Yohane Sane Kpakpa a

4 Benɛ Nyɔmtsɛ ɔ ba ná le kaa Farisi bi ɔmɛ nu he kaa e ngɛ nihi kaseli pee nɛ e ngɛ nihi baptisie pe Yohane ɔ— 2 e ngɛ mi kaa Yesu nitsɛ baptisii we nihi mohu lɛɛ, se e kaseli ɔmɛ lɛ a pee jã— 3 e je Yudea kɛ ho Galilea ya ekohu. 4 Se e he ba hia nɛ e ya gu Samaria. 5 Enɛ ɔ he ɔ, e ba Samaria ma ko nɛ a tsɛɔ ke Sikar a mi, lejɛ ɔ kɛ zugba nɛ Yakob kɛ ha e bi Yosef ɔ he kɛ we. 6 Ngɛ anɔkuale mi ɔ, Yakob vu ɔ ngɛ lejɛ ɔ. Jamɛ a be ɔ mi ɔ, pɔ tɔ Yesu he ngɛ blɔ nɛ e hia a he je, nɛ e hii si ngɛ vu* ɔ he. E maa pee kaa ngmlɛfia ekpane* ɔ mi.

7 Samaria yo ko ba konɛ e ba sa nyu. Yesu de lɛ ke: “Ha mi nyu ɔ eko nɛ ma nu.” 8 (Ejakaa e kaseli ɔmɛ je kɛ ho ma a mi ya konɛ a ya he niye ní.) 9 Kɛkɛ nɛ Samaria yo ɔ bi lɛ ke: “Mɛni he je nɛ mo nɛ o ji Yudano ɔ, o ngɛ imi nɛ i ji Samaria yo ɔ nyu bae ɔ?” (Ejakaa jamɛ a be ɔ mi ɔ, Yudabi kɛ Samariabi be nɔ́ ko peemi.) 10 Yesu ha lɛ heto ke: “Ke o le nike ní nɛ Mawu kɛ haa faa a, kɛ nɔ nɛ e ngɛ mo dee ke, ‘Ha mi nyu ɔ eko nɛ ma nu’ ɔ, jinɛ o ko bi lɛ, nɛ e ko ha mo wami nyu.” 11 E de lɛ ke: “Etsɛ, tse o be nɔ́ nɛ a kɛ saa nyu, nɛ vu ɔ hu mi kuɔ. Lɛɛ jije o ma ná wami nyu nɛ ɔ kɛ je mɔ? 12 Anɛ o pe wa nɛ Yakob nɛ e ha wɔ vu ɔ, nɛ́ e kɛ e binyumu ɔmɛ kɛ e na amɛ nu mi nyu ɔ lo?” 13 Yesu ha lɛ heto ke: “Nɔ fɛɛ nɔ nɛ e nuɔ nyu nɛ ɔ, kuma maa ye lɛ ekohu. 14 Se nɔ fɛɛ nɔ nɛ e maa nu nyu nɛ ma ha lɛ ɔ, kuma be lɛ yee hu gblegbleegble, mohu ɔ, nyu nɛ ma ha lɛ ɔ ma plɛ pee nyu hɛngmɛ nɛ e ngɛ súe ngɛ e mi konɛ e ha lɛ neneene wami.” 15 Yo ɔ de lɛ ke: “Etsɛ, ha mi nyu nɛ ɔ konɛ kuma nɛ ko ye mi, nɛ́ ma ko hi hiɛ ɔ bae nɛ ma ba hi nyu sae.”

16 E de lɛ ke: “Yaa nɛ o ya tsɛ o huno ɔ, nɛ nyɛɛ ba hiɛ ɔ.” 17 Yo ɔ he nɔ ke: “I be huno.” Yesu de lɛ ke: “O tu anɔkuale kaa o de ke, ‘I be huno.’ 18 Ejakaa o gba nyumuhi enuɔ momo, nɛ nyumu ɔ nɛ o kɛ lɛ ngɛ amlɔ nɛ ɔ hu tsa pi o huno. Nɔ́ nɛ o de ɔ ji anɔkuale.” 19 Yo ɔ de lɛ ke: “Etsɛ, i na kaa gbalɔ ji mo. 20 Yoku nɛ ɔ nɔ nɛ wa nɛmɛ ɔmɛ ja Mawu ngɛ, se nyɛɛ lɛɛ nyɛ deɔ ke Yerusalem ji he nɛ e sa kaa nihi nɛ a ja lɛ ngɛ.” 21 Yesu de lɛ ke: “Yo, mo he mi nɛ o ye, ngmlɛfia a ma nɛ pi yoku nɛ ɔ nɔ loo Yerusalem nɛ nyɛ ma ja Tsɛ ɔ ngɛ. 22 Nyɛ jaa nɔ́ nɛ nyɛ li; wɔɔ lɛɛ wa jaa nɔ́ nɛ wa le, ejakaa Yudabi ɔmɛ a ngɔ nɛ yi wami hemi je sisi ngɛ. 23 Se kɛ̃ ɔ, ngmlɛfia a ma, nɛ e su, be mi nɛ anɔkuale jali ma ja Tsɛ ɔ ngɛ mumi kɛ anɔkuale mi, ejakaa niinɛ, Tsɛ ɔ ngɛ nihi kaa kikɛ nɛ ɔ hláe nɛ a ja lɛ. 24 Mawu ji mumi, nɛ nihi nɛ a ngɛ lɛ jae ɔ, e sa nɛ a ja lɛ ngɛ mumi kɛ anɔkuale mi.” 25 Yo ɔ de lɛ ke: “I le kaa Mesia a nɛ a tsɛɔ lɛ ke Kristo ɔ ma. Be fɛɛ be nɛ e maa ba a, e ma ba jaje níhi tsuo kɛ tsɔɔ wɔ heii.” 26 Yesu de lɛ ke: “Imi ji lɛ. Lɛ nɛ e kɛ mo ngɛ munyu tue ɔ nɛ.”

27 Jamɛ a be ɔ mi nɔuu nɛ e kaseli ɔmɛ ba su, nɛ e pee mɛ nyakpɛ, ejakaa e kɛ yo ngɛ munyu tue. Se kɛ̃ ɔ, nɔ ko nyɛ we nɛ e bi lɛ ke: “Mɛni o ngɛ hlae?” aloo “Mɛni he je nɛ o kɛ yo ɔ ngɛ munyu tue ɔ?” 28 Kɛkɛ nɛ yo ɔ je e pa yami buɛ ɔ he nɛ e pue nɔ kɛ ho ma a mi ya, nɛ e ya de ni ɔmɛ ke: 29 “Nyɛɛ ba nɛ nyɛ ba hyɛ nyumu ko nɛ e de mi nɔ́ fɛɛ nɔ́ nɛ i pee ɔ. Anɛ e be nyɛe maa pee kaa lɛ ji Kristo ɔ lo?” 30 A je ma a mi nɛ a bɔni Yesu ngɔ bami.

31 Jamɛ a be ɔ mi ɔ, kaseli ɔmɛ ngɛ lɛ dee ke: “Rabi, ye ní.” 32 Se e de mɛ ke: “I ngɛ niye ní nɛ ma ye nɛ́ nyɛ li.” 33 Enɛ ɔ he ɔ, kaseli ɔmɛ bi a sibi ke: “Anɛ nɔ ko ba ha lɛ nɔ́ ko nɛ e ye lo?” 34 Yesu de mɛ ke: “Ye niye ní ji kaa ma pee nɔ nɛ e tsɔ mi ɔ suɔmi nya ní nɛ ma gbe e ní tsumi ɔ nya. 35 Anɛ nyɛ de we ke e piɛ nyɔhiɔ eywiɛ loko ní kpami be ɔ maa su lo? Hyɛ! I ngɛ nyɛ dee ke: Nyɛ wo nyɛ hɛ nɔ nɛ nyɛɛ hyɛ ngmɔ ɔmɛ, nɛ nyɛ maa na kaa a hiɛ futaa nɛ e sa kaa a kpa a nɔ ní. Amlɔ nɛ ɔ, 36 ní kpali ɔmɛ ngɛ a hiɔwo náe, nɛ a ngɛ yiblii nya buae kɛ ha neneene wami, konɛ ní dulɔ ɔ kɛ ní kpalɔ ɔ nɛ a pee kake kɛ nya. 37 Ejakaa ngɛ enɛ ɔ blɔ fa mi ɔ, munyu nɛ ɔ ji anɔkuale: Nɔ kake ji ní dulɔ nɛ nɔ kpa ji ní kpalɔ. 38 I tsɔ nyɛ konɛ nyɛ ya kpa nɔ́ nɛ pi nyɛ nɛ nyɛ gbo he dengme. Ni kpahi gbo dengme, nɛ nyɛɛ lɛɛ nyɛ ba ngɛ a dengme gbomi ɔ he se náe.”

39 Samariabi babauu nɛ a je jamɛ a ma a mi ɔ ná hemi kɛ yemi ngɛ e mi ngɛ odase nɛ yo ɔ ye mɛ ɔ he je. E de mɛ ke: “E de mi nɔ́ fɛɛ nɔ́ nɛ i pee ɔ.” 40 Enɛ ɔ he ɔ, benɛ Samariabi ɔmɛ ba e ngɔ ɔ, a kpa lɛ pɛɛ kaa e hi a ngɔ, nɛ e hi lejɛ ɔ ligbi enyɔ. 41 Enɛ ɔ ha nɛ nihi fuu he ye ngɛ nɔ́ nɛ Yesu de ɔ he je, 42 nɛ a de yo ɔ ke: “Pi nɔ́ nɛ o de ɔ pɛ nɛ ha nɛ wa he ye; ejakaa wɔ nitsɛmɛ wa nu, nɛ wa le kaa, nyumu nɛ ɔ ji je ɔ yi wami helɔ ɔ niinɛ.”

43 Ligbi enyɔ ɔ se ɔ, e je lejɛ ɔ kɛ ho Galilea ya. 44 Se Yesu nitsɛ ye odase kaa gbalɔ ko hɛ mi be nyami ngɛ lɛ nitsɛ e ma mi. 45 Enɛ ɔ he ɔ, benɛ e ba su Galilea a, Galileabi ɔmɛ nya e he ngɛ níhi tsuo nɛ a na nɛ e pee ngɛ Yerusalem benɛ a ngɛ gbijlɔ ɔ yee ɔ he je, ejakaa mɛ hu a ya gbijlɔ ɔ eko.

46 Lɔ ɔ se ɔ, e kpale kɛ ba Kana nɛ ngɛ Galilea a, he nɛ e ha nɛ nyu plɛ pee wai ngɛ ɔ ekohu. Jamɛ a be ɔ mi ɔ, matsɛ sɔmɔlɔ ko binyumu be he wami ngɛ Kapernaum. 47 Benɛ nyumu nɛ ɔ nu kaa Yesu je Yudea kɛ ba Galilea a, e ya e ngɔ nɛ e ya kpa lɛ pɛɛ kaa e kple kɛ ba nɛ e ba tsa e binyumu ɔ, ejakaa e miɔ nɛ e ma gbo. 48 Se Yesu de lɛ ke: “Ke nyɛ nɛ okadihi kɛ nyakpɛ níhi ɔ, nyɛ he we yi kɔkɔɔkɔ.” 49 Matsɛ sɔmɔlɔ ɔ de lɛ ke: “Nyɔmtsɛ, mo kple kɛ ba konɛ ye bi wayo ɔ nɛ e ko gbo.” 50 Yesu de lɛ ke: “Moo ya; o binyumu ɔ ngɛ wami mi.” Nyumu ɔ he nɔ́ nɛ Yesu de lɛ ɔ ye, nɛ e je kɛ ho. 51 Se benɛ e ngɛ kplee kɛ yaa ngɛ blɔ ɔ nɔ ɔ, e nyɔguɛ ɔmɛ kɛ lɛ ba kpe nɛ a ba de lɛ ke e binyumu ɔ ngɛ wami mi.* 52 Lɔ ɔ he ɔ, e bi mɛ ngmlɛfia mi nɛ jokuɛ ɔ ná he wami ɔ. A ha lɛ heto ke: “Asla a po ngɛ e nɔ hiɛ ngɛ ngmlɛfia kpaagone* ɔ mi.” 53 Kɛkɛ nɛ e tsɛ ɔ na kaa jamɛ a ngmlɛfia a mi tutuutu nɛ Yesu de lɛ ke: “O binyumu ɔ ngɛ wami mi” ɔ nɛ. Enɛ ɔ he ɔ, nyumu ɔ kɛ e we mi bimɛ ɔmɛ tsuo a he ye. 54 Enɛ ɔ ji okadi enyɔne nɛ Yesu pee benɛ e je Yudea kɛ ba Galilea a.