5 Mose

29 Somi nɛ Yehowa fã Mose kaa e kɛ Israel ma a nɛ so ngɛ Moab zugba a nɔ ɔ mi munyuhi ji nɛ ɔmɛ nɛ, e slo somi nɛ e kɛ mɛ so ngɛ Horeb ɔ.

2 Kɛkɛ nɛ Mose tsɛ Israel ma a tsuo kɛ kpe nɛ e de mɛ ke: “Nyɛ na níhi tsuo nɛ Yehowa pee Farao kɛ e sɔmɔli ɔmɛ, kɛ e zugba a tsuo ngɛ Egipt ɔ kɛ nyɛ hɛngmɛ. 3 Nyɛ na kojomi* nguahi kɛ nyɛ hɛngmɛ, nyɛ na jamɛ a okadihi kɛ nyakpɛ ní nguangua amɛ tsuo. 4 Se kɛ ba si mwɔnɛ ligbi nɛ ɔ, Yehowa ha we nyɛ tsui nɛ nyɛɛ kɛ maa nu sisi, kɛ hɛngmɛ nɛ nyɛɛ kɛ maa hyɛ, kɛ tue nɛ nyɛɛ kɛ maa nu. 5 ‘Benɛ i ya nɔ nɛ i tsɔɔ nyɛ blɔ jeha 40 ngɛ nga a nɔ ɔ, nyɛ tade ɔmɛ pee we momo ngɛ nyɛ he, nɛ nyɛ tokota amɛ hu yi ngɛ nyɛ nane si. 6 Nyɛ yi abolo, nɛ nyɛ nui wai aloo dã nɛ nya wa ko hulɔ, bɔ nɛ pee nɛ nyɛ ná nɛ nyɛɛ le kaa imi ji Yehowa nyɛ Mawu ɔ nɛ.’ 7 Nyagbenyagbe ɔ, benɛ nyɛ ba su hiɛmɛ nɛ ɔ, Heshbon Matsɛ Sihon, kɛ Bashan Matsɛ Og je kpo nɛ a kɛ wɔ ba hwu ta, se wa ye a nɔ kunimi. 8 Lɔ ɔ se ɔ, wa ngɔ a zugba a, nɛ waa kɛ ha Reuben bi ɔmɛ, Gad bi ɔmɛ, kɛ Manase bi ɔmɛ a wɛtso fã a kaa a weto ní. 9 Lɔ ɔ he ɔ, nyɛɛ ye somi nɛ ɔ mi munyu ɔmɛ a nɔ, nɛ́ nyɛ kɛ tsu ní, konɛ nɔ́ fɛɛ nɔ́ nɛ nyɛ maa pee ɔ nɛ hi ha nyɛ.

10 “Mwɔnɛ ɔ, nyɛ tsuo nyɛ daa si ngɛ Yehowa nyɛ Mawu ɔ hɛ mi, nyɛ wɛtsoyi ɔmɛ, nihi nɛ a ngɛ blɔ nya amɛ, nyɛ ma nikɔtɔma amɛ, Israel nyumu fɛɛ nyumu, 11 nyɛ bimɛ ɔmɛ, nyɛ yi ɔmɛ, kɛ o nubwɔ nɛ ngɛ o sito he ɔ, kɛ je nɔ nɛ buaa lɛ́ nya ha mo ɔ nɔ kɛ ya si nɔ nɛ saa nyu ha mo ɔ nɔ. 12 Somi nɛ Yehowa o Mawu ɔ kɛ mo ngɛ soe mwɔnɛ ɔ, o ba hiɛmɛ nɛ ɔ konɛ o ba kã kita kɛ ma somi nɛ Yehowa o Mawu ɔ kɛ mo ngɛ soe ɔ nɔ mi, 13 konɛ e ma nɔ mi mwɔnɛ ɔ kaa e ma ji mo, nɛ́ e pee o Mawu, kaa bɔ nɛ e wo mo si ɔ, nɛ́ e kã o nɛmɛ Abraham, Isak, kɛ Yakob hu kita a.

14 “Amlɔ nɛ ɔ, pi nyɛ pɛ nɛ i kɛ nyɛ ngɛ somi nɛ ɔ soe, nɛ pi nyɛ pɛ nɛ i ha nɛ nyɛ ngɛ kita nɛ ɔ kãe, 15 mohu ɔ, i kɛ nihi nɛ a piɛɛ wa he kɛ daa si ngɛ hiɛ ɔ mwɔnɛ ɔ ngɛ Yehowa wa Mawu ɔ hɛ mi ɔ, kɛ nihi nɛ a piɛɛ we wa he ngɛ hiɛ ɔ mwɔnɛ ɔ tsuo. 16 (Ejakaa nyɛ nitsɛmɛ nyɛ le bɔ nɛ wa hi Egipt zugba a nɔ ha, kɛ bɔ nɛ wa nyɛɛ kɛ gu je ma amɛ a zugba a nɔ ngɛ wa blɔ hiami ɔ mi ɔ. 17 Nɛ jinɛ nyɛ pɔɔ a ní hiemi ní ɔmɛ kɛ a wɔhi nɛ a he ngɛ tãi* nɛ a kɛ tso kɛ tɛ, kɛ sika hiɔ kɛ sika tsu pee nɛ ngɛ a kpɛti ɔ nami.) 18 Nyɛɛ hyɛ nɛ hi nɛ a ko na nyumu ko aloo yo ko, weku ko aloo wɛtso ko ngɛ nyɛ kpɛti mwɔnɛ ɔ nɛ e tsui gba kɛ je Yehowa wa Mawu ɔ he kɛ ya sɔmɔ jamɛ a je ma amɛ a mawu ɔmɛ, konɛ a ko na sipoku ko nɛ maa wa ba pee tso nɛ duɔ ngɛ mi, kɛ tso nɛ dooɔ.

19 “Se ke nɔ ko nu kita nɛ ɔ mi munyu ɔmɛ nɛ e fĩa ngɛ e tsui mi ke, ‘E ngɛ mi kaa ma ya nɔ nɛ ma pee imi nitsɛ ye tsui nya ní mohu lɛɛ, se ma ná tue mi jɔmi,’ nɛ e kɛ kpata nɔ́ fɛɛ nɔ́* nɛ ngɛ e blɔ mi ɔ hɛ mi ɔ, 20 Yehowa kɛ be lɛ kee. Mohu ɔ, Yehowa mi mi ma fu jamɛ a nɔ ɔ wawɛɛ, nɛ bɔ fɛɛ bɔ nɛ ji ɔ, gbiɛmi nɛ a ngma ngɛ womi nɛ ɔ mi ɔ tsuo maa ba e nɔ, nɛ Yehowa ma ha nɛ́ e biɛ nɛ laa ngɛ hiɔwe sisi kokooko. 21 Kɛkɛ ɔ, Yehowa ma je lɛ kɛ je Israel wɛtso ɔmɛ tsuo a he konɛ e kɛ haomi nɛ ba e nɔ, ngɛ somi ɔ mi gbiɛmi ɔ tsuo nɛ a ngma ngɛ Mlaa womi nɛ ɔ mi ɔ nya.

22 “Nyɛ bimɛ ɔmɛ a yi nɔ nɛ maa ba hwɔɔ se ɔ, kɛ nubwɔ nɛ e je ma se tsitsaa a maa na haomi nɛ ngɛ zugba a nɔ, nɛ ji amanehluhi nɛ Yehowa kɛ ba zugba a nɔ ɔ. 23 Ke a na kaa a kɛ sɔlfa kɛ ngo kɛ la kpata zugba a tsuo hɛ mi, konɛ a ko du ní ngɛ zugba a nɔ, nɛ́ nɔ́ ko nɛ ko tsɛ̃ ngɛ nɔ hulɔ, nɛ́ nga ko hu nɛ ko puɛ ngɛ nɔ, kaa bɔ nɛ a kpata Sodom kɛ Gomora, Adma kɛ Zeboiim a hɛ mi, nɛ ji mahi nɛ Yehowa kpata a hɛ mi ngɛ e mi mi la kɛ e we abofu nɛ nya wa a mi ɔ— 24 a kɛ je ma amɛ tsuo ma de ke, ‘Mɛni he je nɛ Yehowa pee nɔ́ nɛ ɔ kɛ si zugba nɛ ɔ? Mɛni lɛ ngɔ mi mi fumi nɛ nya wa wawɛɛ nɛ ɔ kɛ ba?’ 25 Kɛkɛ ɔ, a ma de ke, ‘E ba jã ejakaa a kua Yehowa a nɛmɛ a Mawu ɔ somi ɔ nɛ e kɛ mɛ so be mi nɛ e je mɛ kɛ je Egipt zugba a nɔ ɔ. 26 A ya sɔmɔ mawu kpahi, nɛ a kplã si ha mɛ, mawuhi nɛ a li mɛ, nɛ́ e ngmɛ́ mɛ blɔ kaa a ja mɛ.* 27 Kɛkɛ nɛ Yehowa mi mi fu jamɛ a zugba a wawɛɛ nɛ e ngɔ gbiɛmi nɛ a ngma ngɛ womi nɛ ɔ mi ɔ tsuo kɛ ba e nɔ. 28 Lɔ ɔ he ɔ, Yehowa kɛ mi mi fumi kɛ abofu nɛ nya wa kɛ e mi mi la kpetekpleenyɛ ɔ hia mɛ kɛ je a zugba a nɔ, nɛ e fiee mɛ kɛ ho zugba kpa nɔ ya, ngɛ he nɛ a ngɛ mwɔnɛ ɔ.’

29 “Níhi nɛ a laa nɔ ɔ ji Yehowa wa Mawu ɔ níhi, se níhi nɛ a je kpo ɔ ji waa kɛ wa sisi bimɛ wa níhi kɛ yaa neneene, bɔ nɛ pee nɛ waa ye Mlaa nɛ ɔ mi munyu ɔmɛ tsuo a nɔ.