La

145 Oo ye Mawu kɛ ye Matsɛ, ma wo o nɔ gojoo,

Ma je o biɛ ɔ yi kɛ ya neneene.

 2 Ma je o yi ligbi ɔ tsuo;

Ma je o biɛ ɔ yi kɛ ya neneene.

 3 Yehowa kle nɛ e sa nɛ a je e yi wawɛɛ;

E kle pe bɔ nɛ juɛmi ma nyɛ maa kpe he.*

 4 A ma je o ní tsumi ɔmɛ a yi kɛ ya yi nɔhi tsuo;

A maa tu níhi nɛ o kɛ o he wami pee ɔmɛ a he munyu.

 5 A maa tu o we agboje kɛ o hɛ mi nyami ɔ he munyu,

Nɛ ma pue ye yi mi tɛ ngɛ o nyakpɛ ní tsumi ɔmɛ a he.

 6 A maa tu nyakpɛ níhi nɛ o pee ɔmɛ a he munyu,*

Nɛ ma jaje bɔ nɛ o kle ha a.

 7 Ke a kai o kpakpa peemi babauu ɔ, a ma je o yi wawɛɛ,

Nɛ a kɛ bua jɔmi ma la ngɛ o dami ɔ he je.

 8 Yehowa mi mi sãã lɛ ngɛ nɔ he* nɛ e naa nɔ mɔbɔ,

E mi mi fu we mla, nɛ e suɔmi nɛ se pui ɔ hiɛ babauu.

 9 Yehowa peeɔ nihi tsuo kpakpa,

Nɛ e mɔbɔ nami ɔ jeɔ kpo ngɛ e ní tsumi ɔmɛ tsuo a mi.

10 Oo Yehowa, o ní tsumi ɔmɛ tsuo maa wo o hɛ mi nyami,

Nɛ nihi nɛ a yeɔ mo anɔkuale ɔ ma je o yi.

11 A maa jaje o matsɛ yemi nɛ hɛ mi ngɛ nyami ɔ,

Nɛ a maa tu o he wami ɔ he munyu,

ל [Lamed]

12 Konɛ adesahi nɛ a le níhi nɛ o kɛ o he wami pee ɔmɛ,

Kɛ o matsɛ yemi nɛ hɛ mi ngɛ nyami ɔ.

13 O matsɛ yemi ɔ ji neneene matsɛ yemi,

Nɛ o nɔ yemi ɔ ngɛ kɛ yaa yi nɔhi tsuo.

14 Yehowa yeɔ kɛ buaa nihi tsuo nɛ a ngɛ si nɔɔe ɔ,

Nɛ e woɔ nihi tsuo nɛ a miɔ nɛ a maa nɔ si ɔ a nɔ.

15 O nɔ lɛ nihi tsuo ngɔɔ a hɛ kɛ fɔɔ;

O haa mɛ niye ní ngɛ be nɛ sa mi.

16 O bliɔ o dɛ mi

Nɛ o haa nɔ́ fɛɛ nɔ́ nɛ ngɛ wami mi ɔ nɔ́ nɛ e hia.

17 Yehowa peeɔ nɔ́ nɛ da be fɛɛ be,

Nɛ e yeɔ anɔkuale ngɛ nɔ́ fɛɛ nɔ́ nɛ e peeɔ ɔ mi.

18 Yehowa ngɛ nihi tsuo nɛ a tsɛɔ lɛ ɔ a kasa nya,

Nihi tsuo nɛ a tsɛɔ lɛ ngɛ anɔkuale mi ɔ.

19 E haa nihi nɛ a yeɔ lɛ gbeye ɔ nɔ́ nɛ a hia;

E nuɔ ya nɛ a foɔ kɛ biɔ yemi kɛ buami ɔ, nɛ e kpɔ̃ɔ mɛ.

20 Yehowa buɔ nihi tsuo nɛ a suɔ lɛ ɔ a he,

Se yiwutsotsɛmɛ tsuo lɛɛ, e ma kpata a hɛ mi.

21 Ye nya maa jaje Yehowa yi jemi ɔ;

Nɔ́ fɛɛ nɔ́ nɛ ngɛ wami mi ɔ* nɛ je e biɛ klɔuklɔu ɔ yi kɛ ya neneene.