La
115 Wa sɛ hɛ mi nyami, Oo Yehowa, wa sɛ hɛ mi nyami,*
Mohu ɔ, moo wo o biɛ ɔ hɛ mi nyami
Ngɛ o suɔmi nɛ se pui kɛ o we anɔkuale yemi ɔ he je.
2 Mɛni he je nɛ e sa kaa je ma amɛ nɛ a bi ke:
“Jije a Mawu ɔ ngɛ?”
3 Wa Mawu ɔ, hiɔwe e ngɛ;
Nɔ́ fɛɛ nɔ́ nɛ e suɔ ɔ, lɔ ɔ e peeɔ.
4 A we amaga amɛ ji sika hiɔ kɛ sika tsu,
A ji adesa nine nya ní tsumi.
5 A ngɛ nya, se a tui munyu;
A ngɛ hɛngmɛ, se a hyɛ we nɔ́;
6 A ngɛ tue, se a nui nɔ́;
A ngɛ gugwɔ, se a nui nɔ́ he fu;
7 A ngɛ nine, se a tɛ nɔ́ he;
A ngɛ nane, se a nyɛɛ we;
A kuɛ si po a kpɛ we.
8 Nihi nɛ pee amaga amɛ ɔ ma ba pee kaa amaga amɛ nɔuu,
Nɛ nihi nɛ a ngɔɔ a hɛ kɛ fɔɔ amaga amɛ a nɔ ɔ hu, maa pee kaa amaga amɛ kɛ̃.
9 Oo Israel, ngɔɔ o hɛ kɛ fɔ Yehowa nɔ;
Lɛ ji nyɛ yemi kɛ bualɔ kɛ nyɛ tsɛ̃i.
10 Oo Aaron we, ngɔɔ o hɛ kɛ fɔ Yehowa nɔ;
Lɛ ji nyɛ yemi kɛ bualɔ kɛ nyɛ tsɛ̃i.
11 Nyɛ nihi nɛ nyɛ yeɔ Yehowa gbeye, nyɛɛ ngɔ nyɛ hɛ kɛ fɔ Yehowa nɔ
—Lɛ ji nyɛ yemi kɛ bualɔ kɛ nyɛ tsɛ̃i.
12 Yehowa kaiɔ wɔ, nɛ e maa jɔɔ wɔ;
E maa jɔɔ Israel we ɔ;
E maa jɔɔ Aaron we ɔ.
13 Yehowa maa jɔɔ nihi nɛ yeɔ lɛ gbeye ɔ,
Nimli wawi kɛ nimli nguahi tsuo.
14 Yehowa ma ha nɛ nyɛɛ bɔ saminya,
Nyɛɛ kɛ nyɛ bimɛ.*
15 Yehowa nɛ ji hiɔwe kɛ zugba Bɔlɔ ɔ,*
Nɛ jɔɔ nyɛ.
16 Hiɔwe ɔ, Yehowa nɔ́,
Se zugba a lɛɛ, e kɛ ha nimli a bimɛ.
17 Gbogboehi je we Yah yi;
Nɛ nihi nɛ a kple kɛ ho yɔkɔ mi ya a* hu je we e yi.
18 Se wɔɔ lɛɛ wa ma je Yah yi
Kɛ je amlɔ nɛ ɔ kɛ ya neneene.
Nyɛ je Yah yi!*