Tika Onongo Ingeyo?

Kodi gadigadi mene ma laco ma Laetiopia-ni onongo tye ka wot kwede i kare ma Pilipo orwatte kwede?

NYIG lok me leb Grik ma kigonyo ni ‘gadigadi’ kitwero tic kwede me lok i kom kwai gadigadi mapatpat. (Tic 8:​28, 29, 38) Ento, nen calo Laetiopia-ni onongo tye ka wot ki gadigadi madit makato kodi gadigadi matino ma onongo kitiyo kwede i lweny nyo i pyem ngwec. Nen kong tyen lok mogo mumiyo wawaco kit meno.

Laetiopia-ni onongo obedo latic ma rwomme dit ma owoto wot mabor adada. En onongo “latic madit pa Kandake, kabaka ma dako me lobo Etiopia, ladit ma lakan jamine ducu.” (Tic 8:27) Lobo Etiopia me kare macon onongo gwaro Sudan ma i kare-ni kacel ki tung kupiny me lobo Ejipt ma i kare-ni. Kadi bed laco-ni nen calo pe otiyo ki gadigadi acel keken i wotte man, en twero bedo ni owoto ki yec mapol i wot mabor man. Gadigadi mogo ma onongo kitiyo kwede i cencwari me acel me tingo luwot onongo tye ki tyene angwen dok wiye nongo kiumo woko. Ma lubbe ki buk mo acel ma loko i kom buk me Tic pa Lukwena, “Kodi gadigadi man onongo iye lac ma twero tingo yec mapol, weko luwot bedo agonya, dok weko gibedo ki kare me wot i kabedo maboco.”

Laetiopia-ni onongo tye ka kwan i kare ma Pilipo orwatte kwede. Ginacoya waco ni “ka Pilipo oringo bote, ci owinyo en ka kwano buk pa lanebi Icaya.” (Tic 8:30) Gadigadi me wot ka maboco onongo pe kiyubogi me ngwec madwir. Kit macalo gadigadi magi onongo gingweco mot, man omiyo kare ki Laetiopia-ni me kwan dok oweko obedo yot ki Pilipo me make kadi bed ni ongweco ki tyene.

Laetiopia-ni “olwongo Pilipo ni obed kwede kacel.” (Tic 8:31) I gadigadi me pyem ngwec, lungwec kwede onongo gicung acunga. Ento gadigadi ma kiyubo pi wot maboco, iye onongo lac ma romo pi laco-ni ki Pilipo me bedo i iye.

Ma lubbe ki gin ma kicoyo i Tic pa Lukwena cura 8 kacel ki lok mogo me tekwaro ma okatti nyen, i kare-ni bukkewa nyuto cal pa Laetiopia-ni ma tye ka wot ki gadigadi madit ento pe kodi gadigadi matino ma kitiyo kwede i lweny nyo pyem ngwec.