Pingo Lubanga Pe Gamo Lega Ducu?
Wonwa me polo Jehovah tye atera dok cwinye yom me winyo lega ma a ki i cwinywa. Ento tye jami mogo ma twero genge ki gamo legawa. Jami mene, dok ngo ma omyero wiwa opo iye ka watye ka lega? Nen kong tira ma Baibul miyowa madok i kom lega.
‘Ka wutye ka lega, pe wubed ka nwoyo lok acel-li teretere.’—Matayo 6:7.
Jehovah pe mito ni wabed ka nwoyo lega ma wamako i wiwa nyo ka kwanone akwana ki i buk lega. Me ka meno, en mito ni watite lok ma i cwinywa kikome. Go kong kit ma cwinyi twero wang kwede ka laremi mo bedo ka nwoyo lok acel-li boti nino ki nino. Lurem ma gicok giloko agonya i kingi. Ka walego kun watito lok ma i cwinywa, ci meno nyuto ni waneno Wonwa me polo macalo laremwa.
“Wulego, pe wunongo, pien wulego marac.”—Yakobo 4:3.
Waniang maber ni Lubanga pe bigamo legawa ka walego pi jami ma wangeyo ni en pe mito ni watim nyo wabed kwede. Me labolle, ka ngat ma tuko tuko luguma olego bot Lubanga ni omine gum me loyo cente, Jehovah tika twero gamo lega meno? En otitiwa ka maleng ni pe omyero wabed luworo lim dok pe wabed ka ye jami ma kubbe ki jok nyo gum. (Icaya 65:11; Luka 12:15) Pe watwero tamo ni Jehovah bigamo lega magi kulu! Wek Lubanga ogam legawa, omyero wanen ni legawa rwatte ki gin ma en otitiwa i Baibul.
“Ngat ma pe tero ite ka winyo lok me cik ki lubone, Rwot [Jehovah] bene bikwero winyo legane woko.”—Carolok 28:9.
I kare me Baibul, Lubanga onongo pe gamo lega pa jo ma gikwero lubo cikke ma atir. (Icaya 1:15, 16) Lubanga peya olokke. (Malaki 3:6) Ka wamito ni Lubanga ogam legawa, ci omyero watim gin ma watwero me kwo ma lubbe ki cikke. Ento, ka watimo jami maraco i kare mukato angec kono? Tika meno te lokke ni Jehovah pe biwinyo legawa matwal? Pe tye kit meno! Lubanga bitimiwa kica ka waloko kwowa dok watute me yomo cwinye.—Tic pa Lukwena 3:19.