Yohane Sane Kpakpa a
18 Benɛ Yesu de ní nɛ ɔmɛ ta a, e kɛ e kaseli ɔmɛ je kpo nɛ a po Kedron Dɔgba a* kɛ ya he nɛ abɔɔ ko ngɛ, nɛ e kɛ e kaseli ɔmɛ sɛ abɔɔ ɔ mi. 2 Yuda, nɛ ji e se blɔ tsɔɔlɔ ɔ hu le lejɛ ɔ, ejakaa Yesu kɛ e kaseli ɔmɛ pɔɔ kpemi ngɛ lejɛ ɔ. 3 Enɛ ɔ he ɔ, Yuda ngɔ tabuli kɛ tsɔli nɛ osɔfo nikɔtɔma amɛ kɛ Farisi bi ɔmɛ tsɔ mɛ ɔ kɛ ba lejɛ ɔ kɛ a dɛ mi jatɛhi kɛ kanehi kɛ ta hwumi níhi. 4 Lɔ ɔ he ɔ, akɛnɛ Yesu le níhi tsuo nɛ maa ba e nɔ he je ɔ, e hɛ lɛ kɛ ba hɛ mi nɛ e bi mɛ ke: “Mɛnɔ nyɛ ngɛ hlae?” 5 A ha lɛ heto ke: “Yesu, Nazaretno ɔ.” E de mɛ ke: “Imi ji nɛ ɔ nɛ.” Jamɛ a be ɔ mi ɔ, Yuda, nɛ ji e se blɔ tsɔɔlɔ ɔ hu piɛɛ a he kɛ daa si.
6 Se benɛ Yesu de mɛ ke, “Imi ji nɛ ɔ nɛ” ɔ, a ya senyasenya nɛ a nɔɔ si ngɛ zugba. 7 Lɔ ɔ he ɔ, e kpale bi mɛ ke: “Mɛnɔ nyɛ ngɛ hlae?” A de ke: “Yesu, Nazaretno ɔ.” 8 Yesu ha mɛ heto ke: “I de nyɛ ke imi ji nɛ ɔ nɛ. Lɔ ɔ he ɔ, ke imi lɛ nyɛ ngɛ hlae ɔ, lɛɛ nyɛ ha nɛ nyumu nɛ ɔmɛ nɛ a ho.” 9 E de jã konɛ nɔ́ nɛ e de ɔ nɛ e ba mi. E de ke: “Nihi nɛ o ngɔ mɛ kɛ ha mi ɔ, i ha we nɛ a kpɛti nɔ kake po nɛ e laa.”
10 Kɛkɛ nɛ Simon Petro, nɔ nɛ klaate ngɛ e he ɔ hia klaate ɔ, nɛ e po osɔfo nɔkɔtɔma pe kulaa a nyɔguɛ ɔ hiɔ nɔ tue ɔ kɛ fɔ si. A tsɛɔ nyɔguɛ ɔ ke Malko. 11 Se Yesu de Petro ke: “Ngɔɔ klaate ɔ kɛ wo e kpo ɔ mi. Anɛ e sɛ nɛ ma nu kplu ɔ nɛ ye Tsɛ ɔ ha mi ɔ lo?”
12 Kɛkɛ nɛ tabuli ɔmɛ kɛ tabuli a nyatsɛ ɔ kɛ Yudabi ɔmɛ a tsɔli ɔmɛ nu Yesu nɛ a fĩ lɛ. 13 Kekleekle ɔ, a ngɔ lɛ kɛ ya ha Anas, ejakaa Kayafa, nɛ e ji osɔfo nɔkɔtɔma pe kulaa ngɛ jamɛ a jeha a mi ɔ ngatsɛ ji lɛ. 14 Ngɛ anɔkuale mi ɔ, Kayafa ji nɔ nɛ e wo Yudabi ɔmɛ ga kaa ke nɔ kake gbo kɛ ha ni ɔmɛ ɔ, a ma ná he se ɔ nɛ.
15 Jehanɛ ɔ, Simon Petro kɛ kaselɔ kpa ko ngɛ Yesu se nyɛɛe. Osɔfo nɔkɔtɔma pe kulaa a le jamɛ a kaselɔ ɔ, nɛ e piɛɛ Yesu he kɛ ya su osɔfo nɔkɔtɔma pe kulaa a kpo ɔ nɔ, 16 se Petro lɛɛ e daa si ngɛ agbo ɔ se.* Lɔ ɔ he ɔ, kaselɔ kaketsɛ ɔ, nɔ nɛ osɔfo nɔkɔtɔma pe kulaa a le lɛ ɔ je kpo nɛ e kɛ agbo nya bulɔ ɔ ya tu munyu nɛ e ngɔ Petro kɛ ba mi. 17 Kɛkɛ nɛ mawayo ɔ nɛ e ji agbo nya bulɔ ɔ de Petro ke: “Tse mo hu nyumu nɛ ɔ kaseli ɔmɛ a ti nɔ kake ji mo, aloo?” E de ke: “Pi e kaselɔ ji mi.” 18 Jehanɛ ɔ, nyɔguɛ ɔmɛ kɛ tsɔli ɔmɛ daa si kɛ bɔle la nɛ a kɛ hã slɛ ɔ, ejakaa fĩɛ ngɛ yee, nɛ a ngɛ la hluee. Petro hu daa si ngɛ a kpɛti nɛ e ngɛ la a hluee.
19 Kɛkɛ nɛ osɔfo nɔkɔtɔma a bi Yesu sane kɛ kɔ e kaseli ɔmɛ kɛ e ní tsɔɔmi ɔ he. 20 Yesu ha lɛ heto ke: “I tu munyu kɛ tsɔɔ je ɔ ngɛ ma hɛ mi. Be fɛɛ be ɔ, i tsɔɔ ní ngɛ kpe he ɔ kɛ sɔlemi we ɔ, he nɛ Yudabi ɔmɛ tsuo ba buaa a he nya ngɛ ɔ, nɛ i de we nɔ́ ko nɔ́ ko ngɛ laami mi. 21 Mɛni he je nɛ o ngɛ mi sane bie ɔ? Mo bi nihi nɛ a nu níhi nɛ i de mɛ ɔ. Hyɛ! Ni nɛ ɔmɛ le níhi nɛ i de ɔ.” 22 Benɛ Yesu de ní nɛ ɔmɛ ta a, tsɔli ɔmɛ nɛ a daa si ngɛ lejɛ ɔ, a ti nɔ kake gba e hɛ mi ma nɛ e bi lɛ ke: “Jã nɛ e sa kaa o haa osɔfo nɔkɔtɔma a heto lo?” 23 Yesu ha lɛ heto ke: “Ke i de nɔ́ yayami ko ɔ, lɛɛ moo ye nɔ́ yayami ɔ he odase; se ke nɔ́ nɛ i de ɔ da a, lɛɛ mɛni he je nɛ o gba mi ma mɔ?” 24 Kɛkɛ nɛ Anas ha nɛ a fĩ lɛ nɛ a ngɔ lɛ kɛ ya ha Kayafa, nɛ ji osɔfo nɔkɔtɔma pe kulaa a.
25 Jamɛ a be ɔ mi ɔ, Simon Petro daa si ngɛ lejɛ ɔ nɛ e ngɛ la hluee. Kɛkɛ nɛ a bi lɛ ke: “Tse mo hu e kaseli ɔmɛ a ti nɔ kake ji mo?” E kua nɛ e de ke: “Pi e kaselɔ ji mi.” 26 Osɔfo nɔkɔtɔma pe kulaa a nyɔguɛ ɔ kake, nɛ́ e ji nyumu ɔ nɛ Petro po e tue ɔ wekuno ɔ bi lɛ ke: “Tse i na o kɛ lɛ ngɛ abɔɔ ɔ mi, aloo i nɛ mo?” 27 Se Petro kua ekohu, nɛ amlɔ nɔuu nɛ kungwɔ ku ko kpa nɔ́.
28 Lɔ ɔ se ɔ, mɔtu mla a, a ngɔ Yesu kɛ je Kayafa ngɔ kɛ ya amlaalo ɔ we ɔ mi. Se mɛ nitsɛmɛ lɛɛ a sɛ we amlaalo ɔ we ɔ mi, bɔ nɛ pee nɛ a ko ble a he konɛ a nyɛ nɛ a ye Hetsɔmi ɔ. 29 Lɔ ɔ he ɔ, Pilato je kpo kɛ ba a ngɔ nɛ e ba bi mɛ ke: “Mɛni yayami nɛ nyɛ ke nyumu nɛ ɔ pee?” 30 A ha lɛ heto ke: “Kaa pi yayami peelɔ ji nyumu nɛ ɔ, jinɛ wa ko ngɔɛ lɛ kɛ ba ha we mo.” 31 Kɛkɛ nɛ Pilato de mɛ ke: “Nyɛ nitsɛmɛ nyɛɛ ngɔ lɛ kɛ ho nɛ nyɛ ya da nyɛ mlaa a nɔ kɛ kojo lɛ.” Yudabi ɔmɛ de lɛ ke: “Mlaa ngmɛ́ blɔ kaa waa gbe nɔ ko.” 32 A de enɛ ɔ konɛ munyu nɛ Yesu tu kɛ tsɔɔ gbenɔ pɔtɛɛ nɛ e be kɛe nɛ e ma gbo ɔ nɛ e ba mi.
33 Kɛkɛ nɛ Pilato kpale kɛ sɛ amlaalo ɔ we ɔ mi, nɛ e tsɛ Yesu nɛ e bi lɛ ke: “Anɛ mo ji Yudabi ɔmɛ a Matsɛ ɔ lo?” 34 Yesu ha heto ke: “Anɛ mo nitsɛ o yi mi lɛ o je kɛ ngɛ enɛ ɔ bie, aloo nihi lɛ a tu ye he munyu kɛ tsɔɔ mo?” 35 Pilato he nɔ ke: “Anɛ Yudano ji mi lo? Mo nitsɛ o ma mi bi ɔmɛ kɛ osɔfo nikɔtɔma amɛ lɛ a ngɔ mo kɛ ba ha mi. Mɛni o pee?” 36 Yesu ha heto ke: “Ye Matsɛ Yemi ɔ, pi je nɛ ɔ mi nɔ́. Kaa ye Matsɛ Yemi ɔ je nɛ ɔ mi nɔ́ ɔ, jinɛ ye sɔmɔli ɔmɛ ko hwu, nɛ a ko ngɔɛ mi kɛ wui Yudabi ɔmɛ a dɛ mi. Se kaa bɔ nɛ e ji ɔ, pi hiɛ ɔ nɛ ye Matsɛ Yemi ɔ je.” 37 Enɛ ɔ he ɔ, Pilato bi lɛ ke: “lɛɛ matsɛ ji mo lo?” Yesu he nɔ ke: “Mo nitsɛ o ngɛ dee ke matsɛ ji mi. Ejakaa enɛ ɔ he je nɛ a fɔ mi, nɛ enɛ ɔ he je nɛ i ba je ɔ mi, kaa ma ba ye anɔkuale ɔ he odase. Nɔ fɛɛ nɔ nɛ e ngɛ anɔkuale ɔ blɔ fa mi ɔ buɔ ye gbi tue.” 38 Pilato bi lɛ ke: “Mɛni ji anɔkuale?”
Benɛ e de enɛ ɔ, e je kpo ekohu kɛ ya Yudabi ɔmɛ a ngɔ nɛ e ya de mɛ ke: “I nɛ tɔmi ko ngɛ e he. 39 Jehanɛ se hu ɔ, ngɛ nyɛ kusumi nya a, e sa nɛ ma ngmɛɛ nɔ ko he ha nyɛ ngɛ Hetsɔmi ɔ mi. Lɔ ɔ he ɔ, anɛ nyɛ suɔ kaa ma ngmɛɛ Yudabi ɔmɛ a Matsɛ ɔ he ha nyɛ lo?” 40 A kpa ngmlaa ekohu ke: “Pi nyumu nɛ ɔ, ngmɛɛ Baraba mohu he!” Pohu Baraba a, julɔ ji lɛ.