Hiob
42 Kɛkɛ nɛ Hiob ha Yehowa heto ke:
2 “Jehanɛ ɔ lɛɛ, i na kaa o nyɛɔ peeɔ nɔ́ fɛɛ nɔ́
Nɛ nɔ́ ko nɔ́ ko be nɛ o to o yi mi kaa o maa pee nɛ́ o be nyɛe maa pee.
3 O bi ke, ‘Mɛnɔ ji nɛ ɔ, nɛ e ngɛ ye yi mi tomi ɔ nya tsie ngɛ blɔ nɛ́ nile be mi nɔ nɛ ɔ?’
Niinɛ, níhi nɛ i de ɔ, i nui sisi
I tu níhi nɛ a ngɛ nyakpɛ tsɔ kɛ ha mi nɛ́ i li ɔ a he munyu.
4 O de ke, ‘I kpa mo pɛɛ, bu tue, nɛ́ ma tu munyu.
Ma bi mo sane nɛ́ o ha mi heto.’
5 Ye tue nu o he sane,
Se amlɔ nɛ ɔ lɛɛ i na mo paa kɛ ye hɛngmɛ.
6 Enɛ ɔ he je nɛ i kpale ye nya se ngɛ nɔ́ nɛ i de ɔ he
Nɛ i tsake ye tsui ngɛ tabo zu kɛ lazu mi ɔ nɛ.
7 Benɛ Yehowa kɛ Hiob tu munyu nɛ ɔmɛ ta a, Yehowa de Elifaz nɛ je Teman ɔ ke:
“Ye mi mi fu o kɛ o huɛ enyɔ ɔmɛ tsuo, ejakaa nyɛ tui ye he anɔkuale munyu kaa bɔ nɛ Hiob pee ɔ. 8 Enɛ ɔ he ɔ, nyɛɛ ngɔ na ku kpaago kɛ agbosu kpaago nɛ nyɛɛ ya ye sɔmɔlɔ Hiob ngɔ, nɛ́ nyɛ ya sã sami afɔle kɛ ha nyɛ he. Nɛ ye sɔmɔlɔ Hiob maa sɔle ha nyɛ. Bɔ fɛɛ bɔ nɛ ji ɔ, ma bu e ní bimi kaa i kɛ nyɛ kó ye ngɛ nyɛ kuasia jemi ɔ nya a tue,* ejakaa nyɛ tui ye he anɔkuale munyu kaa bɔ nɛ ye sɔmɔlɔ Hiob pee ɔ.”
9 Lɔ ɔ he ɔ, Elifaz nɛ je Teman ɔ, Bildad nɛ je Shua a kɛ Zofar nɛ je Naama a ho nɛ a ya pee kaa bɔ nɛ Yehowa fã mɛ ke a pee ɔ. Nɛ Yehowa bu Hiob sɔlemi ɔ tue.
10 Benɛ Hiob sɔle ha e huɛ etɛ ɔmɛ ta a, Yehowa je Hiob amanehlu ɔ, nɛ e ha nɛ e ná ní ekohu.* Yehowa ha lɛ níhi nɛ e ngɛ kekle ɔ kɛ bɔ he si enyɔ. 11 E nyɛminyumu ɔmɛ kɛ e nyɛmiyi ɔmɛ kɛ nihi nɛ a le lɛ sa a tsuo ba e ngɔ nɛ a kɛ lɛ ba ye ní ngɛ e we ɔ mi. A ba ye kɔmɔ ha lɛ nɛ a wo e bua ngɛ haomihi tsuo nɛ Yehowa ngmɛ blɔ nɛ a ba e nɔ ɔ he je. A kpɛti nɔ fɛɛ nɔ ke lɛ sika kɛ sika tsu ga.
12 Lɔ ɔ he ɔ, Yehowa jɔɔ Hiob wami si himi nyagbe ɔ kulaa pe e sisije ɔ, nɛ Hiob ba ná jijɔ 14,000, afukpɔngɔ 6,000, na 2,000,* kɛ teji yihi 1,000. 13 Jehanɛ ɔ hu, e kpale fɔ binyumuhi kpaago kɛ biyihi etɛ. 14 E wo e biyo nɔkɔtɔma a biɛ ke Yemima, enyɔne ɔ Kezia, kɛ etɛne ɔ Keren Hapok. 15 Ngɛ zugba a nɔ tsuo ɔ, yo ko yo ko be nɛ e he ngɛ fɛu kaa Hiob biyi ɔmɛ, nɛ a tsɛ ɔ ha mɛ weto ní kaa bɔ nɛ e ha a nyɛminyumu ɔmɛ ɔ.
16 Ngɛ enɛ ɔmɛ a se ɔ, Hiob hi si jeha 140, nɛ e ba ná bimɛ kɛ bibimɛ hluu kɛ ya si yi nɔ nɛ ji eywiɛ. 17 Hiob wa saminya nɛ e tsui nɔ e mi ngɛ si himi mi.* Lɔ ɔ se ɔ, e gbo.