La
WOMI EYWIƐNE
(La 90-106)
Anɔkuale Mawu ɔ nɔmlɔ Mose sɔlemi.
90 Oo Yehowa, ngɛ yi nɔhi tsuo a mi ɔ, mo ji wa hi he.*
3 O haa nɛ nɔmlɔ adesa kpaleɔ kɛ yaa zu mi;
O deɔ ke: “Nyɛɛ kpale nyɛ se, nyɛ nimli a bimɛ.”
4 Ejakaa jeha akpe ngɛ wa hɛ mi ɔ, ngɛ kaa hiɛ ha mo,
Kaa nyɔ mi hwɔɔmi be.
5 O bɛɛɔ mɛ kɛ yaa; a beɔ kɛ yaa kaa nlami;
Mɔtu ɔ, a ngɛ kaa nga nɛ tsɛ̃.
6 Mɔtu ɔ, e peeɔ flɔflɔɔflɔ, nɛ e peeɔ ehe,
Se ke e ke suɔ gbɔkuɛ ɔ, e gboɔ nɛ e gbliɔ.
7 Ejakaa o we abofu ɔ kpataa wa hɛ mi,
Nɛ o mi mi la a woɔ wa he gbeye.
8 O ngɔɔ wa tɔmi ɔmɛ kɛ pueɔ o hɛ mi;*
O hɛ mi la a jeɔ wa laami sanehi kpo.
10 Wa wami ligbi ɔmɛ ji jeha 70,
Aloo jeha 80 ke nɔ ko ngɛ he wami wawɛɛ.
Se a hyi tɔ kɛ haomi kɛ aywilɛho sɔuu;
A beɔ mlamlaamla, nɛ wa laa.
11 Mɛnɔ ma nyɛ maa nu bɔ nɛ o we abofu ɔ nya wa ha a sisi?
O we abofu ɔ nya wa, nɛ jã nɛ e sa nɛ a ye mo gbeye.
12 Moo tsɔɔ wɔ bɔ nɛ waa kane wa ligbi ɔmɛ ha,
Konɛ wa ná nile tsui.
13 Oo Yehowa, moo kpale o se! Be enyɛmɛ nɛ nɔ́ nɛ ɔ maa ye?
Moo na o sɔmɔli ɔmɛ mɔbɔ.
14 Mɔtu ɔ, mo ha nɛ waa tɔ kɛ o suɔmi nɛ se pui ɔ,
Konɛ waa kɛ bua jɔmi nɛ he ose nɛ wa nya wa wami ligbi ɔmɛ tsuo.
15 Ligbihi abɔ nɛ o kɛ haomi ba wa nɔ ɔ, ha nɛ wa nya jã nɔuu,
Jehahi abɔ nɛ wa na amanehlu ɔ, ha nɛ wa nya jã nɔuu.
16 O sɔmɔli ɔmɛ nɛ a na o ní tsumi ɔ,
Nɛ a binyumu ɔmɛ nɛ a na o we afɛu ɔ.
17 Yehowa wa Mawu ɔ nɛ́ e ya nɔ nɛ e na wɔ mɔbɔ;
Mo ha nɛ wa nine nya ní tsumi ɔ nɛ ya nɔ.*
Ee, mo ha nɛ wa nine nya ní tsumi ɔ nɛ ya nɔ.*