Yesaya
49 Nyɛ zugba kpɔhi nɛ nyu bɔle nyɛ, nyɛɛ bu mi tue,
Nyɛ je mahi nɛ nyɛ ngɛ tsitsaa lokoo, nyɛɛ bu tue.
Yehowa tsɛ mi loko a fɔ mi.*
E tsua ye biɛ benɛ i ngɛ ye nyɛ fɔmi kotoku mi tɔɔ.
2 E ha ye nya pee kaa klaate nɛ nya ba;
E ngɔ mi kɛ laa ngɛ e nine hɔ̃ ɔ sisi.
E ha nɛ i pee kaa kɛ̃ɛ̃ mi bi nɛ nya ba;
E ngɔ mi kɛ laa ngɛ e kɛ̃ɛ̃ mi bi gbaja a mi.
3 E de mi ke: “Oo Israel, ye sɔmɔlɔ ji mo,
O nɔ lɛ ma gu kɛ je ye hɛ mi nyami ɔ kpo.”
4 Se i de ke: “I gbo yaka dengme.
I ngɔ ye he wami kɛ tsu nɔ́ nɛ se nami be he, i tsu ní yaka gu.
Se i le kaa Yehowa lɛ maa kojo mi,*
Nɛ ye hiɔwo ngɛ Mawu ngɔ.”
5 Nɛ amlɔ nɛ ɔ, Yehowa, nɔ nɛ e puɛ mi ngɛ fɔmi kotoku mi kaa ma ba pee e sɔmɔlɔ ɔ
De mi ke ma ya ngɔ Yakob kɛ ba ha lɛ ekohu,
Bɔ nɛ pee nɛ a bua Israel nya kɛ ba e ngɔ.
Ye hɛ mi maa ba nyami ngɛ Yehowa hɛ mi,
Nɛ ye Mawu ɔ ma ba pee ye he wami.
6 Nɛ e de ke: “Ye sɔmɔlɔ ji mo,
Nɛ o ma wo Yakob wɛtso ɔmɛ a nɔ
Nɛ Israelbi nɛ a baa a yi ɔ, o maa kpale mɛ kɛ ba, se lɔ ɔ pɛ pi.
Jehanɛ hu, i ngɔ mo kɛ pee la kɛ ha je ma amɛ,
Konɛ ye yi wami hemi ɔ nɛ ya su zugba a nyagbe he ɔmɛ.”
7 Nɔ́ nɛ Yehowa, Israel Kpɔlɔ ɔ, Israel Nɔ Klɔuklɔu ɔ ngɛ nɔ nɛ a bui lɛ ɔ,* nɔ nɛ je ma amɛ hiɔ lɛ, nɛ e ji nɔ yeli a sɔmɔlɔ ɔ dee ji nɛ ɔ nɛ:
“Matsɛmɛ maa na nɛ a maa te si,
Nɛ ma nikɔtɔmahi ma kplã si
Ngɛ Yehowa, nɔ nɛ yeɔ anɔkuale,
Israel Nɔ Klɔuklɔu ɔ nɛ e hla mo ɔ he je.”
8 Nɔ́ Nɛ Yehowa ngɛ dee ji nɛ ɔ nɛ:
“I he mo nɔ ngɛ dloomi be* mi,
Nɛ i ye bua mo ngɛ yi wami hemi ligbi nɔ;
I ya nɔ nɛ i po o he piɛ konɛ ma ngɔ mo kɛ ha kaa somi kɛ ha je ma amɛ,
Konɛ a dla zugba a,
Konɛ lɔ ɔ nɛ ha nɛ a ba ngɔ a weto níhi nɛ a kua a,
9 Konɛ o de nihi nɛ a wo mɛ tsu ɔ ke, ‘Nyɛɛ je kpo!’
Nɛ o de nihi nɛ a ngɛ diblii mi ke, ‘Nyɛ je nyɛ he kpo!’
A maa ye ní ngɛ gbɛjegbɛ ɔmɛ a he,
Nɛ a maa ye ní ngɛ blɔ ɔmɛ* tsuo a he.
10 Hwɔ be mɛ yee, nɛ kuma be mɛ yee,
Nɛ kɔɔhiɔ nɛ mi dɔ la loo pu la hu be mɛ sããe.
Ejakaa nɔ nɛ e na mɛ mɔbɔ ɔ maa nyɛɛ a hɛ mi,
Nɛ e maa tsɔɔ mɛ blɔ kɛ be ngɛ nyu hɛngmɛhi a he.
11 Ma ha nɛ ye yoku ɔmɛ tsuo maa pee blɔ,
Nɛ ma wo ye gbɛjegbɛ ɔmɛ a nɔ.
12 Hyɛ! Nihi maa je tsitsaa lokoo kɛ ba,
Nɛ hyɛ! Ni komɛ maa je yiti je kɛ pusinɔ he kɛ ba,
Nɛ ni komɛ hu maa je Sinim zugba a nɔ kɛ ba.”
13 Mo hiɔwe, o kɛ bua jɔmi nɛ he ose, nɛ mo zugba, mo nya.
Yoku ɔmɛ kɛ bua jɔmi nɛ he ose.
Ejakaa Yehowa wo e we bi ɔmɛ a bua,
Nɛ e na lɛ nitsɛ e we bi nɛ a hao ɔ mɔbɔ.
14 Se Zion ya nɔ nɛ e de ke:
“Yehowa kua mi, nɛ Yehowa hɛ je ye nɔ.”
15 Anɛ binyɛ hɛ ma nyɛ maa je e bi nɛ ngɛ nyɔ nya a nɔ lo?
Anɛ e mi mi be lɛ sãe ngɛ e mi mi bi ɔ he lo?
Ke yi nɛ ɔmɛ a hɛ je nɔ po, ye hɛ be o nɔ jee kɔkɔɔkɔ.
16 Hyɛ! I ngma o biɛ ngɛ ye dɛ mi.*
O gbogbo ɔmɛ ngɛ ye hɛ mi be fɛɛ be.
17 O bimɛ ɔmɛ maa ye oya kɛ kpale kɛ ba.
Nihi nɛ a ku mo ngɔ pue si nɛ a kpata o hɛ mi ɔ maa je o he kɛ ho.
18 Wo o yi nɔ nɛ o hyɛ o he kɛ kpe.
Mɛ tsuo a ngɛ a he nya buae.
A ma o ngɔ.
Yehowa ke, “Be abɔ nɛ i ngɛ nɛ ɔ,
O maa ngɔ mɛ tsuo kɛ ha o he kaa junehi,
Nɛ o maa fi mɛ kɛ wo o he kaa bɔ nɛ ayɛflo woɔ junehi ɔ.
19 E ngɛ mi kaa a puɛ o hi he ɔmɛ nɛ a fɔɔ si gu, nɛ a kpata o zugba a hɛ mi mohu lɛɛ,
Se amlɔ nɛ ɔ, nihi a he maa hiɛ ngɛ lejɛ ɔ nɛ a he be mɛ kpee,
Nɛ nihi nɛ a mi mo ɔ maa hi tsitsaa lokoo.
20 O maa nu nɛ bimɛ nɛ a fɔ be mi nɛ o bimɛ gbo ɔ ngɛ dee ke,
‘Hiɛ ɔ klee we ha mi.
Ha mi he ko ngɛ hiɛmɛ nɛ ɔ nɛ ma hi.’
21 Nɛ o ma de ngɛ o tsui mi ke,
‘Mɛnɔ lɛ e fɔ bimɛ nɛ ɔmɛ ha mi?
Ejakaa i ji yo nɛ e bimɛ gbo, i ji yosa,
A ngɔ mi kɛ je ye zugba a nɔ, nɛ a wo mi tsu.
Mɛnɔ lɛ e tsɔse mɛ?
Hyɛ! E piɛ imi nɔ kake too pɛ,
Lɔ ɔ jije a je kɛ ba?’”
22 Nɔ́ nɛ Nyɔmtsɛ Matsɛ Yehowa ngɛ dee ji nɛ ɔ nɛ:
“Hyɛ! Ma wo ye nine nɔ kɛ tsɔɔ je ma amɛ,
Nɛ ma wo ye we okadi* ɔ nɔ kɛ tsɔɔ ma amɛ.
A ma wo o binyumu ɔmɛ ngɛ a kɔni bɔkɔ mi* kɛ ba,
Nɛ a ma wo o biyi ɔmɛ ngɛ a konɔ.
23 Matsɛmɛ ma sɔmɔ mo,
Nɛ matsɛmɛ ɔmɛ a biyi ɔmɛ ma ha nyɛ bimɛ nyɔ.
A ma kplã si ha mo, nɛ a kɛ a hɛ mi ma bu zugba
Nɛ a ma lɔ o nane he bunyuku,
Kɛkɛ ɔ, o ma ná le kaa imi ji Yehowa;
Nihi nɛ a ngɔɔ a hɛ kɛ fɔɔ ye nɔ ɔ, zo be mɛ gbee.”
24 Nihi nɛ nyumu he walɔ nuu mɛ ɔ, anɛ nɔ ko ma nyɛ ma kpɔ̃ mɛ ngɛ e dɛ lo?
Anɛ nɔ ko ma nyɛ ma kpɔ̃ nihi nɛ yi mi walɔ nuu mɛ nyɔguɛ ɔ lo?
25 Se nɔ́ nɛ Yehowa ngɛ dee ji nɛ ɔ nɛ:
“Nihi nɛ nyumu he walɔ ɔ nuu mɛ nyɔguɛ ɔ po, a ma kpɔ̃ mɛ ngɛ e dɛ,
Nɛ nihi nɛ yi mi walɔ ɔ nuu mɛ ɔ hu, a ma kpɔ̃ mɛ.
Ma te si kɛ wo nihi nɛ a teɔ si kɛ woɔ mo ɔ,
Nɛ ma he o bimɛ ɔmɛ a yi wami.
26 Ma ha nɛ nihi nɛ ngɛ mo yi mi wae ɔ maa ye mɛ nitsɛmɛ a he lo,
Nɛ mɛ nitsɛmɛ a muɔ maa de mɛ kaa wai dɔkɔdɔkɔ.