Yesaya
26 Jamɛ a ligbi ɔ, a ma la la nɛ ɔ ngɛ Yuda:
“Wa ngɛ ma nɛ he wa.
E ngɔ yi wami hemi kɛ pee e gbogbo kɛ e ta hwumi kpokuhi.
2 Nyɛ bli agbo ɔmɛ konɛ ma nɛ peeɔ nɔ́ nɛ da a nɛ sɛ mi,
Ma nɛ yeɔ anɔkuale ɔ.
3 O maa bu nihi nɛ a kɛ a he fɔɔ o nɔ kulaa* a he;
O maa ya nɔ nɛ o ma ha mɛ tue mi jɔmi,
Ejakaa o nɔ lɛ a ngɔ a hɛ kɛ fɔ.
4 Ngɔɔ o hɛ kɛ fɔ Yehowa nɔ kɛ ya daa,
Ejakaa Yah* Yehowa ji Tɛsa nɛ ngɛ kɛ yaa neneene.
5 “Ejakaa e ba nihi nɛ a ngɛ hehi nɛ ya hiɔwe ɔ si, nihi nɛ a ngɛ ma nɛ nɔ kuɔ ɔ mi ɔ.
E ha nɛ e nɔ si,
E ha nɛ e nɔ zugba;
E ha nɛ e nɔ bunyuku mi.
6 Nane maa naa e nɔ,
Nihi nɛ a wa mɛ yi mi a nane, nihi nɛ a ní ngɛ mɔbɔ a nane.”
7 Dalɔ blɔ* da tlɔmɔɔ.
Akɛnɛ o da he je ɔ,
O ma ha nɛ dalɔ blɔ nɔ maa da.
8 Oo Yehowa, be mi nɛ wa ngɛ o kojomi blɔ ɔ nɔ nyɛɛe ɔ,
Wa ngɔ wa hɛ kɛ fɔ o nɔ.
Wa* hɛ jaa ngɛ o biɛ ɔ kɛ o kaimi ɔ he.*
9 Nyɔ mi ɔ, ye nɔmlɔ tso ɔ tsuo* hɛ jaa ngɛ o he.
Ee, ye mumi ɔ yaa nɔ nɛ e hlaa mo;
Ejakaa ke o kojo zugba a,
Nihi nɛ a ngɛ zugba a nɔ ɔ kaseɔ dami he ní.
10 Ke a na yiwutsotsɛ mɔbɔ po,
E be bɔ nɛ a peeɔ dami ní ha kasee.*
Ngɛ zugba nɛ dali sɔuu lɛ a ngɛ nɔ ɔ nɔ po ɔ, e maa pee yiwutso ní,
Nɛ e be Yehowa we agboje ɔ nae.
11 Oo Yehowa, o wo o nine nɔ, se a nɛ.
A maa na bɔ nɛ o suɔ o we bi ɔmɛ wawɛɛ ha a, nɛ zo maa gbe mɛ.
Niinɛ, o la a maa sã mɛ.
12 Oo Yehowa, o ma ha nɛ wa ma ná tue mi jɔmi
Ejakaa nɔ́ fɛɛ nɔ́ ko nɛ wa pee ɔ
Mo lɛ o pee kɛ ha wɔ.
13 Oo Yehowa, ngɛ o se ɔ, nyɔmtsɛmɛ komɛ hu yeɔ wa nɔ,
Se o biɛ ɔ ta pɛ lɛ wa woɔ.
14 A gbo; a be wami mi hu.
A gbo nɛ a be he wami ko, a be si tee.
Ejakaa o je o hɛ kɛ pi mɛ
Konɛ o gu a sisi nɛ a biɛ nɛ laa.
15 Oo Yehowa, o ha nɛ ma a kle,
O ha nɛ ma a kle;
O wo o hɛ mi nyami.
O hɛ zugba a huzu ɔmɛ tsuo kɛ ya se tsitsaa.
16 Oo Yehowa, benɛ a sɛ haomi mi ɔ, a ba o ngɔ;
Benɛ o tsɔse mɛ ɔ, a sɔle ngɛ a nya he kɛ ha mo.
17 Bɔ nɛ yohɔyo nɛ e miɔ nɛ e ma fɔ ɔ
Nuɔ kɔɔmi nɛ e kpaa ngmlaa a,
Jã nɛ wa ba pee ngɛ o he je, oo Yehowa.
18 Wa ngɔ hɔ, nɛ wa nu kɔɔmi,
Se e pee kaa nɔ́ nɛ wa fɔ kɔɔhiɔ.
Wa ngɔɛ yi wami hemi kɛ bɛ zugba a nɔ,
Nɛ a fɔ we bi ko nɛ e hi zugba a nɔ.
19 Nyɛ nihi nɛ a gbo ɔ maa ba wami mi.
Ye gbogboe ɔmɛ maa te si.
Nyɛɛ te si nɛ nyɛɛ kɛ bua jɔmi nɛ he ose,
Nyɛ nihi nɛ nyɛ ngɛ zu ɔ mi!
Ejakaa bɔ́ nɛ nɛɔ kɛ pueɔ o nɔ ɔ ngɛ kaa makɛ bɔ́,*
Nɛ zugba a ma ha nɛ nihi nɛ a gbo nɛ a be he wami ko ɔ maa ba wami mi.*
20 Ye we bi, nyɛɛ ho, nyɛɛ sɛ nyɛ se tsu ɔmɛ a mi,
Nɛ nyɛ nga nyɛ sinya amɛ ngɛ nyɛ se.
Nyɛɛ laa nyɛ he be bɔɔ ko
Kɛ yaa si be nɛ abofu ɔ maa be.
21 Ejakaa hyɛ, Yehowa je e hi he ɔ kɛ ma
Konɛ e ha nɛ nihi nɛ a ngɛ zugba a nɔ ɔ nɛ a bu a yayami ɔ he akɔtaa,
Nɛ zugba a ma je muɔ si nɛ e pue ɔ kpo
Nɛ zugba a be nihi nɛ e gbe ɔ nɔ laae hu.”