Yesaya
35 Nga zugba kpataa kɛ zugba nɛ e gbli kadokado ma nya,
Nɛ nga kplanaa ma ná bua jɔmi nɛ e maa wo mɔmɔhi kaa safron.
2 Nga kplanaa a maa wo mɔmɔ kokooko;
E ma nya nɛ e ma la kɛ bua jɔmi.
A maa ngɔ Lebanon hɛ mi nyami ɔ,
Kɛ Karmel kɛ Sharon a he fɛu ɔ kɛ ha lɛ.
A maa na Yehowa hɛ mi nyami ɔ, wa Mawu ɔ we agboje ɔ.
3 Nyɛɛ wo ninehi nɛ a gbɔjɔ ɔ mi he wami;
Nɛ nyɛ ha nɛ nakutsohi nɛ a ngɛ mimiɛe ɔ a mi nɛ wa.
4 Nyɛ de nihi nɛ a tsui ngɛ poe ɔ ke:
“Nyɛ wlua nyɛ. Nyɛ ko ye gbeye.
Hyɛ! nyɛ Mawu ɔ ma ba ye lue,
Mawu ma ba wo nyɛ he nyɛli ɔmɛ hiɔ.
E ma ba kpɔ̃ nyɛ.”
5 Jamɛ a be ɔ mi ɔ, hɛ yuyuili a hɛngmɛ ma bli,
Nɛ tuekpokutsɛmɛ a tue maa nu nɔ́.
6 Jamɛ a be ɔ mi ɔ, glɔtsɛmɛ maa tuu kaa afugbɛ,
Nɛ amuɛtihi a lilɛ ma la kɛ bua jɔmi.
Ejakaa nyu maa hia ngɛ nga nɔ,
Nɛ pahi maa be ngɛ nga kplanaa nɔ.
7 Zugba nɛ e nɔ gbli ma plɛ pee taku kɛ e mi glãhi,
Nɛ nyu ma tsɛ̃ ngɛ zugba kadokado nɔ.
Nga mumu kɛ glã kɛ ngɔwu maa puɛ
Ngɛ he nɛ nga mi gbehi buɔ si ngɛ.
8 A maa je blɔ ngua ko ngɛ lejɛ ɔ,
Ee, a ma tsɛ blɔ ɔ ke Blɔ Klɔuklɔu.
Nɔ nɛ e he tsɔ we be blɔ nɛ ɔ nɔ nyɛɛe.
A si kɛ ha nihi nɛ e sa kaa a nyɛɛ nɔ ɔ;
Kuasia ko kuasia ko be blɔ tlae kɛ ba blɔ nɛ ɔ nɔ.
9 Jata ko be lejɛ ɔ hie,
Nɛ lohwe awi yelɔ ko be nɔ bae.
A be mɛ nae ngɛ lejɛ ɔ;
Nihi nɛ a kpɔ̃ mɛ ɔ pɛ lɛ a maa nyɛɛ ngɛ lejɛ ɔ.
10 Nihi nɛ Yehowa kpɔ̃ mɛ ɔ maa kpale kɛ ba Zion kɛ bua jɔmi la.
Nɛ bua jɔmi nɛ se pui maa hi a yi kaa jlasi.
A ma nya, nɛ a bua maa jɔ wawɛɛ,
Nɛ aywilɛho yemi kɛ kɔmɔ yemi se maa po.