Tika Kiloko Lok pa Lubanga?

Jo mukene gipennye ka kiloko Lok pa Lubanga woko. Lanebi Icaya ocoyo ni Lok pa Lubanga “bedo matwal.” (Icaya 40:8) Watwero bedo ki gen nining ni cikke pa Lubanga kigwoko ma pe olokke?

Lubanga tye ki teko me gwoko Lokke ki gengo dano wek pe gulok woko. I kare macon, ma onongo kikobo coc ki cing, lukob coc ma ludiro onongo gikwano nukuta acel acel me coc maleng ma gucoyo wek gumok ni pe gumedo, guloko, nyo guweko gin mo. Kadi bed kit meno dano tye ki roc, dok lukob coc mukene pe gukobo coc mogo kakare.

PINGO WATWERO BEDO KI GEN NI COC MALENG MA WATYE KWEDE I KARE-NI TYE KI KWENA PA LUBANGA KIKOME?

I kare-ni, tye kopi alip mapol me Coc Maleng ma kicoyo ki cing. Ka kiporo kopi mapatpat magi, ci bedo yot me nongo ka ma pe kikobo kakare.—Pi ngec mukene nen pwony ma wiye tye ni “Has the Bible Been Changed or Tampered With?” i jw.org.

Me labolle, tam kong i kom bukke adola macon ma kilwongo ni Dead Sea Scrolls ma lukwat ma Luarab gunongo i boro got macok ki Nam me Kado i mwaka 1947. Bukke adola magi tye ki Coc Maleng ma kicoyo mwaki makato 2000 angec. Lukwan guporo buk adola magi ki Coc Maleng ma watye kwede i kare-ni. Gin ango ma gunongo?

Lukwan magi gunongo ni jami ma tye i Lok pa Lubanga i kare-ni rwatte ki ma i coc macon.a Ka kingiyo coc macon ki diro ci moko ni gin ma wakwano i Coc Maleng obedo kwena pa Lubanga kikome. Watwero bedo ki gen ni, Lubanga ogwoko Coc Maleng piwa oweko pe kiloko.

Pi meno, watwero kwano Lok pa Lubanga ma nongo watye ki gen matek ni lokke tye kakare. Ki tam meno i wiwa, kong dong wanyamu gin ma watwero pwonyo i kom Lubanga ki bot lunebine.