero kumeno! Me niang pingo, kong waniang tyen lok meno, ki kit ma kitiyo kwede i Baibul.

“LWAK DUCU GIBIGAMO NI, ‘AMEN!’”

Nyig lok man ni “amen” tyen lokke tye ni “wek ocobbe kit meno” nyo “ada.” Kigonyo ki i nyig lok me leb Ibru ma tere tye ni “bed lagen.” Onongo i kare mukene kitiyo kwede i lok ma kubbe ki kot. I nge kwonge pa ngat moni, en onongo waco ni “amen” me moko ni gin ma ewaco tye ada dok ni etye atera pi adwogi me lokke-ni. (Wel 5:22) Ka en owaco “amen” i nyim lwak, man onongo miye tyen lok madit me gwoko cikkene.—Nek. 5:13.

Yo acel mapat adada ma kitiyo kwede ki nyig lok me “amen” tye kicoyo i Nwoyo Cik cura 27. I nge donyogi i Lobo ma Kiciko Pire, jo Icrael onongo myero gugure i kin Got Ebal ki Got Gerijim me winyo ka kikwano Cik. Onongo gugure kenyo pe pi winyo Cik keken ento bene me moko ni giye. Gutimo meno ki gamone ni “Amen!” teke kikwano adwogi ma bino pi turo cik. (Nwo. 27:15-26) Go kong kit ma obedo longo kwede me winyo dwan co, mon ki lutino alip mapol ata i kare ma gigamo ni “amen”! (Yoc. 8:30-35) Labongo akalakala, wigi pe owil i kom lok ma guwaco i nino meno. Dok jo Icrael magi gugwoko cikkegi, pien ginacoya waco ni: “Jo Icrael gutiyo bot Rwot [Jehovah] i kare pa Yocwa ducu ki i kare pa ludongo ducu ma yam gudong ka Yocwa dong oto, gin jo ma yam gungeyo tic ma yam Rwot [Jehovah] otiyo pi jo Icrael.”—Yoc. 24:31.

Yecu bene otiyo ki “amen” me moko ada pa lok ma ewaco, ento en otiyo kwede i yo mapat. Me ka tic kwede me gamo lok pa ngat moni, en owaco “amen” (ma kigonyo i leb Acholi ni “ada”) ma peya otito lok ada mo ma pire tek. I kare mogo en onwoyo lok man, kun waco ni “amen amen” (ma kigonyo i leb Acholi ni “adada”). (Mat. 5:18; Jon 5:19) I yo meno en ocuko cwiny jo ma winyo lokke ni eloko lok ada. Yecu onongo loko ki tekcwiny pien en aye kimine twero me cobo cikke pa Lubanga ducu kakare.—2 Kor. 1:20; Yabo 3:14.

“LWAK DUCU GUGAMO NI, ‘AMEN!’ CI GUPAKO RWOT [JEHOVAH]”

Jo Icrael bene gutiyo ki “amen” ka gitye ka pako Jehovah nyo lega bote. (Nek. 8:6; Jab. 41:13) Ka guwaco lok man i nge lega, jo ma guwinyo lega meno onongo ginyuto ni giye gin ma kiwaco. I yo man dano ducu ma gitye onongo gibedo ki kare me nywako kacel i lega meno, dok man oweko gunongo mit pa woro Jehovah. Meno aye gin mutimme i kare ma Kabaka Daudi okelo canduk me gicikke pa Jehovah i Jerucalem. I kare me kwer meno, Daudi olego lega ma tye calo wer ma tye kicoyo i 1 Tekwaro 16:8-36. Lega man ogudo cwiny jo ma gubedo tye i yub man adada mumiyo “lwak ducu gugamo ni, ‘Amen!’ ci gupako Rwot [Jehovah].” Ada, gubedo ki yomcwiny me note kacel i woro Jehovah.

Lukricitayo me cencwari me acel bene gutiyo ki nyig lok me “amen” i kare ma gitye ka pako Jehovah. Luco Baibul pol kare gutiyo ki lok man i waragagi. (Rom. 1:25; 16:27; 1 Pet. 4:11) Buk me Niyabo nyuto bene cwec me cwiny ma i polo ma gitye ka miyo deyo bot Jehovah ki waco ni: “Amen. Aleluya!” (Yabo 19:1, 4) Lukricitayo me cencwari me acel onongo giwaco “amen” i nge lega ma kiwaco i cokkegi. (1 Kor. 14:16) Ento, man pe obedo lok ma onongo ginwoyo ata labongo niang iye.

GIN MUMIYO “AMEN” MA IWACO PIRE TEK

I nge pwonyo kit ma lutic pa Jehovah i kare mukato angec gutiyo ki nyig lok me “amen”, watwero niang pingo man obedo yo maber me dolo te legawa. Ka wawaco “amen” i agikki me legawa kenwa, wanyuto ni lega man oa ki i cwinywa. Dok ka wagamo ni “amen” i nge lega pi lwak, kadi laling i cwinywa, wanyuto ni wacwako tam ma kiwaco. Nen kong tyen lok mukene mumiyo “amen” ma wawaco pire tek.

Nyuto ni waketo cwinywa i worowa. Waworo Jehovah pe ki waco “amen” keken ento bene i kit ma waketo kwede cwinywa i kare ma nongo kitye ka lega. Mitiwa me waco “amen” ma a ki i cwinywa konyowa me keto tamwa i kom lega.

Ribowa kacel macalo luwor Jehovah. Ka kitye ka lega pi lwak, jo ducu me kacokke giketo cwinygi ka winyo kwena acel-li. (Tic 1:14; 12:5) Ka wagamo “amen” kacel ki omegiwa ki lumegiwa, man ribowa matek. Ka wawaco “amen” kacel, ki dwan malongo nyo laling i cwinywa, legawa twero tugo cwiny Jehovah me timo gin ma walego pire-ni.

Laminwa mo okulo wiye ka lega kun okubbe ki cim me winyo yub me cokke — “Amen” ma wawaco medo pak bot Jehovah

Weko wapako Jehovah. Jehovah neno jami ducu ma watimo i worowa. (Luka 21:2, 3) En neno kadi wa mitiwa kacel ki gin ma tye i cwinywa. Kadi bed kikubowa ki cim wek walub cokke, watwero bedo ki gen ni Jehovah winyo “amen” ma wawaco. Ka wawaco “amen,” waribbe kacel ki jo ma gitye i cokke i pako Jehovah.

“Amen” ma wawaco twero nen calo gin matidi, ento pire tek adada. Buk mo acel ma tito lok me Baibul i yo matut owaco ni: “Nyig lok acel man weko lutic pa Lubanga ginyuto tekcwinygi, cwakgi, kacel ki gen ma gitye kwede i cwinygi.” Dong walego ni, “amen” ducu ma wawaco myero oyom cwiny Jehovah.—Jab. 19:14.

TIKA OMYERO IWAC “AMEN ” KARE DUCU?

“Amen” pe obedo lok ma watero tuku tuku. Ento, ka ngat ma tye ka lega-ni owaco gin mo ma pe tye kakare kono? Tika omyero wakwer waco “amen”? Pe tye kit meno. Nge ni, Jehovah niang ni wan ducu i kare mogo waloko lok ma pe tye kakare, ento en pe keto cwinye iye. Pi meno, ka ngat mo tye ka lega, ce waketo tamwa i kom cwiny ma en tye kwede ento pe nyig lok ma en otiyo kwede kikome, wabinongo ni pud watwero waco “amen” pi lega meno.

Kitungcel, pe wawaco “amen” ki dwan malongo nyo laling i cwinywa, ka ngat ma olego-ni pe obedo Lacaden. Ka watye i cawa ma ngat ma pe Lacaden-ni olego kono? Me labolle, ket kong ni watye i yub mo ma kubbe ki dog ticwa ci kipenyo ngat mo ni oleg pi lwak. Nyo twero bedo ni watye i paco ma jone dinigi opokke ci won ot, ma pe obedo laye, omoko tamme me lega pi jo ducu. Ngo ma omyero watim?

Ka gin ma kit meno otimme i komwa, watwero ling mot kun wanyuto woro. Pe omyero wanywak i worogi ki waco “amen”; dok bene pe wamako cing ki jo mukene i kare me lega, pien meno nyuto ni watye ka ribbe kwedgi i legagi. Watwero yero me waco legawa laling i cwinywa, ento omyero wagwokke pe me waco “amen” ki dwan malongo wek pe gutam ni watye ka nywako i legagi. Ka gurup pa lulega meno gua malo, wan aye omyero wayer ka wabicung nyo pe. Cung nyo kulo wiwa pe nyuto ni watye ka ribbe kwedgi i worogi. Lakricitayo acel acel myero omok tamme pire kene i kom gin ma ebitimo, dok ngat mo pe myero oca tam ma en omoko.

Jami ma waloko i komgi malo-ni nyuto pingo “amen” ma wawaco pire tek bot Jehovah.