Yesaya

7 Jehanɛ ɔ, ngɛ Yuda matsɛ Ahaz nɛ ji Uziah bi Yotam binyumu ɔ ligbi ɔmɛ a mi ɔ, Siria Matsɛ Rezin kɛ Israel matsɛ Peka nɛ ji Remalia binyumu ɔ kuɔ kɛ ba konɛ e* kɛ Yerusalem nɛ ba hwu ta, se e nyɛ we nɛ e ngɔ ma a. 2 A ya bɔ David we ɔ amaniɛ ke: “Siria kɛ Efraim pee kake.”

Nɛ Ahaz tsui kɛ e we bi ɔmɛ a tsui bɔni simi kaa hue tso mi tsohi nɛ kɔɔhiɔ ngɛ mɛ mimiɛe.

3 Kɛkɛ nɛ Yehowa de Yesaya ke: “I kpa mo pɛɛ, jee kpo nɛ o kɛ o binyumu Shear Yashub* nyɛɛ kɛ Ahaz nɛ ya kpe ngɛ yiti je taku ɔ nyu dɔ ɔ nya, ngɛ blɔ ngua a nɛ yaa níhi a he fɔli a zugba a nɔ ɔ he. 4 De lɛ ke, ‘Hyɛ saminya nɛ o ko ye tsui. Koo ye gbeye, nɛ o tsui hu nɛ ko po ngɛ tso kuhi nɛ a ngɛ lasuku jee ɔ a tso kpoku enyɔ nɛ ɔmɛ a he, ngɛ Rezin kɛ Siria kɛ Remalia binyumu ɔ a we abofu nɛ nya wa a he je. 5 Ejakaa Siria kɛ Efraim kɛ Remalia binyumu ɔ so konɛ a ye mo awi, nɛ a ngɛ dee ke: 6 “Nyɛ ha nɛ waa kuɔ kɛ ya tua Yuda nɛ wa ya tsɔtslɔɔ e mi,* nɛ waa ngɔ ma a,* nɛ waa wo Tabeel binyumu ɔ Yuda nɔ matsɛ.”

 7 “‘Nɔ́ nɛ Nyɔmtsɛ Matsɛ Yehowa ngɛ dee ji nɛ ɔ nɛ:

10 Yehowa ya nɔ nɛ e kɛ Ahaz tu munyu ke: 11 “Mo bi okadi ko kɛ je Yehowa o Mawu ɔ ngɔ; e mi ma nyɛ maa kuɔ kaa Yɔkɔ,* loo e ma nyɛ maa ya hiɔwe kaa bɔku ɔ.” 12 Se Ahaz de ke: “I be bie, nɛ i be Yehowa kae hulɔ.”

13 Kɛkɛ nɛ Yesaya de ke: “Oo David we, i kpa nyɛ pɛɛ, nyɛɛ bu tue. Anɛ adesahi a tsui si tomi nɛ nyɛ ka a pi ha nyɛ lo? Anɛ e sa kaa nyɛɛ ka Mawu hu tsui si tomi ɔ lo? 14 Enɛ ɔ he ɔ, Yehowa nitsɛ ma ha nyɛ okadi ko: Hyɛ! Yiheyo* ɔ maa ngɔ hɔ nɛ e ma fɔ binyumu, nɛ e maa wo lɛ biɛ ke Yimanuel.* 15 Loko e maa le bɔ nɛ a kuaa nɔ́ yaya nɛ a hlaa nɔ́ kpakpa a, jamɛ a be ɔ, e bɔni bɔta kɛ hwo yemi momo. 16 A ma kua matsɛmɛ enyɔ ɔmɛ nɛ o ngɛ mɛ gbeye yee ɔ a zugba a kulaa loko nyumuyo ɔ maa le bɔ nɛ a kuaa nɔ́ yaya nɛ a hlaa nɔ́ kpakpa ha. 17 Yehowa maa ngɔ haomi be ko nɛ eko bɛ hyɛ kɛ je ligbi nɛ Efraim tsɔ e he ngɛ Yuda he ɔ kɛ ba mo kɛ o we bi ɔmɛ kɛ o tsɛ we ɔ nɔ, ejakaa e maa tsɔ Asiria matsɛ ɔ kɛ ba.

18 “Jamɛ a ligbi ɔ, Yehowa ma kpa nyagba kɛ tsɛ anunuhi kɛ je Nilo dɔhi nɛ a ngɛ Egipt ɔ mi tɔɔ, kɛ hwohi nɛ a ngɛ Asiria zugba a nɔ ɔ, 19 nɛ mɛ tsuo a maa ba nɛ a ma ba ma dɔgbahi* nɛ a mi kuɔ ɔmɛ a mi, a ma ba ma tɛsahi nɛ a mi gba kɛ mio tsohi tsuo a nɔ, kɛ jehanɛ ɔ hu lohwehi a nyu numi he ɔmɛ tsuo.

20 “Jamɛ a ligbi ɔ, Yehowa maa gu yi sɛmi ha ko nɛ a hai kɛ je Pa* a kpokpa a nɔ, nɛ ji Asiria matsɛ ɔ nɔ kɛ sɛ yi bwɔmi kɛ nane he bwɔmi, nɛ e maa sɛ kpɛni hulɔ.

21 “Jamɛ a ligbi ɔ, adesa maa baa na wayo ko yi ngɛ na amɛ a kpɛti, nɛ e maa baa jijɔ enyɔ hu a yi. 22 Nɛ akɛnɛ nyɔ nyu maa hiɛ babauu he je ɔ, e maa ye bɔta, ejakaa nɔ fɛɛ nɔ nɛ maa piɛ ngɛ zugba a nɔ ɔ maa ye bɔta kɛ hwo.

23 “Jamɛ a ligbi ɔ, he fɛɛ he nɛ jinɛ wai tso 1,000 nɛ a he jua ji sika hiɔ 1,000 ngɛ ɔ, mio tsohi kɛ ngahi pɛ lɛ maa hi lejɛ ɔ. 24 Nihi maa ya lejɛ ɔ kɛ a dɛ mi kɛ̃ɛ̃ kɛ kɛ̃ɛ̃ mi bi, ejakaa zugba a tsuo ma plɛ pee mio tsohi kɛ ngahi. 25 Nɛ yoku ɔmɛ tsuo nɛ jinɛ a kɛ kpakplaa huɔ a nɔ ɔ, o be a he sue, akɛnɛ o yeɔ mio tsohi kɛ ngahi gbeye ɔ he je; a ma plɛ pee na kuhi a ní yemi he kɛ zugba nɛ jijɔhi naa nɔ.”