Yesaya
1 Nina nɛ Amoz binyumu Yesaya* na kɛ kɔ Yuda kɛ Yerusalem a he ngɛ Yuda matsɛmɛ nɛ ji Uziah, Yotam, Ahaz, kɛ Hezekia a yi nɔ ji nɛ ɔ nɛ:
2 Oo hiɔwe, bu tue, Oo zugba, ta tue,
Ejakaa Yehowa tu munyu:
“I tsɔse* binyumuhi nɛ a wa,
Se a tsɔ ye hɛ mi atuã.
3 Na ku le e tsɛ* saminya,
Nɛ teji le he nɛ e nyɔmtsɛ haa lɛ niye ní ngɛ;
Se Israel li mi,*
Imi nitsɛ ye we bi ɔmɛ kɛ nɔ́ sisi numi tsu we ní.”
4 Musu tloo je ma nɛ peeɔ yayami ɔ,
Nihi nɛ tɔmi ngɛ mɛ gbee ɔ,
Yiwutsotsɛmɛ a ninahi, bimɛ nɛ a puɛ!
A kua Yehowa;
A bui Israel Nɔ Klɔuklɔu ɔ;
A plɛ a se wo lɛ.
5 Nyɛ ngɛ atuã tsɔe kɛ mwɔɔ, nyɛ jije kulaa lɛ ma fia nɔ́ ekohu?
Yi ɔ tsuo be he wami,
Nɛ hiɔ nu tsui ɔ tsuo.
6 Kɛ je nyɛ nane si kɛ ya si nyɛ yi mi ɔ, he ko he ko be nɛ ngɛ he wami.
He komɛ plaa, he komɛ kpɔ, he komɛ pee pahi nɛ a nɔ fɔɔ si gu
—A tsɔɔ we,* nɛ a fi we a nɔ, nɛ a tui a nɔ nu hulɔ.
7 Nyɛ zugba a pee ma doku.
A kɛ la sã nyɛ ma amɛ.
Ma se bi kpata nyɛ zugba a hɛ mi ngɛ nyɛ nitsɛmɛ nyɛ hɛ mi.
E ngɛ kaa zugba nɛ se nami be he nɛ ma se bi ngɔ.
9 Ke pi nɛ Yehowa tabohiatsɛ ɔ ha nɛ wa ti nihi bɔɔ wa yi ná wami ɔ,
Jinɛ wa ko pee kaa Sodom,
Nɛ jinɛ wa ko pee kaa Gomora.
10 Nyɛ Sodom nɔ yeli nɛ nyɛ yi mi wa,* nyɛɛ bu Yehowa munyu ɔ tue.
Nyɛ Gomorabi, nyɛ ta tue ha wa Mawu ɔ mlaa a.*
11 Yehowa ke: “Mɛni se nami ngɛ nyɛ afɔlehi babauu ɔ he ha mi?
Agbosuhi nɛ nyɛɛ kɛ sãã sami afɔlehi kɛ lohwehi nɛ a plɔke a zɔ ɔ ba ti mi,*
Nɛ ye bua jɔɛ na ku wawi ɔmɛ a muɔ kɛ jijɔ bimɛ kɛ apletsihi a he.
12 Ke nyɛ ba ye hɛ mi ɔ,
Mɛnɔ deɔ nyɛ ke
Nyɛ ba naa ye yale ɔ mi?
13 Nyɛ kpa ngma afɔlehi nɛ se nami be a he ɔ ngɔmi kɛ ba.
I hiɔ nyɛ tsopa kɛ he via amɛ.
Nyɛ yeɔ nyɔhiɔ ehehi, he jɔɔmi ligbihi, nɛ nyɛ tsɛɔ kpehi;
I be kunya he wami nɛ nyɛɛ kɛ tsuɔ ní kɛ nyɛ he nya buami klɔuklɔu ɔmɛ a he tsui.
14 I* hiɔ nyɛ nyɔhiɔ ehe ɔmɛ kɛ nyɛ gbijlɔ ɔmɛ.
A ba pee tlomi ha mi;
Pɔ tɔ ye he kɛ a tloomi.
15 Nɛ ke nyɛ gbɛ nyɛ dɛ mi ɔ,
I ngɔɔ ye hɛ mi* kɛ laa nyɛ.
E ngɛ mi kaa nyɛ sɔleɔ babauu mohu lɛɛ,
Se i bui tue;
Nyɛ ninehi a he hyi tɔ kɛ muɔ.
16 Nyɛ fɔ nyɛ he, nyɛ ha nɛ nyɛ he nɛ tsɔ;
Nyɛ je nyɛ ní peepee yayami ɔmɛ kɛ je ye hɛ mi;
Nyɛ kpa nɔ́ yayami peemi.
17 Nyɛɛ kase bɔ nɛ a peeɔ kpakpa ha, nyɛ hla dami sane yemi se blɔ,
Nyɛ tsɔse nɔ nɛ e yi mi wa,
Nyɛ fã he blɔhi nɛ awusa* ngɛ ɔ he,
Nɛ nyɛ fã yalɔyo he.”
18 Yehowa ke: “Amlɔ nɛ ɔ, nyɛɛ ba, nyɛ ha nɛ wa dla wa kpɛti.”
“E ngɛ mi kaa nyɛ yayami ɔmɛ tsuɔ tsutsuutsu mohu lɛɛ,
Se ma ha nɛ a hiɛ futaa kaa snoo;
E ngɛ mi kaa a tsuɔ kaa kɔjai* mohu lɛɛ,
Se a maa pee kaa jijɔ he bwɔmi.
19 Ke nyɛ je nyɛ tsui mi nɛ nyɛ bu tue ɔ,
Nyɛ maa ye zugba a nɔ ní kpakpahi.
20 Se ke nyɛ bui tue nɛ nyɛ tsɔ atuã a,
Klaate ma kpata nyɛ hɛ mi,
Imi Yehowa lɛ i de.”
21 Hyɛ! Ma nɛ yeɔ anɔkuale ɔ ba plɛ tuutuu polɔ!
Jinɛ dami sane yemi hyi lɛ tɔ;
Jinɛ dami ngɛ ma a mi,
Se amlɔ nɛ ɔ, nɔ gbeli lɛ a ngɛ mi.
22 O sika hiɔ ɔ plɛ pee sika hiɔ mi mu,
Nɛ a kɛ nyu futu o dã a.*
23 O ma nikɔtɔma amɛ a tue mi ti, nɛ juli ji a huɛmɛ.
A ti nɔ fɛɛ nɔ suɔ nyɔ mi ní, nɛ a diɔ nike níhi a se.
A yi dami sane kɛ ha awusahi,*
Nɛ a bui yalɔyihi hu a sane tue.
24 Enɛ ɔ he ɔ, anɔkuale Nyɔmtsɛ ɔ, Yehowa tabohiatsɛ ɔ,
Israel He Walɔ ɔ ngɛ dee ke:
“Aa! Ma je ye he nyɛli ɔmɛ kɛ je ye he,
Nɛ ma ye lue ngɛ ye he nyɛli ɔmɛ a nɔ.
25 Ma je ye nine kɛ pi mo,
Ma sile mo, nɛ ma je mu nɛ ngɛ o mi ɔ kɛ je kaa bɔ nɛ jale jeɔ mu ɔ,
Nɛ ma je o mi mu ɔ tsuo.
26 Ma ha mo kojoli ekohu kaa bɔ nɛ e ji kekle ɔ,
Nɛ ma ha mo ga woli ekohu kaa bɔ nɛ e ji kɛ je sisije ɔ.
Lɔ ɔ se ɔ, a ma tsɛ mo ke Dami Ma, Anɔkuale Yemi Ma.
27 A kɛ dami sane yemi ma kpɔ̃ Zion,
Nɛ a kɛ dami ma kpɔ̃ e mi bi nɛ́ a kpale kɛ ba a.
28 A ma kpata atuã tsɔli ɔmɛ kɛ yayami peeli ɔmɛ a hɛ mi kɛ bla,
Nɛ nihi nɛ a jeɔ Yehowa he ɔ, a hɛ mi ma kpata.
29 Ejakaa tso nguanguahi nɛ nyɛ suɔ ɔ, a he zo maa pee mɛ,
Nɛ nyɛ hɛ mi ma pue si ngɛ abɔɔhi* nɛ nyɛ hla a he je.
30 Ejakaa nyɛ maa pee kaa tso ngua ko nɛ e bahi ngɛ gblie,
Nyɛ maa pee kaa abɔɔ nɛ e nɛ nyu.
31 Nyumu he walɔ maa pee kaa doti kpa,*
Nɛ e ní tsumi ɔ maa pee kaa la nɛ ngɛ pɛ́e;
Lɛ tsuo maa sã gegeege,
Nɛ nɔ ko be nɛ e maa gbe la a.”