Watwero Kwo pi Naka

1. Lwodo lok i kom cikke pa Jehovah me miyo botwa kwo ma pe tum gudowa nining?

JEHOVAH ocikke ni ebimiyo ki jo ma luwiny bote “kwo ma pe tum.” (Rom. 6:23) Ka walwodo lok i kom gin ma Jehovah tye ka miyo botwa, marwa pire bidongo doko matek. Tam kong: Wonwa me polo marowa matek adada ma oweko en ominiwa mic man wek pe wapokke woko ki bote matwal.

2. Cikke pa Lubanga me miyowa kwo ma pe tum konyowa nining?

² Cikke pa Lubanga me miyowa kwo ma pe tum konyowa me kanyo pekki ma watye ka kato ki iye i kare-ni. Kadi bed lumonewa gubwurowa ni gibinekowa woko, pe wabijuko tic pi Jehovah. Pingo? Tyen lok acel aye ni wangeyo ni ka wato ma wabedo lugen bot Jehovah, en bicerowa dok wabibedo ki gen ni pe dong wabito matwal. (Jon 5:28, 29; 1 Kor. 15:55-58; Ibru 2:15) Pingo watwero moko ada ni twerre piwa me kwo pi naka? Nen kong tyen lok magi.

JEHOVAH BEDO NAKANAKA

3. Pingo watwero ye ni Jehovah twero weko wabedo kwo nakanaka? (Jabuli 102:12, 24, 27)

³ Wangeyo ni Jehovah twero weko wabedo kwo nakanaka pien en aye Wang It me kwo dok en kwo pi naka. (Jab. 36:9) Nen kong wang ginacoya mogo ma nyuto ni Jehovah kare ducu obedo tye dok bibedo tye kare ducu. Jabuli 90:2 waco ni Jehovah “bedo nakanaka.” Jabuli 102 bene waco lok marom. (Kwan Jabuli 102:12, 24, 27.) Dok lanebi Kabakuk ocoyo kit man i kom Wonwa me polo, ni: “Ai Jehovah, in pe ibedo tye wacon? Ai Lubangana, Ngat Maleng, in pe ito.”—Kab. 1:12, NWT.

4. Tika myero wabed ki par ka pe waniang tam man ni Jehovah kare ducu obedo tye? Tit kong.

⁴ Tika inongo ni tek me niang tam man ni Jehovah “bedo nakanaka”? (Ic. 40:28) Jo mapol bene ginongo ni tek me niang tam meno. Eliu oloko i kom Lubanga kit man, ni: “Wel mwaka ma en ori kwede pe rotte.” (Yubu 36:26) Ento ka pe waniang gin mo, meno pe tyen lokke ni gin meno pe tye ada. Me labolle, kadi bed pe watwero niang maber kit ma mac elektwic tiyo kwede, meno mono tyen lokke ni mac elektwic pe tye? Pe tye kit meno! I yo acel-lu, wan dano pe watwero niang maber lok man ni Jehovah kare ducu obedo tye dok bibedo tye matwal. Ento man pe te lokke ni Lubanga pe bedo kwo nakanaka. Lok ada madok i kom Lacwec pe cung mere i kom gin ma waniang nyo pe waniang. (Rom. 11:33-36) Dok en okwongo bedo tye ma pud gin mo keken i polo nyo i lobo pe tye—ma i kine tye iye ceng ki lacer. Jehovah otitiwa ni en aye ‘eketo lobo ki twerone.’ Ada, en obedo tye con ma peya “oyaro polo.” (Jer. 51:15; Tic 17:24) Tyen lok mukene ango mumiyo waromo ye ni watwero kwo pi naka?

JEHOVAH OCWEYOWA ME BEDO KWO NAKANAKA

5. Mot ango ma onongo luot mukwongo gitye kwede?

⁵ Jami makwo ducu ma Jehovah ocweyogi i lobo kany pe kicweyogi me kwo pi naka, mapat ki dano. En omiyo ki dano mot ma kite dok pat me kwo labongo to. Ento, Jehovah ociko Adam ni: “Yat me ngeyo gin maber ki marac pe icam, pien i nino ma ibicamo iye, en aye ibito iye bene.” (Acak. 2:17) Ka onongo Adam gin ki Kawa gubed luwiny bot Jehovah, kono onongo pe guto. Dong watwero moko ni i nge kare mo, Jehovah onongo biye ni gucam “nyig yat me kwo.” Man onongo bimoko cikkene ni gitwero “kwo nakanaka.”b—Acak. 3:22.

6-7. (a) Ngo mukene ma nyuto ni Lubanga pe ocweyo dano ni guto? (b) Jami ango ma itye ki miti me timone i paradic? (Nen cal.)

⁶ Lucayan mogo gunongo gin ma moko ni adamwa twero gwoko ngec madwong adada ma loyo ma wapwonyo i kare me kwowa. Lok meno weko wabedo ki ur. I mwaka 2010, gajeti mo otito ni kibyeko ni ngec ma adamwa twero gwokone rom ki filim ma borre romo cawa milion adek. Neno filim ma kit meno twero tero mwaki makato 300 kulu. Dok twero bedo ni adamwa romo gwoko ngec madwong makato meno tyen mapol ata. Man nyuto ni Jehovah oyubo adamwa me gwoko ngec madwong makato ma watwero pwonyo i mwaki 70 nyo 80 keken.—Jab. 90:10.

⁷ Jehovah bene ocweyowa ki miti matek me bedo kwo. Baibul loko i kom dano ni Lubanga “oketo wa miti me kwo pi naka i cwinygi.” (Latit. 3:11, NWT) Meno obedo tyen lok acel mumiyo waneno to macalo lamone. (1 Kor. 15:26) Ka komwa odoko lit matek, tika dong wakweyo komwa mot ci wakuro mere to? Pe. Pol kare wacito bot daktar dok i cawa mukene wamwonyo yat me lweny ki two meno. Ki lok ada, watimo gin ducu ma watwero me gengowa ki to. Dok ka ngat ma wamaro oto, kadi bed en tidi nyo oti woko, cwinywa cwer pi kare malac. (Jon 11:32, 33) Watwero medde ki pwonyo jami manyen pi naka dok watye ki miti matek me kwo pi naka pien Lacwecwa ocweyowa kit meno. Man nyuto ka maleng ni en biweko twere piwa me kwo nakanaka. Ento pud dok tye tyen lok mapol me ye ni watwero kwo pi naka. Kong dong wanenu jami mogo ma Jehovah otimo i kare mukato ki ma en tye ka timo kombeddi ma nyuto ni en pud pe oloko yubbe mukwongo.

YUB PA JEHOVAH PE OLOKKE

8. Gin ango ma Icaya 55:11 pwonyowa madok i kom yub pa Jehovah piwa?

⁸ Kadi bed Adam ki Kawa gubalo dok gukelo to i kom lutinogi, Jehovah pe oloko tamme madok i kom yubbe. (Kwan Icaya 55:11.) Yubbe pud tye ni jo ma lugen gubed kwo nakanaka. Watwero moko meno ki i jami ma Jehovah owaco dok otimo me cobo yubbe.

9. Gin ango ma Lubanga ocikke pire? (Daniel 12:2, 13)

⁹ Jehovah ocikke ni ebicero jo muto ci emiyo botgi kare me kwo pi naka. (Tic 24:15; Tito 1:1, 2) Yubu, laco ma lagen-ni, onongo tye ki tekcwiny ni Jehovah tye ki miti matek me cero jo ma guto. (Yubu 14:14, 15) Lanebi Daniel onongo ngeyo ni kibicero jo muto ci gibedo ki kare me kwo pi naka. (Jab. 37:29; kwan Daniel 12:2, 13.) Lujudaya ma i kare pa Yecu bene onongo gingeyo ni Jehovah bimiyo bot luticce ma lugen “kwo ma pe tum.” (Luka 10:25; 18:18) Yecu onwoyo cikke man tyen mapol, dok en kikome bene Wonne ocere ki i to.—Mat. 19:29; 22:31, 32; Luka 18:30; Jon 11:25.

10. Nicer mogo ma otimme i kare mukato nyuto gin ango? (Nen cal.)

¹⁰ Jehovah aye Lami Kwo dok en tye ki teko me cero jo muto. En omiyo ki lanebi Elia teko me cero latin pa dato me Jarepat. (1 Luker 17:21-23) Lacen, ki kony pa Lubanga, lanebi Elica odwoko kwo pa wod pa dako mo me Cunem. (2 Luker 4:18-20, 34-37) Nicer magi kacel ki mukene nyuto ni Jehovah tye ki teko me cero jo muto. I kare ma Yecu tye i lobo, en onyuto ni Wonne omine teko meno. (Jon 11:23-25, 43, 44) Kombeddi Yecu tye i polo dok kityeko miyo bote “twero ducu ma i wi polo ki i lobo.” Pi meno, en twero cobo cikke ma waco ni “jo ducu ma tye i lyel” kibicerogi ki gen me bedo kwo pi naka.—Mat. 28:18; Jon 5:25-29.  

11. I yo ma nining ma ginkok weko twere botwa me bedo ki kwo ma pe tum?

¹¹ Pingo Jehovah oye ni Wode me amara oto to malit? Yecu ogamo lapeny meno i kare ma owaco ni: “Lubanga con omaro lobo kumeno, omiyo iye Wode acel keken, wek dano ducu ma ye en owek to, ento obed ki kwo ma pe tum.” (Jon 3:16) I kare ma Lubanga omiyo Wode macalo ginkok pi balwa, en oweko twere botwa me nongo kwo ma pe tum. (Mat. 20:28) Lakwena Paulo otito but yub pa Lubanga man i kare ma en ocoyo ni: “Dano aye mukelo to, dok bene cer pa jo muto dano mukelo. Pien macalo dano ducu to i Adam, en i kit yo acel-lu jo ducu gibimiyogi kwo i Kricito.”—1 Kor. 15:21, 22.

12. I yo ma nining ma Ker-ri bicobo kwede yub pa Jehovah piwa?

¹² Yecu opwonyo lulub kore me lega ni Ker pa Lubanga obin dok miti pa Lubanga otimme i lobo. (Mat. 6:9, 10) But yub pa Lubanga tye ni dano myero gubed kwo nakanaka i wi lobo. Me cobo meno, Jehovah ocimo Wode macalo Kabaka me Ker-ri. Lubanga obedo ka coko dano 144,000 ki i lobo me tic kacel ki Yecu me cobo miti pa Lubanga.—Yabo 5:9, 10.

13. Gin ango ma Jehovah tye ka timo i kare-ni, dok ngo ma omyero itim?

¹³ I kare-ni, Jehovah tye ka coko “lwak dano mapol ata.” En tye ka pwonyogi me kwo i te loc me Kerre. (Yabo 7:9, 10; Yak. 2:8) Kadi bed pol pa dano ma gikwo i lobo i kare-ni gupokke woko pi adegadega ki lweny, ‘lwak dano mapol ata-ni’ gitiyo matek me jwayo kit adegadega mo keken ki i cwinygi. Ginyuto ki i ticgi ni gitye ka teto pala lucwangi doko lak kweri dyang. (Mika 4:3) Me kaka rwako wigi i lweny me lobo-ni, gitye ka konyo dano me nongo “kwo ma en aye kwo kikome” kun gipwonyogi lok i kom Lubanga me ada kacel ki yubbe. (1 Tem. 6:19) Jo me gangigi romo kwerogi nyo giromo rwenyo limgi pien ni gicwako Ker pa Lubanga, ento Jehovah neno ni gitye ki jami ma mitte pi kwo. (Mat. 6:25, 30-33; Luka 18:29, 30) Jami magi ducu cuko cwinywa ni Ker pa Lubanga tye ada dok ni bimedde ki cobo yub pa Jehovah.

KWO MAMWYONYA TYE ANYIM

14-15. Cikke pa Jehovah me jwayo to woko matwal bicobbe nining?

¹⁴ Yecu dong tye ka loc macalo Kabaka me Ker-ri i polo, dok en bicobo jami ducu ma Jehovah ociko. (2 Kor. 1:20) Nicakke i mwaka 1914, Yecu tye ka loc i dye lukworre. (Jab. 110:1, 2) En kacel ki luloc luwote dong cokcok-ki gibijwero jo maraco ducu.—Yabo 6:2.

¹⁵ I kare me Loc me Mwaka Alip Acel pa Yecu, en bicero jo muto dok bikonyo jo ducu ma gin luwiny bot Jehovah me bedo labongo roc. I nge atematema me agikki, jo ma Jehovah ongoligi kop ni kitgi atir ‘gibicamo lobo, dok gibibedo iye matwal.’ (Jab. 37:10, 11, 29) Ki yomcwiny madit, “lakwor ma gibityeko woko me agikki en aye to.”—1 Kor. 15:26.

16. Tyen lok ma pire tek loyo mumiyo watiyo pi Jehovah myero obed ngo?

¹⁶ Kit ma waneno kwede, genwa me kwo pi naka cung matek i kom Lok pa Lubanga. Gen meno twero konyowa me medde ki bedo lugen i kare me agikki man ma kwo tek-ki. Ento me yomo cwiny Jehovah, tyen lokwa me tic pire pe myero obed miti me nongo kwo ma pe tum keken. Tyen lok ma pire tek loyo mumiyo wabedo lugen bot Jehovah ki Yecu aye pien wamarogi matek. (2 Kor. 5:14, 15) Mar meno tugo cwinywa me lubo lanengi ki me nywako genwa ki jo mukene. (Rom. 10:13-15) Ka wapwonnye me bedo ma cingwa yot kun waparo pi jo mukene, ci wabidoko jo ma Jehovah mito ni gubed lureme matwal.—Ibru 13:16.

17. Tic ango ma wan ducu ki acel acel watye kwede? (Matayo 7:13, 14)

¹⁷ Tika wabibedo i kin jo ma gibinongo kwo ma pe tum? Jehovah otyeko yabbiwa doggola ma weko twere. Dong cung i wiwa ki acel acel me medde ki wot i yo ma tero dano i kwo. (Kwan Matayo 7:13, 14.) Kwo bibedo nining ka dong watwero kwo pi naka? Wabinyamo lagam me lapeny meno i pwony ma lubo man.