Yohane Sane Kpakpa a

9 Benɛ e bee ɔ, e na nyumu ko nɛ kɛ je be nɛ a fɔ lɛ ɔ, e hyɛ we nɔ́. 2 Nɛ e kaseli ɔmɛ bi lɛ ke: “Rabi, mɛnɔ lɛ e pee yayami loko a fɔ nyumu nɛ ɔ hɛ yuyuilɔ ɔ, nyumu nɛ ɔ aloo e fɔli?” 3 Yesu ha heto ke: “Nyumu nɛ ɔ pee we yayami ko, nɛ e fɔli ɔmɛ hu pee we yayami ko, mohu ɔ, e ba mi jã bɔ nɛ pee nɛ Mawu ní tsumi ɔmɛ nɛ a je kpo ngɛ e sane ɔ mi. 4 Be mi nɛ je jɔɛ lolo nɛ ɔ, e sa nɛ wa tsu nɔ nɛ e tsɔ mi ɔ ní tsumi ɔmɛ; je ma jɔmi, nɛ nɔ ko be nyɛe maa tsu ní. 5 Be abɔ nɛ i ngɛ je ɔ mi nɛ ɔ, imi ji je ɔ la a nɛ.” 6 Benɛ e de ní nɛ ɔmɛ ta a, e su lada kɛ pue zugba nɛ e ngɔ kɛ pɔtɔ zu, nɛ e ngɔ zu ɔ nɛ e pɔtɔ ɔ kɛ kpa nyumu ɔ hɛngmɛ ɔmɛ a nɔ 7 nɛ e de lɛ ke: “Ya fɔ ngɛ Siloam taku ɔ mi” (Siloam sisi ji, “A Tsɔ Lɛ”). Nɛ e ho nɛ e ya fɔ, nɛ benɛ e kpale kɛ ba a, e ngɛ nɔ́ hyɛe.

8 Kɛkɛ nɛ nihi nɛ a ngɛ kpɔ ɔ mi, kɛ nihi nɛ be ko nɛ be ɔ, a naa lɛ nɛ e hii ní bae ɔ bɔni bimi ke: “Anɛ pi nyumu ɔ nɛ jinɛ e hiɔ si nɛ e hii ní bae ɔ ji nɛ ɔ lo?” 9 Ni komɛ ngɛ dee ke: “Lɛ ji nɛ ɔ nɛ.” Ni kpa komɛ hu ngɛ dee ke: “Dɛbi, e je lɛ kɛkɛ.” Nyumu ɔ de mɛ si abɔ ke: “Imi.” 10 Lɔ ɔ he ɔ, a bi lɛ ke: “Lɛɛ kɛ e ba lɛ kɛɛ nɛ o hɛngmɛ ɔmɛ bli mɔ?” 11 E ha heto ke: “Nyumu ɔ nɛ a tsɛɔ lɛ ke Yesu ɔ lɛ e pɔtɔ zu nɛ e kɛ kpa ye hɛngmɛ ɔmɛ a nɔ, nɛ e de mi ke, ‘Yaa Siloam nɛ o ya fɔ.’ Lɔ ɔ he ɔ, i ya nɛ i ya fɔ, nɛ i bɔni nɔ́ hyɛmi.” 12 Kɛkɛ nɛ a bi lɛ ke: “Jije jamɛ a nyumu ɔ ngɛ?” E de ke: “I li.”

13 A ngɔ nyumu ɔ nɛ jinɛ e ji hɛ yuyuilɔ ɔ kɛ ho Farisi bi ɔmɛ a ngɔ ya. 14 E ba mi kaa ligbi ɔ nɛ Yesu pɔtɔ zu ɔ nɛ e bli nyumu ɔ hɛngmɛ ɔ, e ji He Jɔɔmi Ligbi. 15 Enɛ ɔ he ɔ, Farisi bi ɔmɛ hu bɔni nyumu ɔ nɔ́ nɛ ha nɛ e ngɛ nɔ́ hyɛe ɔ he sane bimi. E de mɛ ke: “E ngɔ zu nɛ a pɔtɔ kɛ kpa ye hɛngmɛ ɔmɛ a nɔ, nɛ i fɔ, nɛ i ngɛ nɔ́ hyɛe.” 16 Kɛkɛ nɛ Farisi bi ɔmɛ a ti ni komɛ bɔni demi ke: “Pi Mawu ngɔ nɛ nyumu nɛ ɔ je, ejakaa e yi He Jɔɔmi Ligbi ɔ.” Ni kpahi de ke: “Kɛ yayami peelɔ ma plɛ kɛ pee okadihi kaa kikɛ nɛ ɔ kɛɛ?” Enɛ ɔ ha nɛ a mi gba. 17 Nɛ a kpale bi hɛ yuyuilɔ ɔ ke: “Mɛni o ngɛ dee ngɛ e he, ejakaa o hɛngmɛ lɛ e bli ɔ nɛ?” Nyumu ɔ de ke: “E ji gbalɔ.”

18 Se Yudabi ɔmɛ he we yi kaa jinɛ e hɛngmɛ yu nɛ e bɔni nɔ́ hyɛmi, kɛ ya si be nɛ a tsɛ nyumu ɔ nɛ jehanɛ ɔ lɛɛ e ngɛ nɔ́ hyɛe ɔ fɔli ɔmɛ. 19 Nɛ a bi mɛ ke: “Anɛ nɔ nɛ ɔ ji nyɛ binyumu ɔ nɛ nyɛ ke nyɛ fɔ lɛ hɛ yuyuilɔ ɔ lo? Lɛɛ kɛ e ba lɛ kɛɛ nɛ amlɔ nɛ ɔ, e ngɛ nɔ́ hyɛe ɔ?” 20 E fɔli ɔmɛ ha heto ke: “Wa le kaa wa binyumu ɔ ji nɛ ɔ nɛ, nɛ wa fɔ lɛ hɛ yuyuilɔ. 21 Se bɔ nɛ e plɛ kɛ ngɛ nɔ́ hyɛe amlɔ nɛ ɔ lɛɛ wa li; nɛ nɔ nɛ e bli e hɛngmɛ ɔ hu wa li. Nyɛ bi lɛ. E wa. E sa nɛ lɛ nitsɛ é je e nya.” 22 E fɔli ɔmɛ de ní nɛ ɔmɛ akɛnɛ a ngɛ Yudabi ɔmɛ gbeye yee ɔ he je, ejakaa Yudabi ɔmɛ so momo kaa ke nɔ ko de ke Yesu ji Kristo ɔ, e sa nɛ a fiee jamɛ a nɔ ɔ kɛ je kpe he ɔ. 23 Enɛ ɔ he je nɛ e fɔli ɔmɛ de ke: “E wa. Nyɛ bi lɛ” ɔ nɛ.

24 Lɔ ɔ he ɔ, a kpale tsɛ nyumu ɔ nɛ jinɛ e hɛngmɛ yu ɔ si enyɔne, nɛ a de lɛ ke: “Moo wo Mawu hɛ mi nyami; wa le kaa nyumu nɛ ɔ ji yayami peelɔ.” 25 E ha mɛ heto ke: “Yayami peelɔ ji lɛ jio, pi yayami peelɔ ji lɛ jio, i li. Nɔ́ pɛ nɛ i le ji kaa jinɛ ye hɛngmɛ yu, se amlɔ nɛ ɔ, i ngɛ nɔ́ hyɛe.” 26 Kɛkɛ nɛ a bi lɛ ke: “Mɛni e pee mo? Mɛni blɔ nɔ e gu kɛ bli o hɛngmɛ ɔ?” 27 E ha mɛ heto ke: “I de nyɛ momo, se nyɛ bui tue. Mɛni he je nɛ nyɛ ngɛ hlae nɛ nyɛɛ nu ekohu ɔ? Anɛ nyɛ hu nyɛ suɔ kaa nyɛ maa pee e kaseli lo?” 28 Kɛkɛ nɛ a ye e he fɛu nɛ a de ke: “Mo ji jamɛ a nyumu ɔ kaselɔ, se wɔɔ lɛɛ Mose kaseli ji wɔ. 29 Wa le kaa Mawu kɛ Mose tu munyu, se nyumu nɛ ɔ lɛɛ, wa li he nɛ e je.” 30 Nyumu ɔ ha mɛ heto ke: “Enɛ ɔ lɛɛ e ngɛ nyakpɛ pɛ kaa nyɛ li he nɛ e je, se kɛ̃ ɔ, e bli ye hɛngmɛ. 31 Wa le kaa Mawu bui yayami peeli tue, se ke nɔ ko yeɔ Mawu gbeye nɛ e peeɔ e suɔmi nya ní ɔ, e buɔ jamɛ a nɔ ɔ tue. 32 Kɛ je blema a, wa nui kaa nɔ ko bli nɔ ko nɛ a fɔ lɛ hɛ yuyuilɔ ɔ hɛngmɛ hyɛ. 33 Ke pi Mawu ngɔ nɛ nyumu nɛ ɔ je ɔ, jinɛ e ko nyɛ we nɔ́ ko peemi kulaa.” 34 A de lɛ ke: “Mo nɛ a fɔ mo ngɛ yayami tuu mi ɔ, mo lɛ o ngɛ wɔ ní tsɔɔe nɛ ɔ lo?” Kɛkɛ nɛ a fiee lɛ kɛ je kpo!

35 Yesu nu kaa a fiee lɛ kɛ je kpo, nɛ benɛ e na lɛ ɔ, e bi lɛ ke: “Anɛ o heɔ nɔmlɔ Bi ɔ yeɔ lo?” 36 Nyumu ɔ he nɔ ke: “Etsɛ, lɛ ji mɛnɔ, konɛ ma he lɛ ma ye?” 37 Yesu de lɛ ke: “O na lɛ, nɛ ngɛ anɔkuale mi ɔ, lɛ nɛ e kɛ mo ngɛ munyu tue ɔ nɛ.” 38 E de ke: “Nyɔmtsɛ, i heɔ lɛ yeɔ.” Nɛ e kplã si ngɛ e hɛ mi.* 39 Kɛkɛ nɛ Yesu de ke: “Kojomi nɛ ɔ he je nɛ i ba je ɔ mi ɔ nɛ, konɛ nihi nɛ a hyɛ we nɔ́ ɔ nɛ a hyɛ nɔ́, nɛ́ nihi nɛ a ngɛ nɔ́ hyɛe ɔ a hɛngmɛ nɛ yu.” 40 Farisi bi nɛ a ngɛ lejɛ ɔ nu ní nɛ ɔmɛ, nɛ a bi lɛ ke: “Tse wɔɔ lɛɛ wa hɛngmɛ yu we, aloo wa hɛngmɛ yu?” 41 Yesu de mɛ ke: “Kaa nyɛ hɛngmɛ yu ɔ, jinɛ yayami ko be nyɛ he. Se amlɔ nɛ ɔ, nyɛ ngɛ dee ke, ‘Wa ngɛ nɔ́ hyɛe.’ Nyɛ yayami ɔ ngɛ nyɛ he.”