Lapeny pa Lukwan Bukkewa

I yo ma nining ma “Jerucalem” ma kiloko i kome i Icaya 60:1 “a malo” ci miyo ‘ceng tuc’?

Wang ginacoya man tye ka lok i kom boma me Jerucalem nyo Cion, ma onongo obedo boma madit me Juda i kare meno. (Ic. 60:14; 62:​1, 2) Jerucalem onongo cung pi rok me Icrael. Tye lapeny aryo ma wabigamo ma lubbe ki tyeng man: Mukwongo, awene dok i yo ma nining ma Jerucalem “a malo” ci miyo dero ceng ryeny i yo me cwiny? Me aryo, tika lok pa lanebi Icaya man tye ka cobbe tyen me aryone i karewa-ni?

Awene dok i yo ma nining ma Jerucalem “a malo” ci miyo dero ceng ryeny i yo me cwiny? Jerucalem kacel ki ot pa Lubanga odoko wi obur i kare ma Lujudaya onongo gitye i opii i Babilon pi mwaki 70. Ento i kare ma jo Medi ki jo Percia guturo loc me Babilon, Luicrael ducu ma gikwo i te ker me Babilon onongo gitye agonya me dok cen paco ka roco woro me ada. (Ejira 1:​1-4) Cakke i mwaka 537 K.M.P., Luicrael mogo ma lugen ma gia ki i kaki 12 ducu gutimo meno. (Ic. 60:4) Gucako miyo gityer bot Jehovah, kwero kwer mapatpat, kacel ki gero ot pa Lubanga odoco. (Ejira 3:​1-4, 7-11; 6:​16-22) Meno oweko deyo pa Jehovah ocako ryeny i kom Jerucalem odoco—ma en aye jo pa Lubanga. Man oweko rok me Icrael gudoko dero ceng i yo me cwiny bot rok mukene ma pe gingeyo Jehovah.

Kadi bed kit meno, but lok pa lanebi Icaya manok keken aye ocobbe i kare meno i kom Jerucalem. Pol pa Luicrael pe gumedde ki bedo luwiny bot Lubanga. (Nek. 13:27; Mal. 1:​6-8; 2:​13, 14; Mat. 15:​7-9) Lacen, gukwero wa Meciya, Yecu Kricito kulu. (Mat. 27:​1, 2) I mwaka 70 K.M., kijwero Jerucalem ki ot pa Lubanga woko pi tyen me aryo.

Jehovah onongo otito con ni gin man bitimme. (Dan. 9:​24-27) Onen ka maleng ni, onongo pe obedo yub pa Jehovah ni lok me roco woro me ada ma kitito pire i Icaya 60 myero ocobbe kwicikwici i kom Jerucalem macon.

Tika lok pa lanebi Icaya man tye ka cobbe tyen me aryone i karewa-ni? Ada, tye ka cobbe, ento tye ka timme i kom Jerucalem mukene—“Jerucalem ma tye i polo.” Lakwena Paulo ocoyo lok i kome ni: “En obedo minwa.” (Gal. 4:26) Jerucalem ma tye i polo obedo but dul pa Lubanga ma tye iye lumalaika ma lugen. Litinone aye Yecu kacel ki Lukricitayo 144,000 ma kiwirogi ki cwiny maleng, dok gitye ki gen me kwo i polo calo Paulo. (Gal. 4:31) Lukricitayo ma kiwirogi gubedo “rok maleng”—“Luicrael pa Lubanga.”—1 Pet. 2:9; Gal. 6:​16, NWT.

I yo ma nining ma Jerucalem ma tye i polo “a malo” ci ‘ceng tuc’? En otimo meno kun tiyo ki lutinone ma kiwirogi ma gitye i lobo kany. Nen kit ma gin mutimme i komgi rwatte kwede ki lok pa lanebi Icaya ma nonge i Icaya cura 60.

Onongo mitte ni Lukricitayo ma kiwirogi ‘gua malo’ pien onongo gitye i col piny i yo me cwiny i nge to pa lukwena i kare ma pwony pa jo mungak onya. (Mat. 13:​37-43) I kare meno aye gudonyo i te loc pa Babilon Madit, ma en aye dini goba ducu me lobo-ni. Lukricitayo ma kiwirogi gumedde ki bedo i opii nio wa i kare me “agikki piny,” ma ocakke i mwaka 1914. (Mat. 13:​39, 40) Ma pe otero kare, i mwaka 1919, kigonyogi dok cutcut gucako miyo dero ceng ryeny i yo me cwiny ki tito kwena maber me Ker-ri ki mit kom madwong.a Pi mwaki mapol dong, dano ma gia ki i rok mapatpat gubino i dero man, kadi wa Luicrael pa Lubanga—ma gin aye “luker” ma kiloko i komgi i Icaya 60:3.—Yabo 5:​9, 10.

I kare me anyim, Lukricitayo ma kiwirogi gibiryeny i yo me cwiny makato i kare-ni. I yo ma nining? Ka guto ki i lobo, gidoko but “Jerucalem Manyen,” nyo nyako ger pa Kricito ma tye iye luker ki lulamdog 144,000.—Yabo 14:1; 21:​1, 2, 24; 22:​3-5.

Jerucalem Manyen bitiyo tic matek me cobo lok pa lanebi ma tye i Icaya 60:1. (Por Icaya 60:​1, 3, 5, 11, 19, 20 ki Niyabo 21:​2, 9-11, 22-26.) Kit macalo Jerucalem ma i lobo kany onongo obedo ka ma luker me Icrael giloyo iye locgi, Jerucalem Manyen ki Kricito gibidoko gamente me lobo manyen. Tyen lokke ngo ka kiwaco ni Jerucalem Manyen “oa ki i polo bot Lubanga bino piny”? Tyen lokke ni bitimo jami ma gudo kwo pa dano i lobo kany dok bimiyo derone ryeny i komgi. Kibigonyo dano ki i opii me bal ki to. (Yabo 21:​3, 4, 24) Man ‘biroco jami ducu dwoko kakare,’ kit ma Icaya kacel ki lunebi mukene gutito kwede con. (Tic 3:21) Tic man me roco jami ducu ocakke i kare ma kiketo Kricito me bedo Kabaka dok man bitum i agikki me Mwaka Alip Acel me Locce.