Yesaya
45 Nɔ́ nɛ Yehowa ngɛ Sirus, nɔ nɛ e pɔ lɛ nu ɔ,
Nɔ nɛ i pɛtɛ e hiɔ nine he
Konɛ ma kɛ ba je mahi si ngɛ e hɛ mi,
Konɛ ma kɛ kpɔ̃ matsɛmɛ a ta hwumi níhi ngɛ a dɛ,*
Konɛ ma bli agbo enyɔ ɔmɛ ngɛ e hɛ mi,
Bɔ nɛ pee nɛ a ko nyɛ nɛ a ngmɛ agbo mi ɔ ngɛ dee ji nɛ ɔ nɛ:
2 “Ma nyɛɛ o hɛ mi,
Nɛ ma ba yoku wawi ɔmɛ si.
Ma ywia akɔblee agbo ɔmɛ wɔtsɔwɔtsɔ,
Nɛ ma poo agbo se lami dade ɔmɛ ngɔ pue si.
3 Ma ngɔ juetlihi nɛ ngɛ diblii mi
Kɛ juetlihi nɛ a kɛ laa ngɛ laami hehi ɔ kɛ ha mo,
Konɛ o ná nɛ o le kaa imi ji Yehowa,
Israel Mawu ɔ, nɔ nɛ ngɔ o biɛ kɛ ngɛ mo tsɛe ɔ nɛ.
4 Ngɛ ye sɔmɔlɔ Yakob, kɛ Israel nɔ nɛ i hla a he je ɔ,
I ngɔ o biɛ kɛ ngɛ mo tsɛe.
E ngɛ mi kaa o li mi mohu lɛɛ, se i ha mo biɛ nɛ hɛ mi ngɛ nyami.
5 Imi ji Yehowa, nɛ nɔ kpa ko be.
Mawu kpa ko be, ja imi pɛ.
O li mi mohu lɛɛ, se ma wo mo he wami,*
6 Konɛ nihi nɛ a le
Kɛ je puje he kɛ ya si pusinɔ he
Kaa ye se ɔ, nɔ ko nɔ ko be.
Imi ji Yehowa, nɔ kpa ko be.
7 I pee la, nɛ i bɔ diblii,
I haa tue mi jɔmi baa, nɛ i haa nɛ haomi baa;
Imi Yehowa lɛ i ngɛ ní nɛ ɔmɛ tsuo pee.
8 Mo hiɔwe, nɛɛ nyu kɛ pue zugba;
Ha nɛ bɔku ɔ nɛ e nɛ dami ngɔ pue si.
Ha nɛ zugba a mi nɛ bli nɛ e nɔ nɛ hyi tɔ kɛ yi wami hemi,
Konɛ e ha nɛ dami nɛ ba ngɛ jamɛ a be ɔ mi nɔuu.
Imi Yehowa lɛ i bɔ.”
9 Musu tloo nɔ nɛ e kɛ e Bɔlɔ ɔ* sãã nya,
Ejakaa e ngɛ kaa ngɛyu kake
Ngɛ ngɛyuhi nɛ a pueɔ si ngɛ zugba a kpɛti!
Anɛ e sa kaa zu nɛ bi e Puɛlɔ ɔ ke, “Mɛni o ngɛ puɛe ɔ?”
Aloo anɛ e sa kaa nɔ́ nɛ o puɛ ɔ nɛ e de ke: “E be nine” lo?*
10 Musu tloo nɔ nɛ deɔ e tsɛ ke: “Mɛni o fɔ?”
Nɛ́ e deɔ e nyɛ ke: “Mɛni o ngɛ fɔe ɔ?”*
11 Nɔ́ nɛ Yehowa, Israel Nɔ Klɔuklɔu ɔ, nɔ nɛ e pee lɛ ɔ ngɛ dee ji nɛ ɔ nɛ:
“Anɛ o ma bi mi níhi nɛ ma a he sane lo?
Anɛ o ma fã mi ngɛ ye bimɛ ɔmɛ kɛ ye nine nya ní tsumi ɔmɛ a he lo?
12 Imi lɛ i pee zugba a nɛ i bɔ nɔmlɔ ngɔ fɔ nɔ.
Imi nitsɛ ye nine lɛ i kɛ bli hiɔwe ɔ mi,
Nɛ i kɛ fami haa e tabo ɔ tsuo.”
13 “I wo nyumu ko nɔ ngɛ dami mi,
Nɛ ma ha nɛ e blɔ ɔmɛ tsuo maa da.
Lɛ ji nɔ nɛ e maa po ye ma a
Nɛ́ e ma ha nɛ a ngmɛɛ ye we bi nɛ a ngɔ mɛ nyɔguɛ ɔ a he faa nɛ a be sika loo nyɔ mi ní ko hee,” Yehowa tabohiatsɛ ɔ lɛ de.
14 Nɔ́ nɛ Yehowa de ji nɛ ɔ nɛ:
“Se nɛ Egipt ná a* kɛ Etiopia jua yemi níhi* kɛ Sebabi nɛ a ka gagaaga a
Maa ba o ngɔ, nɛ a ma ba pee o nɔ́.
A maa nyɛɛ o se kɛ a he kɔsɔkɔsɔhi.
A maa ba nɛ a ma ba kplã si ha mo.
A maa sɔle ha mo ke, ‘Niinɛ, Mawu kɛ mo ngɛ,
Nɛ nɔ kpa ko be; Mawu kpa ko be.’”
15 Niinɛ, o ji Mawu nɛ́ o laa o he,
Oo Israel Mawu, Kpɔlɔ ɔ.
16 Zo maa gbe mɛ tsuo nɛ a hɛ mi ma pue si;
Amaga peeli ɔmɛ tsuo maa nyɛɛ ngɛ hɛ mi si puemi mi.
17 Se Yehowa ma kpɔ̃ Israel kɛ ya neneene.
O hɛ mi be si puee, nɛ zo be mo gbee kɛ ya daa.
18 Ejakaa nɔ́ nɛ Yehowa,
Nɔ nɛ e bɔ hiɔwe ɔ, anɔkuale Mawu ɔ,
Nɔ nɛ e to zugba a sisi, nɔ nɛ e pee zugba a nɛ e kɛ ma si kpɛii,
Nɛ́ e buɛ lɛ ngɔ fɔɛ si yaka gu,* se mohu e bɔ konɛ adesahi nɛ a hi nɔ ɔ ngɛ dee ji nɛ ɔ nɛ:
“Imi ji Yehowa, nɛ nɔ kpa ko be.
19 I tui munyu ngɛ laami mi, ngɛ zugba nɛ e nɔ wo diblii nɔ;
I de we Yakob nina* ke;
‘Nyɛ hla ye se blɔ yaka gu.’
Imi ji Yehowa, nɔ nɛ e tuɔ dami munyu nɛ e deɔ nɔ́ nɛ da a.
20 Nyɛ bua nyɛ he nya nɛ nyɛɛ ba.
Nyɛ nihi nɛ nyɛ tu fo kɛ je je ma amɛ a mi, nyɛɛ pee kake nɛ nyɛɛ ba.
Nihi nɛ a hɛɛɔ amagahi nɛ a hlɔ kɛ hii nyɛɛe,
Nɛ́ a sɔleɔ kɛ haa mawuhi nɛ a be nyɛe ma he a yi wami ɔ li nɔ́ ko nɔ́ ko fɛɛ.
21 Nyɛɛ tu munyu, nyɛɛ ngɔ nyɛ sane ɔ kɛ ba.
Nyɛɛ kpe nyɛ yi.
Mɛnɔ lɛ e gba nɔ́ nɛ ɔ kɛ fɔ si kɛ je blema
Nɛ e tu he munyu kɛ je blema lokoo?
Anɛ pi imi Yehowa lo?
Ye se ɔ, Mawu kpa ko be;
I ji Mawu nɛ da kɛ Kpɔlɔ, ye se ɔ, nɔ ko be.
22 Zugba a nyagbe he ɔmɛ tsuo, nyɛɛ ba ye ngɔ konɛ nyɛ yi nɛ ná wami,
Ejakaa imi ji Mawu, nɔ kpa ko be.
23 I kã imi nitsɛ ye he kita;
Munyu ɔ je ye nya ngɛ dami mi,
Nɛ e be e se kpalee:
Nakutso fɛɛ nakutso ma kplã si ha mi,
Nɛ lilɛ fɛɛ lilɛ ma kã kita kaa e maa ye anɔkuale,
24 Nɛ e ma de ke, ‘Niinɛ, Yehowa mi lɛ anɔkuale dami kɛ he wami ngɛ.
Nihi tsuo nɛ a mi mi fu lɛ ɔ maa ba e hɛ mi kɛ zo.
25 A maa bu Israel nina* tsuo dali ngɛ Yehowa mi,
Nɛ a maa fĩa ngɛ e mi.’”