2 Samuel

13 Jehanɛ ɔ, David binyumu Absalom ngɛ nyɛmiyo ko nɛ e he ngɛ fɛu nɛ a tsɛɛ lɛ ke Tamar, nɛ David binyumu Amnon ná e he suɔmi. 2 Amnon hao wawɛɛ nɛ e nu hiɔ ngɛ e nyɛmiyo Tamar he je, ejakaa e li nyumu, nɛ e ngɛ kaa nɔ́ nɛ Amnon be nyɛe nɛ e pee lɛ nɔ́ ko. 3 Jamɛ a be ɔ, Amnon ngɛ huɛ ko nɛ a tsɛɛ lɛ ke Yehonadab, e ji David nyɛminyumu Shimea binyumu. Yehonadab ji nɔ ko nɛ e le ga saminya. 4 Enɛ ɔ he ɔ, e bi lɛ ke: “Mɛni he je nɛ daa mɔtu ɔ, mo matsɛ binyumu ɔ, o haoɔ kikɛ nɛ ɔ? Mɛni he je nɛ o de we mi?” Amnon ha lɛ heto ke: “I ná Tamar, ye nyɛminyumu Absalom nyɛmiyo ɔ he suɔmi.” 5 Yehonadab de lɛ ke: “Yaa hwɔ si ngɛ o sa a nɔ, nɛ o bua nɛ o pee kaa o be he wami. Ke o tsɛ ba slaa mo ɔ, mo de lɛ ke, ‘I kpa mo pɛɛ, ha nɛ ye nyɛmiyo Tamar nɛ ba nɛ e ba ha mi niye ní. Ke e ba pee hiɔtsɛmɛ a niye ní* ngɛ ye hɛ mi ɔ, ma ye ngɛ e dɛ mi.’”

6 Lɔ ɔ he ɔ, Amnon ya hwɔ si nɛ e bua pee kaa e be he wami, nɛ matsɛ ɔ ba slaa lɛ. Kɛkɛ nɛ Amnon de matsɛ ɔ ke: “I kpa mo pɛɛ, mo ha nɛ ye nyɛmiyo Tamar nɛ ba ye ngɔ, nɛ e ba sã keeki enyɔ nɛ a pee mɛ kaa tsui ngɛ ye hɛ mi, konɛ ma ye ní ɔ ngɛ e dɛ mi.” 7 Kɛkɛ nɛ David tsɔ nɛ a ya de Tamar ngɛ we ɔ mi ke: “I kpa mo pɛɛ nɛ o ya o nyɛminyumu Amnon we ɔ mi nɛ o ya pee niye ní* ha lɛ.” 8 Enɛ ɔ he ɔ, Tamar ho e nyɛminyumu Amnon we ɔ mi ya ngɛ he nɛ e hwɔɔ si ngɛ ɔ. E ngɔ mamu nɛ a pɔtɔ kɛ bɔ keekihi ngɛ e hɛ mi, nɛ e sã keeki ɔmɛ. 9 Kɛkɛ nɛ e wo tsesi ɔ, nɛ e ha lɛ niye ní ɔ. Se Amnon kua ní ɔ yemi, nɛ e de ke: “Nyɛ ha nɛ nɔ fɛɛ nɔ nɛ je ye he!” Lɔ ɔ he ɔ, nɔ fɛɛ nɔ je e he.

10 Kɛkɛ nɛ Amnon de Tamar ke: “Ngɔɔ niye ní* ɔ kɛ ba tsu nɛ a hwɔɔ mi ɔ mi nɛ ma ye ngɛ o dɛ mi.” Lɔ ɔ he ɔ, Tamar ngɔ keekihi nɛ e pee mɛ kaa tsui ɔ kɛ ba ha e nyɛminyumu Amnon ngɛ tsu nɛ a hwɔɔ mi ɔ mi. 11 Benɛ e ngɔ keeki ɔmɛ kɛ ba ha lɛ ɔ, e nu lɛ nɛ e de lɛ ke: “Ye nyɛmiyo, ba nɛ o kɛ mi ba hwɔ.” 12 Se e de lɛ ke: “Ohoo, ye nyɛminyumu! Ko pue ye hɛ mi si, ejakaa a pee we nɔ́ nɛ ɔ ngɛ Israel. Ko tsu zo ní nɛ ɔ. 13 Jije i kɛ zo nɛ ɔ maa gu? Nɛ mo hu a maa bu mo kaa nyumuhi nɛ a tsuɔ zo ní ngɛ Israel ɔ a kpɛti nɔ kake. Moo lɛɛ i kpa mo pɛɛ nɛ o kɛ matsɛ ɔ nɛ ya tu munyu, ejakaa e be dee ke e kɛ mi be mo hae.” 14 Se e bui lɛ tue, nɛ e nu lɛ pani nya, nɛ e tua lɛ abonua kɛ pue e hɛ mi si. 15 Lɔ ɔ se ɔ, Amnon bɔni Tamar he ninyɛ nami wawɛɛ nitsɛ, nɛ ninyɛ nɛ e ná kɛ ha lɛ ɔ nya ba wa pe suɔmi nɛ e ná kɛ ha lɛ kekle ɔ. Amnon de lɛ ke: “Tee si; jee hiɛ ɔ kɛ ho!” 16 Kɛkɛ nɛ e de lɛ ke: “Ohoo, ye nyɛminyumu, fieemi nɛ o ngɛ mi fiee nɛ ɔ pa hí kulaa pe nɔ́ nɛ o pee mi ɔ!” Se e bui lɛ tue.

17 Kɛkɛ nɛ Amnon tsɛ e tsɔlɔ niheyo ɔ, nɛ e de lɛ ke: “I kpa mo pɛɛ, ngɔɔ nɔmlɔ nɛ ɔ kɛ je ye hɛ mi kɛ ho, nɛ o ngmɛ sinya a mi ngɛ e se.” 18 (Jamɛ a be ɔ mi ɔ, e wo tade klɔii ko nɛ a je blɔ pee, ejakaa lɔ ɔ nɛ matsɛ biyi ɔmɛ nɛ a li nyumu ɔ woɔ.) Enɛ ɔ he ɔ, e tsɔlɔ ɔ je lɛ kpo, nɛ e ngmɛ sinya a mi ngɛ e se. 19 Kɛkɛ nɛ Tamar muɔɔ la zu kɛ pue e yi mi, nɛ e gba tade klɔii saminyayoo ɔ nɛ e wo ɔ ngɛ e he; nɛ e ngɔ e nine kɛ kpla e yi, nɛ e je. Benɛ e yaa a tsuo ɔ, e ngɛ ya foe yuuyuuyuu.

20 Kɛkɛ nɛ e nyɛminyumu Absalom bi lɛ ke: “Anɛ o nyɛminyumu Amnon lɛ e pee mo nɔ́ nɛ ɔ lo? Ye nyɛmiyo, moo lɛɛ mo ma o nya. O nyɛminyumu ji lɛ. Koo ngɔ nɔ́ nɛ ɔ kɛ wo o tsui mi.” Kɛkɛ nɛ Tamar ya hi e nyɛminyumu Absalom we ɔ mi, nɛ e yɛ nihi a kpɛti. 21 Benɛ Matsɛ David nu ní nɛ ɔmɛ tsuo ɔ, e mi mi fu wawɛɛ. Se e ha we nɛ e binyumu Amnon nɛ hao akɛnɛ e suɔ lɛ ɔ he je, ejakaa lɛ ji e kekleekle bi. 22 Absalom de we Amnon nɔ́ ko nɔ́ ko, yayami jio, kpakpa jio; ejakaa Absalom ná Amnon he ninyɛ ngɛ e nyɛmiyo Tamar hɛ mi si nɛ e pue ɔ he je.

23 Jeha enyɔ se ɔ, Absalom jijɔ he bwɔmi sali ɔmɛ ngɛ Baal Hazor ngɛ Efraim kasa nya, nɛ Absalom fɔ matsɛ ɔ binyumu ɔmɛ tsuo nine. 24 Lɔ ɔ he ɔ, Absalom ba matsɛ ɔ ngɔ ba de lɛ ke: “O sɔmɔlɔ ɔ ngɛ e jijɔhi a he bwɔmi sãe. I kpa matsɛ ɔ pɛɛ nɛ e kɛ e sɔmɔli ɔmɛ nɛ a piɛɛ ye he kɛ ya.” 25 Se matsɛ ɔ de Absalom ke: “Dɛbi, ye binyumu. Ke wɔ tsuo wa ya a, wa maa pee tlomi ngɛ o kuɛ nɔ.” E ngɛ mi kaa e ya nɔ nɛ e kpa lɛ pɛɛ mohu lɛɛ, se e kplɛɛ we, mohu ɔ, e jɔɔ lɛ. 26 Kɛkɛ nɛ Absalom de lɛ ke: “Ke moo o be yae ɔ, lɛɛ i kpa mo pɛɛ nɛ o ha nɛ ye nyɛminyumu Amnon kɛ wɔ nɛ ya mɔ.” Matsɛ ɔ bi lɛ ke: “Mɛni he je nɛ e sa nɛ e kɛ mo nɛ ya a?” 27 Se Absalom kpa lɛ pɛɛ hluu, enɛ ɔ he ɔ, matsɛ ɔ ha nɛ Amnon kɛ matsɛ ɔ binyumu ɔmɛ tsuo piɛɛ Absalom he kɛ ho.

28 Kɛkɛ nɛ Absalom fã e tsɔli ɔmɛ ke: “Nyɛɛ pee klaalo, nɛ ke Amnon nu wai nɛ e tsui hyi kɛ bua jɔmi ɔ, ma de nyɛ ke, ‘Nyɛɛ fia Amnon nɔ́!’ Kɛkɛ ɔ, nyɛɛ gbe lɛ. Nyɛ ko ye gbeye. Anɛ pi imi nɛ i fã nyɛ lo? Nyɛ he nɛ wa nɛ nyɛɛ pee kã.” 29 Lɔ ɔ he ɔ, Absalom tsɔli ɔmɛ pee Amnon kaa bɔ nɛ Absalom fã mɛ ɔ pɛpɛɛpɛ; kɛkɛ nɛ matsɛ ɔ binyumu kpa amɛ tsuo te si, nɛ a ti nɔ fɛɛ nɔ kuɔ e teji okpɔngɔ nɛ e tu fo. 30 Benɛ a ngɛ blɔ ɔ nɔ kɛ ma a, David nine su amaniɛ bɔmi nɔ ke: “Absalom gbe matsɛ ɔ binyumu ɔmɛ tsuo, nɛ a ti nɔ kake po píɛ.” 31 Kɛkɛ nɛ matsɛ ɔ te si, nɛ e gba e tade ɔmɛ ngɛ e he, nɛ e hwɔ zugba, nɛ e sɔmɔli ɔmɛ tsuo nɛ a kɛ lɛ daa si ɔ hu gba a tade ɔmɛ ngɛ a he.

32 Se Yehonadab, David nyɛminyumu Shimea binyumu ɔ de ke: “Ye nyɔmtsɛ ɔ nɛ ko susu kaa a gbe matsɛ ɔ bi nihewi ɔmɛ tsuo, ejakaa Amnon pɛ lɛ e gbo. A pee enɛ ɔ ngɛ Absalom fami nya. Kɛ je ligbi ɔ nɛ Amnon pue e nyɛmiyo Tamar hɛ mi si ɔ tɔɔ nɛ e to kaa e maa pee nɔ́ nɛ ɔ. 33 Enɛ ɔ he ɔ, amaniɛ bɔmi kaa ‘Matsɛ ɔ binyumu ɔmɛ tsuo gbo’ ɔ, ye nyɔmtsɛ matsɛ ɔ nɛ ko bu tue;* Amnon pɛ lɛ e gbo.”

34 Jamɛ a be ɔ, Absalom tu fo kɛ je. Pee se ɔ, bulɔ ɔ wo e hɛ nɔ nɛ e na kaa nihi fuu ma ngɛ gbɛjegbɛ ɔ nɛ ngɛ e se ngɛ yoku ɔ kasa nya a nɔ. 35 Kɛkɛ nɛ Yehonadab de matsɛ ɔ ke: “Hyɛ! Matsɛ ɔ binyumu ɔmɛ kpale kɛ ba. Nɔ́ nɛ o sɔmɔlɔ ɔ de ɔ, jã pɛpɛɛpɛ nɛ e ngɛ.” 36 Benɛ e tu munyu ɔ ta a, matsɛ ɔ binyumu ɔmɛ ba, nɛ a ngɛ ya foe boboobo; matsɛ ɔ kɛ e sɔmɔli ɔmɛ tsuo hu fo ya wawɛɛ. 37 Se Absalom tu fo kɛ ho Amihud binyumu Talmai, Geshur matsɛ ɔ ngɔ ya. David fo e binyumu ɔ he ya ligbihi babauu. 38 Nɛ benɛ Absalom tu fo kɛ ho Geshur ya a, e hi lejɛ ɔ jeha etɛ.

39 Nyagbenyagbe ɔ, Matsɛ David hɛ ja ngɛ Absalom he, nɛ e ná nɛ e ya e ngɔ, ejakaa e yi Amnon gbenɔ ɔ he aywilɛho hu.