Yesaya
42 Hyɛ! Ye sɔmɔlɔ ɔ, nɔ nɛ i fi e se ɔ!
Nɔ nɛ i hla, nɔ nɛ ye* bua jɔ e he ɔ!
I ngɔ ye mumi ɔ kɛ wo e mi;
E ma ha nɛ je ma amɛ maa na nɔ́ nɛ dami sane yemi ji.
2 E be ngmlaa kpae, nɛ e be e gbi nɔ woe,
Nɛ e be hae nɛ a nu e gbi ngɛ gbɛjegbɛ ɔ nɔ.
3 Glã nɛ e mi dɔ ɔ, e be mi kue,
Nɛ kane mi tako nɛ e ngɛ tsoe sulii ɔ, e be gbee.
E kɛ anɔkuale yemi maa ye dami sane.
4 E be gbɔjɔe, nɛ e kɔni mi be jɔe kɛ yaa si be nɛ e kɛ dami sane yemi maa ba zugba a nɔ;
Zugba kpɔhi nɛ nyu bɔle mɛ ɔ ngɛ e mlaa a* mlɛe.
5 Nɔ́ nɛ Yehowa, anɔkuale Mawu ɔ,
Nɔ nɛ e bɔ hiɔwe ɔ, nɛ e bli mi ɔ,
Nɔ nɛ e bli zugba a kɛ níhi nɛ ngɛ nɔ ɔ mi,
Nɔ nɛ e ha nɛ nihi nɛ a ngɛ nɔ ɔ woɔ mumi
Nɛ e ha nihi nɛ a nyɛɛɔ ngɛ nɔ ɔ mumi ɔ ngɛ dee ji nɛ ɔ nɛ:
6 “Imi Yehowa lɛ i tsɛ mo ngɛ dami mi;
I pɛtɛ o nine he wawɛɛ.
Ma po o he piɛ, nɛ o ma ba pee kaa somi ngɛ i kɛ je ma amɛ a kpɛti
Nɛ i kɛ mo maa pee la kɛ ha je ma amɛ,
7 Konɛ o bli hɛ yuyuili a hɛngmɛ,
Nɛ o je nihi nɛ a wo mɛ tsu ɔ kɛ je tsu womi mi
Nɛ o je nihi nɛ a ngɛ diblii mi ɔ kɛ je tsu womi he.
8 Imi ji Yehowa. Jã ji ye biɛ;
I kɛ ye hɛ mi nyami ɔ be nɔ ko hae,*
Nɛ i kɛ ye yi jemi ɔ be amaga ko hae.
9 Hyɛ, kekle ní ɔmɛ ba mi;
Amlɔ nɛ ɔ, i ngɛ ní kpahi dee.
I ngɛ nyɛ dee loko a ba mi.”
10 Nyɛ la la ehe ha Yehowa,
Nyɛ la yi jemi la kɛ je zugba a nyagbe he ɔmɛ,
Nyɛ nihi nɛ nyɛ nyɛɛɔ wo ɔ nɔ kɛ níhi tsuo nɛ hyi e mi tɔ ɔ,
Nyɛ zugbahi nɛ nyu bɔle nyɛ kɛ nihi nɛ a ngɛ a nɔ ɔ.
11 Nyɛ ha nɛ nga kplanaa a kɛ mahi nɛ a ngɛ nɔ ɔ nɛ a wo a gbi nɔ,
Kɔpehi nɛ ngɛ he nɛ Kedar ngɛ ɔ.
Nihi nɛ a ngɛ tɛsa mi ɔ nɛ́ a he ose kɛ bua jɔmi;
Nɛ a kpa ngmlaa kɛ je yoku ɔmɛ a yi mi.
12 Nyɛ ha nɛ a wo Yehowa hɛ mi nyami
Nɛ a je e yi ngɛ zugbahi nɛ nyu bɔle mɛ ɔ a nɔ.
13 Yehowa maa je kpo kaa nyumu he walɔ.
E ma je e kã a kpo kaa tatsɛ.
E ma kpa ngmlaa, ee, e ma kpa ta ngmlaa;
E maa tsɔɔ kaa e ngɛ he wami pe e he nyɛli ɔmɛ.
14 “I pee kpoo hluu.
I ma ye nya, nɛ i ye ye he nɔ.
Ma kɛmɛ, nɛ ma nyɛɛ kɛ ya kɛ ba, nɛ ma wo mumi mlamlaamla ngɛ be kake mi
Kaa yo nɛ e nu kɔɔmi.
15 Ma kpata yokuhi kɛ yoku wawi a hɛ mi
Nɛ ma ha nɛ a nɔ niba níhi ma ngla.
Ma ha nɛ pa amɛ ma plɛ pee zugbahi nɛ nyu bɔle mɛ*
Nɛ ma ha nɛ takuhi nɛ glã puɛ ngɛ a mi ɔ maa si.
16 Ma nyɛɛ hɛ yuyuili a hɛ mi kɛ gu blɔ nɛ a li nɔ ɔ nɔ
Nɛ ma ha nɛ a gu blɔhi nɛ a gui nɔ hyɛ ɔ nɔ.
Ma ha nɛ diblii nɛ ngɛ a hɛ mi ɔ ma plɛ pee la
Nɛ ma ha nɛ zugba nɛ e nɔ ngɛ googagooga a nɔ maa da.
Nɔ́ nɛ ma pee ha mɛ ji nɛ ɔ nɛ, nɛ i be mɛ kuae.”
17 Nihi nɛ a ngɔ a hɛ kɛ fɔ amagahi nɛ a hlɔ nɔ,
Nihi nɛ a ngɔ a hɛ kɛ fɔ dade amagahi a nɔ nɛ a deɔ ke: “Nyɛ ji wa mawuhi” ɔ
Maa kpale a se, nɛ zo maa gbe mɛ kpɔtɔɔ.
18 Nyɛ tue kpokutsɛmɛ, nyɛɛ bu tue;
Nyɛ hɛ yuyuili, nyɛɛ hyɛ, nɛ́ nyɛɛ na.
19 Mɛnɔ lɛ e hɛngmɛ yu pe ye sɔmɔlɔ ɔ,
Nɛ e tue tsi kaa nɔ nɛ i tsɔ ɔ?
Mɛnɔ lɛ e hɛngmɛ yu pe nɔ nɛ a wo lɛ hiɔ ɔ,
Nɛ e hɛngmɛ yu pe Yehowa sɔmɔlɔ ɔ?
20 O na níhi fuu, se o tui a he hɛ.
O pa o tue mi, se o bui tue.
21 Yehowa dami ɔ he je ɔ,
E suɔ kaa e ma ha nɛ a na bɔ nɛ e mlaa a* nɔ kuɔ, nɛ e hɛ mi ngɛ nyami ha.
22 Se nimli nɛ ɔmɛ ji nihi nɛ a ha a ní, nɛ a muɔɔ a níhi kɛ ho;
A sa mɛ tsuo a yi kɛ wo muɔhi a mi nɛ a kɛ mɛ laa ngɛ tsu womi he ɔmɛ.
A muɔɔ mɛ kɛ ho nɛ nɔ ko be nɛ e ma kpɔ̃ mɛ,
A kɛ mɛ ho nɛ nɔ ko be nɛ e ma de ke: “Kpale mɛ kɛ ba!”
23 Nyɛ kpɛti mɛnɔ lɛ e maa nu nɔ́ nɛ ɔ?
Mɛnɔ lɛ e ma ta tue nɛ e bu nɔ́ nɛ maa ba a tue?
24 Mɛnɔ lɛ e ngɔ Yakob kɛ ha kaa a muɔɔ e níhi
Nɛ e ngɔ Israel kɛ wo ní hali a dɛ mi ɔ?
Anɛ pi Yehowa, nɔ nɛ wa tɔ̃ e nɔ ɔ lo?
A kua ke a be e blɔ ɔmɛ a nɔ nyɛɛe,
Nɛ a be e mlaa a* nɔ yee.
25 Lɔ ɔ he ɔ, e ya nɔ nɛ e plɛ e we abofu ɔ,
Kɛ e mi mi fumi ɔ ngɔ pue e nɔ, nɛ e ha nɛ ta nɛ nya wa ba e nɔ.
La a sã nɔ́ fɛɛ nɔ́ nɛ bɔle lɛ ɔ, se e nɛ.
E sã lɛ, se e kɛ tui e tsui mi.