Tika Itye Atera me ‘Leyo Lobo’?

WAN ducu watye ka kuro neno cobbe pa lok pa Yecu ma waco ni: “Gitye ki gum [yomcwiny] jo ma mwol, pien gibileyo lobo doko megi.” (Mat. 5:5) Jo ma kiwirogi gibileyo lobo i kare ma gibidoko luker i polo kun giloyo loc kacel ki Yecu. (Yabo 5:10; 20:6) Pol pa Lukricitayo me ada i kare-ni, gitye ki gen me kwo pi naka i lobo. Gibibedo ki yomcwiny kacel ki kuc dok labongo roc mo keken. Wek meno otwere, gibibedo ki tic ma pire tek adada me atima. Me labolle, bimitte ni gulok lobo-ni odok paradic, gumi jami ma mitte pi jo ma kicerogi, dok gupwony jo ma kicerogi. Kong wanenu jami ma watwero timone i kare-ni me nyuto ni wamito timo tic magi i lobo manyen.

TIKA ITYE ATERA ME LOKO LOBO WEK ODOK PARADIC?

I kare ma Jehovah ociko dano ni ‘gupong lobo, dok gulo bene,’ en onyuto ni i agikkine lobo-ni ducu onongo bidoko paradic. (Acak. 1:28) Jo ma gibikwo pi naka myero bene gulub cik meno. Ento lobo-ni pe bibedo paradic i acakkine, pien poto me Eden dong pe tye. Cutcut i nge lweny me Armagedon, wabibedo ki tic madwong adada me lonyo kabedo mogo i lobo-ni ma i kare-ni kibalo woko. Tic meno pe bibedo tic mayot!

Man poyo wiwa i kom tic ma Luicrael gukemme kwede i kare ma gudwogo cen ki i opii i Babilon. Pe tye ngat mo ma onongo obedo i lobogi pi mwaki 70 kulu. Ento Icaya onongo otito con ni, ki kony pa Jehovah, onongo gibibedo ki kero me loko lobo meno wek odok mamwonya odoco. Lanebi man onongo otito ni: “Tim ma iye bibedo calo Eden, ki tim aroo mutwo bibedo calo poto pa Rwot [Jehovah].” (Ic. 51:3) Luicrael gucobo tic man maber. I yo acel-lu, ki kony pa Jehovah, jo ma gibileyo lobo bene gibibedo ki kero me loko lobo wek odok paradic. Dok kadi wa i kare-ni, tye jami mogo ma itwero timone me nyuto ni imito nywako i tic meno.

Yo acel aye ki timo jami ducu ma itwero me gwoko gangi ki kabedo ma orumi wek obed maleng dok ma neno mit. Itwero timo meno kadi bed jiranini pe giparo pi gwoko lengo me kabedo ma orumogi. Itwero bene miyo kony me gwoko lengo ki roco Ot me Kerwu ki Ot me Gurewu bene. Ka twere boti, ci itwero pongo fom wek ijalle me miyo kony ka ma can ma poto atura otimme iye. Meno binyuto ni itye atera me konyo omegini ki lumegini ka can opoto atura. Pennye kekeni ni, ‘Tika tye diro mogo ma atwero pwonyo ma abitic kwede i kare me anyim ka Jehovah oye ni abed kwo pi naka i lobo?’

Gurup pa omege ki lumege ma gitye ka gwoko lengo ki roco me Ot me Ker.

TIKA ITYE ATERA ME GWOKO JO MA KIBICEROGI?

Cutcut i nge cero nya pa Yairo, Yecu owaco ni omyero kimi ki latin-ni ginacama. (Mar. 5:42, 43) Miyo ginacama ki latin me mwaka 12 meno onongo pe obedo tic matek. Ento tam kong i kom tic ma bimitte ni watim i kare ma Yecu bicobo cikkene ma waco ni, “Jo ducu ma tye i lyel biwinyo iye dwane ci gibikatti woko.” (Jon 5:28, 29) Kadi bed Baibul pe wacciwa jami ducu ma bitimme, watwero goyo ni jo ma kicerogi gibimito cam, odi me bedogi, kacel ki ginaruka. Kadi wa i kare-ni tye jami mogo ma itwero timo me nyuto ni itye atera me miyo kony. Nen kong lapeny magi.

Ngo ma itwero timone i kare-ni me nyuto ni itye atera me leyo lobo?

Omege ki lumege ma cwinygi yom ma gitye i bar dege, gitye ka jolo wele ma gubino i gure ma kwako lobe mapol i boma me Paris.

Ka kimiyo lok angeya ni laneno me adwol tye ka bino me limo kacokkewu, in mono imiyo nyingi wek obin gangi ka cam? Ka kiloko tic pa Labetel mo ci odoko painia i kacokkewu nyo ka laneno me adwol mo ogiko ticce me limo adwol, tika itwero konyogi ki yenyo ot? Ka ce wubibedo ki gure me rijion nyo gure ma kwako lobe mapol i kabedowu, tika itwero jalle me jolo welle, nyo timo tic mukene ma gure peya ocakke nyo i ngeye?

TIKA ITYE ATERA ME PWONYO JO MA KIBICEROGI?

Ma lubbe ki Tic pa Lukwena 24:15, watwero bedo ki gen ni kibicero dano bilion mapol ata. Polgi onongo pe gubedo ki kare me ngeyo Jehovah ma peya guto. Ento gibinongo kare meno i nge cerogi.a Lutic pa Lubanga ma gitye lugen gibinywako i tic me pwonyo jo magi. (Ic. 11:9) Laminwa Charlotte, ma dong obedo ki mot me tito kwena i lobo Ulaya, South America, ki Afrika, tye ka kuro kare meno ki miti madwong adada. En owaco ni: “Atye ki miti madwong me pwonyo jo ma kibicerogi. Ka akwano lok i kom ngat mo ma okwo i kare macon, pol kare atamo ni: ‘Kono onongo dano-ni ongeyo Jehovah, kwone onongo bibedo pat adada.’ Atye ki miti me tito bot jo ma kibicerogi lok i kom Jehovah ki kit ma kwogi bibedo maber kwede ka gutiyo pire.”

Kadi wa lutic pa Jehovah ma lugen ma gukwo i kare ma Yecu peya obino i lobo, gibibedo ki jami mapol me apwonya. Tam kong kit ma biyomo kwede cwinywa ki kit ma bibedo mot madit me tito ki Daniel kit ma lok pa lunebi ma en ocoyo ento pe oniang iye ocobbe kwede. (Dan. 12:8) Nyo tam kong i kom konyo Ruth ki Naomi me niang ni Meciya ma kiciko pire-ni oa ki i doggolagi. Pud dong biyomo cwinywa ya me pwonyo dano labongo lyeto ki dic ma tye i lobo marac ma wakwo iye i kare-ni!

Laminwa mo tye ka miyo trak bot dako mo i kabedo ma kilwoko iye bongo.

Ngo ma itwero timo i kare-ni me nyuto ni itye atera me pwonyo jo ma kibicerogi? Yo acel aye ki tute matek me doko lapwony ma ocwiny kacel ki nywako i tic me tito kwena kare ki kare. (Mat. 24:14) Ento kadi bed pe itwero tito kwena kit ma imito kwede pi peko me tiyo nyo tyen lok mukene, pud itwero nyuto ni itye ki miti me pwonyo jo ma kibicerogi ka itimo gin maber loyo ma itwero i kare-ni.

Lapeny ma pigi tego dong tye ni, Tika itye atera me leyo lobo-ni? Tika itye ki miti me loko lobo-ni wek odok paradic, kacel ki gwoko ki dong pwonyo jo ma kibicerogi? Itwero nyuto ni itye atera me kwo pi naka i lobo ka inywako i tic marom aroma ki tic ma wabitimo ka dong watye i lobo manyen!

a Nen pwony ma wiye tye ni “Loko Jo Mapol Dwogo i Kit ma Atir” i Wi Lubele me Sektemba 2022.