La

78 Ye we bi, nyɛɛ bu ye mlaa a* tue;

Nyɛ ta tue kɛ ha ye nya mi munyu ɔmɛ.

 3 Níhi nɛ wa nu, nɛ wa le,

Nɛ́ wa tsɛmɛ ɔmɛ sɛɛ ha wɔ ɔ,

 4 Waa kɛ be a bimɛ lae;

Wa ma de yi nɔ nɛ maa ba a,

Níhi nɛ Yehowa pee nɛ sa yi jemi ɔ, e he wami ɔ,

Kɛ nyakpɛ níhi nɛ e pee ɔ.

 5 E kɛ blɔ tsɔɔmi ha Yakob,

Nɛ e wo mlaa ngɛ Israel;

E fã wa nɛmɛ ɔmɛ

Kaa a ha nɛ a bimɛ nɛ le ní nɛ ɔmɛ,

 6 Konɛ yi nɔ nɛ nyɛɛ se ɔ,

Jokuɛwi nɛ a ná we nɛ a fɔ mɛ ɔ nɛ a le.

A hɛ be Mawu ní tsumi ɔmɛ a nɔ jee,

Mohu ɔ, a maa ye e mlaa amɛ a nɔ.

 8 Kɛkɛ ɔ, a be pee kaa a nɛmɛ ɔmɛ,

Yi nɔ nɛ a tue mi ti nɛ a tsɔ atuã,

Yi nɔ nɛ a tsui be he kake,*

Nɛ́ a ji a tsui mi kɛ ye Mawu anɔkuale ɔ.

 9 Efraimbi ɔmɛ dla a he kɛ kɛ̃ɛ̃,

Se a tu fo ngɛ ta ligbi ɔ nɔ.

10 A yi somi nɛ a kɛ Mawu so ɔ nɔ,

Nɛ a nyɛɛ we ngɛ e mlaa a nya.

11 Jehanɛ hu ɔ, a hɛ je níhi nɛ e pee ɔ nɔ,

E nyakpɛ ní tsumi ɔmɛ nɛ e ha nɛ a na a.

12 E pee nyakpɛ níhi ngɛ a nɛmɛ ɔmɛ a hɛ mi,

Ngɛ Egipt zugba a nɔ, ngɛ Zoan kpokpa a nɔ.

13 E gba wo ɔ mi, nɛ e ha nɛ a gu mi,

E ha nɛ nyu ɔmɛ da si kaa gbogbo.

14 Ke je na a, e ngɔɔ bɔku kɛ nyɛɛɔ a hɛ mi,

Nɛ nyɔ mi tsuo ɔ, e kɛ la nɛ kpɛɔ nyɛɛɔ a hɛ mi.

15 E gba tɛsahi a mi ngɛ nga a nɔ,

E ha nɛ a nu nyu nɛ a tɔ kaa nɔ́ nɛ pahi nɛ a mi kuɔ mi nyu lɛ a nu.

16 E ha nɛ pahi je tɛsa mi,

Nɛ e ha nɛ nyuhi be pue si kaa pahi.

17 Se a ya nɔ nɛ a pee yayami kɛ si lɛ,

Nɛ a tsɔ Nɔ Nɛ E Nɔ Kuɔ Pe Kulaa a hɛ mi atuã ngɛ nga kplanaa a nɔ;

18 A doo Mawu nya kaa e ha mɛ niye ní nɛ jlo mɛ ɔ*

Nɛ a kɛ ka lɛ* ngɛ a tsui mi.

19 Lɔ ɔ he ɔ, a tu munyu kɛ si Mawu,

Nɛ a de ke: “Anɛ Mawu ma nyɛ maa ngmɛ wɔ okplɔɔ ngɛ nga nɛ ɔ nɔ lo?”

20 Hyɛ! E fia tɛsa nɔ́,

Nɛ nyuhi be, nɛ pahi ywia nga.

“Anɛ e ma nyɛ ma ha wɔ niye ní hulɔ lo,

Aloo e ma nyɛ ma ha e we bi ɔmɛ lo lo?”

21 Benɛ Yehowa nu nɔ́ nɛ a de ɔ, e mi mi wo la wawɛɛ;

E ha nɛ la tso kɛ wo Yakob,

Nɛ e mi mi fu Israel wawɛɛ,

22 Ejakaa a ná we hemi kɛ yemi ngɛ Mawu mi;

A kɛ a hɛ fɔɛ nyɛmi nɛ e ngɛ kaa e ma he a yi wami ɔ nɔ.

23 Lɔ ɔ he ɔ, e fã hiɔwe bɔku ɔmɛ,

Nɛ e bli hiɔwe agbo ɔmɛ.

24 E ya nɔ nɛ e nɛ mana ha mɛ nɛ a ye;

E ha mɛ hiɔwe ngma.

25 Adesahi ye he wali* a niye ní;

E ha mɛ ní nɛ a tɔ.

26 E klɛ puje he kɔɔhiɔ ɔ mi ngɛ hiɔwe,

Nɛ e ha nɛ woyi je kɔɔhiɔ ɔ fia ngɛ e he wami ɔ nya.

27 E nɛ lo kɛ pue a nɔ kaa zu,

Bebeehi kaa wo nya zia.

28 E ha nɛ a nɔɔ si ngɛ e sito he ɔ kpɛti,

Kɛ bɔle e bo tsu ɔ kɛ kpe.

29 Nɛ a ye nɛ a tɔ kɛ be nɔ;

E ha mɛ nɔ́ nɛ jlo mɛ ɔ.

30 Se benɛ a ngɛ nɔ́ nɛ jlo mɛ ɔ yee kɛ mwɔɔ,

Nɛ́ niye ní ɔ ngɛ a nya mi loloolo ɔ,

31 Mawu we abofu ɔ tso kɛ wo mɛ.

E gbe nyumuhi nɛ a he wa wawɛɛ ngɛ a kpɛti ɔ;

E kpata Israel nihewi ɔmɛ a hɛ mi.

32 Ngɛ enɛ ɔ tsuo se ɔ, a ya nɔ nɛ a pee yayami babauu,

Nɛ a ná we hemi kɛ yemi ngɛ nyakpɛ ní nɛ e tsu ɔmɛ a mi.

33 Lɔ ɔ he ɔ, e ha nɛ a ligbi ɔmɛ ba nyagbe kaa gugwɔ mi kɔɔhiɔ kɛkɛ,

Nɛ haomi gbeyegbeye ba po a jeha amɛ a nɔ tlukaa.

34 Se ke e bɔni mɛ gbemi ɔ, kɛkɛ a bɔni e se blɔ hlami;

A kpaleɔ nɛ a ba hlaa Mawu,

35 Nɛ a kaiɔ kaa Mawu ji a Tɛsa,

Nɛ Mawu, Nɔ Nɛ E Nɔ Kuɔ Pe Kulaa a ji a Kpɔlɔ.*

36 Se a bɔ mɔde kaa a kɛ a nya maa sisi lɛ,

Nɛ a kɛ a lilɛ ye lɛ lakpa.

37 A yi lɛ anɔkuale;

Nɛ a yi somi nɛ a kɛ lɛ so ɔ nɔ.

38 Se e naa mɛ mɔbɔ;

E ngɔɔ a tɔmi kɛ keɔ mɛ,* nɛ e ha we nɛ a hɛ mi nɛ kpata.

Behi fuu ɔ, e tsiɔ e we abofu nya

Mohu pe nɛ e ma je e mi mi fumi tsuo kpo.

39 Ejakaa e kaiɔ kaa he lo ji mɛ;

A ngɛ kaa kɔɔhiɔ nɛ fiaa kɛ beɔ nɛ kpale we e se.*

40 Hyɛ bɔ nɛ a tsɔ e hɛ mi atuã ngɛ nga a nɔ si abɔ,

Nɛ́ a ye e tsui ngɛ nga kplanaa a nɔ ha!

41 A ka Mawu nɛ a hyɛ si abɔ,

Nɛ a ha nɛ Israel Nɔ Klɔuklɔu ɔ ye aywilɛho.*

42 A kaii we e he wami* ɔ

Ligbi nɛ e kpɔ̃ mɛ ngɛ he nyɛli ɔmɛ a dɛ ɔ.

43 A kaii we bɔ nɛ e pee okadihi ngɛ Egipt,

Kɛ e nyakpɛ níhi nɛ e pee ngɛ Zoan kpokpa a nɔ ɔ,

44 Kɛ bɔ nɛ e ha nɛ Nilo dɔ ɔmɛ pee muɔ,

Nɛ́ a nyɛ we nɛ a nu a pa amɛ a mi nyu ɔ.

45 E tsɔ pwɔlwɛhi* kɛ ba konɛ a ba kɔɔ mɛ,

Kɛ ovɔnɔhi konɛ a ba kpata a hɛ mi.

46 E ngɔ a ngmɔ ní ɔmɛ kɛ ha baalɛhi nɛ a puɛɔ ní wawɛɛ,

E ngɔ ní nɛ a gbo dengme kɛ ná a kɛ ha baalɛhi babauu.

47 E kɛ gbiɛ ngo ngu kpata a wai tso ɔmɛ a hɛ mi,

Nɛ e kɛ gbiɛ ngo ngu lokpolokpohi kpata a sikamore tso ɔmɛ a hɛ mi.

48 E ngɔ a lohwehi nɛ a kɛ muɔɔ tlomi ɔ kɛ ha gbiɛ ngo ngu,

Nɛ e ngɔ a lohwehi nɛ a ngɛ lɛe ɔ kɛ ha oslabai.*

49 E mi mi fu mɛ wawɛɛ,

E ha nɛ e we abofu nɛ nya wa, kɛ mi mi la, kɛ haomi ba a nɔ,

E tsɔ bɔfohi nɛ́ a ngɔ haomi kɛ ba a nɔ.

E je we mɛ* ngɛ gbenɔ dɛ mi;

Nɛ e ngɔ mɛ* kɛ ha gbenɔ hiɔ nɛ sãã nɔ.

51 Nyagbenyagbe ɔ, e gbe Egiptbi ɔmɛ a kekleekle bimɛ tsuo,

Nɛ ji a fɔmi he wami sisije ɔ ngɛ́ Ham bo tsu ɔmɛ a mi.

52 Kɛkɛ nɛ e ngɔ e we bi ɔmɛ kɛ je Egipt,

Nɛ e kudɔ mɛ kaa to kuu ngɛ nga a nɔ.

53 E nyɛɛ a hɛ mi slɔkee,

Nɛ a yi gbeye;

Wo ɔ ha a he nyɛli ɔmɛ a nɔ.

54 Nɛ e ngɔ mɛ kɛ ba e zugba klɔuklɔu ɔ nɔ,

Yoku zugba nɛ ɔ lɛ e kɛ e hiɔ nine ngɔ ɔ nɛ.

55 E fiee je ma amɛ ngɛ a hɛ mi;

E kɛ susumi kpã gba weto ní ha mɛ;

E to Israel wɛtso ɔmɛ si ngɛ a wehi a mi.

56 Se a ya nɔ nɛ a ka Mawu, Nɔ Nɛ E Nɔ Kuɔ Pe Kulaa a,* nɛ a tsɔ e hɛ mi atuã;

A bui e kaimi ɔmɛ tue.

58 A ya nɔ nɛ a ngɔ a hehi nɛ ya hiɔwe* ɔ kɛ wo e mi mi la,

Nɛ a ngɔ a we amagahi nɛ a hlɔ ɔ kɛ wo lɛ abofu.*

59 Mawu nu nɛ e mi mi fu wawɛɛ,

Lɔ ɔ he ɔ, e kua Israel kulaa.

60 Nyagbenyagbe ɔ, e kua bo tsu ɔ nɛ ngɛ Shilo ɔ,

Bo tsu nɛ e hi mi ngɛ adesahi a kpɛti ɔ.

61 E ha nɛ e he wami ɔ he okadi ɔ ho nyɔguɛ tso mi ya;

E ngɔ e we afɛu ɔ kɛ wo he nyɛli a dɛ.

62 E ngɔ e we bi ɔmɛ kɛ ha klaate,

Nɛ e mi mi fu e weto ní ɔ wawɛɛ.

63 La sã e nihewi ɔmɛ,

Nɛ a la we yo kpeemi lahi kɛ ha e yihewi nɛ a li nyumu ɔ.*

64 E we osɔfo ɔmɛ nɔ ngɛ klaate nya,

Nɛ mɛ nitsɛmɛ a yalɔyi ɔmɛ fo we ya.

65 Kɛkɛ nɛ Yehowa te si kaa nɔ ko nɛ je mahe mi,

Kaa nyumu he walɔ nɛ wai tsɔ ngɛ e hɛ mi.

66 Nɛ e wo e he nyɛli ɔmɛ fo kɛ ho;

E pue a hɛ mi si kɛ yaa neneene.

67 E kua Yosef bo tsu ɔ;

E hlɛ Efraim wɛtso ɔ.

68 Se e hla Yuda wɛtso ɔ,

Zion Yoku ɔ nɛ e suɔ ɔ.

69 E ha nɛ e jami he ɔ ma si kpɛii kaa hiɔwe,*

Kaa zugba a nɛ e bɔ kaa e hi si kɛ ya neneene ɔ.

70 E hla e sɔmɔlɔ David,

Nɛ e ngɔ lɛ kɛ je jijɔ piɛ ɔmɛ a mi,

71 Konɛ e kpa jijɔ yihi nɛ a ngɛ a bimɛ nyɔ hae ɔ a nɔ hyɛmi;

E pee lɛ to hyɛlɔ ngɛ Yakob, nɛ ji e we bi ɔmɛ a nɔ,

Kɛ Israel nɛ ji e weto ní ɔ nɔ.

72 E kɛ tsui klɔuu hyɛ a nɔ kaa tohi,

Nɛ e kɛ ga nyɛɛ a hɛ mi.