Yesaya
30 Yehowa ke: “Musu tloo bi tue gboli,
Nɛ a peeɔ níhi nɛ ji ye ngɔ,
Nɛ a kɛ nihi soɔ somi* nɛ ye mumi ɔ kplɛɛ we nɔ,
Bɔ nɛ pee nɛ a pee yayami kɛ to yayami nɛ a pee ɔ nɔ.
2 A kpleɔ kɛ yaa Egipt be mi nɛ a de we mi,*
Konɛ a ya laa a he ngɛ Farao he piɛ pomi sisi,*
Nɛ a sa we ngɛ Egipt hɔ ɔ sisi.
3 Se Farao he piɛ pomi ɔ maa pee zo kɛ ha nyɛ,
Nɛ we nɛ nyɛ ma ya sa ngɛ Egipt hɔ ɔ sisi ɔ maa pee hɛ mi si puemi.
4 Ejakaa e ma nikɔtɔma amɛ ngɛ Zoan,
Nɛ e tsɔli ɔmɛ ya su Hanes.
5 Ma nɛ se nami ko ji e mi kɛ bɛ,
Nɛ́ e be nyɛe maa ye bua nɔ, nɛ e he be se nami ko,
Se mohu zo kɛ hɛ mi si puemi lɛ e kɛ baa a,
Ma ha nɛ zo maa gbe mɛ tsuo.”
6 Munyu nɛ a tu kɛ si lohwehi nɛ a ngɛ woyi je ɔ ji nɛ ɔ nɛ:
A gu zugba kɛ e nɔ haomi kɛ nyagba,
Zugba nɛ jata, jata nɛ ngɛ huae ngɛ nɔ,
Zugba nɛ sinɔ, la sinɔ nɛ e tsɛ̃ɔ* ngɛ nɔ ɔ nɔ kɛ ho.
A kɛ ní nɛ a ná a pue tejihi a nɔ
Nɛ a kɛ a tlomi ɔmɛ fɔ afukpɔngɔhi a se mi kpɔ* ɔmɛ a nɔ.
Se ní nɛ ɔmɛ a he be se nami bae kɛ ha ni ɔmɛ.
7 Ejakaa se nami ko kulaa be Egipt yemi kɛ buami ɔ he.
Enɛ ɔ he ɔ, i tsɛ lɛ ke: “Rahab nɛ hii si nɛ e mimiɛ we e he.”
8 “Amlɔ nɛ ɔ, ho nɛ o ya ngma ngɛ tɛ tɛtlɛɛ nɔ ngɛ a hɛ mi,
Nɛ o ngma ngɛ womi mi
Konɛ e fɔ si kɛ ha hwɔɔ se
Kaa odase nɛ ngɛ daa.
9 Ejakaa a ji atuã tsɔli, sisimi bimɛ,
Bimɛ nɛ a sume kaa a maa bu Yehowa mlaa* tue.
10 A deɔ ní nali ɔmɛ ke, ‘Nyɛ ko na ní,’
Nɛ a deɔ gbali ɔmɛ ke; ‘Nyɛ ko de wɔ nina nɛ ji anɔkuale.
Nyɛ de wɔ níhi nɛ maa ngɔ ngɛ wa tue mi; Nyɛɛ na lakpa ninahi.
11 Nyɛɛ je blɔ ɔ nɔ, nyɛ gba kɛ je blɔ ɔ nɔ.
Nyɛ ko tu Israel Nɔ Klɔuklɔu ɔ he munyu kɛ tsɔɔ wɔ hu.’”*
12 Lɔ ɔ he ɔ, nɔ́ nɛ Israel Nɔ Klɔuklɔu ɔ ngɛ dee ji nɛ ɔ nɛ:
“Akɛnɛ nyɛ kua munyu nɛ ɔ
Nɛ nyɛɛ kɛ nyɛ hɛ fɔ lakpa kɛ sisimi nɔ
Nɛ nyɛɛ kɛ nyɛ hɛ fɔ ní nɛ ɔmɛ a nɔ he je ɔ,
13 Nyɛ tɔmi ɔmɛ maa pee kaa gbogbo nɛ ku
Kaa gbogbo nɛ ya hiɔwe nɛ e miɔ nɛ e maa ku.
E maa ku si kake too, e maa ku tlukaa
14 E maa ywia kaa zu buɛ ngua,
E maa ywia dukuduku, nɛ a be ngɛyu kake po nae ngɛ mi
Nɛ́ a kɛ maa je la ngɛ latɛ mi
Aloo nɛ a kɛ maa yɛ nyu ngɛ nɔ́ mi.”*
15 Ejakaa nɔ́ nɛ Nyɔmtsɛ Matsɛ Yehowa, Israel Nɔ Klɔuklɔu ɔ ngɛ dee ji nɛ ɔ nɛ:
“Ke nyɛ kpale kɛ ba ye ngɔ, nɛ nyɛ pee kpoo ɔ, ma he nyɛ yi wami;
Ke nyɛ pee kpoo nɛ nyɛ ngɔ nyɛ hɛ kɛ fɔ ye nɔ ɔ, nyɛ ma ná he wami.”
Se nyɛ kplɛɛ we.
16 Mohu ɔ, nyɛ de ke: Dɛbi, wa maa hi okpɔngɔhi a nɔ kɛ tu fo kɛ je!”
Lɔ ɔ he ɔ, nyɛ maa tu fo ɔ kɛ̃.
Nyɛ de hu ke, “okpɔngɔhi nɛ a he sɔɔ nɔ lɛ wa maa hi!”
Lɔ ɔ he ɔ, nihi nɛ a maa fiee nyɛ se ɔ hu a he maa sɔ.
17 Nɔ kake maa wo nihi akpe a he gbeye, nɛ a he maa do blibliibli;
Nihi enuɔ maa wo nyɛ he gbeye, nɛ nyɛ maa tu fo
Kɛ yaa si be nɛ nyɛ kpɛti nihi nɛ a maa piɛ ɔ maa pee kaa abalaa tso nɛ maa si ngɛ yoku nɔ,
Kaa okadi tso nɛ maa si ngɛ yoku wayo nɔ.
Ejakaa Yehowa ji Mawu nɛ e yeɔ dami sane.
Nihi tsuo nɛ a hyɛɛ lɛ blɔ ɔ* ngɛ bua jɔmi.
19 Ke ni ɔmɛ hi Zion, nɛ ngɛ Yerusalem ɔ, o be ya foe. Ke e nu o ya fomi ɔ, e maa na mo mɔbɔ kokooko; ke e ná nɛ e nu o ya fomi ɔ pɛ, e ma ha mo heto. 20 E ngɛ mi kaa Yehowa ma ha mo haomi kaa niye ní, nɛ e ma ha mo yi mi wami kaa nyu mohu lɛɛ, se o Tsɔɔlɔ Ngua a kɛ e hɛ mi be mo laae hu, nɛ o maa na o Tsɔɔlɔ Ngua a kɛ mo nitsɛ o hɛngmɛ. 21 Ke o gba kɛ ya o hiɔ nɔ aloo o muɔ nɔ ɔ, o maa nu gbi ko ngɛ o se nɛ ngɛ dee ke, “Blɔ ɔ ji nɛ ɔ nɛ. Moo nyɛɛ nɔ.”
22 Nɛ o ma ble sika hiɔ nɛ a kɛ ha o we amaga amɛ a he ɔ, kɛ sika tsu nɛ a kɛ ha o dade amaga amɛ a he ɔ. Nyɛ ma sake mɛ kɛ fɔ he kaa bo nɛ yo nɛ e pee yihi a ní kɛ dla e he, nɛ nyɛ ma de mɛ ke, “Nyɛɛ je hiɔ kɛ ho!”* 23 Nɛ e ma ha nɛ hiɔmi maa nɛ kɛ pue wu nɛ nyɛ du ngɛ zu mi ɔ nɔ, nɛ ní nɛ zugba a maa ba a maa hiɛ babauu nɛ e maa hi.* Jamɛ a ligbi ɔ, nyɛ lohwe ɔmɛ maa ye ní ngɛ lohwehi a ní yemi he nɛ kle. 24 Nɛ nahi kɛ tejihi nɛ a tsuɔ ní ngɛ o zugba a nɔ ɔ maa ye nga kpakpa nɛ a futu mi nɛ a kɛ sofi kɛ fɔɔki sa mi. 25 Ligbi nɛ a maa gbe nihi babauu nɛ mɔ ɔmɛ maa ku pue si ɔ, pahi kɛ nyu dɔhi maa be ngɛ yoku gagaaga amɛ kɛ kpongu gagaaga amɛ tsuo a nɔ. 26 Nɛ nyɔhiɔ ɔ kpɛmi maa pee kaa pu la; nɛ pu la a nya maa wa kɛ bɔ he si kpaago, e nya maa wa kaa ligbi kpaago pu la nɛ ngɛ tsoe ligbi kake. Enɛ ɔ maa ya nɔ ngɛ ligbi nɛ Yehowa maa fi e we bi ɔmɛ a kumi ɔ, nɛ e ma ha nɛ pa nɛ a ná benɛ e fia mɛ nɔ́ ɔ ma gbo ɔ.
27 Hyɛ, Yehowa biɛ ɔ ma kɛ je tsitsaa,
E ma kɛ e mi mi fumi kɛ bɔku nɛ e mi ti kpii.
Abofu hyi e nya mi tɔ,
Nɛ e lilɛ ngɛ kaa la nɛ kpataa nɔ́ hɛ mi.
28 E mumi* ɔ ngɛ kaa pa nɛ hyi kɛ ta nɔ kuɛ si,
Nɛ e ma mimiɛ je ma amɛ ngɛ hɛ mi kpatami nɔ́ mi sami nɔ́ nɔ;*
Nɛ e maa wo a tsitsa mi kpa nɛ́ ma ha nɛ a laa blɔ.
29 Se nyɛ lami ɔ maa pee kaa la nɛ a la nyɔ mi
Ke nyɛ ngɛ nyɛ he dlae* nɛ nyɛɛ ye gbijlɔ ɔ.
O bua maa jɔ ngɛ o tsui mi kaa nɔ ko nɛ
E ngɛ bɛ kpae
Kɛ ngɛ nyɛɛe kɛ yaa Yehowa yoku ɔ nɔ, kɛ yaa Israel Tɛsa a ngɔ.
30 Yehowa ma ha nɛ a maa nu e gbi nɛ́ hɛ mi ngɛ nyami ɔ,
Nɛ e ma je e nine kpo ke e kɛ abofu ngɛ kplee kɛ ma,
Kɛ la nɛ kpataa nɔ́ hɛ mi,
Kɛ hiɔmi kɛ hiɔwe simi kɛ gbiɛngongu.
31 Ejakaa Yehowa gbi ɔ ma ha nɛ Asiria maa ye gbeye wawɛɛ;
E maa fiaa lɛ tso.
32 Be fɛɛ be nɛ Yehowa maa ngɔ
Tue gblami tso kɛ fia Asiria a,
Akasawa kɛ saku pɛmi maa piɛɛ he
Be mi nɛ e woɔ e nine nɔ kɛ siɔ mɛ ngɛ ta mi ɔ.
33 Ejakaa a dla e Tofet* ɔ kɛ fɔ si momo;
A dla lɛ hu kɛ ha matsɛ ɔ.
Hehi nɛ a bua tsohi nya ngɛ ɔ, e ha nɛ e mi kuɔ nɛ e mi bli,
Nɛ la kɛ tsohi babauu ngɛ mi.
Yehowa gugwɔ mi kɔɔhiɔ nɛ ngɛ kaa sɔlfa babaaba a
Ma ha nɛ la maa nɔ mi.