La
La nɛ Asaf po.
79 Oo Mawu, je ma amɛ ba tua o weto ní ɔ;
A ble o sɔlemi we klɔuklɔu ɔ;
A ha nɛ Yerusalem pee ma doku.
2 A ngɔ o sɔmɔli ɔmɛ a gbogboehi kɛ ha hiɔwe lohwe pɛlitsɛmɛ nɛ a ye,
Nɛ a ngɔ nihi nɛ a yeɔ mo anɔkuale ɔ kɛ ha zugba a nɔ lohwe awi yeli.
3 A plɛ a muɔ kɛ pue si kaa nyu kɛ bɔle Yerusalem,
Nɛ nɔ ko pa piɛ́ nɛ maa pu mɛ.
4 Wa ba pee he guɛ gbemi nɔ́ kɛ ha wa kpɔ mi bi;
Nihi nɛ a bɔle wɔ ɔ yeɔ wa he fɛu nɛ a muɔɔ wɔ.
5 Oo Yehowa, kɛ yaa si mɛni be nɛ o mi mi ma fu? Kɛ yaa neneene lo?
Kɛ yaa si mɛni be nɛ o we abofu ɔ maa hi tsoe kaa la?
6 Mo plɛ o we abofu ɔ kɛ pue je mahi nɛ a li mo,
Kɛ matsɛ yemihi nɛ a tsɛ we o biɛ ɔ a nɔ.
7 Ejakaa a gbe Yakob sisi bimɛ,
Nɛ a pee e ma a ma doku.
8 O kɛ wɔ nɛ ko ye ngɛ wa nɛmɛ ɔmɛ a tɔmi ɔmɛ a he je.
Mo je o mɔbɔ nami ɔ kpo kɛ tsɔɔ wɔ esɔ,
Ejakaa wa ngɛ haomi mi.
9 Oo wa yi wami hemi Mawu, ye bua wɔ
Ngɛ o biɛ nɛ hɛ mi ngɛ nyami ɔ he je;
Mo kpɔ̃ wɔ nɛ o ngɔ wa yayami ɔmɛ kɛ ke wɔ* ngɛ o biɛ ɔ he je.
10 Mɛni he je nɛ e sa kaa je ma amɛ nɛ́ a bi ke: “Jije a Mawu ɔ ngɛ?”
Ha nɛ je ma amɛ nɛ a le, nɛ wɔ hu waa na kɛ wa hɛngmɛ
Kaa o ye o sɔmɔli ɔmɛ a muɔ nɛ a pue si ɔ he lue.
11 Moo nu nɔ nɛ a wo lɛ tsu ɔ huu peemi ɔ.
Ngɔɔ o he wami ngua a* kɛ baa nihi nɛ a bu mɛ gbenɔ fɔ ɔ* a yi.*
12 Moo to wa kpɔ mi bi ɔmɛ nane mi si kpaago
Ngɛ ahlua nɛ a bɔ mo ɔ he je, Oo Yehowa.
13 Kɛkɛ ɔ, wɔ nɛ wa ji o we bi kɛ to kuu nɛ ngɛ o lohwehi a ní yemi he ɔ
Maa na mo si kɛ ya neneene;
Nɛ wa maa jaje o yi jemi ɔ yi nɔhi tsuo.