5 Mose

12 “Blɔ tsɔɔmihi kɛ kojomihi nɛ nyɛɛ hyɛ nɛ hi nɛ nyɛɛ ye a nɔ ligbihi tsuo nɛ nyɛ maa hi wami mi ngɛ zugba nɛ Yehowa o nɛmɛ ɔmɛ a Mawu ɔ kɛ ma ha mo kaa o nɔ́ ɔ nɔ ɔ ji nɛ ɔmɛ nɛ. 2 Nyɛ puɛ hehi tsuo nɛ je mahi nɛ nyɛ maa fiee mɛ ɔ sɔmɔɔ a mawu ɔmɛ ngɛ ɔ pɛsɛpɛsɛ, yoku gagaa amɛ a nɔ jio, kpongu ɔmɛ a nɔ jio, tso saisaa nɛ bɔ kusuu sisi jio. 3 Nyɛɛ hule a we afɔle sami la tɛ ɔmɛ, nyɛɛ ywia a wɔ titima amɛ, nyɛɛ sã a wɔ tso* ɔmɛ ngɛ la mi, nɛ nyɛɛ poo a mawu ɔmɛ a we amaga amɛ. Nyɛ tsu* a biɛhi ngɛ lejɛ ɔ pɛsɛpɛsɛ.

4 “Nyɛ ko sɔmɔ Yehowa nyɛ Mawu ɔ ngɛ jamɛ a blɔ ɔ nɔ. 5 Mohu ɔ, nyɛ hla Yehowa nyɛ Mawu ɔ ngɛ he fɛɛ he nɛ e maa hla kaa e biɛ ɔ nɛ hi, nɛ́ e maa pee e hi he ngɛ nyɛ wɛtso ɔmɛ tsuo a kpɛti ɔ, nɛ nyɛɛ ya lejɛ ɔ. 6 Lejɛ ɔ ji he nɛ nyɛɛ ngɔ nyɛ sami afɔle ɔmɛ, nyɛ we afɔle ɔmɛ, nyɛ mi dlami nyɔngmanyɔngma mi kakaaka amɛ, nyɛ yemi kɛ buami ɔmɛ, nyɛ si womi afɔle ɔmɛ, nyɛ afɔlehi nɛ je tsui mi faa a, kɛ nyɛ na amɛ a kekle bimɛ ɔmɛ kɛ nyɛ to ɔmɛ a kekle bimɛ ɔmɛ kɛ ya. 7 Nyɛɛ kɛ nyɛ we mi bi ɔmɛ nɛ ye nyɛ blɔ fa mi nɔ́ ɔ ngɛ lejɛ ɔ ngɛ Yehowa nyɛ Mawu ɔ hɛ mi, nɛ nyɛ nya ngɛ níhi tsuo nɛ nyɛ pee ɔ mi, ejakaa Yehowa nyɛ Mawu ɔ jɔɔ nyɛ.

8 “Nyɛ ko pee kaa bɔ nɛ wa ngɛ pee ngɛ hiɛ ɔ mwɔnɛ ɔ, nɛ́ nɔ fɛɛ nɔ ngɛ nɔ́ nɛ da ngɛ lɛ nitsɛ e hɛ mi* pee ɔ, 9 ejakaa nyɛ sui he jɔɔmi he ɔ, kɛ zugba nɛ Yehowa nyɛ Mawu ɔ kɛ ngɛ nyɛ hae ɔ nɔ lolo. 10 Ke nyɛ po Yordan Pa a, nɛ nyɛ ya ngɛ zugba nɛ Yehowa nyɛ Mawu ɔ kɛ ngɛ nyɛ hae kaa nyɛ nɔ́ ɔ nɔ ɔ, bɔ fɛɛ bɔ nɛ ji ɔ, e ma ha nyɛ he maa jɔ nyɛ ngɛ nyɛ he nyɛli nɛ a bɔle nyɛ ɔ tsuo a he, nɛ nyɛ maa hi si slɔkee. 11 Nyɛɛ ngɔ níhi tsuo nɛ i ngɛ nyɛ fãe ke nyɛ kɛ ya a kɛ ya he nɛ Yehowa nyɛ Mawu ɔ maa hla kaa e biɛ ɔ nɛ hi ɔ; nyɛ sami afɔle ɔmɛ, nyɛ we afɔle ɔmɛ, nyɛ mi dlami nyɔngmanyɔngma mi kakaaka amɛ, nyɛ yemi kɛ buami ɔmɛ, kɛ si womi afɔle fɛɛ si womi afɔle nɛ nyɛ wo si kaa nyɛɛ kɛ ma ha Yehowa a. 12 Nyɛ ma nya ngɛ Yehowa nyɛ Mawu ɔ hɛ mi, nyɛɛ kɛ nyɛ binyumu ɔmɛ, nyɛ biyi ɔmɛ, nyɛ nyɔguɛ nyumu ɔmɛ kɛ nyɔguɛ yi ɔmɛ, kɛ Levi bi nɛ a ngɛ nyɛ ma amɛ* a mi ɔ, ejakaa a be blɔ fa mi nɔ́ ko loo weto ní ko ngɛ nyɛ kpɛti. 13 Moo hyɛ nɛ hi nɛ o ko sã o sami afɔle ɔmɛ ngɛ he fɛɛ he ko nɛ o maa na. 14 Moo sã o sami afɔle ɔmɛ ngɛ he nɛ Yehowa maa hla ngɛ nyɛ wɛtso ɔmɛ a kpɛti ɔ pɛ, nɛ lejɛ ɔ nɛ nyɛɛ pee nɔ́ fɛɛ nɔ́ nɛ i ngɛ nyɛ fãe ɔ ngɛ.

15 “Se be fɛɛ be nɛ lo ma jlo mo ɔ,* o ma nyɛ maa gbe nɛ o ye, ngɛ jɔɔmihi nɛ Yehowa o Mawu ɔ jɔɔ mo ɔ nya ngɛ o ma amɛ* tsuo a mi. Nɔ nɛ e he tsɔ kɛ nɔ nɛ e he tsɔ we tsuo ma nyɛ maa ye eko kaa bɔ nɛ o yeɔ odabɔ loo afugbɛ ɔ. 16 Se nyɛ ko ye muɔ ɔ; nyɛ plɛ kɛ pue zugba kaa nyu. 17 A be mo blɔ ngmɛe nɛ o ye o ngma mi dlami nyɔngma mi kake ɔ, o wai ehe ɔ, o nu ɔ, o na amɛ kɛ o to ɔmɛ a kekle bi ɔmɛ, si womi afɔle fɛɛ si womi afɔle nɛ o wo si kaa o kɛ ma ha, o we afɔle nɛ je tsui mi faa a, aloo o yemi kɛ buami ɔ ngɛ o ma amɛ* a mi. 18 Moo ye ní nɛ ɔmɛ ngɛ Yehowa o Mawu ɔ hɛ mi, ngɛ he nɛ Yehowa o Mawu ɔ maa hla a; o kɛ o binyumu, o biyo, o sɔmɔlɔ kɛ o mawayo, kɛ Levi bi nɛ ngɛ o ma amɛ* a mi ɔ; nɛ o nya ngɛ Yehowa o Mawu ɔ hɛ mi ngɛ níhi tsuo nɛ o pee ɔ mi. 19 Moo hyɛ nɛ hi nɛ o ko ma o hɛ kɛ fɔ Levi bi ɔmɛ a nɔ be abɔ nɛ o ngɛ zugba a nɔ ɔ.

20 “Ke Yehowa o Mawu ɔ bli o zugba kpɔ ɔ mi kaa bɔ nɛ e wo mo si ɔ, nɛ o de ke, ‘I ngɛ hlae nɛ ma ye lo,’ akɛnɛ lo ngɛ mo* jloe he je ɔ, o ma nyɛ maa ye lo be fɛɛ be nɛ e ma jlo mo.* 21 Ke he nɛ Yehowa o Mawu ɔ hla kaa e ma ha nɛ e biɛ ɔ nɛ hi ɔ kɛ o he kɛ ɔ, lɛɛ moo gbe o na amɛ loo o to ɔmɛ nɛ Yehowa kɛ ha mo ɔ eko, kaa bɔ nɛ i fã mo ɔ, nɛ o ye ngɛ o ma amɛ* a mi be fɛɛ be nɛ e ma jlo mo.* 22 O ma nyɛ maa ye kaa bɔ nɛ o yeɔ odabɔ kɛ afugbɛ ɔ; nɔ nɛ he tsɔ kɛ nɔ nɛ he tsɔ we tsuo ma nyɛ maa ye. 23 Se moo fia o pɛɛ si kaa o be muɔ ɔ yee, ejakaa muɔ ɔ ji wami ɔ* nɛ, nɛ koo ye wami ɔ* kɛ lo ɔ tsuo. 24 Koo ye muɔ ɔ. Mo plɛ kɛ pue zugba kaa nyu. 25 Koo ye muɔ ɔ, bɔ nɛ pee nɛ e hi ha o kɛ o bimɛ nɛ maa ba ngɛ o se ɔ, ejakaa o ngɛ nɔ́ nɛ da pee ngɛ Yehowa hɛ mi. 26 Ke o ma he nɛ Yehowa maa hla a, moo ngɔ ní klɔuklɔuhi nɛ a ji o nɔ́ ɔ kɛ o si womi afɔle ɔmɛ pɛ kɛ ba. 27 Lejɛ ɔ nɛ o maa sã o sami afɔle ɔmɛ, nɛ ji lo ɔ kɛ muɔ ɔ ngɛ, ngɛ Yehowa o Mawu ɔ we afɔle sami la tɛ ɔ nɔ, nɛ́ o plɛ lohwehi nɛ o kɛ ma afɔle sami ɔ a muɔ kɛ pue Yehowa o Mawu ɔ we afɔle sami la tɛ ɔ he, se lo ɔ lɛɛ o ma nyɛ maa ye.

28 “Moo hyɛ nɛ hi nɛ o ye munyu nɛ ɔmɛ tsuo nɛ i ngɛ mo fãe ɔ nɔ, bɔ nɛ pee nɛ be fɛɛ be ɔ, e hi ha o kɛ o bimɛ ɔmɛ nɛ a maa ba ngɛ o se ɔ, ejakaa o ngɛ nɔ́ nɛ hi kɛ nɔ́ nɛ da pee ngɛ Yehowa o Mawu ɔ hɛ mi.

29 “Ke Yehowa o Mawu ɔ kpata je mahi nɛ o maa fiee mɛ ɔ a hɛ mi, nɛ o ya ngɛ a zugba a nɔ ɔ, 30 moo hyɛ nɛ hi nɛ ke a kpata a hɛ mi ngɛ o hɛ mi se ɔ, o ko ya kase a ní peepee ɔmɛ. Ko ya bi a mawu ɔmɛ a he sane ke, ‘Kɛ je ma nɛ ɔmɛ plɛ kɛ sɔmɔ a mawu ɔmɛ ha kɛɛ? Imi hu ma pee jã.’ 31 Ko ja Yehowa o Mawu ɔ jã, ejakaa ní hiemi níhi nɛ Yehowa nyɛ ɔ, lɔ ɔ ji nɔ́ nɛ a peeɔ kɛ haa a mawu ɔmɛ, nɛ a sãã a binyumu ɔmɛ kɛ a biyi ɔmɛ po ngɛ la mi kɛ haa a mawu ɔmɛ. 32 Nɔ́ fɛɛ nɔ́ nɛ i ngɛ nyɛ fãe ɔ, lɔ ɔ nɛ e sa nɛ nyɛɛ pee. Nyɛ ko ngɔ nɔ́ ko kɛ piɛɛ he, nɛ nyɛ ko je nɔ́ ko ngɛ mi hulɔ.