Yesaya
47 Oo Babilon biyo yomiyo,
Kple si nɛ o ba hi si ngɛ bunyuku mi.
Oo Kaldeabi ɔmɛ a biyo,
Hii si ngɛ zugba mi ngɛ he nɛ matsɛ sɛ be,
Ejakaa nihi be mo hɛɛe dɔdɔɔdɔ nɛ a be mo puae hu.
2 Ngɔɔ wɛ tɛ nɛ o wɛɛ mamu.
Je o hɛ mi hami nɔ́ ɔ.
Kpa o he bo nɛ o nane he nɛ je kpo.
Nɛ o po pa amɛ.
3 Nihi maa na o he gu ɔ.
O zo ɔ maa je kpo.
Ma ye lue, nɛ nɔ ko nɔ ko be nyɛe maa tsi ye nya.*
4 “Nɔ nɛ ngɛ wɔ kpɔ̃e ɔ,
E biɛ ji Yehowa tabohiatsɛ;
Lɛ ji Israel Nɔ Klɔuklɔu ɔ nɛ.”
5 Hii si ngɛ lejɛ ɔ dii nɛ o hi diblii mi,
Oo Kaldeabi ɔmɛ a biyo;
A be mo tsɛe hu ke Matsɛ Yemi Ɔmɛ A Yo.*
6 Ye mi mi fu ye we bi ɔmɛ.
I ble ye weto ní ɔ,
Nɛ i ngɔ mɛ kɛ wo o dɛ mi.
Se o nɛ mɛ mɔbɔ.
Nihi nɛ a bwɔ ɔ po, o ngɔ kuɛpã tso nɛ jiɔ kɛ fɔ a kuɛ nya.
7 O de ke: “Ma pee Manyɛ kɛ ya neneene.”
O susuu we ní nɛ ɔmɛ a he;
O susuu we bɔ nɛ sane ɔ nyagbe ma ji ha a he.
8 Amlɔ nɛ ɔ, moo bu tue, mo nɛ o suɔ ngɔɔmi yemi,
Mo nɛ o ngɛ slɔkee, nɛ o deɔ ngɛ o tsui mi ke:
“Imi ji imi, nɛ nɔ kpa ko be hu.
I be yalɔyo pee.
Ye bimɛ be gboe kɔkɔɔkɔ ɔ.”
9 Se ní enyɔ nɛ ɔmɛ tsuo maa ba o nɔ tlukaa ngɛ ligbi kake mi:
O bimɛ ma gbo, nɛ o maa pee yalɔyo hulɔ.
Ní nɛ ɔmɛ tsuo maa ba o nɔ wawɛɛ
Ngɛ o kunya yemi kɛ o kablɛ fimi babauu ɔ he je.*
10 O ngɔ o hɛ kɛ fɔ o yiwutso ní peepee ɔ nɔ.
O de ke: “Nɔ ko nɔ ko nɛ mi.”
O juɛmi kɛ o nile ɔ lɛ ha nɛ o tla blɔ ɔ nɛ,
Nɛ o deɔ ngɛ o tsui mi ke: “Imi ji imi, nɛ ye se ɔ, nɔ ko be hu.”
11 Se haomi maa ba o nɔ,
Nɛ o kunya yemi ɔ be nyɛe maa tsi nya.*
Amanehlu maa ba o nɔ; nɛ o be nyɛe maa tsi nya.
Hɛ mi kpatami nɛ o nɛ eko hyɛ maa ba o nɔ tlukaa.
12 Lɔ ɔ he ɔ, yaa nɔ nɛ o pɛtɛ kablɛ nɛ o fi kɛ kunya nɛ o ye
Kɛ je o jokuɛwi a si ɔ he.
Eko ɔ, o ma ná he se;
Eko ɔ, o kɛ maa wo nihi a he gbeye.
13 O ga woli babauu ɔmɛ ha nɛ pɔ tɔ o he.
Á te si amlɔ nɛ ɔ, nɛ́ a kpɔ̃ mo,
Nihi nɛ a jaa hiɔwe,* nɛ a hyɛɔ dodoehi a mi,
Nihi nɛ a hyɛɔ nyɔhiɔ ehe
Nɛ́ a deɔ níhi nɛ maa ba o nɔ ɔ.
14 Hyɛ! A ngɛ kaa nga.*
La maa sã mɛ.
A be nyɛe ma kpɔ̃ a he* kɛ je la nɛ ngɛ tsoe wawɛɛ ɔ mi.
Tsa pi la nɛ a hlueɔ ji nɛ ɔ,
Nɛ tsa pi la nɛ a hiɔ he ji nɛ ɔ.
15 Jã ji bɔ nɛ o kunya yeli ɔmɛ ma ba pee kɛ ha mo,
Ni nɛmɛ nɛ o kɛ mɛ gbo dengme kɛ je nyɛ jokuɛwi a si ɔ.
Mɛ tsuo a ma tataa si, nɔ fɛɛ nɔ ma wo lɛ nitsɛ e blɔ.*
Nɔ ko nɔ ko be nyɛe ma kpɔ̃ mo.