Tika Ibidiyo Cwinyi me Kuro Jehovah?

1, 2. (a) Ngo ma weko wapenye ki lapeny ni: “Pi kare ma rom mene?” (b) Pingo labol pa lutic pa Lubanga i kare macon cuko cwinywa i kare-ni?

“PI KARE ma rom mene?” Meno aye lapeny ma lanebi Icaya gin ki Kabakuk gupenyo. (Icaya 6:11; Kabakuk 1:2) I kare ma Kabaka Daudi ocoyo Jabuli 13, en bene openyo lapeny meno pi tyen ma romo angwen kulu. (Jabuli 13:1, 2) Dok i kare ma Yecu Kricito tye ka kwo i kin jo ma gipe ki niye, en openyo ni: “Nio wa awene?” (Matayo 17:17) Wan bene watwero penyo lapeny ma kit meno.

² Pingo wapenye ni: “Pi kare ma rom mene?” Gwok kiterowa i yo marac, komwa lit nyo dong watye ka ti woko. Twero bedo ni watye ki par mapol pien watye ka kwo i kare ma ‘piny tye marac.’ (2 Temceo 3:1) Nyo twero bedo ni jo ma wakwo kwedgi gitye ki cwiny marac, dok man twero turo cwinywa adada. Cuko cwinywa adada me ngeyone ni Jehovah pe okeco i kom luticce ma lugen ma gupenyo lapeny meno i kare macon.

3. Gin ango ma twero konyowa ka kwo tek?

³ Gin ango ma twero konyowa ka kwo tek? Yakobo, omin Yecu ocoyo ni: “Kit meno utmegina, wudi cwinywu nio wang ma Rwot bidwogo.” (Yakobo 5:7) Pi meno, mitte ni wan ducu wadi cwinywa. Diyo cwiny kwako gin ango, dok wanyuto nining?

DIYO CWINY KWAKO GIN ANGO?

4, 5. (a) Diyo cwiny kwako gin ango, dok watwero diyo cwinywa nining? (b) Yakobo oporo diyo cwiny ki gin ango? (Nen cal ma tye i pot karatac 3.)

⁴ Baibul waco ni cwiny maleng aye konyowa me diyo cwinywa. Labongo kony pa Lubanga, twero bedo tek adada pi jo ma gitye ki roc me diyo cwinygi i kare ma kwo tek. Diyo cwiny obedo mot ma a ki bot Lubanga, dok wanyuto marwa pi Jehovah ki pi jo mukene ka wadiyo cwinywa. Ka pe wadiyo cwinywa, ci mar ma watye kwede pi jo mukene twero kwe woko. (1 Jo Korint 13:4; Jo Galatia 5:22) Diyo cwiny kwako gin ango? Kwako kanyo kwo matek kun nongo itye ki neno matir. (Jo Kolocai 1:11; Yakobo 1:3, 4) Diyo cwiny twero konyowa me gwoko gennewa bot Jehovah kadi bed peko tye. Konyowa pe me culo wang gin marac ma kitimo i komwa. Baibul waco ni myero waye ni pire tek me diyo cwinywa. Meno obedo pwony ma pire tek ma wanongo i Yakobo 5:7, 8. (Kwan.)

⁵ Pingo myero wawek jami ducu i cing Jehovah. Lakwena Yakobo oporo gin ma timme i komwa ki pur. Kadi bed ni lapur tiyo matek me pito cam, en pe twero doro kit ma pinye bibedo kwede nyo wek cam ocek oyotoyot. Mitte ni en odi cwinye wek en onong “gin ma pire tek ma cek i lobo.” I yo acel-li, tye jami mapol ma pe watwero timone ka nongo wakuro cobbe pa cikke pa Jehovah. (Marako 13:32, 33; Tic pa Lukwena 1:7) Calo lapur, mitte ni wan bene wadi cwinywa.

6. Gin ango ma wapwonyo ki i labol pa lanebi Mika?

⁶ Onongo mitte ni lanebi Mika bene okany kwo matek, kit ma timme kwede i komwa i kare-ni. En okwo i kare me loc pa Kabaka Akaj. Akaj onongo obedo kabaka ma kite rac adada. Macalo adwogine, tim me camucana onongo oromo kin piny adada. Tim maraco onongo dwong adada ma oweko Baibul owaco ni ‘cing jo meno onongo tye i kom gin marac, dok gimito timone ki cwinygi ducu.’ (Kwan Mika 7:1-3.) Mika onongo ngeyo ni pe tye gin mo keken ma etwero timone me loko tim maraco magi. Ci dong ngo ma en onongo bitimone? En owaco ni: “Ento ki tung bota, abineno bot Rwot, abikuro Lubanga lalar mera; Lubangana biwinyo lokka.” (Mika 7:7) Calo Mika, wan bene myero ‘wakur Lubanga.’

7. Pingo pe myero wabed mere mot labongo timo gin mo keken ka nongo wakuro ni Jehovah ocob cikkene?

⁷ Ka watye ki niye calo Mika, wabibedo atera me kuro Jehovah. Wan pe watye calo lamabuc ma bedo mere mot i ot buc kun kuro nino ma kibineke iye. Nongo kitye ka diye adiya me kuro nino meno, dok pe kuro nino meno ki yomcwiny. Ento dok pat ki tung botwa! Wadiyo cwinywa me kuro Jehovah pien wangeyo ni en bicobo cikkene me miniwa kwo ma pe tum i karene kikome! Pi meno, ‘waciro can ducu kun wadiyo cwinywa i yo ducu ki yomcwiny.’ (Jo Kolocai 1:11, 12) Ka watye ka kuro Jehovah pe wabedo ka nguru ni Jehovah tye ka galle ki cobo cikkene. Ka wabedo ka nguru, ci meno pe biyomo cwinye.​—Jo Kolocai 3:12.

LABOL PA JO MA GUDIYO CWINYGI

8. Gin ango ma wapwonyo ki i lanen pa jo ma gubedo lugen i kare macon?

⁸ Gin ango ma bikonyowa me diyo cwinywa? Watwero tamo i kom lanen pa jo ma lugen mogo ma gukwo i kare macon ki kit ma gudiyo kwede ki cwinygi me kuro cobbe pa cikke pa Jehovah. (Jo Roma 15:4) Ka walwodo lok i kom lanen pa jo magi, myero bene watam i kom kare ma gutero me kuro cobbe ma cikke meno, tyen lok muweko gudiyo cwinygi ki dok kit ma Jehovah ominigi mot pi diyo cwinygi.

9, 10. Pi kare ma rom meno ma Abraim gin ki Cara gudiyo kwede ki cwinygi me kuro Jehovah?

⁹ Tam kong i kom labol pa Abraim gin ki Cara. “Pi niyegi, ki pi diyo cwinygi,” gunongo “gin ma yam Lubanga ociko pire.” Baibul wacciwa ni i nge kare ma ‘Abraim odiyo cwinye,’ Jehovah ocikke ni ebiye mot dok ebiweko en bedo kwaro pa rok madit. (Jo Ibru 6:12, 15) Pingo onongo mitte ni Abraim odi cwinye? Pien onongo bitero kare malac wek cikke pa Lubanga ocobbe. I nino dwe 14 me Nican i mwaka 1943 ma peya kinywalo Kricito, Abraim gin ki Cara kacel jo me otgi ducu gungolo kulu me Euprate ci gudonyo i Lobo ma Kiciko Pire. Ento onongo dok mitte ni Abraim odi cwinye pi mwaki 25 wek kinywal wode Icaka ki dok mwaki 60 wek kinywal likwayone, Ecau gin Yakobo.​—Jo Ibru 11:9.

¹⁰ Abraim onongo ngom ma rom mene ki i Lobo ma Kiciko pire? Baibul waco ni Jehovah “pe omiye oleyo gin mo kany, kadi wa dul lobo mo ma rom ki tyen dano, ento ocikke me miyo bote me bedo lobone ki pa likwaye ma gibilube, kadi onongo latinne mo pud pe.” (Tic pa Lukwena 7:5) I nge mwaki 430 ma Abraim ongolo kulu Euprate en aye kare ma likwayone gudoko rok ma onongo gibikwo i lobo meno.​—Nia 12:40-42; Jo Galatia 3:17.

11. Pingo Abraim onongo tye atera me diyo cwinye, dok mot ango ma en binongone pi diyo cwinye?

¹¹ Abraim onongo tye atera me kuro Jehovah pien onongo ngeyo ni Jehovah bicobo cikkene. En onongo tye ki niye i kom Jehovah. (Kwan Jo Ibru 11:8-12.) Cwiny Abraim obedo yom me kuro cobbe pa cikke pa Lubanga kadi bed ni en oto ma pe oneno cobbe pa jami magi ducu. Ento go kong yomcwiny ma Abraim bibedo kwede ka kicere me kwo i paradic. En bibedo ki ur me kwano lok ma kicoyo i kome kacel ki jo me ode i kabedo mapol i Baibul.a (Nen lok ma tye i tere piny.) Go kong yomcwiny ma en bibedo kwede me niang ni ekonyo wek yub pa Jehovah madok i kom Meciya ocobbe kakare! Wangeyo ni en biniang ni nongo pire tek ni edi cwinye wek enong mot magi ducu.

12, 13. Pingo onongo mitte ni Yucepu odi cwinye, dok en onongo tye ki neno matir ango?

¹² Yucepu lakwar Abraim bene onongo tye atera me diyo cwinye. Kitere i yo marac adada. Me acel, omegine gucate macalo opii i kare ma en tye ki mwaka 17 keken. Lacen kiketo adot me goba i kome ni otemo buto ki dako pa laditte tektek, dok man oweko kitweye i buc. (Acakki 39:11-20; Jabuli 105:17, 18) Kadi bed ni Yucepu onongo lagen bot Lubanga, onongo nen calo gibedo ka pwodde ma ka mine mot. Ento i nge mwaka 13, jami ducu olokke. Kigonyo Yucepu ki i buc ci en odoko ngat ma lubo kor kabaka me Ejipt.​—Acakki 41:14, 37-43; Tic pa Lukwena 7:9, 10.

¹³ Tika tim maraco magi oweko cwiny Yucepu odoko kec? Tika en owinyo calo Jehovah onongo dong oweke woko? Pe. Yucepu odiyo cwinye adada. Gin ango ma okonye? Meno obedo niyene i kom Jehovah. En oniang ni Jehovah tye ka doro jami ducu. Waneno meno ki i gin ma en owaco bot omegine: “Pe wulwor, an atye ma ka Lubanga bo? Ki tung botwu yam wuyubbe pi timo gin marac i koma, ento Lubanga oyubo pi tiyo gin maber, ma omiyo jo mapol gubedo kwo, macalo gitye kwede wa kombeddi.” (Acakki 50:19, 20) Yucepu onongo ngeyo ni myero wadi cwinywa wek wanong mot ki bot Jehovah.

14, 15. (a) Pingo kit ma Daudi odiyo kwede ki cwinye yomo cwinywa adada? (b) Gin ango ma okonyo Daudi me diyo cwinye?

¹⁴ Jami mapol ma pe atir bene otimme i kom Kabaka Daudi. Jehovah owiro Daudi me bedo kabaka me Icrael i kare ma en pud tidi. Ento onongo mitte ni Daudi okur pi mwaka 15 ma peya ocako loc macalo kabaka kadiwa pi jo me kakane. (2 Camuel 2:3, 4) I kare magi ducu, Daudi obedo i wi ngwec pi gwoko kwone ki i cing Kabaka Caulo, ma onongo tye ka temme me neke woko.b (Nen coc ma tye i tere piny.) Macalo adwogine, Daudi onongo pe ki gange mo keken. En obedo ka kwo i lobo pa lurok nyo i boro i dye tim. Lacen, kineko Caulo woko i dog lweny. Ento onongo mitte ni Daudi kong dok okur pi mwaka ma romo abiro wek odok kabaka pa rok me Icrael ducu.​—2 Camuel 5:4, 5.

¹⁵ Pingo Daudi odiyo cwinye? En ominiwa lagamme i jabuli 13 ka ma en openyo tyen angwen kulu ni: “Pi kare ma rom mene” En owaco ni: “Ento an dong atyeko geno mar meri ma pe lokke; abibedo ki yomcwiny pi lar meri. Abiwero wer bot Rwot, pien otima maber atika.” (Jabuli 13:5, 6) Daudi onongo ngeyo ni Jehovah marre dok bibedo lagen bote kare ducu. En otamo i kom kit ma Jehovah okonye kwede i kare mukato angec, dok onongo tye ki miti me kuro kare ma Jehovah bigiko atematema ducu ma onongo en tye ka wok ki iye. Daudi onongo ngeyo ni pire tek me diyo cwinywa wek wanong mot pa Jehovah.

16, 17. Jehovah gin ki Yecu gunyutiwa lanen maber nining ma lubbe ki kit ma myero wadi kwede cwinywa?

¹⁶ Jehovah pe mito ni watim gin ma en kikome bene pe mito timone. En onyutiwa lanen maber loyo ma lubbe ki diyo cwiny. (Kwan 2 Petero 3:9.) Me labolle, mwaki alip mapol mukato angec i poto me Eden, Catan omoro adot goba i kom Jehovah ni en pe timo jami i yo matir. Jehovah “tye ka kuro” kare ma kibilonyo nyinge. Man bikelo adwogi maber bot jo ducu ma “gikure.”​—Icaya 30:18.

¹⁷ Yecu bene odiyo cwinye me kuro cobbe pa cikke pa Jehovah. I kare ma en tye i lobo, en obedo lagen nio wa i to. I mwaka 33, en odok i polo ci otero bot Jehovah wel ginkok me kwone ma pe ki roc-ci. Ento en okuro nio wa i 1914 wek ecak loc macalo Kabaka. (Tic pa Lukwena 2:33-35; Jo Ibru 10:12, 13) Kadi bed kumeno, mitte ni Yecu kong dok okur nio wa i agikki me mwaki alip acel me locce ka wek dong kityek lumonene kwicikwici. (1 Jo Korint 15:25) Man bimitte ni en odi cwiny pi kare malac. Ento, bikelo mot mapol.

GIN ANGO MA BIKONYOWA?

18, 19. Gin ango ma bikonyowa me diyo cwinywa?

¹⁸ Ki lok ada, Jehovah mito ni wadi cwinywa dok wawek jami ducu i cinge. Gin ango ma bikonyowa me timo meno? Myero waleg pi cwiny maleng. Wiwa myero opo ni cwiny maleng aye ma konyowa me diyo cwinywa. (Jo Epeco 3:16; 6:18; 1 Jo Tecalonika 5:17-19) Pi meno kwa Jehovah wek okonyi me ciro jami ducu kun idiyo cwinyi!

¹⁹ Wi bene myero opo i kom gin ma okonyo Abraim, Yucepu, ki Daudi me diyo cwinygi kun giguro cobbe pa cikke pa Jehovah. Obedo pi niyegi ki gengi i kom Jehovah. Pe gubedo ka keto tamgi i komgi keken nyo pi gin ma gimito. Ka watamo i kom kit ma jami olokke kwede i yo maber pigi, ci bicuko cwinywa bene me diyo cwinywa.

20. Myero wamok tamwa me timo ngo?

²⁰ Pi meno, kadi bed watye ka kato ki i atematema, wamoko tamwa me ‘kuro’ Jehovah. I kine mukene watwero penyo ni: “Rwot, imito akok boti pi kare ma rom mene?” (Icaya 6:11) Ento ki kony pa cwiny maleng, watwero lubo lanen pa Jeremia kun wawaco ni: Jehovah “aye dul ma gipokka, pi meno abigeno [abikuro] en.”​—Koko 3:21, 24.