1 Kronika

25 Jehanɛ hu ɔ, David kɛ kuu ɔmɛ nɛ a sɔmɔɔ ɔ a nya dali ɔmɛ hla Asaf, Heman, kɛ Yedutun binyumu ɔmɛ a ti ni komɛ nɛ́ a sɔmɔ konɛ a ngɔ sakuhi kɛ kpa sakuhi, kɛ ayawahi kɛ gba. Nihi nɛ a hla mɛ kɛ ha sɔmɔmi nɛ ɔ a biɛhi ji nɛ ɔmɛ nɛ, 2 ngɛ Asaf binyumu ɔmɛ a kpɛti ɔ: Zakur, Yosef, Netania, kɛ Asharela. A ji Asaf binyumuhi, nɛ a sɔmɔɔ ngɛ Asaf blɔ tsɔɔmi nya, nɛ Asaf hu gbaa ngɛ matsɛ ɔ blɔ tsɔɔmi nya. 3 Ngɛ Yedutun blɔ fa mi ɔ, Yedutun binyumuhi ji: Gedalia, Zeri, Yeshaya, Shimei, Hashabia, kɛ Matitia, mɛ ni ekpa. A sɔmɔɔ ngɛ a tsɛ Yedutun blɔ tsɔɔmi nya, nɛ Yedutun kɛ saku gbaa, nɛ e naa Yehowa si, nɛ e jeɔ e yi. 4 Ngɛ Heman blɔ fa mi ɔ, Heman binyumuhi ji: Bukia, Matania, Uziel, Shebuel, Yerimot, Hanania, Hanani, Eliata, Gidalti, Romamti Ezer, Yoshbekasha, Maloti, Hotir, kɛ Mahaziot. 5 Ni nɛ ɔmɛ tsuo ji Heman binyumuhi. Heman ji matsɛ ɔ ní nalɔ ngɛ anɔkuale Mawu ɔ he sanehi a mi, konɛ e kɛ wo e hɛ mi nyami;* enɛ ɔ he ɔ, anɔkuale Mawu ɔ ha Heman binyumuhi 14 kɛ biyihi 3. 6 Ni nɛ ɔmɛ tsuo a sɔmɔmi ní tsumi ngɛ anɔkuale Mawu ɔ we ɔ ji kaa a kɛ ayawahi, kpa sakuhi, kɛ sakuhi maa fia la ngɛ Yehowa we ɔ, nɛ a peeɔ jã ngɛ a tsɛ ɔ blɔ tsɔɔmi nya.

Asaf, Yedutun, kɛ Heman sɔmɔɔ ngɛ matsɛ ɔ blɔ tsɔɔmi nya.

7 A kɛ a nyɛminyumu ɔmɛ nɛ a tsɔse mɛ kaa a la ha Yehowa a, a yibɔ ji 288. Mɛ tsuo a he be. 8 Lɔ ɔ he ɔ, mɛ tsuo a fɔ sɔ kɛ gba ní tsumi ɔ ha a he, nɔ nyafii jio, nɔmlɔ ngua jio, nɔ nɛ e he be jio, kaselɔ jio.

9 Kekleekle sɔ ɔ ya nɔ Asaf binyumu Yosef nɔ, nɔ́ nɛ ji enyɔ ɔ ya nɔ Gedalia nɔ (e kɛ e nyɛminyumu ɔmɛ kɛ e binyumu ɔmɛ a yibɔ ji 12); 10 nɔ́ nɛ ji etɛ ɔ ya nɔ Zakur nɔ, e kɛ e binyumu ɔmɛ kɛ e nyɛminyumu ɔmɛ a yibɔ ji 12; 11 nɔ́ nɛ ji eywiɛ ɔ ya nɔ Izri nɔ, e kɛ e binyumu ɔmɛ kɛ e nyɛminyumu ɔmɛ a yibɔ ji 12; 12 nɔ́ nɛ ji enuɔ ɔ ya nɔ Netania nɔ, e kɛ e binyumu ɔmɛ kɛ e nyɛminyumu ɔmɛ a yibɔ ji 12; 13 nɔ́ nɛ ji ekpa a ya nɔ Bukia nɔ, e kɛ e binyumu ɔmɛ kɛ e nyɛminyumu ɔmɛ a yibɔ ji 12; 14 nɔ́ nɛ ji kpaago ɔ ya nɔ Yesharela nɔ, e kɛ e binyumu ɔmɛ kɛ e nyɛminyumu ɔmɛ a yibɔ ji 12; 15 nɔ́ nɛ ji kpaanyɔ ɔ ya nɔ Yeshaya nɔ, e kɛ e binyumu ɔmɛ kɛ e nyɛminyumu ɔmɛ a yibɔ ji 12; 16 nɔ́ nɛ ji nɛɛ ɔ ya nɔ Matania nɔ, e kɛ e binyumu ɔmɛ kɛ e nyɛminyumu ɔmɛ a yibɔ ji 12; 17 nɔ́ nɛ ji nyɔngma a ya nɔ Shimei nɔ, e kɛ e binyumu ɔmɛ kɛ e nyɛminyumu ɔmɛ a yibɔ ji 12; 18 nɔ́ nɛ ji 11 ɔ ya nɔ Azarel nɔ, e kɛ e binyumu ɔmɛ kɛ e nyɛminyumu ɔmɛ a yibɔ ji 12; 19 nɔ́ nɛ ji 12 ɔ ya nɔ Hashabia nɔ, e kɛ e binyumu ɔmɛ kɛ e nyɛminyumu ɔmɛ a yibɔ ji 12; 20 nɔ́ nɛ ji 13 ɔ ya nɔ Shubael nɔ, e kɛ e binyumu ɔmɛ kɛ e nyɛminyumu ɔmɛ a yibɔ ji 12; 21 nɔ́ nɛ ji 14 ɔ ya nɔ Matitia nɔ, e kɛ e binyumu ɔmɛ kɛ e nyɛminyumu ɔmɛ a yibɔ ji 12; 22 nɔ́ nɛ ji 15 ɔ ya nɔ Yeremot nɔ, e kɛ e binyumu ɔmɛ kɛ e nyɛminyumu ɔmɛ a yibɔ ji 12; 23 nɔ́ nɛ ji 16 ya nɔ Hanania nɔ, e kɛ e binyumu ɔmɛ kɛ e nyɛminyumu ɔmɛ a yibɔ ji 12; 24 nɔ́ nɛ ji 17 ɔ ya nɔ Yoshbekasha nɔ, e kɛ e binyumu ɔmɛ kɛ e nyɛminyumu ɔmɛ a yibɔ ji 12; 25 nɔ́ nɛ ji 18 ɔ ya nɔ Hanani nɔ, e kɛ e binyumu ɔmɛ kɛ e nyɛminyumu ɔmɛ a yibɔ ji 12; 26 nɔ́ nɛ ji 19 ɔ ya nɔ Maloti nɔ, e kɛ e binyumu ɔmɛ kɛ e nyɛminyumu ɔmɛ a yibɔ ji 12; 27 nɔ́ nɛ ji 20 ɔ ya nɔ Eliata nɔ, e kɛ e binyumu ɔmɛ kɛ e nyɛminyumu ɔmɛ a yibɔ ji 12; 28 nɔ́ nɛ ji 21 ɔ ya nɔ Hotir nɔ, e kɛ e binyumu ɔmɛ kɛ e nyɛminyumu ɔmɛ a yibɔ ji 12; 29 nɔ́ nɛ ji 22 ɔ ya nɔ Gidalti nɔ, e kɛ e binyumu ɔmɛ kɛ e nyɛminyumu ɔmɛ a yibɔ ji 12; 30 nɔ́ nɛ ji 23 ɔ ya nɔ Mahaziot nɔ, e kɛ e binyumu ɔmɛ kɛ e nyɛminyumu ɔmɛ a yibɔ ji 12; 31 nɔ́ nɛ ji 24 ɔ ya nɔ Romamti Ezer nɔ, e kɛ e binyumu ɔmɛ kɛ e nyɛminyumu ɔmɛ a yibɔ ji 12.